18
Yaŋ nba jiin nyannu po
1 Yennu, n loona bonchiann, fine tee wunba kɔn n paak.
2 Yennu-e tee n guutɔɔ, ŋɔɔ tee n digbanpaarir,
ki mi-i be u boor, n be n yamaniŋe.
U guun nan naagbankɔŋir nae,
ki kɔn n paak, ki dian fanu.
3 N tuu yiin Yennu-e ki wun tinnin ki nyinnin n datai nuu ni.
Pakin Yennu man.
4 Kuun daŋ kaane ki lintin,
ki biiru yuuk ki gaar n paak nan nyunpana na.
5 Kuun daŋ kaane ki lintin; ki kaauk pii u baruk ki guun.
6 Maa be mabir ni, n yiin Yennu-e.
N yiin Yennu ki loon sommir,
ki u be u ŋasaakak ni, ŋaan gbat n kunkɔr,
ki gbiint n mɔŋ nba ki n mɔ ki loon sommir na.
7 Ŋanne ki tingbouŋ damm ki nik, ki jɔjaana fiaka bekint ki jekir;
kimaan Yennu wutoor doowa.
8 Ki munyuut nyii u manbonii ni,
ki mupeenu nan musankɔɔna nyii u mɔb ni.
9 Ŋanne ki u pat sanpagbouŋ ki nyii sik;
ki sanpagbounbɔŋ be u taa po.
10 Ki u kar u bonfoa nba mɔk kpinkpant paak ki bi yukir,
ki wouŋ saa nanɔ.
11 U jii bunbɔnne ki dɔkin u mɔŋ,
ki sanpagboun-gbakisir nba gbee nan nyun na
kaan lint u munn po.
12 Ki sakaana nan mukpana nyii sanyikintii ni,
u tɔɔnn po, ki baar tan bɔkit sanpagbouŋ na ki gar.
13 Ŋanne Yennu tian; ki sɔɔ kur gbat Yabint daanɔ Yennu kunkɔr;
14 ki u yek u peenii ki yat u datai.
U jii sanyikintiie ki weib, ki bi chiar.
15 Yennu, yoo nba ki a gaar jat a datai paak,
ki yakii namm nan wutoor na,
ŋanne ki mɔkgbeŋir tiŋ po ji dɔɔ yann, ki tingbouŋ fiakir nyɔɔnt.
16 Yennu tant nuu ki li nyii sanpaapo ki sik ki tan soorin,
ki dat nyinnin nyun nba sumii ni.
17 Ki u fatin, ki n nyii n datai nba mɔk paŋ na nuu ni,
ki bia fatin ki n nyii binba namin,
ki bia tee binba mɔk paŋ ki garin na nuu ni.
18 Maa be daamii ni yoo nba, ki bi worin,
ŋaan ki Yennu tinnin.
19 Ki u sommin, ki n nyii ninbɔŋ ni,
ki tinnin, kimaan u par mei n paak.
20 Yennu pa paatii ki teenin, kimaan n tuun linba tooke,
u tee piisin n paak, kimaan n ki mɔk biiti.
21 N mɔk mɔsaku nan Yennu sennu na;
N ki yêt n Yomdaanɔ Yennu.
22 N sak wei u sennii na kurawa;
N ki mɔk mɔyêtuk nan u sennii na.
23 U mi nan n ki mɔk biiti,
ki bia mi nan n soor n mɔŋ ki ki tun kpeti.
24 Ki u pa paatii ki teenin,
kimaan n tuun linba tooke, ki u bia mi nan n ki tun biiti.
25 Yennu, a tuun toonŋanae ki teen damm nba ŋan na,
a mantik ŋanne ki tur binba ŋan.
26 A mantik want a yeenu ki teen binba yeen,
ŋaan tee tondamm dataak.
27 A tuu tinn damm nba sikin bi mɔŋe,
ŋaan sikint damm nba donn bi mɔŋ.
28 Yennu, fine teenin yentu,
fine boon bunbɔnn nba bo be n boor na.
29 Fine turin paŋ, ki n fit lek n datai,
ki bia turin yiikoo ki n fit nyann bi jatuk.
30 Yennu, a toona mantik ŋan halii.
A mɔbona mantik waa leer.
A tee nan naagbankɔŋir nae ki tur sɔɔ kur nba loon a sommir.
31 Yennu kuukɔɔe tee ti Yomdaanɔ
Yennu kuukɔɔe tee ti sommtɔɔ.
32 Ŋɔɔe tee Yennu nba teenin paŋ,
ki ŋamii n sɔnjot ki li yeen.
33 U te ki n tiin fanu nan piarɔ na,
u guun fanu, jɔjaana paak,
34 ki tumiin ki n teen siir nan tɔb,
ki te ki n saa fit tɔ tɔrbanpaarir.
35 Yennu, fine guun, ki tinnin,
a baka nba be n po na paake ki n tee nijaann,
ki a yiikoo na dian, ki n tinn.
36 Fine bɔrin, ki bi ki fit soorin, ki n bia ki baa tiŋ ni,
37 ki n tuu wei ber n datai ki soorib,
ki n ki nyikitib nan maa tuu tan biirib,
38 ki n tuu faa birib tiŋ ni, ki bin gbar fiiru,
ki n nyannib, ki bi dɔɔ n tɔɔnn.
39 Fine turin paŋ tɔb ni, ki te ki n nyann n datai na;
40 ki a te ki n datai na chiar ki nyikin
ki n biir binba namin na.
41 Ki bi yikin ki loon sommir, ŋaan sɔɔ kaa ki saa fatib;
ki bi yi Yennu, ŋaan ki u ki teemm gatu.
42 Ki n biirib, ki bi naan nan tanbiinii nba ki wouŋ
tuu pebir yaat nann na.
Ki n ŋmaatib nan tant nba tuu dɔɔ sɔnjot ni na.
43 Ki a fatin ki n nyii mɔyêtdamm nuu ni,
ki teenin digbana na diarɔɔ;
niib nba ki n tuu ki mib na, ŋamme ji tee n jiamm.
44 Ki boorganu-i gbat n kunkɔr yoo nba, ki bi mɔk mɔsaku,
ki gbaant n tɔɔnn,
45 ki bi gbanant baŋit, ki bi nyi bi digbanpaara ni, ki jekir.
46 Yennu fo; pakin n sommtɔɔ.
A mɔɔnt Yennu nba tinnin na yabint nba tee.
47 U te ki n nyant n datai, u baŋit digbana nba ki n diab na,
48 ki fiarin, ki n nyi n datai ni.
Yennu, fine te ki n fit nyant n datai,
ki fiarin ki n nyi nikpiirit nuu ni.
49 Li paak, ki n dontir a sann, digbana niib sinsuuk ni.
N saa yin yaŋ ki dont fine.
50 Yennu-e teen min kpanbar Defid nyannjaann,
ki jikit u lomm nba kaa paak na,
ki teen min nba ki u gannin na,
nan n yaaboona, ki saa tuu yoo nba kaa paak.