4
Nabi Isa ditolak wan handak dimatiꞌi di kampung Sidin saurang
16 Lalu Nabi Isa sampai ka kuta Nazaret, banua Sidin diganalakan. Wayah hari Sabat (hari istarahat wan sambahyang gasan juriat Nabi Ibrahim), nang kaya biasanya, Sidin masuk ka rumah ibadat. Lalu Sidin badiri gasan mambacaakan Kitab Suci.
17 Imbah itu, Sidin dijulungi sabuah gulungan Kitab Suci, surah Nabi Yasaya. Dibuka Sidin ai, lalu tadapat bagian nang handak dibacaakan manganai Al Masih. Di situ tatulis:
18 “Ruh Allah marasuki Aku sualnya Allah mamilih wan mautus Aku gasan mahabarakan ka urang-urang susah amun Allah cagaran manulungi bubuhannya. Allah mautus Aku gasan mahabari amun urang nang takurung cagaran dibibasakan, urang nang picak cagaran malihat, urang nang tatindas cagaran dibibasakan.
19 Allah mautus Aku gasan mahabarakan amun Inya cagaran manyalamatakan manusia” ujar Nabi Isa mambacaakan surah tadi.
20 Gulungan Kitab Suci tadi digulung pulang wan dibulikakan ka patugas di situ. Imbah itu, duduk ai Nabi Isa gasan mangajar urang-urang nang ada di situ. Samunyaan urang di situ maitihi Sidin.
21 “Hari ini, napa nang bubuhan ikam hanyar dangar tadi sudah bamula tajadi” ujar Nabi Isa bamula mangajar.
Nabi Isa maampihi kasarungan roh jahat di kuta Kapernaum
4:31-37
31 Lalu Nabi Isa tulak ka Kapernaum, sabuah kuta di banua Galilea. Nang kaya biasa, pada hari Sabat, Sidin mangajar urang di rumah-rumah ibadat di situ.
32 Kagum banar urang banyak tu mandangarakan ajaran Nabi Isa. Sualnya Sidin tu bapander bapangaruh.
33 Di rumah ibadat nang itu ada saikung lalakian nang kasarungan roh jahat. Inya manceleng-celeng sambil bakuciak-kuciak.
34 “Ui! Nabi Isa, urang matan kampung Nasaret! Tulung pang kami jangan diganggu! Pian handak mambinasakan kami kah? Aku tahu ai Pian tu. Pian tu utusan nang suci matan Allah.”
35 “Bahinip ja! Bajauh matan urang ini!” ujar Nabi Isa manyuruh bajauh ruh jahat tadi. Lalu, ruh jahat tadi mahampas urang tadi dihadapan urang banyak. Imbah itu, kaluaran ai roh roh jahat tadi tagal urang tadi kada disakitinya.
36 Samunyaan urang hiran wan baucap ka urang lain, “Hibatnya lah pandiran Sidin tu. Bapangaruh wan bakuasa. Wayah Sidin manyuruh ruh ruh jahat tu bajauh, langsung maasi ai ruh ruh jahat tu lawan pandiran sidin!”
37 Maka habar manganai kuasa Nabi Isa dihabarakan ka samunyaan palosok di banua nitu.