Ⅲ
Ⅰ Nyɛ lɛ a sɩ Sãa na nʊ̃ sɩ jã. Wʊ sɔɔn bʊɔlɔ sɩ a Nãaŋmɩn bibiir, ka sɩ mɩ sɩr ɩ! A lɛ jũu, a wɛr nɩbɛ ba bɔ̃ɔ wʊ ɛ, ala lɛ so ban ba bɔ̃ɔ sɩ ɛ.
Ⅱ N barmɩne, pʊ̃pãanyã, sɩ ɩ naa Nãaŋmɩn bibiir, saa bɔ̃ɔ lɛ sɩn na be daar kɔ̃ɔ ɛ, tɩchɛ sɩ bɔ̃ɔn naa ɩka, a Yesu wa lɩɛb wa a wɛr nyã pɔ, sɩn nyɛ naa a lɛ wʊn na be, na sɩ kaara a wʊ kaar.
Ⅲ Yɩ ãsʊɔ jaa na tara a tɩɛrtɔ nyãna a Yesu 'yɔ̃ɔ, wʊ ir wʊ mãɛ yin dɛɛr pɔ, nɩtãa lɛ a Yesu na ɩ chɛchɛ.
Ⅳ Nɩrɛ 'lɔ jaa na chɛnɛ ɩrɛ yeldɛɛr, a nɩnyɩnɛ sɔ̃ɔnɔ̃ naa a Nãaŋmɩn nɛbinsɩ ala wʊn bin, bojũu waa tara Nãaŋmɩn nɩ nɛbʊ̃'yen ɛ.
Ⅴ Tɩchɛ yɩ bɔ̃ɔn ɩka Yesu ba maal dɛɛr ɛ, a lɛ ka wʊ wa ɩka wʊ wa de a sɩ dɛbɛ bar.
Ⅵ A lɛ nɩrɛ 'lɔ jaa na tara Yesu nɩ nɛbʊ̃'yen, wʊ maa lɛ chɛnɛ ɩrɛ yeldɛɛr go ɛ, tɩchɛ a nɩnyɩnɛ wa chɛnɛ ɩrɛ yeldɛɛr, waa bɔ̃ɔ a Yesu nɩ a nɩnyɩnɛ wʊn ɩ ɛ.
Ⅶ N bibiir yɩ bɔ̃ɔnɔ̃ sʊ̃, ka nɩrɛ jaa taa bɛlɛ yɩ ɛ. Nɩrɛ 'lɔ na maala a lɛ na tor, wʊ ɩ naa nɩtor nɩtãa lɛ Yesu na ɩ nɩtor.
Ⅷ Nɩrɛ 'lɔ jaa na chɛnɛ ɩrɛ yeldɛɛr yi naa a tɩɩ sɛ̃, bojũu 'lɔ lɛ ɩrɛ yeldɛbɛ yi a wɛr pielfʊ. Ala lɛ so ka Yesu na ɩ Nãaŋmɩn Bie wa ɩka wʊ wa sɔ̃ɔ a tɩɩ tʊ̃mɔ̃.
Ⅸ Nɩrɛ 'lɔ jaa na wa ɩ Nãaŋmɩn bie, maa lɛ sɛɛ ɩka wʊ lɛ ɩrɛ yeldɛbɛ go ɛ, bojũu Nãaŋmɩn befʊ be naa a wʊ yɔ̃ɔ. Wʊ kʊ̃ lɛ chɛnɛ ɩrɛ yeldɛbɛ go ɛ, bojũu wʊ ɩn Nãaŋmɩn bie.
Ⅹ Nɩtɔ̃ lɛ sɩ de bɔ̃ɔn a Nãaŋmɩn bibiir nɩ a Tɩɩ bibiir. Nɩrɛ 'lɔ jaa na ba wa turo a Nãaŋmɩn nɛɛ 'lɔ wʊn bin bɩɩ na waa lɛ nʊ̃ a wʊ yɛɛr, waa ɩ Nãaŋmɩn bie ɛ.
Ⅺ An yi a daar 'lɔ jaa yɩn piel sɔɔ Yesu, yɩ wõ naa a Nãaŋmɩn 'yɛr bie na 'yɛr ɩka sɩ nʊ̃ taa.
