3
1 Qinee minara irammirisee qimannimianaura Yuda maqannaasa aanaamuru urinnaaqaraqa maridee kaqi fifau fee miqiqa marida fee. Misa fainanduqirausa misee aanaamuru urinnaaqaraidee kaqi fifau fee miqi qida fee.
2 Oo sia fifau miqi qidaqa misa uriqararafa firaafa maridanoo. Doo qinee oosanarasee maaqi qimasee qimannimianaura, Anutufa narí ufa Yuda maqannaasasaa quqaqoofanoo marinau.
3 Akaqausa sia narisaa quqaqoonara irisee andeeqaramau fiqa rukiasee kaqi runnambiqau. Anutufa misa furufarirana qafamaseenoo qinee faqa misa qima afeekaikamma nimiafanna ufana qinee faqa misa naanna reeqa rukiaanauree qianauree.
4 Qinee Pauroosa minara maaqi qidaqa. Oo sia uqanna Anutufa mi mandoosanna maraannoo anoona ufa kai qimarifa maridanoo. Faiqí anaasee unnufa kai qimariasa kai mariafanoo sia Anutufa miqiannoo andeeqasee anoona kai qiannoo. Ooqeenaa akara Anutunara maaqi qinoo maridanoo.
Ani ookinaa ufara aiqamausa anoona ufa fee qifaranoo. Misa ani ufara amanamandee irifanoo anoonaikammiannoo.
Dafidina akarakinaa ufa Anutunara miqimminoo maridanoo.
5 Misa faiqí faiqi unna qimasee maaqi qimasee Anutuna andeeqaranara qidaqa. Maasa faiqí faiqi qiqa aaqarafa quandaki Anutuna andeeqarana mara maree kooroomeeqeenoo uqeerainaqa maasa qeeqa aaqaranara amiqira ainainee qianauree. Miqooqari maasa maaqi qianaura mandainaina akiaqara maasa Anutufa darinaqa maasa maaqi qianaura Anutufa aaqaidanoo daridanoo fee qianaura.
6 Qinee Pauroosa minara maaqi qidaqa. Oo sia uqanna Anutufa aaqaidanoo. Anutufa sia uqanna aaqaidanoo, narí andeeqarafa marinara maasa andeeqaqisaannoo mina andeeqarafa sia marinanoofau sia amana maasa aiqama maqannaasa ufa iriseenoo andeeqaisaiqini.
7 Misa faiqí faiqi unna qimasee maaqi qimasee Anutuna anoona ufara qidaqa, maasa qiqa unna ufa fannoo Anutuna anoona ufa kooroomafi uqeerainanoo qiqa unna ufa amiqirafa maridanoo nanaree Anutufa qiqa unna ufa akiaqara qiqa daruannoo fee.
8 Qinee mi manda ufanara eedoo qaanaqau maaqi qiaqini, Doo aniaqa maasa manda marirana uqeeraseeqa minannai amiqira marirana kambiqasaanee qiaqa. Mi manda ufana uqeereemaria fasiqausa Anutufa misa mara mareenoo nári nariranaki quqaannoo. Sia aaqaidanoo miqidanoo, andeeqaidanoo miqidanoo. Mi aaqara ufana qimariasa qini Pauroosara faqa unna qimasee Pauroofa maasara manda marirana uqeerasee minannai amiqira marirana kambiqaanifeera qimasee minannai qini diqidaqa aaqee mariafanoo.
Aiqamausa nári mandainaina ameemaanai maridaqa.
9 Doo qinee kafaa Pauroosa minara maaqi qimasee iraidaqa, Anutufa maasa Yuda maqannaasee, aanaamuru mariasee, uriqaraida fee qidanoo amana amana kai fee maridee qidanoo. Qinee Pauroosa oo sia moo uriqarara fee qidanoo doo qinee faasai qimannimiqa sia moo fannoo uriqararafa mariaafoo qidaqa aanaamuru faqa maasa Yuda maqannaasa faqa nári mandainaina ameemaanai ureeqaqa mariaafoo qidaqa.
10-11 Ooqeenaa tamummaqara fasiqausa akara minara maaqi qinoo maridanoo.
Aiqama maa maqa maaqanaki mariasakiqari moodaa fasiqa sia uqanna andeeqarafa maridanoo, aiqamausa miqirausa kai maridaqa. Misakiqari sia moodaa fasiqa Anutuna aanara randaidanoo.
12 Aiqama fasiqa anaasee uqanna Anutuna afusaaqari quandaki kaqi runnamma ubeekamasee aaqaranaki fimariafanoo. Sia moodaa fannoo amiqira oosana maraidaqa sia uqanna.
13 Misa noo aamara faiqí madikara foora oo raqanoo marifaqa faiqí kurididaqa. Misa ufa fannoo sakani ukaqa
nimiranara foora inoo maridanoo faiqí kuqannaruaqaa ufa kai qimariasa.
14 Misa nookiqari sukufa kai qidaqa niquraree mariasa.
15 Misa dauni faiqí kuqannarirana aupurarana nimimariasa.
16 Miqi mariasa fimariaqoo kai faaqa fuisee qirana faqa aiqama ainaina kuridi kaaridiqa turi taariqa fidaqa.
17-18 Misa sia asooara aana qafeeqa sia Anutunara naaquqaranara irimariasa maridaqa.
