24
1 Sia manda oosana maree mariasa oosanara rua. Sia misa aqoondikia.
2 Misa iriranaki faiqí mandaikamma nimaqarara kai randaidaqa. Misa aiqama kari ummaara kambiqaanifeera kai ufa qidaqa.
3 Amiqira iriranannai faqa oonu mafi iriranannai faqa maaqa atunara foora aruseeqa usakaidaqa.
4 Amiqira irirafa mari maaqanaki amiqira ainainauqa qumbiqanoo maridanoo.
5 Irirana faqaa marirafa afeeka faqaa marirana uriaaqaramasee maridanoo. Amiqira irirafa afeeka faqaasa kaaqa urinnaaqaranoo maridanoo.
6 Anee moo maqannaasa faqa rakirarinana irirana faqaasiannai irirana mara mareenana rakirannai fua. Moomoo irirana faqaa fasiqa ufa iriseenana rakirana uriqareennaranoo.
7 Amiqira irirafa firaa farumara foora marifaqa furufarirausa sia iridaqa. Misa firaa ufa suqiranaki oonuree sia ufa qiaqaa ifaqa noo qumunimmasee maridaqa.
8 Maqee maqee mandainainara randee mari fasiqanara ummaara oosana aree marifee qidaqa.
9 Furufarirausa mandainaina auqarara kai iridaqa. Aiqama misa auqee maria ainainausa numoo ainaina kai maridanoo. Faiqí ramoo ramaa imari fasiqanra manda fasiqee qimasee qafaidaqa.
10 Ufarurira aukuana anee kudoosaapeenana anee afeeka siaifa marinnaranoo.
11 Kootaki faiqí quqasee fifau kuqa ariraree qifana anee minakinaana mareeqee kaqini quqaa.
12 Sia ani ainaina marida fee qia. Anutufa iridanoo mifa kai ani marirana rainaannoo fee qia. Mifa anisaa rakisidanoo, mifa iridanoo anee auqee mariannana akiiqara mifa amiannoo fee qia.
13 Oo qini qimaaku anee ookasaasa anoona naa. Mifa amiqirafa maridanoo afaurusaa quqasainanoo adiafaa iannoo.
14 Anee maana faqa iria. Amiqira irirafa ookasaasa anoonara foora adiafaa irafa maridanoo. Anee mina qumareenana kasooaqee amiqiranaki marinnaranoo.
15 Sia manda oosana maree mariasa naanna reenana andeeqarausa maaqa rapeemmasee minakinaa ainaina ummuariraee qimasee tipundaa ria.
16 Andeeqarausa moomoo kari aqufiqa misa amana findififaranoo. Mandainaina fannoo manda oosana maree mariasa narusainaqa kuridifaranoo.
17 Ani namuqaa mandainainaki aqufifana sia asasia. Mifa aiku rupauraki saamurinana sia nasuria.
18 Anee asasinanoo Yaaweefa ani qafainanoo akooqaannoo narí aranaqarana rafaaqafusee sia naruannoo.
19 Anee sia manda oosana maree mariasa marirana qinee faqa miqiraree qimasee iria. Sia misa mariranara rua.
20 Manda oosana maree mariasa sia misa kasooaqee marirafa mariannoo. Misa qausana qooma dauni maqa raquraminoo dimbaannoo.
21 Oo qini qimaaku, anee Yaaweena ameemanai faqa (maqasaa karaambaiqa nimeemaanai faqa maria). Ufa rukiee mariasa faqa sia moodaanakikia.
22 Miqi maria fasiqausa kai kaqi uqanna mandaikifaranoo. Moo mandainaina Anutufa faqa maqasaa rakisirafa faqa misasaa quqeefaranoo. Akaqa amiqira ufa maaqoo maridanoo.
23 Irirana faqaasa maa ufana faqa qimannimiqau. Siaasa fannoo kootaki akaqausa dadaaqinoo akaqausa rafaaqa finanoo sia andeeqaannoo.
24 Siaasa fannoo aaqee mariasara sia aaqarana marisee qinaqa faiqí anaasee aiqamausa mi siaasanara fidiaqaa ifaranoo.
25 Siaasa fannoo aaqee mariasara sia rufiarai kaqi ummaara niminafa reemindeemiriranaki maridanoo amiqira mariranaki asasida mariannoo.
26 Kuqaa anoona ufa qimaminafa ani aqoondi uqanna maridanoo.
27 Anee ququsa auquseenana ainaina masainanoo anoona koorooinana miqoo kai maaqa usakasee maria.
28 Anee kootaki oonuree sia aaqarana siaisara unna qimasee rafaaqa fua. Sia ani afauru fannoo unnufa qiani.
29 Sia maaqi qia, mifa ummaara qimindee kai iqa narí faqa ummaara amianee qia. Sia maaqi qia, qinee maa fasiqana narí mandainaina akiiqara kai aruannauree qia.
30 Qinee furufarira fasiqa ainainirara raindaani mari fasiqana afuqaki nidaqa qafeeqa.
31 Amuka faqaafa faqa firaa andanda faqa mina rafaaqafinoo marifaqa qafeeqa. Ooni faandaamura mi afuqanasee auquqaafa rapeemmaki aqufinoo marifaqa qafeeqa.
32 Qinee mina qafaidaqa oonu mafi iriqa. Oonu mafi iridaqa irirana mareeqa.
33 Ainainirara raindaani mariasa maaqi qidaqa. Maasa kaqikaaqoo faiqararee qidaqa. Maasa kaqikaaqoo idooamasee findifuanauree qidaqa.
34 Doo misa miqianara misa aiqama ainaina fannoo taikafuannoo. Sarau irafa faiqí nári mari fasiqafara foora ani aruannoo.