Kolosi Enembodu
Pol Unda Ingiso Kolosi Enembodu Gefiria, Aná Evere.
Pol umó aghajora ghaeko* 60 Iesu siroruturia-da ambova diburava irirota, Kolosi naava Ekaresia* desea vitia-du ená ingiso gefirie. Ená Ekaresia rera mo, jo Pol na minono rata sirorambi re. Tago, aná kambesi unda kaifa arida tuva irasua, aghago nundubuturota, ená ingiso gembua, Tikikus ungá Onesimus gha dava ututurieta bua igiguturie.
Pol ená ingiso gefiria-da bee mo, Kolosi desea vitia-da rova enembo dumenimi gaga gaveranu iruguturota, “Enembo avona God da jebuga tumanadu irari baita adua, Iesu umonu gaabee ari jo inono irambi re. Iesu gaabee arida kasava taimu manede anera manede tumogha baĩ urota, ari bari dumeni, vii mendó andoro tafugari aghago adua mo, God da jebuga baita rouvie.”
Pol ená ingisova gefiria-da mendó jojabe mo, eghá re. Enembo avona Iesu Keriso unuka umonu gaabee adua, jebuga tumanadu baita rouvie. Tago, asisi dumeninu gaabee adua-mi aná enembo kofiri ea bata, umó Iesu doa, jebugada emboro kasovigaita rouvie.
Pol Ená Buka Gefiria Gagada Mendó Mane, Aná Evere:
1:1-8 Kolosi enembo daiyagha gaabee egeguturia-da gaga re.
1:9-2:19 Keriso umó daiyagha enda tamo bua asugea furia sirorea, buro uria re.
2:20-4:6 Keriso dava Jebuga reka barida gaga re.
4:7-18 Pol unda gaga ambo gajari riria re.
1
1-2 Ariee, anda ikoko mendi, ariri gharovu, amó Pol re. Amó God da unova Iesu Keriso da aghi kato ea vitere. Nímane God da unonu urota, Keriso de dano takembea, unda natofo kakara ea, Kolosi bogu naava vitera enembo dano, namonde anda ikoko Timoti de amó nímane ghanena bee rosore. Yata bua gigige!
Namonde anda Afa God na unda sonembade siriri aride nímandu utota bubugadi rere!
3-4 Nímane daiyagha ea, Iesu Keriso gaabee eta rosora, kotú daiyagha ea, God da natofo dano neno bua goghó eta rosora amindu, namonde anda Jojabee Iesu Keriso da Afa God dava benunuva nímandu “aiye” reta rosore.
5 Avore, nímane ambova uutuva donu baita rosora-nu, kaifa gigita urota vitera-du, nímane Iesu gaabee urota, God da natofo neno bubugeta rosoravore. Epafras na seibe aria, nímandava bubua, God da Gaga Taubana bee mokónu minono ririeta niningigea, neno kaverea, anavareta aná eini-eini uutuva baita rosora-nu kaifa gigita urota reisi-foravore.
6-7 Eto-bato Epafras na seibe tutuno ea, nímandava God da sonembada beede unda Gaga Taubanadenu minono ririeta niningigea tanana egegutureravore. Anavareta etia oreki, unda ea simbugari bua, nímane oruabe ea viteravore. Kotú aghagonu, enembo kambesi nanjogova aghá egegeta rousue. Epafras mo, námanda neno bari buro komana eini re. Umó Keriso da buro kato ea aria, nímane sonembeta rouvie.
8 God da Asisi daiyagha urieta, nímane God da natofo dano neno buta rosora-da bingá unona bua futa, námandu ritata niningigutare.
9 Avore, nímanda bingá ningia angá tutuno ea, tumanadu nímandu benunu urota vitere. God na unda unonu irugota, tanana ea goghó egegadi rirota, unda Asisi na sonembuturota, beforo gari jojabede neno nundubaride bubugadi, benunu urota vitere.
10 Aghá siroradua mo, nímane Jojabeeda unonu egeguturota, umó nímandu gangoro aita rouvie. Aghade, nímane ari-bari taubana dibe eini be eini egeguturota, nímanda God tanana ari baborurota yaita rouvie.
11-12 Tago, angá anda benunuda mendó eini aná evere: God da anode duroghadenu bua, ano ea jiria, nímane darade memade itatama egegeta rosora-da rova durumugea gangoro urota, God Afadava “aiye” rirota iririgadi rere. Anada bee mo, umó seibe nímandu “avore” riria-du unda kambesi unanade unda natofodu* simbuguturia-va teraita rosoravore.
