18
Biaŋinba ki Jeremaya saan yɔkmaarɔ ŋaak
1 Ki Yennu pak min Jeremaya a,
2 “Saant yɔkmaarɔ na ŋaak, ki n saa tura n maan leŋ.”
3 Ki n saan ki saa la ki yɔkmaarɔ na maa yɔk.
4 Li-i tee ki bobsiar ki ŋan, u tuu yeere ki ŋamm maa.
5 Ŋanne ki Yennu pakin a,
6 “N ki mɔk yaak ki saa teen yimm Israel teeb nan yɔkmaarɔ na nba tee u yɔk biaŋinba na-a? I be n nuu nie nan yɔk nba be yɔkmaarɔ nuu ni na.
7 Yoo nba ki n yet nan n saa ŋabir ki yeer, koo ki biir digbann nba, koo naan yent nba,
8 ŋaan ki li digbann ŋmat jen n boor ki nyik biit tumu, n ji kan tun linba ki n bo yaa n tun na.
9 Li mun bia tee nnae, li-i tee ki n yet nan n saa bur, koo ki maa digbann, koo naan yent nba,
10 ŋaan ki li digbann yêt n mɔb ki tuun biit, n ji kan tun linba ki n bo yaa n tun na.
11 Tɔn, pakin Juda teeb nan Jerusalem teeb nan n lorin lorbiite ki jiint bi po, ki tee siir ki saa dat bi tuba. Pakimm ki bin nyik bi yanbɔnbinbeŋ na, ki lebit bi benu nan bi marima.
12 Ŋaan bi saa jiin a, ‘Aaii. Bee ki ti saa lebit ti binbeŋi? Ti sii yɔɔ tee tubkangbata nan biit damm, taa loon biaŋinbae.’ ”
Biaŋinba ki niib na yêt Yennu
13 Ki Yennu yet a,
“Boin digbann kur ki laan linba na booru ban tumewa.
Israel teeb tun bonbilankanta.”
14 Lebanonn jɔfɔkit ban nak marin baanuwa-a?
Li jɔɔt ni kpenii na ban fɔɔra-a?
15 Ŋaan n niib tamm n powa,
ki jokit bonnunubit ki teen tingbana.
Bi gbiatire sɔnu nba tee bin tɔkin na ni,
bi ji ki waa sɔnkperii na, ŋaan tɔkii sɔnbukii.
16 Bi tunn tiŋ na ki teenir woribuk boore,
a bii yɔɔ kii yisimir yoo kur.
Wunba kur gar leŋ, u gbanu saa jek,
kimaan waa saa la linba na paak.
Li saa bakitib, ki bi saa pak bi yura.
17 N saa yat n niib bi datai tɔɔnn,
nan wonfufuk nba tuu yat tant na.
N saa ŋmant n poor ki turib,
ki biiru-i baarib yoo nba, n kan sommibi.
Lorbiiuk nba jiin Jeremaya po
18 Ŋanne ki niib na yet a, “Ŋaant man ki tin tun siar ki jiin Jeremaya po. Mannteeb sii yɔɔ be-e ki teenit tumiiu, ki subindamm yɔɔ be ki teenit kpaanii, ki Yennu sɔkiniinba yɔɔ be ki mɔɔntir Yennu maan. Ŋaant ki tin paanɔ maan, ki bia nyik waa piak linba na gbiintu.”
19 Ŋanne ki n miar Yennu a, “Yennu, gbatir linba ki n piak na, ki gbiint linba ki n datai piak ki jiin n po na.
20 Biite tee ŋamm nyɔɔti-i? Ŋaan bi gbiir bootuko a man baa leŋ. Tiat biaŋinba ki n baar a boor ki pak sommib, nan a daa diab nan wutoori.
21 Yennu, ŋaant bi waas n kpo kon, ŋaant ki bin kpo tɔbii ni, ŋaant ki bi poob n kɔŋ bi sɔrib nan bi waas, ŋaant yiarii n kpi jab na, ki naasimm na n kpo tɔbii ni.
22 Tumin biirteeb ki bin biir bi ŋei, yoo nba ki bi ki mi li po, ki bin bui nan jaŋmaanii. Bi gbiir bootuko a man baa leŋ, ki pii baruk a lin soorin.
23 Ŋaan fin Yennu mi bi lorbiit nba ki bi lorin a bin kpin na po. A daa chabin bi yanbɔmm, koo ki nyikin bi biit na. A te ki bi datai n nyannib, ki bin di biak, a wutoor ni.”