3
Iesu i Laumet lo Moses
1 Foron kalkaluu na tuaklik, God i tawi ta gam sabin isi gamen kau na kukulii. Pesu, gamen luun wolwol kimi lo Iesu, i e Aposel ke Laulaumet na Pris ae kere fapos u la.
2 I tel fatus foim ke God ae i tim pes ta u, arae sabin Moses i tel fatus foim na fatpoton fanu tikii ke God.
3 Ma i tortores tom le Iesu in kep as laumet lo Moses, arae sau lon tom tel fel, in kep as laumet na fel ae i tel u.
4 Wara le foron fel tikii, imel e kaltu i tel ta u, isau le God i tel foron tier tikii.
5 Moses i tel fatus foim kia arae nenge fafauun na fatpoton fanu tikii ke God. Foim kia i finngas sani ae God in famalal u namih.
6 Isau le Karisito, i e Kalalik ke God ma i tel fasuut foim kia arae laulaumet na fatpoton fanu ae ri arae fel ke God. Kere fel ke God, male kere tifat, ma biil kere sokeh, ma kere ka nene ini unune isi foron tier ae kere laes ini.
Fafanau ulon Fanu ae ri Ongen Fabulwar
7 Pesu, Tanwa Kalkaluu ka tarah,
“Igii, male gam ongen kine,
8 gong gam fasorokai balmi
arae foron tubutamat gam,
ae ri ta ta pokta ri ta usuf iau pakanini,
ma ri ka tof ta iau,
aunbiing ri kiis ta na falifu foes.
9 Aiwa, ri tof ta iau ma ri ka luun ta iau na fatoftof,
taftawa le ri ka par ta sani ia tel ta u, na ifet e sangful e bet.
10 Pesu, ia ka ngaliaf ulon fanu na ulul ae,
ke ia ka tarah,
‘Na balri, fitliu ri la rong koseng iau,
ma biil ri ier isi mi na foron sal kiak.’
11 Pesu, ia ka ngaliaf ma ia ka falimlim aragii,
‘Biil tom rin to kau ta na salan mangeh kiak.’ ”
12 Foron tuaklik, gamen tumarang, isi gong tikas lo gam imel e sinang laulau na liu kia, ma unune kia i luut ke ka tamikis koseng God ae i liu.
13 Isau le, gamen farakrakai faliu ini gam na foron biing temtem tikii ae ri foteng u le, “Igii,” isi biil ti sinang laulau in fabal tikas lo gam ma ik fasorokai bala.
14 Kere foron tala Karisito, male kere posefat na unune papang na farfarop, arae tom tinpakanini.
15 Arae ia ka use ta u le,
“Igii, male gam ongen kine,
gong gam fasorokai balmi
arae foron tubutamat gam,
ae ri ta ta pokta ri ta usuf iau pakanini.”
16 Fanse ae ri ongen kine God ma ri ka ta pokta ri lo? Fanu sau ae Moses i lame fasuu ri ta tina Isip, bikiih?
17 Fanse ae God i ngaliaf ta ulo ri na ifet e sangful e bet? Fanu sau ae ri tel ta sinang laulau, ma ri ka met na falifu foes, bikiih?
18 Ma fanse ae God i falimlim ta usuf ri le biil rin kau na salan mangeh kia? Fanu sau ae ri ongen fabulwar tah, bikiih?
19 Kere par u le, biil ifasi rin kau, wara le biil ri unune.