1 Jon
Jon Unda Ingiso Tutunova Gefiria, Aná Evere.
Iesu da ambo nimbi eini, ragaro Jon, umó emboko ea, ghaeko* 85-95 Iesu siroruturia-da ambova ená gaga gefirie. Aghajora, 2 Jon kotú 3 Jon de, fefera dabako aghade gefirie.
Jon da gefiria mo, umó fefera inono natofo ekaresia* rova vitia, númandu roboghami, “anda sasingu” rirota, kotú “neno bari kokomana” rirota, unda gaga gefirie.
Avotago, Jon da feferava, enembo dumeni gaabee ari bee doa vitirie. Númane nendufako kukuvirota, númane God gaabee ari kakatoda tamova gaa rirota, Iesu umó beago God re-tago, númane jo gaabee ambi re. Kotú, God vorefuria, enembo bee siroruturia beago, jo gaabee egegambi re.
Ená enembo rera, numanena namonde anda asisi mo eini-eini jojabe gaa rirota, tamo firí mo, eini-eini ijokoko gaa regegeta urie. Aghá-gea, tamo firída uno jo buregambi egegadora, God anadu mema jo ambi aita rouvia gaga regegeta urie. Amindu númane ari-bari akuago dumeni isaghava egegetueta, Jon tanana urie. Jon umó numonde besiga urota, númanda gaga dea desaita rea, gaga fakara, kotú anogha ená bukada rova gefirie.
Jon Ená Buka Gefiria Gagada Mendó Mane, Aná Evere:
1:1-4 Jon gaga tutuno uria re.
1:5-2:27 Unanade, bingoideda gaga riria re.
2:28-3:24 God da sasingu avouvi, kotú Satan da sasingu avouvi anada gaga re.
4:1-6 Asisi daiyaghago ro-nu tanana arida gaga re.
4:7-5:21 Keriso da natofo donu gaabee egegasua-de, kotú daiyagha iririgasua-deda gaga rea, tano uria re.
1
1:1-4 Jebuga Tumanadu Irarida Gaga Re.
1 Tutunova jebuga tumanadu irarida Gaga vitirie. Enembo avona aná Gaga ningia gaabee adua, umó jebuga tumanadu irari baita rouvie. Námane aná Gaga niningiguturere, kotú aná Gaga dibemi gigigea, ingomi ririkiguturere.
2 Ená Gaga, aná Iesu re. Umó God Afa na ninenguturieta furia, isagha urieta, námane gigiguturere. Jebuga Tumanadu Irari seibe God Afadava vitiria, aná umó re. Námane umonu gigiguturere-gea, nímandu minono reisi-rere.
3 Nímane furá namonde danode takembea, namonde anda God Afade, unda mendi Iesu Keriso de dano uumo egegadi rirota, námane donu gigiguturera, kotú niningiguturera-nu, minono rirota vitere.
4 Námane ená ingiso nímandu reisi-gefera-da bee mo, nímane furá namonde dano takembadi-gea, namonde dano gangoro egegaita rea, reisi-gefere.
1:5-10 God Umó Unanada Ruru Re.
5 Avore, námanda Iesu dava niningiguturera gaga, enanu nímandu reisi-rere. God umó unana re. Undava bingoi tefo re.
6 Aghá-gea, namonde amó God de uumo ari gaa rirota, ari-bari akokogonu egegadora, namonde gavera rirota, gaa bee jo ambo-ambo ambi aita rosore.
7 Tago, namonde amó God de dano unda unanava iririgadora mo, namonde amó uumo danode ririkurota, unda mendi Iesu da tatangumi namonde anda ari-bari akokogo seghaita rouvie.
8 Atá namonde andava ari-bari akokogo tefo gaa regegadora, aná namonde andufako kuviraita rosore. Kotú namonde andava gaa bee eini tefo re.
9 Avotago, namonde anda ari-bari akokogonu God dava karigadora, umó aito taubana fugiturota, unda bee gajituria-nu ambo-ambo urota, namonde anda ari-bari akokogo dano seghea, nundubea gia, doaita rouvie.
10 Atá namonde amó ari-bari akokogo ambi, taubana nuenembo ari gaa regegadora, namonde aghá urota, God umó gavera rari gaa regegaita rosore. Aghá egegadora mo, God da Gaga namonde anda neno rova jo irambi re.