20
Ki jiin Jeremaya nan manntɔɔ Pasur kɔnn po
1 Ki manntɔɔ Pasur, wunba tee Imer bija, ki din tee Yenjiantu ŋasaakak yudaanɔ na nba gbat ki n mɔɔntir maan na,
2 ki u te bi soorin ki boon, ki baanin bant, ki birin kpian Yenjiantu ŋasaakak na, Benjaminn tammɔb nba be paapo na boor.
3 Laa fant sanyiɔk ki Pasur te ki bi baatin yoo nba ki n pak turɔ a, “Yennu ki pur a sann Pasur kaa. Sann nba ki u tura tee, ‘Jaŋmaanchiɔŋ siar kur po.’
4 Yennu tiɔŋ yet a, ‘N yaa man teena jaŋmaanchiɔŋo ki tur a mɔŋ nan a yɔɔsnba, ki a saa la bi datai dia jukii ki kpib. N saa jii Juda niib kur ki teemm Babilonn kpanbar nuu ni, ki u saa yaat nan siab ki saan namm u tiŋ ni, ki bii tee daaba, ŋaan kpi leeb na.
5 N bia saa te ki bi datai n fat bi mɔkint kur doo na ni, ki yent i gor nan i faar kur, ki kpab nan Juda kpanbara gor kur, ki saan nann Babilonn,
6 ŋaan bi saa soor fin Pasur nan a ŋaateeb kur ki saan nani Babilonn. I saa kpo leŋe ki bin pii-i, ki kpab nan i yɔɔsnba nba ki i faar faak bonchiann ki turib na.’ ”
Biaŋinba ki Jeremaya jii u daamii ki tur Yennu
7 Yennu, a kpannime, ki n set be kpinkpannii ni.
A mɔk paŋ ki garin, ki nyannin.
Sɔɔ kur piak maame ki jiint n po, ki bi laan yontunmuna.
8 Yoo nba kur ki n pak,
li tee man yikin sanpaapoe ki hoot a, “Woribuk! Biiru!”
Yennu, n be tiŋ nie ki tee yann yoo kur,
kimaan maa mɔɔntir a maan na paak.
9 Ŋaan li-i tee ki n yet a,
“See ki n nyik Yennu ki ji kan ban pak u sann ni,”
li yoo a maan na tuu tee nan muu nae ki di n par ni.
N tuu yabire maa mii diar n par ni,
ŋaan n ki fit diari.
10 N gbat sɔɔ kur lɔkin ki yeen a, “Jaŋmaanchiɔŋ li munn po.
Ŋaant tin pootɔ ki tur doo yiikoo damm.”
N yɔnanmɔnii gbaa guu man baae.
Bi yeen a, “Li ki gar ti saa fit kparɔ ki nyannɔwa,
ki soorɔ ki teenɔ bonbiir.”
11 Ŋaan fin Yennu-e see n poor nan paŋ nan yabint,
ki binba waan na saa baa.
Bi saa di fei yaayoo siiyoo, kimaan bi kan nyanni.
Bi fei maŋ sii kaa tammu.
12 Ŋaan fin Yabint Yennu ŋarin bikii niib fanue,
ki mi linba be bi para ni, nan bi dudukit ni.
Li paak, ŋaant man la ki a pa bonbiir ki jiin n datai,
kimaan n jii n binbeŋ ki teen a nuu nie.
13 Yinin yaŋ ki tur Yennu. Dontir Yennu.
U nyinn binba di biak na biit damm na nuu niwa.
14 Porin daar nba ki bi din marin na mɔb.
Tammit daar nba ki n naa din marin na po.
15 Porin daanɔ nba din maan n baa par na mɔb,
wunba din baar ki kumiiɔ a, “Li tee bonjake, a mɔk bija na.”
16 Ŋaant ki wuu tee nan doi nba ki Yennu biirir,
ki li ki mɔkɔ ninbaauk na.
Ŋaant wun gbat tont mɔnii sanyiɔk ni, nan tɔb fuur yonsuuk ni,
17 kimaan waa din ki kpiin yoo nba ki n be poor ni na.
N naa poor nie din bo sii tee n kaauk.
18 Bi din marin bia poe?
A mii be daamii nan ninbaatir ni,
ki n manfoor n tan joont nan fei-i?