46
Biaŋinba ki bi nyann Ijipt jab
1 Ki Yennu pak turin ki jiin digbana na po,
2 ki piin Ijipt. Waa pak linbae na ki jiin Ijipt kpanbar Neko jab po, binba ki Babilonn kpanbar Nebukanesar din nyannib Karkemis doo ni, ki li kpia nan Yufrates mɔkir na. U din nyinnib Juda kpanbar Jehoyakim naan bina ŋanna nie. Yennu din yet a:
3 “Ijipt jab saakab hoot a,
‘Teent siir nan i naagbankɔŋa man, ki saan tɔb.
4 Baant i taanii ki jakib.
Setir chaabu ki yir i kut fokirii.
Ŋatir i kpana man. Lian i jatiat.’ ”
5 Ki Yennu boi a, “N laat bee?
Bi ŋmat poor nan yanputuko.
Bi nyann bi jabe, ki jaŋmaanii yentib,
ki bi chiar nan bi paŋ kur, ki ki jiant poori.
6 Binba chiar nan paŋ na, ŋaan bi kan paaki.
Jab na kan boti.
Gaŋ po ki kpian Yufrates mɔkire ki bi gbiatir baa.
7 Ŋmee gbeet nan Nail mɔkir na,
nan mɔkir nba tuu gbee ki do mɔkgbiɔŋ na?
8 Ijipt tiŋe naan Nail mɔkir na,
nan mɔkir nba tuu gbee ki do mɔkgbiɔŋ na.
Ijipt yet a, ‘N saa fiire ki dɔkin durinya,
ki biir doi nan niib nba be doi maŋ ni na.
9 A te ki taanii na-ii saa, ki torit na-ii somm,
ki te ki jab na-ii saa:
jab nba nyii Sudann nan Libia ki dia naagbankɔŋa na,
nan tɔrbamiira nba nyii Lidia na.’ ”
10 Yabint Daanɔ Yennu nba tee Yomdaanɔ na daare na.
Dinnae ki u saa pa jiin niib.
Dinnae ki u saa dat u datai tuba.
U banjiak saa ŋmamm nan laa tan saa gboo,
ki nyu bi sɔn nan li par nba tan saa maak.
Dinnae ki Yabint Daanɔ Yennu saa mann maruŋ
nba sii be gaŋ po tiŋ nba kpia nan Yufrates mɔkir na.
11 Ijipt teeb, ii saa Gilead tiŋ ni ki saa lon tebuk.
I tebuk na kur tee yanne; siar kaa ki saa turi laafia.
12 Digbana gbat i fei dinu powa, sɔɔ kur gbat ki i mɔ.
Jayenɔ tuu gbiat u lɔɔe, ki bi banlee n kpab baa.
Ki jiin Nebukanesar baaru po
13 Babilonn kpanbar Nebukanesar nba baar a wun lek Ijipt yoo nba, ki Yennu pak turin a,
14 “A mɔɔnt maan maŋ Ijipt doi ni,
ŋanne tee Migdol nan Memfis nan Tapanes,
ki yet a, ‘Teent siir man ki kɔn fat i mɔŋ.
Yaa mɔk linba kur, bi saa biirir tɔb niwa.
15 Bee ki i tingbanjaann nba tee Apis na baa?
Yennu-e faau lu.’
16 I jab gbiate ki baa, ki yenɔ tuu pak u lɔɔ a,
‘Kakitir; ŋaant tin kun ti niib boor,
ki nyi ti datai takoobii ni.’
17 “Ii pur Ijipt kpanbar sanpaann man,
ki lii tee, ‘Fuut daanɔ nba kɔŋ u yaak.’
18 Min Yabint Yennu-e tee kpanbar.
Mine tee Yennu nba fo na.
Tabor kunkonn nba fɔk ki gar kunkonn kur,
ki Kamel kunkonn nba kpia mɔkgbeŋir ki fɔk biaŋinba na,
nnae ki wunba saa leka na paŋ sii tee.
19 Yimm Ijipt teeb, ii teen siir man
ki bin soori ki saan nani digbangann.
Memfis saa kpant kunkoouk,
ki tee langbent nba ki sɔɔ kaa leŋi.
20 Ijipt tiŋ ŋan nan naasar ŋann nae,
ŋaan ki kabik nyii gaŋ po ki baar lekɔ.
21 U jab nba ki u jɔɔmm na gbar nan naabis nae.
Bi ki set ki kɔni, bi kur ŋmat chiare.
Bi biiru daar baara, bi boontu yoo baara.
22 Ijipt jab tiine ki foi nan waauk nba tuu gaan jat na,
yoo nba ki datai na baat.
Bi saa lekib nan pajarae, nan jab nba tuu chɔɔ tiinii
23 ki biir fɔɔr na.
Bi jab na yab ki kaa kanni, bi yab chee naasuut.
24 Ijipt teeb dii feiwa. Gaŋ po teeb nyanniba.
Min Yennu-e pak na.”
25 Israel teeb Yabint Daanɔ Yennu yet a, “N saa dat Amonn nba tee Tebes tingbann na tubir, ki kpab nan Ijipt tingbana nan li kpanbara. N saa jii Ijipt kpanbare nan binba teenɔ yada na kur
26 ki kubin binba loon bin kpib na, ŋamme tee Babilonn kpanbar Nebukanesar nan u jab. Ŋaan li poor po, niib bia tan saa kɔɔ kar Ijipt, nan baa din kar biaŋinba na. Min Yennu-e pak na.”
Ki jiin Yennu tinnu po
27 “N niib, i daa tiin jaŋmaanii man.
Israel teeb, i daa te ki i yan puti.
N saa nyinni digbanbanfɔkir maŋ ni,
siaminba ki i tee yommii na.
I saa jen kpen ki sii be i yan ni;
i sii be fanu, ki sɔɔ kan te ki jaŋmaanii n soori.
28 N saa baar i boor ki tan tinni.
N saa biir digbana nba kur ki n yati ki i saan leŋ na,
ŋaan n kan biir i mɔŋi.
N saa dat i tubawa, ŋaan mi-i daar yoo nba,
n sii daar nan lommo. Min Yennu-e pak na.”