Ⅳ
Ⅰ A Nãaŋmɩn Sɩɛ tara na Yesu kpɛ̃n a mɔgɔ̃ɔ pɔ, ka a tɩɩ tɩ bɛɛr wʊ kaa.
Ⅱ Waa di bon jaa ber lɩjaayi nɩ tãsɔɔ gbulo lɩjaayi ɛ, ka kɔ̃ kpɛ wʊ.
Ⅲ A 'yɛr kʊ wʊ, “Ala ɩ fʊ̃ʊ lɛ a Nãaŋmɩn Bie, 'yɛr kʊ a kʊsɩbɛ a nyãna ka a lɩɛb bʊ̃diir.”
Ⅳ Tɩchɛ ka Yesu 'yɛr kʊ wʊ, “A sɛb a Nãaŋmɩn gãn pɔ ɩka, bʊ̃diir tɛɛ kʊ̃ tʊ̃ɔ kʊ nɩrɛ nyɛvʊr ɛ, tɩchɛ 'yɛrbir jaa na yi Nãaŋmɩn nɛɛ pɔ.” (Mosesɩ Gãma Na Tu Anũu 8:3)
Ⅴ A bɛɛr kaa sʊɔ lɛ tara wʊn don a Jerusalɛm, tɩ wiil wʊ a puorfʊ jie na do gar a jaa,
Ⅵ tɩ 'yɛr kʊ wʊ, “Ala ɩ fʊ̃ʊ lɛ a Nãaŋmɩn Bie, ɔɔ lo a tẽe. A sɛb ɩka, wʊn vɛ̃n ka a wʊ malakasɩ gu fʊ na ba nyɔɔ fʊ nɩ a ba nuur ka fu gbɛr kʊ ŋme kʊsɩr ɛ.” (Yiel Gãn 91:11, 12)
Ⅶ Ka a Yesu mɩ 'yɛr kʊ wʊ, “A mɩ sɛb a Nãaŋmɩn gãn pɔ ɩka, ta bɛɛr a yɩ Nãaŋmɩn kaa ɛ.” (Mosesɩ Gãma Na Tu Anũu 6:16)
Ⅷ A tɩɩ lɛ tara wʊn don tɔ̃ɔ ju tɩ wiil wʊ a nãa di jiir a jaa na be ka a wɛr pɔ, na a bʊ̃vɩɛlsɩ lɛ an be.
Ⅸ Ka wʊ 'yɛr kʊ wʊ, “Ɩn kʊ fʊ naa anyãna a jaa, ala ɩ fʊ gbur dumo puor ma.”
Ⅹ Yesu 'yɛr kʊ wʊ, “Fʊ̃ʊ Satan nyã tɔɔ yi be. A sɛb a Nãaŋmɩn gãn pɔ ɩka, a sɩ Soro Nãaŋmɩn tɛɛ lɛ a sɛɛ ɩka yɩ puoro na yɩ tʊ̃nɔ̃ kʊrɔ a 'lɔ tɛɛ.” (Mosesɩ Gãma Na Tu Anũu 6:13)
Ⅺ A tɩɩ bar wʊn tɩ chen, tɩchɛ ka a Nãaŋmɩn malakasɩ wa sʊ̃ʊ wʊ.
Ⅻ Yesu na wa wõ ɩka ba nyɔɔn Jɔɔn na ba pɔɔ, wʊ chen Galilee.
ⅩⅢ Wʊ yin Najaretɩ na wʊ tɩ kpɩɛrɛ be a Kapenahum a man nɛɛ be Jebulun nɩ Naftalɩ wɛr pɔ.
ⅩⅣ Ka a lɛ jaa a Nãaŋmɩn 'yɛ'yɛrɛ Isaiya na dɔ̃ɔ 'yɛr ɩ yelmãɛ,
ⅩⅤ “Jebulun wɛr, Naftalɩ wɛr, a man sɔr a Jordan man gɔ̃ɔn. Galilee be a nɩyor na kpɩɛrɛ.
ⅩⅥ A nɩbɛ na dɔ̃ɔ be libe pɔ nyɛn chãa, nɩbɛ bala na ba dɔ̃ɔ tara nyɛvʊr Nãaŋmɩn pɔ ɛ, nyɛn Nãaŋmɩn chãa kpɛ̃ɛ.” (Isaiya 9:1, 2)
ⅩⅦ A sɔ̃ɔ 'lɔ̃nɔ̃ Yesu piel na wʊ mʊɔlɔ 'yɛrɛ, “Yɩ lɩɛb a yɩ befʊ a saaju nãalʊ̃ʊ ta na.”
ⅩⅧ Yesu na wa de a Galilee man gogoro lana, wʊ nyɛn yɛɛr ayi Simon ban bʊɔlɔ Pita nɩ a wʊ yɛbɛ Andiru na lɔɔrɔ lɔyaar 'yɔ̃ɔnɔ̃ a kʊ̃ɔ pɔ. Ba dɔ̃ɔ ɩ jãnyɔɔrbɔ.
ⅩⅨ Ka wʊ 'yɛr kʊ ba, “Yɩ turo ma, n vɛ̃ naa ka yɩ nyɔɔrɔ nɩbɛ 'yɔ̃ɔnɔ̃ a Nãaŋmɩn nãalʊ̃ʊ pɔ.”
ⅩⅩ Ka ba tɔ̃ɔ tãɛ a lɔyaarsɩ bar tɩ na ba turo wʊ.
ⅩⅪ Wʊn lɛ yɩ a be chiine, wʊ lɛ nyɛn yɛɛr ayi, Jemesɩ na ɩ Jebedee bidaba naa a wʊ yɛbɛ Jɔɔn ka ba be a gboro pɔ nɩ a ba sãa Jebedee, maala a ba lɔyaarsɩ ka wʊ bʊɔl ba.
ⅩⅫ A ba tɔ̃ɔ tɩɛ a gboro bar nɩ a ba sãa tɩ turo wʊ.
ⅩⅩⅢ Yesu yɔn a Galilee wile ba a lɔ̃ɔfʊ jiir tɩ mʊɔlɔ a Nãaŋmɩn nãalʊ̃ʊ 'yɛr nʊ̃ɔ tɩ sãana nɩrɛ jaa baal.
ⅩⅩⅣ Ka a wʊ yele yaar a Siriya ka ba tara a baalsɩ ba jaa waan a wʊ sɛ̃, bala a baalsɩ nɩ ãgãn ɔbɔ na nyɔɔ, bala na tara a sɩdɛbɛ, banyã baal tãanaa na nyɔɔ nɩ gbɛrfʊ jaa bʊrɔ, ka wʊ sãa a ba baalsɩ.
ⅩⅩⅤ Nɩyɔɔ yin Galilee, nɩ Dekapolisɩ, nɩ Jerusalɛm, nɩ Judiya nɩ a Jordan man gɔ̃ɔn wa turo wʊ.