61
Ki jiin tinnu barŋanii po
1 Yabint Yennu Seek be n ni.
U gannin ki tumin a man mɔɔnt barŋanii ki tur tatimm,
ki maan binba para biir na,
ki mɔɔnt tur yommii ki bin la yent-n-mɔŋ,
ki mɔɔnt tur dansarkɔɔra ki bin la fat-n-mɔŋ.
2 U tumin a man mɔɔnt a yoo na baar
nan Yennu n tinn u niiba, ki nyann bi datai.
U tumin a man maan binba mɔ na kur parae,
3 ki tur binba mɔ Sayɔnn na parpeenn nan kpinkpammuk,
ki li kii tee parbiir kaa, a bin nyik parbiir,
ŋaan kii yiin dontir yanii.
Bi sii tee nan tiinii nba ki Yennu tiɔŋ burir nae,
ki bi kur sii tuun linba took.
Ki Yennu saa la dontir, waa tun linba paak.
4 Bi saa ŋamm maa doi nba dɔɔr langbent ki li yukir na.
5 N niib, boorganu saa jianti.
Bi sii gorii i bonkobit, ki sii ko i kpaant, ki ŋamii i daan tiinii,
6 ki bi sii yi-i Yennu mannteeb, ki yi-i Yennu toontunna.
I saa di digbana na mɔkint,
ki sii mɔk parbifaant nan li tee i yare.
7 I fei nan yukpiasir kur gbenna.
I sii be i tiɔŋ tiŋ ni, ki i mɔkint saa pukin,
ki i parpeenn sii be yoo kur.
8 Ki Yennu yet a, “N loon ŋante,
ŋaan n ki loon mukisuk, nan toonbiit.
N saa pa n niib nan barmɔnii, ki lor mɔlor kangbennuk namm.
9 Bi sii tee niyikae digbana niib boor.
Wunba lab saa bann nan bi tee niib nba ki n teen piisin bi paake.”
10 Jerusalem kpamm linba ki Yennu tun na paake.
U tee nan pooyookir nba tuu lia tiat
ki teen siir nan chiann nae.
Yennu-e turɔ tinnu nan nyannu.
11 Bonboorii nba tuu pia ki kpaat biaŋinba na,
nnae ki Yabint Yennu saa tinn u niib,
ki digbana kur niib saa pak dontɔ.