NIKANT
Ki jiin Nikant gbouŋ na po
Gbouŋ na beerit Israel teeb nba din somm kunkoouk paak bina piinna na poe, yoo nba ki bi din nyii Ijipt tiŋ ni ki saa Keenann tiŋ ni na. Kunkoouk paak, saak ki baa, ki nyun kaa, ki mɔɔt bia ki pia, ki jeet kaa. Bi yi gbouŋ na Nikant, kimaan li want biaŋinba ki Moses din kan Israel teebe. Baatusir ni, bi yi gbouŋ maŋe Numbers.
1
Ki jiin Israel teeb sinsinn nikant po
1 Moses din be Yennu lanbouŋ na ni, Sainai kunkoouk paak, bina ŋanlee niŋ nba ki Israel teeb din nyii Ijipt na, li ŋmaarii ŋanlee sinsinn daar, ki Yennu yetɔ a,
2 “Fin nan Aarɔnn n kan Israel teeb nikant. Ii kan naakuuk naakuuk nan ŋaak ŋaak. Ii sɔb jɔɔ kur sann,
3 jab nba dii bina piinlee koo binba gar nna, ki jaŋ nan bin saan tɔb.
4 Ŋaant ki naakuuk tɔɔndaanɔ n nyi booru kur ni ki sommi.”
5-15 Jab nba saa sommi na, bi sanae na:
| Booru | Naakuuk saakɔɔ |
| Rubenn | Elisur, ki u tee Sedeur bija |
| Simeonn | Selumiel, ki u tee Surisadai bija |
| Juda | Naasonn, ki u tee Aminadab bija |
| Isakar | Netanel, ki u tee Suar bija |
| Sebulunn | Eliab, ki u tee Helonn bija |
| Efraim | Elisama, ki u tee Amihud bija |
| Manase | Gamaliel, ki u tee Pedasur bija |
| Benjaminn | Abidann, ki u tee Gideoni bija |
| Dann | Ahieser, ki u tee Amisadai bija |
| Aser | Pagiel, ki u tee Okrann bija |
| Gaad | Eliasaf, ki u tee Dewel bija |
| Naftali | Ahira, ki u tee Enann bija |
16 Jab nba nae ki bi din gannib niib na ni, ki bi tee saakab nba be bi naakuut ni, ki bia nyii bi booru ni, ŋamme din tee Israel naakuut saakab.
17 Jab piik nan banlee na sommire din te ki Moses nan Aarɔnn
18 fit yiin ki taan niib na kur, ŋmaarii ŋanlee ni sinsinn daar, ki kamm naakuuk naakuuk nan ŋaak ŋaak. Jab nba kur dii bina piinlee koo ki gar piinlee, ki bi kamm ki sɔb bi sana,
19 nan biaŋinba ki Yennu wann Moses na. Moses din kamm Sainai muuk nie.
20-46 Ki jab nba kur dii bina piinlee-lee, koo binba gar nna, ki jaŋ nan bin saan tɔb, ki bi sɔb bi sana nan bi booru nan ŋei nba ki bi nyii, ki piin Rubenn, wunba tee Jakɔb bikperik na booru. Binba ki bi din kamm maŋ tee nnae:
| Booru | Kann |
| Rubenn | tusaa piinna nan ŋanloob nan kobii ŋanŋmu |
| Simeonn | tusaa piinŋmu nan ŋanyia nan kobii ŋantaa |
| Gaad | tusaa piinna nan ŋanŋmu nan kobii ŋanloob nan piinŋmu |
| Juda | tusaa piinlore nan ŋanna nan kobii ŋanloob |
| Isakar | tusaa piinŋmu nan ŋanna nan kobii ŋanna |
| Sebulunn | tusaa piinŋmu nan ŋanlore nan kobii ŋanna |
| Efraim | tusaa piinna nan kobii ŋanŋmu |
| Manase | tusaa piintaa nan ŋanlee nan kobii ŋanlee |
| Benjaminn | tusaa piintaa nan ŋanŋmu nan kobii ŋanna |
| Dann | tusaa piinloob nan ŋanlee nan kobii ŋanlore |
| Aser | tusaa piinna nan yenn nan kobii ŋanŋmu |
| Naftali | tusaa piinŋmu nan ŋantaa nan kobii ŋanna, |
ki bi kur taan ki tee tusaa kobii ŋanloob nan tusaa ŋantaa nan kobii ŋanŋmu nan piinŋmu.
47 Bi din ki kan Liifai teeb na,
48 kimaan Yennu din yet Moses a,
49 “A daa kaan Liifai booru, koo ki pukiib nikant ni, yoo nba ki a kaan Israel jab nba jaŋ nan bin saan tɔb na.
50 Ŋaan a guun Liifai teeb ki bii gorii kii ŋammit n lanbouŋ nan linba kur be li ni, kii tuun leŋ, ki faa bi lanbont ki lintir.
51 Ki li-i tee ki i tuu chat kinkaanboor, Liifai teebe saa chaat n lanbouŋ maŋ ki saa chaan binbenpaaŋ boor. Ki wunba kur ki pukin bi po, ŋaan nakin n lanbouŋ na boor, bin kpiu.
52 Ki Israel teeb nba biar na saa chaan bi lanbont kaann kaann, sɔɔ kur nan u bɔkitu nan li fariŋ.
53 Ŋaan ki Liifai teeb n chaan kii kɔr n kasii lanbouŋ, kii guu ki daa te ki sɔɔ baat ki nakii ki tan saa mann donn n wutoor ki n biir Israel teeb.”
54 Ki Israel teeb tun linba kur ki Yennu wann Moses na.