Ⅻ Yɩ ta ɩ a sɩ kaara a Kain kaar ɛ, wʊ tara na a dɛɛr sʊɔ tɩɛr na wʊ kʊ a wʊ yɛbile. Bo lɛ so wʊn kʊ a yɛbile? Bojũu a Kain tʊ̃mɔ̃ ɩn dɛɛr, tɩchɛ ka a wʊ yɛbile tʊ̃mɔ̃ tor.
ⅩⅢ N yɛɛr, yɩ ta vɛ̃ ka a fɛr yɩ ala ɩ a nɩbɛ na be a wɛr pɔ wa 'laar yɩ naa ɛ.
ⅩⅣ Sɩ bɔ̃ɔn nara ɩka sɩ nʊ̃ naa a sɩ taaba. A wiil ɩka sɩ yin kũu pɔ, tɩ kpɛ nyɛvʊr na ba tara baarfʊ pɔ. Nɩrɛ 'lɔ na ba nʊ̃ a wʊ yɛbɛ ɛ, wʊ chɛnɛ na be kũu pɔ.
ⅩⅤ Nɩrɛ 'lɔ jaa na 'laar a wʊ yɛɛr ɩn nɩkʊrɔ a wʊ nyãa pɔ, ka yɩ mɩ bɔ̃ɔn ɩka nɩkʊrɔ ba tara nyɛvʊr na ba tara baarfʊ ɛ.
ⅩⅥ Sɩ bɔ̃ɔn lɛ a nʊ̃fʊ na be, bojũu Yesu sɔɔn kpi kʊ sɩ, ka a mɩ sɛɛ ɩka, sɩ mɩ sɔɔ kpi kʊ a sɩ yɛɛr.
ⅩⅦ Ala ɩ a yɩ ãsʊɔ tara naa ka a sɛɛn wʊ, tɩ nyɛ a wʊ taa yɛɛr an wõnõ ka wʊ lɩɛb puor yɔ̃ɔ ba, a Nãaŋmɩn nʊ̃fʊ kʊ̃ tʊ̃ɔ be a wʊ sʊɔ 'yɔ̃ɔ ɛ.
ⅩⅧ N bibiir, yɩ ta vɛ̃ ka sɩ nʊ̃fʊ ɩ 'yɛrbie nɩ jãlbir 'yɛrbie ɛ, tɩchɛ yɩ ɩ ka sɩ sʊ̃nɔ̃ taa nɩtãa lɛ a Nãaŋmɩn na nʊ̃ sɩ sɩrɛ jaa.
ⅩⅨ A sɩ befʊ pɔ lɛ sɩn bɔ̃ɔ ɩka sɩ be naa a yelmãɛ pɔ sɔ̃ɔ 'lɔ jaa sɩn wa ara a Nãaŋmɩn niem sʊɔrɔ wʊ, sɩ kʊ̃ lɛ joro dãbãɛ ɛ,
ⅩⅩ ala gba ɩ a sɩ tɩɛr 'yɛr ɩka sɩ maal dɛɛr. Bojũu Nãaŋmɩn bɔ̃ɔn yele jaa a sɩ nyãn pɔ, na wʊ bɔ̃ɔ yele jaa sɩn ɩrɛ.
ⅩⅪ N barmɩne, ala ɩ sɩ bɔ̃ɔn naa a sɩ tɩɛr pɔ, ɩka sɩ maa chɛnɛ maala dɛɛr ɛ, sɩn wa sʊɔrɔ Nãaŋmɩn, sɩ kʊ̃ joro dãbãɛ ɛ,
ⅩⅫ sɩn nyɛn bon jaa sɩn sʊɔr yi a wʊ sɛ̃, bojũu sɩ turo naa a wʊ nɛɛ na sɩ ɩrɛ a lɛ na pɛlɛ a wʊ pʊɔ.
ⅩⅩⅢ Nãaŋmɩn nɛɛ wʊn bin nɩ nyã, ɩka sɩ sɔɔ a wʊ Bie Yesu Kɩrɩsɩto yuor na sɩ nʊ̃ a sɩ taaba, nɩtãa a lɛ wʊn 'yɛr sɩ.
ⅩⅩⅣ Bala jaa na turo a Nãaŋmɩn nɛɛ wʊn bin, ba ben a wʊ 'yɔ̃ɔ, ka wʊ mɩ be a ba 'yɔ̃ɔ. Sɩ bɔ̃ɔn naa ɩka wʊ ben a sɩ 'yɔ̃ɔ, a Sɩɛ 'lɔ wʊn de kʊ sɩ jũu.