15
Ki jiin Juda niib boontu po
1 Ki Yennu pak turin a, “Li-i lekii bo tee Moses nan Samuel see nna ki bo fabin nanin, ŋaan n bo kan tin niib na ninbaauku. A te ki bin seet nna.
2 Li-i tee ki bi boia baa saa yaat saan sian, fan pakib a min Yennu yet a:
Yiariie saa kpi siab; bi sinsaanboore na.
Ki siab mun saa kpo tɔb nie; bi sinsaanboore na.
Ki siab mun, kome saa kpib; bi sinsaanboore na.
Ki siab mun tee bin sooribe ki yaat namm ki teemm yommii,
bi sinsaanboore na mun.
3 Min Yennu-e lor nan bontona ŋanna n tun ki turib. Bi saa kpib tɔbii ni, ki bɔi saa pat bi gbanant, ki nɔɔnii saa dir, ki muuk ni bonkobit saa ŋman linba biar na.
4 N saa te ki niib kur yan n put bi paak, kimaan Hesekia bija Manase nba tun linba Jerusalem, yoo nba ki u din tee Juda kpanbar na.”
5 Ki Yennu yet a,
“Ŋmee saa tin yimm Jerusalem teeb ninbaauku?
Ŋmee ki li saa daamii-ɔ i paaki? Ŋmee saa set ki boi i po?
6 Yimm niib na yêtima, ki ŋmant i poor ki turin,
ŋanne ki n tant n nuu ki faa mati,
kimaan n soor n mɔŋ ki tan baka.
7 Tiŋ na doo kur ni, n lui nan mɔɔt nae ki tur wouŋ.
N biir yimm n niibe ki kpii i waas,
kimaan yaa ki nyik i yanbɔntoona na paak.
8 Pakɔi yab i tiŋ ni ki gar mɔkgbeŋir paak tanbiiniiwa.
N kpii i naasimm bi paant nie, ki dinn bi naanba biak.
N lekib nan biake nan biiru.
9 Poo nba ki u waas banlore kpo na fibe, ki gbaa nan foon.
Yentu nba ki u tuu be leŋ na kpant bunbɔnna,
u dii fei-e, ki li yiarɔ.
N saa te ki i datai n kpi yimm nba daa biar fo na.
Min Yennu-e pak na.”
Ki jiin Jeremaya bunburimii po
10 N tee jɔɔ nba be nan parbiire. Bee ki n naa din marimi? Li tee man kɔn ki bia nɔi nan sɔɔ kure, tiŋ na ni. N ki kpent likirii sɔɔ boor, ki sɔɔ mun bia ki kpent likirii n boori, ŋaan sɔɔ kur porintirin mɔporae.
11 Yennu, li-i tee ki n ki tun a toonn fanu, koo li-i tee ki n ki set n datai taar ni ki fabin nana, yoo nba ki bi bo be biak nan wahala ni na, fan ŋaan ki bi mɔpora maŋ n mann mɔnii.
12 Sɔɔ kaa ki saa fit kɔnn kut, mantik kut nba nyii gaŋ po ki bi ŋmat kutmɔnt li ni na.
13 Ki Yennu pakin a, “N saa tun datai ki bin jii n niib gor nan bi mɔkint, ki lin dat bi tuba, kimaan bi biit nba ki bi tun tiŋ na kur po na paak.
14 N saa te ki bin teen daaba ki tur bi datai, tiŋ nba ki bi ki mi na ni, kimaan n wutoor di nan muu nae, ki kaa kpeenu.”
15 Ŋanne ki n pak a, “Yennu, a mɔk bannu. Tiat n po ki sommin. Datir binba tun bonbiir ki turin na tuba. Daa mantik mɔk sukuru namm, ki bi saa la yaak ki kpin. Tiat nan a paake ki bi sukiin.
16 A pak nanime, ki n gbiint mɔbonn kur. Yabint Yennu nba tee yiikoo daanɔ, n tee a yɔɔe, a mɔmaame gbeen n par nan kpinkpammuk nan parpeenn.
17 N ki be nan nileeb ki laa, ki n par mei. N sak a mɔbe, ki be n kɔɔ, ki n wutoor doo bi biit paak.
18 Bee ki n sii yɔɔ di biaki? Bee ki n daŋ ki mɔk tebuku? Bee ki li kan buuri? A lor fan dinnin fei nan kpenu nba tuu fɔɔr tuntonn biaŋinba nae-e?”
19 Ki Yennu jiin a, “Li-i tee ki a jen, n saa gaarae, ki a ŋamm teen n toontunnɔ. Li-i tee ki a nyik baryana, ŋaan mɔɔnt n maan nba kpaa talas, a saa ŋamm teen n sɔkiniie. Niib nae saa jen a boor, ki li ji kii tee fan saan bi boor kaa.
20 N saa teena nan kutmɔnt maar nba mɔk paŋ nae bi boor. Bi saa kɔn nana, ŋaan kan nyanna. N sii be nana, ki saa guura, ki dia-a fanu.
21 N saa nyinna nɔɔnbiit nan kpikpiruk damm nuu ni. Min Yennu-e pak na.”