6
Urang banyak handak mandangar wan diwagasakan ulih Nabi Isa
6:20-42
20 Wayah itu, Nabi Isa manjanaki bubuhan pangikut Sidin, lalu baucap,
“Bahimunglah bubuhan ikam nang susah, karna bubuhan ikam sudah manjadi anggota karajaan Allah.
21 Bahimunglah bubuhan ikam nang lapar, karna bubuhan ikam cagar dikanyangakan. Bahimunglah bubuhan ikam nang manangis, karna bubuhan ikam cagaran tatawa.
22 Amun bubuhan ikam dimuari, ditolak, dihina, wan difitnah lantaran bubuhan ikam maumpati Aku, nang datang matan surga,
23 bahimunglah wan basuka haja wayah itu. Sualnya pahala gasan bubuhan ikam ganal di surga. Bubuhan nabi bahari gin diulah nang kaya itu jua. Lantaran itu, bubuhannya dapat pahala matan Allah.
24 Cilakalah bubuhan ikam nang sugih, sualnya ikam sudah marasaakan nang nyaman nyamannya haja wayah ini. Kaina tinggal nang cilakanya haja.
25 Cilakalah bubuhan ikam nang wayah ini kakanyangan, kaina ikam cagar kalaparan. Cilakalah bubuhan ikam nang wayah ini tatawa. Kaina ikam cagar basadih wan manangis.
26 Cilakalah bubuhan ikam amun diambung urang tarus. Urang urang bahari nang bapiragah jadi nabi gin diambung jua. Imbah itu bubuhannya dihukum Allah.
27 Tapi kupadahilah, sayangi samunyaan urang tamasuk musuh musuh bubuhan ikam. Babuat baik lah lawan nang muar wan bubuhan ikam.
28 Barkahilah urang nang manyumpahi bubuhan ikam. Doaakan nang baik baik gasan samunyaan urang tamasuk nang manjahati bubuhan ikam.
29 Amun urang malapau pipi ikam gasan manyupani ikam, bariakan jua pipi nang subalahnya pulang. Amun jubah bubuhan ikam diambil, biarakan ja inya maambil baju ikam jua.
30 Bariꞌi urang nang maminta lawan bubuhan ikam! Jangan minta bulikakan ampun bubuhan ikam nang sudah diambil urang.
31 Bubuhan ikam handak urang lain malakuakan napa ka bubuhan ikam? Nah, lakuakan ja nang kaya itu jua ka urang lain.
32 Satiap urang musti ada nang sayang wan inya dan nang kada sayang wan inya. Amun bubuhan ikam bapilih hanya sayang wan urang nang sayang wan bubuhan ikam haja, kada bapahala! Urang urang badusa gin sayang jua wan urang nang sayang wan bubuhannya.
33 Amun bubuhan ikam babuat baik cuma wan urang nang babuat baik wan ikam, kada bapahala jua. Urang badusa gin babuat baik jua wan urang nang babuat baik wan bubuhannya.
34 Amun bubuhan ikam mainjami cuma ka urang nang kawa mambulikakannya haja, kada bapahala jua. Urang badusa gin mainjami ka urang nang kaya itu jua.
35 Tapi jangan nang kaya itu lah! Sayangi musuh musuh bubuhan ikam. Babuat baik lah wan bubuhannya. Injami ja bubuhannya. Kada usah baharap dibulikakan. Ganal pahala bubuhan ikam kaina. Amun bubuhan ikam balaku nang kaya itu tadi, itu pang mambuktiakan amun bubuhan ikam sudah balaku nang kaya Nang Di Atas. Sualnya Nang Di Atas baik jua wan samunyaan urang tamasuk nang jahat wan nang kada manyukuri pambarian-Nya.
36 Abah bubuhan ikam nang di atas katuju manulung urang. Maka bubuhan ikam harus katuju manulung urang jua nang kaya Abah nang di atas.
37 Jangan maniwas urang, nyaman bubuhan ikam kada ditiwas jua! Jangan mahakimi urang, nyaman bubuhan ikam kada dihakimi jua! Ampuni ja! Kaina ikam gin diampuni jua.
38 Bariꞌi! Ikam gin dibariꞌi jua. Bariꞌi nang baik. Ikam gin cagaran dibariꞌi nang baik jua. Sabujurnya bubuhan ikam cagar baulihi pambarian nang banyak banar nang sudah ditakar bajubung gasan ikam. Sualnya takaran nang bubuhan ikam pakai gasan urang cagar dipakaiakan gasan ikam.
39 Urang picak kada kawa manuntun urang picak! Kaina kaduduanya bisa tabarusuk ka dalam luang” ujar Nabi Isa bakisah pulang.
40 “Kadada pang murid nang tapintar pada gurunya. Tagal amun inya sudah tuntung balajar, kawa ai sama pintarnya wan gurunya.
41 Kanapa maka ikam malihat sahimpil kayu di mata dangsanak ikam, tapi balokan di mata ikam saurang, kada ikam lihat?
42 Mana kawa ikam baucap lawan dangsanak ikam, ‘Ayu dangsanakku maraha aku kaluarakan sahimpil kayu nitu di mata ikam’, sadangkan di mata ikam saurang ada balokan nang kada ikam lihat? Ui urang urang nang bapiragah alim. Kaluarkanlah dahulu balokan nang ada di mata ikam saurang. Hanyar ikam kawa jalas malihat wan kawa mangaluarakan sahimpil kayu nitu di mata dangsanak ikam.”
Ajaran Nabi Isa: Ulahan urang manggambarakan pikiran dalam hati urang
6:43-45
43 Nabi Isa bakisah pulang, “Kadada puhun nang baik nang mahasilakan buah nang kada baik. Kaya itu jua, kadada puhun nang kada baik nang mahasilakan buah nang baik.
44 Sualnya satiap puhun dipinandui matan buahnya. Puhun rukam kada babuah limau. Lawan pulang kumpai baduri kada babuah tomat.
45 Urang nang baik mangaluarakan hal-hal nang baik-baik matan hatinya nang baik. Urang nang jahat mangaluarakan hal-hal nang jahat matan hatinya nang jahat. Sualnya napa nang diucapakan muntung urang kaluar matan hatinya.”
Nabi Isa mangajar kanapa maka harus maasi ajaran Sidin
6:46-49
46 Wayah itu, Nabi Isa baucap lawan bubuhan pangikut Sidin, “Kanapa maka bubuhan ikam mangiau Aku ‘Junjungan’ tagal kada maasi lawan Aku?
47 Urang nang mandatangi Aku, mandangar pandiranKu wan maasi, inya kaya urang nang
48 baulah rumah. Inya manabuk dalam-dalam, lalu maandak pundasi rumah di atas batu. Bilanya banyu baꞌah ganal datang mahantam, rumah nang itu kada runtuh sualnya pundasinya nahap.
49 Nang mandangar pandiranKu tagal kada maasi, inya kaya urang nang baulah rumah di atas pundasi nang kada nahap. Bilanya banyu baꞌah ganal datang, runtuh ai rumah tu lalu banyak banar karusakannya.”