4
Ki jiin biit tumu nyiku po
1 Ki Yennu yet a, “Israel teeb, li-i tee ki i loon jenui-e, yii jent na. N ki loon pata na maan. Yi-i nyinnir, ŋaan waan fanu,
2 li sii took nan yii poor n sann ni. Ki digbana kur saa boi a n teen piisin bi paak, ki bin dontin.”
3 Ki Yennu pak tur Juda nan Jerusalem teeb a, “Kon i tinii nba ki koo na, i daa buur i bonboorii kunkonii ni.
4 Ii dia yimm nan min Yennu mɔsonn na man, ki jii i mɔŋ ki turin, yimm Juda nan Jerusalem teeb. Yi-i kii teen nna, n wutoor sii di nan muu nae, kimaan biit nba ki i tun na paak. Li sii die, ki sɔɔ kaa ki saa kpeen muu maŋi.”
Ki jiin Juda po
5 Pebin naatunn tiŋ na kur po,
ki hoot nan kunkɔsaakar ki lin nyi fanu.
Pakin Juda nan Jerusalem teeb ki bin chiar saan doi nba paar ni.
6 Want sɔnu nba saa Sayɔnn. Chiat ki tinn i mɔŋ. I daa taantir.
Yennu baat nan biak nan biiru bonchianne, ki li nyi gaŋ po.
7 Yanbɔr nba tuu nyi u bɔr ni ki baat biaŋinba na,
nnae ki digbana biirtɔɔ na nyii ki baat.
U baat a wun biir Juda-e.
Juda doi saa biar langbente, ki sɔɔ kan kɔɔ leŋi.
8 Li paak, lian bɔtoot liant man, kii mɔ kii fabin,
kimaan Yennu wutochiɔŋ na ki nyik Juda.
9 Ki Yennu yet a, “Li daar ni, kpanbara nan saakab saa kɔŋ bi parcheenn. Mannteeb saa jek, ki lin yaar lit sɔkiniinba.”
10 Ki n yet a, “Yabint Yennu, a kpann Jerusalem teeb nae fas. A yet a parmaasir sii be, ŋaan banjiake dii bi turii ni na.”
11 Yoo baat, ki Jerusalem teeb saa gbat nan wontouŋ da ki nyii kunkoouk paak, ki baat bi paak. Li kii tee wonŋauŋ nba jikit fouŋ kɔɔ kaa;
12 Yennu nba tur mɔb ki wouŋ nba baat na sii mɔk paŋ ki gar nna. Yennu tiɔŋ yeen a u saa dat u niib tuba.
Ki jiin Juda teeb datai po
13 Gotir, datai nae baat ki yat nan sanpagbant na, ki bi tɔb torit tee nan sajaperinn na, ki bi taanii kakii ki gar baakawa. Ti ki mɔk dindann. Ti boonta.
14 Jerusalem, wuut biit nba be a par ni na, ki lian fit la tinnu. A sii dukii yanbɔndudukit ki lin wei nlee?
15 Toomiinba nyii Dann doo ni, nan Efraim kunkona paak, ki mɔɔntir lababiiuk.
16 Bi baar a bin kpaan digbanae, ki bia pak Jerusalem nan datai nyii digbanbanfɔkir ki baat. Datai na saa hoot ki tur Juda doi,
17 ki saa ŋaa loon Jerusalem nan jab nba tuu guu tiŋ na, kimaan u niib na yêt Yennu mɔba. Yennu-e pak na.
18 Juda, fine baar nan linba na a mɔŋ paak, kimaan faa be biaŋinba, nan faa tun linba na paak. A biite baar nan biak na, li ŋmuu ki saar a wuba.
Jeremaya yanyêtuk ki jiin u niib po
19 Tont be. N kan fit gubin gaar tont na.
N wub! N wub ton bonchiann. N kan fit ŋmini.
N gbia naatuna nan tɔb hootii.
20 Biak yenn tuu gare, ki leer waa.
Tiŋ na kur tee langbente.
Ti ŋei na biira, ki li mɔpina na pat pat.
21 N saa la tɔb ninmɔnn nan naatuna mɔnii ki lin wei nlee?
22 Yennu yet a, “N niib na tee bonliiniie.
Bi ki mimi. Bi tee nan wajata nae ki ki mɔk bannu.
Bi mi toonbiit tumue fanu, ŋaan gbar toonŋana tumu.”
Jeremaya yirintu ki jiin biiru po
23 N got tingbouŋ na ki sɔɔ li tee tinkokirik nba fukiie,
ki n got sanpaak ki sɔɔ yentu kaa.
24 Ki n got jɔjaana ki sɔɔ ki bi jekir, ki kunkona labin.
25 N la nan niib kaa, ki nɔɔnii mun bia yukir ki yaata.
26 Tinkpiasir na kpant tanbiiuŋo, ki li doi na tee langbent,
kimaan Yennu wutoor doo bonchiann.
27 Yennu poŋ pak nan tingbouŋ na kur saa kpant tanbiiuŋo, ŋaan u kan biirir fasi.
28 Tingbouŋ na saa bui kpemɔnii, ki sanpaak saa bɔnn.
Yennu-e pak na, ki kan lebit u dudukiti,
u soor sooruwa, ki kan ŋmat poori.
29 Taanjakira nan tɔrbantɔɔra na fuur
saa te ki sɔɔ kur n chiar.
Siab saa chiar ki kɔɔ fɔɔr, ki siab saa do jɔɔt paak.
Doi kur saa biar yann, ki sɔɔ ji kan ban kar bi ni.
30 Jerusalem, a boonta. Bee ki a lia taŋanti?
Bee ki a lia salinbana ki ban chɔrɔ?
A faŋit a mɔŋ yanne. A yɔɔsnba yêtawa, ki loon bin kpia.
31 N gbat mɔŋ, ki li tee nan poo nba tuu yaa wun mar na,
ki gbat wuyikiŋ ki li naan nan poo nba tuu yaa wun mar
u sapaanmar na.
Jerusalem mɔ ki loon wamaasin wun foont,
ki tantir u nuu ki yeen a, “N boonta. Bi baate a bin kpin.”