103
Ki jiin Yennu lomm po
1 N seek, pakin Yennu.
N gbanu kur, pakin Yennu kasii sann.
2 N seek, pakin Yennu, ki daa tammit u ŋamm po.
3 U tuu nyik chab n biit kure ki te n yiarii kur n gbenn.
4 Ŋɔɔe nyintin kuun ni, ki mɔk lomm nan ninbatinu n paak.
5 U gbeen n binbeŋ nan bonŋanae,
li paak ki n tee nipaaŋ ki bia mɔk paŋ
nan baakir nba mɔk paŋ biaŋinba na.
6 Yennu-e bu ki sommit binba be mukir ni na, ki teemm mɔnii.
7 U din fiit u lorae ki tur Moses,
ki te ki Israel teeb la u paŋ toona.
8 Yennu mɔk ninbatinu nan lomm,
u wutoor ki do yian, ki u bia gbee nan lonchiɔŋ.
9 U ki yakii nan niib yoo kuri,
u bia ki yɔɔ be nan wutoori.
10 U ki daar ti tuba ki li baat laa jaŋit biaŋinba
koo ki pa ti biit nan ti yanbɔmm paatii nba tee biaŋinba na.
11 Sanpaak nan tiŋ nba fɔk nan leer biaŋinba na,
nnae ki u lomm mun yab ki tur binba baakitɔ na.
12 Yondo po nan yonbaa po nba fɔk nan leer biaŋinba na,
nnae mun Yennu tuu jii ti biit ki fɔkit nann ti boor.
13 Baa nba mɔk ninbatinu ki tur u waas biaŋinba na,
nnae mun ki Yennu mɔk ninbatinu ki tur damm nba baakitɔ.
14 U mi waa jii linba ki nant, u mi nan ti tee tante.
15 Timm ŋarin, ti manfoor tee nan mɔɔt nba tuu pia nae,
ti tuu kpaat ki yite, ki tee nan tipuuk na,
16 ŋaan wouŋu da yoo nba, lin pebirir, ki sɔɔ ji kan lari.
17 Ŋaan binba teen Yennu baakir na,
Yennu lomm yɔɔ be namme;
ki u lomm be maarpaanu nba baat yoo kur paak,
18 binba dia u mɔlor, ki bia saak u sennu fanu na.
19 Yennu bir u naangbouŋ yendɔuŋ nie;
ŋɔɔe tee niib kura kpanbar.
20 Yimm malakanba nba mɔk paŋ nan yabint na,
ii dont Yennu man,
yimm nba saak u sennii ki bia gbiin u maan na.
21 Yimm sanpaapo pandamm kura n dont Yennu,
yimm u toontunna nba tuun u loomm na.
22 Yimm nba tee u naamii kur, ki be u naan ni kur,
ii dont Yennu man.
N seek, pakin Yennu.