13-14 Namonde amó tumbava irieta, God unda neno bari Mendida daiyagha uria-da anomi namonde anda ari-bari akokogo nundubea gia doa, namonde amó Satan da ingova reta rougea bua, unda neno bari Mendida ingova ititurieta, namonde danode takembea irita rosore.
1:15-23 Pol Keriso Da Ambubuturia-Da Bee Isuri Uria Re.
15 God umó eini-eini dano ata sirorambi irieta, God da mendi Keriso umó seibe vitirie. Eini-eini dano ambova urieta siroruturie, kotú eini jo Keriso go irambi re. Namonde amó God jo dibemi gambi vitere. Tago, Keriso nu gerurota, God da daiyagha vitia-nu gigigeta rosore.
16 Anada bee mo, God umó eini-eini dano uutuvade endavade Keriso da anomi urieta siroruturie. Eini-eini dibemi gita rosora, kotú dibemi jo gambi eta rosora, kotú asisi dibe eini be einide anerade, taimu mane númanda kokotofude babarigaride dano, Keriso da anomi urieta siroruturie. Aná mo, Keriso da anomi kotú Keriso undú urieta siroruturie.
17 Aná eini-eini nanjogoda dibe kena Keriso sirorea vitirie. Kotú eini-eini dano Keriso unona bua righia vitie.
18 Ekaresia* mo, eto-bato unda tamogo re. Kotú umó ekaresiada beforo righari re. Umó eini-eini nanjogoda beforo righari ari-du rea, God na ririeta umó enembo nanjogoda dibeva amburarivareta jebugea erorurie.
19 Aghade, God unda unova urieta, unda daiyagha ea vitia-de unda anode dano unda mendi Keriso na bua dabako aghago siroruturie.
20 Kotú, enembode uutu endava eini-eini nanjogode Iesu da tatangumi siriri urota, jebuga barida emboro ifegaita rea, Iesu ifatarava amburari-du ninenguturieta, furie.
21 Seibe nímane nundubari sembago kotú ari-bari akokogo urota, God dava gitofo ea vitaravore.
22 Tago, oreki mo, unda natofo taubana kakarago dinunu tefo ea ya, unda dibeva jirari-du rea, umó nímanenu aghi jufirota, unda mendi ninenguturieta furia, enembo bee ea ambubuturie. Aghá urota, siriri arida emboro ifeguturieta, unda kokomana ea viteravore.
23 Avore, nímane God da Gaga Taubananu gaabee egeguturota, donu baita gigigutara-nu kaifa urota, ano ea, jo mana-mana egegambi adora mo, nímane ya, unda dibeva jijiregea, jebuga tumanadu irari bubugaita rosoravore. Gaga Taubana rera, endava enembo nanjogodava minono reaveta ningita rousua, anada aghi kato mo, Pol amó re.
1:24-2:5 Pol Ekaresiadu Minono Riria-da Gaga Re.
24 Oreki, amó nímane sonembaita rea, mema itatama urota, gangoro rore. Anada bee mo, Keriso unda tamodu bouvu mema itatama eta uria aghago, amó beago unda natofo, nemonde dano, sonembaita rea, mema bouvu itatama eta rore (amó unda ekaresiadu* rere.).
25 Kotú God undufa urieta, amó unda ekaresiada buro kato ea vitere. Aghá ea, nímane sonembea, unda Gaganu nímandu isuri ea goghó ata niningigadi, buro andava ututurie.
26 Atá, unda Gaga rera, umó sei enembo nanjogodu kivu eta urie. Tago, oreki unda Gaga unda natofo dava ifegetueta ningia, tanana rousue.
27 Kotú God unda nundubuturia-va, umó seibe aná Gaga kivu ea, fefera ambova unda natofodu irugota, tanana ari-du nundubea, aghá urie. Aghade, unda Gaga enembo eini jo gia tanana egegambi vitiria-da durogha jojabenu nímane gaabee ari enembodu, kotú endava enembo nanjogodedu irugota gigigari-du nundubea, aghá urie. Gagada durogha rera, aná eghá re. Namonde amó tanana rosore, Keriso namonde amó gaabee ari enemboda neno rova terua vitia-du, namonde amó ambova unda dibeva jiria, unda durogha gigigaita rosore.
28 Enembo nanjogo Keriso gaabee ari evevetu o embobo ea, God da dibe kena jiria goghó egegari-du rea, námane neno nundubarimi, númandu gaa dibeva rirota, natofo nanjogodava Keriso da Gaga Taubananu minono regegeta rosore.
29 Aghá aita rea, amó ano ititurota, Keriso da andú ututa rouvia ano jojabemi buro fakara bee urota vitere.