10
Yennu mɔsonn nba jiin fatu po
1 Boin Yennu kpafuur yoo ki wun tur saak. Ŋɔɔe tee wunba teen sayuŋ nan saak, ki te bonbuburit ŋan ki tur sɔɔ kur.
2 Niib tuu boi pata nan ninnyɔdamme, ŋaan baa teen gatu nba tee faak nan fuute. Nisiab kpintir damiit ki want li paak, ŋaan bi boontie, par-kpaŋir nba ki bi teeni na tee yanne. Li paak, ki niib na lin ki yirib nan pei nba tuu bot na. Bi be daamii ni, kimaan bi ki mɔk tɔɔndaanɔ.
3 Yennu yet a, “N wutoor doo boorganu nba dia n niib na paaka, ki n yaa n dat bi tubire. Juda teeb tee n yabe, ki min Yabint Yennu-e saa gotib. Bi sii tee n tɔb taanii nba mɔk paŋe.
4 Bi niŋe ki doo diara, nan tɔɔndamm, nan kunkɔnkɔnna saakab saa nyi, ki dia n niib.
5 Juda niib saa la nyannu ki tee nan kunkɔnkɔnna nba tuu nyann bi datai, ki ŋmaa ki birib tiŋ ni nae. Bi saa kɔn, kimaan Yennu be namm, ki bi saa nyann bi datai na, halii nan taanjakira nawa.
6 “N saa te ki Juda teeb-ii mɔk paŋ.
N saa fat Israel teeb na.
N sii mɔk ninbatinu bi paak, ki jen kpen namm,
ki bi sii tee nan n ki mi yêtib na.
Mine tee bi Yomdaanɔ Yennu; n saa gat bi miaruwa.
7 Israel teeb na sii mɔk paŋ nan kunkɔnkɔnna nae,
ki mɔk parpeenn nan jab nba tuu nyu daan na.
Bi yaaboona tan saa tiar nyannu nba na po,
ki mɔk parpeenn, kimaan linba ki Yennu tun na paak.
8 “N saa yiin n niib ki taamm. N saa fatib,
ki te bin pɔt kii tee nan baa tuu tee biaŋinba na.
9 Mine lek yatib ki kɔɔmm digbangana ni,
ki bi be banfɔkir, ŋaan bi sii tian n po.
Ŋamm nan bi waas saa foor ki tɔk jen.
10 N saa nyi nan n niib Ijipt nan Asiria,
ki jen kpen namm ki kaamm bi mɔŋ tiŋ ni,
ki bia kaanib Gilead nan Lebanonn,
ki tiŋ maŋ kur po saa gbee nan niib.
11 Yoo nba ki bi be bi daamii mɔkir ni na,
min Yennu saa soor li nyunjiinu na,
ki Nail nyun sunsuŋ na saa fɔɔr.
Asiria teeb karinbaanii na saa maak,
ki Ijipt teeb paŋ na saa gbenn.
12 N saa te ki n niib na mɔk paŋ,
bi saa jiantin ki sak n mɔb.”
Yennu-e pak na.