30
Ki jiin Yennu mɔsonn po
1 Ki Israel teeb Yomdaanɔ Yennu na
2 pakin a, “Sɔbin linba kur ki n paka na ki teen gbouŋ ni,
3 kimaan yoo baate ki n tan saa ŋamm n niib nba tee Israel teeb nan Juda teeb na. N saa jen namm tiŋ nba ki n din tur bi yeejamm na ni, ki bi saa yentir. Min Yennu-e pak na.”
4 Ki Yennu pak tur Juda teeb nan Israel teeb a:
5 “N gbat yanputuk fuur,
ki li ki tee parmaasir wuyikinii kaa,
ŋaan tee jaŋmaanii wuyikiniie.
6 Ŋminin ŋaan dukin. Jɔɔ saa fit mar bika-a?
Bee ki n laat jɔɔ kur ki u nii be u poor paak
nan poo nba tuu yaa wun mar na?
Bee ki sɔɔ kur penn nna?
7 Dabiir baat, ki daar kaa ki saa yek nan li daari.
Li tee yoo nba bie ki tur n niib, ŋaan n saa tinniba.”
8 Yabint Yennu yet a, “Li daar-i baar, n saa kɔnn yɔkit nba yɔɔk bi turii ni na, ki bia pit jarit na, ki bi ji kii tee digbangann teeb na yommii.
9 Ki bi sii jiantir min nba tee bi Yomdaanɔ Yennu na nan Defid yaaboonn nba ki n saa gann ki dinnɔ naan nae.
10 N niib, i daa tiin jaŋmaanii. Israel teeb, i yan daa puti.
N saa nyinni digbanbanfɔkir na niwa,
tiŋ nba ni ki i tee yommii na.
I saa jen kpen, ki sii be i yamani.
I sii be fanu, ki sɔɔ kan kɔɔni jaŋmaanii.
11 N saa baar i boor ki tan tinni.
N saa biir digbana nba ki n yati ki saan nani na,
ŋaan n kan biir yimmi.
N saa dat i tubawa, ŋaan n saa dat i tuba nan lomme.
Min Yennu-e pak na.”
12 Ki Yennu pak u niib a,
“I fiat na kan buuri, ki i danii na kaa tinteb-po.
13 Sɔɔ kaa ki saa gotini, i nara na kaa tebuku,
dindann kaa nan i saa la laafia.
14 I yɔɔsnba kur tamm i powa, bi ji ki fiin i po.
N leki nan n tee dataak nae.
I tubdatu na paar, kimaan i biit na yab bonchiann,
i nɔɔntont na paak niiwa.
15 I ji daa piak i danii na po, kimaan li kaa tebuku.
N dat i tuba nna, kimaan i biit yab bonchiann,
ki i nɔɔntont na paak niiwa.
16 Ŋaan mɔtana n saa biir binba kur biiri na,
ki bi saa soor i datai kur ki teemm yommii.
Binba dinti biak na kur mun saa di biak,
ki binba fiar i bona na, siab mun saa fat bi yara.
17 N saa te ki yin la laafia, ki te ki i fiat na n buur,
nan i datai na nba lek yeen a,
‘Sayɔnn tee digban-yanne, ki sɔɔ ki fiin u po’ na.
Min Yennu-e pak na.”
18 Ki Yennu yet a, “N saa jiin kaan n niib bi tiŋ ni,
ki sii mɔk ninbatinu ŋaak kur paak,
ki bi saa ŋamm maa Jerusalem nan li naan ŋaak.
19 Niib nba be leŋ na saa yin dontir yaŋ,
ki hoot nan kpinkpammuk.
N piisin saa te ki bin pɔt, ki bia turib baakir.
20 N saa pant digbann na yiikoo nba ki bi din tuu mɔk na,
ki ŋamm sennir fanu, ki dat binba dintib biak na tuba.
21-22 Bi diarɔɔ saa nyi bi tiɔŋ digbann nie,
ki bi yudaanɔ n nyi bi tiɔŋ niib ni.
U saa baar n boor yoo nba ki n yiinɔe.
Ŋmee sii mɔk par ki baar ŋaan ki n ki yiinɔ.
Bi sii tee n niibe, ki n tee bi Yennu.
Min Yennu-e pak na.”
23-24 Yennu wutoor tee wonpaaruko, wonpaaruk nba saa da biit damm paak. Wouŋ maŋ kan nyik danu nan yoo nba ki u tan saa gbenn linba kur ki u lor wun tun na. Yoo baat, ki u niib tan saa bann linba na paak fanu.