2 तीमुथियुस दे ना प्रेरित पौलुस दी दुज्जी चिठ्ठी
जानकारी
पौलुस ऐ चिठ्ठी इयां लिखदा हैं, जियां मना सै मौत दी सजा दा इंतजार करा दा है। सताव दे डरे दिया बजा ला उदे केई सहयोगियां उदा साथ छडी दिता, इना सारियां गल्लां दे बावजूद, पौलुसे अपणे आत्मिक पुत्र तीमुथियुसे जो उस आशा च बदणे तांई जड़ी मसीह च है, मार्गदर्शन करदा है। जियां सै तीमुथियुस जो साहसी बणने तांई, टिकी रेणे तांई, कने झूठी शिक्षां दा सामणा करदे होए भरोसे दे लायक बणी रेणे तांई, बोलदा है, तियां ही पौलुस गेहरी सिंद्धान्तिक शिक्षां दे प्रति भी अपणी चिंता दसदा हैं। पौलुस बोलदा है, “पवित्रशास्त्र परमेश्वर दिया प्रेरणा ला रचया है” कने भरोसा मसीही लोकां जो धर्म दी शिक्षा तांई बतेरा है (अध्याय 3:16-17)। इस तांई, पुराणे भरोसा करणे बालयां जो इसा गल्लां तांई उत्सुक होणा चाहिऐ की सै अपणा पवित्रशास्त्र दा ज्ञान उना लोकां जो देन जड़े भरोसे च नोए न (अध्याय 2:2)। पौलुसे ऐ चिठ्ठी रोम ला ई स 67 से 68 दे बिच लिखियो है।
रूप रेखा
तीमुथियुस तांई अभिवादन कने प्रार्थना 1:1-2
प्रभु ला लज्जित मत होआ 1:3-18
मसीह दा इक अच्छा सैनिक कियां बणन 2:1-26
लोक आखरी रोजां च कदे होणे 3:1-9
भरोसे दे लायक बणी रिया 3:10-4:8
व्यक्तिगत निर्देश कने आखरी अभिवादन 4:9-22
1
शुभकामनाऐ
1 मैं पौलुस जड़ा साड़े पिता परमेश्वरे दिया तरफा ला प्रभु यीशु मसीह दा प्रेरित होणे तांई चुणया है। ताकि मैं प्रचार करी सके, की यीशु मसीह पर भरोसा करणे पर हमेशा दी जिन्दगी देणे दा परमेश्वरे बायदा कितया है,
2 मैं ऐ चिठ्ठी तीमुथियुस जो लिखा दा है, जड़ा मेरे अपणे प्यारे पुत्रे सांई है। मैं प्राथना करदा है की पिता परमेश्वर कने साड़े प्रभु यीशु मसीह दिया तरफा ला तिजो अनुग्रह, दया कने शांति मिल्ले।
धन्यबाद कने प्रोत्साहन
3 मैं परमेश्वरे दा धन्यबाद करदा है, जिसदी सेबा मैं शुद्ध अंतरात्मा ला किती जियां मेरे पूर्वज करदे थे, जालू भी मैं प्राथना करदा है, तां प्राथना च तिजो हमेशा याद करदा है,
4 मिंजो याद है की तू कितणा रोया था, जालू मिंजो तिजो छडी करी जाणा पिया था, कने तेरे आंसुआं जो याद करिरी दिन रात तिजो ने मिलणे दी इच्छा रखदा है, की मैं खुशिया ला भरुई जां।
5 मैं यीशु मसीह च तेरे भरोसे जो भी याद करदा है, जड़ा सारयां ला पेहले तेरी नानी लोइस, कने तेरी माता यूनीक च था, कने मिंजो यकीन है की सेई भरोसा तेरे अंदर भी है।
6 इस तांई मैं तिजो याद दिलादां है कि तू उना बरदाना जो दोबारा ला जगा कर जड़े परमेश्वरे तिजो उस बकत दितयो थे जालू मैं तेरे सिरे पर हथ रखे।
7 क्योंकि परमेश्वरे सांझो डरफोक नी बणाया है, पर परमेश्वरे दी आत्मा साड़े मना जो मजबूत करदी है, कने दुज्जयां ने प्यार करणे च सहायता करदी है, कने सांझो सबर रखणा सिखांदी है।
8 इस तांई ना तां साड़े प्रभु दे बारे च गबाई देणे च शर्म करा, कने ना मिंजो ला शर्म करा, जड़ा यीशु मसीह दी सेबा करणे तांई जेला च है, पर उस परमेश्वरे दी शक्तिया ला शुभसमाचारे तांई दुख झेलणे तांई मेरे सोगी जुड़ी जा।
9 परमेश्वरे ही साड़ा उद्धार कितया है, कने पबित्र जिन्दगी तांई सांझो सदया है, कने उनी सांझो इस तांई नी चुणया की असां खरे कम्म किते न; पर संसार दे बणाने ला पेहले परमेश्वरे यीशु मसीह जो इस संसार च भेजणे दे जरिये अपणा अनुग्रह दसणे दी योजना बणाई।
10 पर हुण साड़ा उद्धारकर्ता प्रभु यीशु मसीह आई गिया है, कने उनी मौत दी शक्ति जो हराई दिता है, कने शुभसमाचारे दे जरिये सांझो हमेशा दी जिंदगी दा रस्ता दसया है।
11 कने परमेश्वरे मिंजो इस शुभसमाचार दा प्रचार करणे कने प्रेरित बणने तांई कने लोकां जो उपदेश देणे तांई चुणयां है।
12 इसा ही बजा ने मैं दुखां जो भी झेलदा है, कने शरमांदा नी है, क्योंकि मैं यीशु मसीह जो जाणदा है जिस पर मैं भरोसा किता; कने मिंजो पक्का पता है, की यीशु मसीह उस दिने दीकर जालू दीकर सै बापस नी ओंगा, उदी रक्षा करणे च सक्षम है, जड़ा उनी मिंजो दितया है।
13 जड़ी सच्ची शिक्षा तू मिंजो ला सुणियो है, इसा जो उस भरोसे कने प्यारे ला जड़ा यीशु मसीह च बसया है, उना जो अपणा आदर्श बणाई कर रख।
14 पबित्र आत्मा दिया सहायता ला जड़ा सांझो च रेंदा है, सच्चाई दी रखबाली करा जड़ी परमेश्वरे सांझो दिती थी।
15 तू जाणदा है की मते सारे आसिया प्रदेश दे भरोसा करणे बालयां मिंजो छडी दितया है, जिना च फूगिलुस कने हिरमुगिनेस न।
16 उनेसिफुरूस दे घरे पर प्रभु दया करे, क्योंकि सै मिंजो ने बड़ी बरी मिलणे जो आया कने मेरी सहायता किती, कने सै जेला च भी मिंजो ने मिलणे तांई शर्मिंदा नी होया।
17 पर जालू सै रोम शेहरे च आया, तां उनी मिंजो हर जगा च तोपया कने मिंजो ने मिल्ला।
18 प्रभु करे, की न्याय दे दिने उस पर बड़ी दया करे। कने जड़ी सेबा उनी मेरी इफिसुस शेहरे च किती है, उसा जो तू अच्छे ने जाणदा है।