9
1 N sunman ki n yur bo tee bunbunne,
ki n ninbina tee ninnyuut nyuntonn,
ki man bo bui n niib nba ki bi kpiib na paak,
yonnu nan nyiɔk.
2 N sunman ki n bo mɔk binbeboore muuk ni,
ki bo nyi n niib ni.
Bi ki tee niŋamm kaa, bi ki waa Yennu,
3 Bi teen siir nan faake yoo kur,
bi nyik mamɔmme ŋaan dia doo na nan faak.
Ki Yennu yet a, “N niib tuu nyi toonbiyenn ni,
ki lɔɔr toonbileer nie, ki ki sak nan n tee bi Yennu.”
4 Sɔɔ kur-ii chek u lɔɔ paak, sɔɔ daa tee u ninja yada,
kimaan ninja kur tee faak daanɔe,
ki sɔɔ kur gbii u yɔɔk paak.
5-6 Sɔɔ kur turin u yɔɔke, ki sɔɔ ki piak mamɔmm,
kimaan bi tumii bi jerima faake,
ki kan nyik toonbiit tumu.
Bi-i nyii kpikpiruk yenn ni, bi tuu kɔɔ leer nie,
ki fayeŋ-i gar, leer n wei.
Yennu yeen a u niib yêtɔe.
7 Linba na paak ki Yabint Yennu yet a,
“N saa pur n niib nan kut nae ki bikimm.
N niib tun biita, n ji saa tun namm lannpoe?
8 Bi jerima tee nan peenlɔbit nae, ki bi fa faak yoo kur.
Sɔɔ kur piak naasinyɔɔsire u lɔɔ boor,
ŋaan pii baruk ki guuntɔ.
9 N kan dat bi tuba linba na paaki-i?
Koo ki daa dont wutoor nibooru nba na paaki-i?
Min Yennu-e pak na.”
10 Ki n yet a, “N saa fabin kunkona paaka,
ki mɔ mɔmaatuk paak, kimaan bi koora,
ki sɔɔ ji ki gaar bi ni, sɔɔ ji ki gbia nei mɔnii,
ki nɔɔnii nan muuk ni bonkobit chiar yaat.”
11 Ki Yennu yet a, “N saa te Jerusalem n kpant langbent,
kii tee mɔbɔi binbeboor,
ki Juda doi bia saa kpant langbent,
ki tee siaminba ki sɔɔ kan fit kar.”
12 Ki n boi a, “Yennu, bee ki tiŋ na biir, ki bia koor nan kunkoouk na, ki sɔɔ ki gaar leŋi? Ŋmee sub fanu ki saa bann linba na paaki? A wann ŋmee li paak, ki u mun saa wann leebi?”
13 Ki Yennu jiin a, “N biir tiŋ na, kimaan n niib nyɔr nyik tumiiu nba ki n turib nae. Bi ki sak n mɔb, ki bia ki tun linba ki n wannib na.
14 Ŋaan bi teen tubkangbatae, ki jiantir tingbann Baal, nan bi baanba nba din wannib biaŋinba na.
15 Li paak, gbiintir linba ki min Yabint Yennu nba tee Israel teeb Yennu yaa man tun. N saa tur n niib jeet nba ton ki bin di, ki bia turib lɔbii ki bin nyu.
16 N saa yat kɔɔnib digbana nba ki bi yeejamm nan bi mɔŋ ki ban gbat li po, ki te ki kunkɔnkɔnna n tookib nan maa tan saa boontib.”
Biaŋinba ki Jerusalem teeb boi sommir po
17 Ki Yabint Yennu yet a, “Dukint linba tuun na po.
Yiint kpemɔnii damm,
nan poob nba yiin kuun yanii na ki bin baar.”
18 Ki niib na yet a,
“Pakimm ki bin kakit ki yin kuun yanii turit,
nan ti ninbina nba tan saa gbee nan ninnyuut,
ki ti ningbant n matik nan mɔnii.”
19 Gbiintir mɔnii fuur Sayɔnn doo ni man a,
“Ti boonta. Ti dii feiwa.
Li tee tin nyi tiŋ na nie, kimaan bi bit ti ŋeiwa.”
20 Ki n yet a, “Yimm poob n gbiint ki tur Yennu;
ki i baka-ii be u maan ni.
Ii tumii i bonpoi kpemɔnii, ki wann i yɔɔsnba kuun yanii yinu.
21 Kuun tɔkin ti takorbonae, ki kɔɔ ti diit ni,
ki bia baar ti kpanbara ŋei ni, ki kpi waas sɔnjot ni,
ki kpi naasimm dai ni.
22 Gbanankpeena dɔɔe siar kur po,
nan mɔbaa nba tuu dɔɔ kpaant ni na,
koo karwantpat-teeb nba tuu chɔɔ karwanta ki bir,
ki sɔɔ ki tikirir na. Yennu nba yetin a n pak linbae na.”
23 Ki Yennu yet a,
“Subindamm daa faa kpinkpant bi subinii paak,
ki paŋ damm mun bia daa faa kpinkpant bi paŋ paak,
ki mɔkita mun bia daa faa kpinkpant bi mɔkint paaki.
24 Li-i tee ki sɔɔ loon wun faa kpinkpant,
wun faa nan u min, ki bia bant n maan paak,
kimaan n lomm yɔɔ be-e, ki n tuun linba ŋan ki bia took.
Ŋanne mei n par. Min Yennu-e pak na.”
25-26 Ki Yennu yet a, “Yoo baat ki n saa dat Ijipt teeb, nan Juda teeb, nan Edom teeb, nan Amonn teeb, nan Moab teeb, nan kunkoouk teeb nba pɔɔn bi yut na tuba. Niib na kur pot bi punawa, ŋaan bi ki dia mɔlor nba ki punpotu tee li nyinn na. Niib na nan Israel teeb na kur, sɔɔ ki dia n mɔlor na.”