Ooqeenaa tamummaqara fasiqauqa akara Yuda maqannaara faqa aanaamuru mariasara faqa amana amana kai miqi mariasee qimaqoofa maridanoo.
19 Mooseena sandufakina mina ameemaanai mariasara qidanoo qimarifaqa maasa minara iridaqa. Faiqí anaasee aiqama maa maqannaasa náriara andeeqarausee qimaria ufana oosana oosanauqa aruseeqa aiqamausa mareeqee Anutuna narira ufa ameemaanai quqaaqeera Mooseena sandufa ani maridanoo.
20 Sia faiqí anaasee moo fannoo Mooseena sandufannai andeeqara fasiqaikamambi Anutuna afusaa mariannoo. Sia minarau Mooseena sandufa ani maridanoofau. Faiqí anaasee maasa aaqee marunausee qiaqeera Mooseena sandufa ani maridanoo.
Anutuna afusaa andeeqasee marirafa kooroo inoo maridanoo.
21 Doo maqee kamuqoo Anutuna afusaa andeeqafi marira oosana doo kooroo inoo maridanoo. Sia Mooseena sandufarau qidau, aaduma moo ufara qidaqa. Mooseena sandufa faqa tamummaqarausa ufa faqa doo minara kooroomasee maaqimminoo maridanoo.
22-23 Faiqí anaasee narí Anutuna asauku mundirana saqarikiranannai Anutufa mareeqee narí afusaa andeeqaranaki quqaidanoo. Aiqamausa asauku mundirana Yisuna ufa irisee minasaa rusimariasa miqi qimariasa aiqama maqannaasa Anutufa mareeqee narí afusaa andeeqaranaki quqaidanoo sia raina rainiannoo.
24 Aiqama maqannaa fasiqa anaasee aaqoonara Anutuna innaaruna asumu mariranasaaqari nianai mariafanoo minara Anutufa narí afaariranakiqari kaqi nimira ainaina narí asauku mundirana Yisunannai misa mareeqeenoo narí afusaa andeeqaranaki quqanniseenoo nári mandainainakinaana idukunnisanau.
25 Anutufa Yisunannai faiqí anaasee mandainaina akiaqara mininnisaaninafa kambiqaanifee qimasee Yisuna aqiqamasee nimufaqa aunirira saqarisaa ariqau. Mi fasiqa anaaseesa nariqa Anutuna andeeqaranaki sia amanaikiqa Yisuna saqarikidaqa. Minaki keeqaranannai Anutufa misa mandainaina taikannisaidanoo. Anutufa narí andeeqara oosana kooroo ianifeera qimaseenoo narí asauku mundirana aunirira saqarisaa quqaseenoo minannai faiqí anaasee mandainaina akiaqara narí maranau. Ooqai maru aukuana Anutufa faiqí anaasee sia mandainainara narimarinau kisaaqasaa kasooinoo marida nifauee marinau.
26 Maqee mari aukuana dauni ufa qimasee andeeqannisaidanoo narí andeeqarana kooroo ianifeera faiqí anaasee mareeqee narí afusaa innaaruna andeeqaranaki quqaidanoo. Anutufa Yisuna mareeqeenoo aunirira saqarisaa aruseenoo minannai maasa mandainaina taikaqisanau. Miqiranannai Anutufa qaara ainaina kooroo idanoo, narí andeeqarana faqa Yisuna ufasaa irirana rusisee mi mau fimariasa mareeqee narí afusaa andeeqaranaki quqannisarana faqa kooroo idanoo.
27 Yuda maqannaasa Mooseena sandufamau fidaqa náriara andeeqarausa maridee qimasee nári nipatara nimooqida maridaqa. Sia sandufa miqinoo maridanoo Anutuna ufasaa irirana mundinoo marifa narí mina mandaaqee marinafa mifa kai andeeqarafa maridanoo. Mifa kai Anutuna innaaruna andeeqaranaki quqaqisaidanoo.
28 Minara maasa maaqi qidaqa Yisuna saqarikiranannai kai Anutuna innaaruna andeeqaranaki keeqafi mariannoo, sia Mooseena sandufamau finnanannai innaaruna andeeqaranaki keeqeefaranoo.
29 Anutufa Yuda maqannaa Anutufa kai fee maridanoo, aanaamuru mariasa Anutufa faqa maridanoo fee. Doo Yuda maqannaa faqa aanaamuru aiqamausa faqa Anutufa maridanoo.
30 Anutufa moodaa maridanoo, moodaamau fimarifa maridanoo. Yuda maqannaasa Yisuna saqarikiranannai Anutufa mareeqeenoo narí afusaa andeeqaranaki quqannisaannoo aanaamuru faqa narí afusaa andeeqaranaki quqannisaannoo anaamuru mariasa faqa miqi kai masee Yisuna saqarikinnanannai narí andeeqaranaki quqaannoo.
31 Miqunannai maasa Yisuna saqarikidaqa sia minannai Mooseena sandufa mareeqee aqidaqa, sia miqidaqa maasa minannai Mooseena sandufa uqeeraidaqa mi mau fidaqa, minara mi sandufana anoona paquridaqa.