9
9:1-29 God Enembo Unda Unova Gategeta Rouvie.
1 Atá amó Keriso da ragarova gaa bee raita riore. Unda Asisi Kakara anda neno rova vitia-mi sonembutueta, itatama urota rere: ená gaa bee re, jo gavera irambi re.
2 Amó anda natofo Israel enembodu neno mema rore. Námane abua dabako, tatangu dabako re. Amindu anda neno rova mema nanjigo aghade jo sidara ambi, tumanadu iraita rouvie.
3 Númane Keriso injigha egeguturia-du, God neno akuago ea, númane mema itatama ari-du simboro urie. Tago, amó gangorogha númanda kambesi bua, God da simboro uria-mi, anona mema itatama ea amburasueta, númane jejebugea, God da natofo egegasua-nu, nundubeta rore.
4 Nímane reisi-geroravore, God námane Israel enembo seibe gategea, unda unanade kotú duroghade námandava ututurota ririeta, unda sasingu egeguturere. Unda Agho Dari beago námandava utua, umonu gaabee urota, tumogha baĩ arida emboro irugea, námandava eini-eini utaita be gajiturota, námanena unda natofo egegaita rirota, be anogha gajituturere.
5 Mambube mane bingáde Abraham, Aisak, kotú Jekop da mambube mane aná námane re. Kotú námanda abua rera-da mambube manenda gorotova Keriso beago, enembo bee ea siroruturie. Amindu, namonde tumanadu, God eini-eini nanjogo kaifa eta rouvia-du raga regegore! Ai, gaa bee re.
6 God na Abraham du be gajituria-da bee sirorambi uria-nu, jo regegambi aita rosoravore. Anada bee mo, Israel enembo dano jo God da sasingu bee irambi re.
7 Dabako aghago, God unda sasingu utaita riria, jo Abraham da mambube mane dano nundubuturota rambi re. Amindu, God Abraham du be gajiturota, eghá ririe, “Inda sasingu kotú mambube mane oruabe utaita rirera mo, amó inda mambube mane Aisak dava siroraita rousua enembo du rirere.”
8-9 Aghá riria-da bee mo, Abraham da mambube mane dano jo God da natofo egegambi re. Abraham da etota asimbari evevetu dumenida fumbari-du jo rambi re. God be gajiturota, Aisak da mambube mane utaita riria enembomi, unda natofo egegea vitie. Anada bee mo, God Abraham du mambu bee mane oruabe utaita be gajiturota, eghá ririe, “Rifo furá bubadua, amó kaverea furá, anda anomi sonembota, niyae Sara mendi fumbaita rouvie.”
10 Ená gagada mendó eini mo, evere: Abraham da mendiyae Rebeka, sasingu vivide ungagha dayade fufiria-da afa dabako námanda mambube Aisak, umó re.
11-12 Aná sasingu mane sirorea, númanda aito fugari taubana o akuago eini jo egegota gambi-da dibeva, God unda uno kotú daiyagha enembo gategeta rouvia-nu, irugaita rea, Rebeka du eghá ririe, “Inda mendi ambo siroraita rouvia-mi, begoda barirari unona baita rouvie,” aghá rirota, God na eghá iruguturie: mendi ambomi barirari baita rouvia-da bee mo, jo sasingu da irari o aito fugari eini irambi re. God da unomi, aná mendi ambo gategea ririeta, barirari unona rururie.
13 Amindu, God da Gagava Rebeka da sasingudu eghá reirie, “Amó Iso dotuturota, Jekop nu neno rei-rurore.”
14 Avore, aná gaga niningigea, “God jo inonova ambi eta rouvie.” mania regegata!
15 Aghá rera-da beenu iruguturota, God na Moses dava eghá ririe, “Amó enembo avonu uno adora-du kauta kavevera aita rore, kotú anda uno rora enembonu sonembaita rore.” ririe.
16 Aghá-gea, God jo enemboda eta rousua o númanda uno nundubea, númane gategambi aita rouvie.
17 Aghá iruguturota, ená Gaga God na Isip enemboda kini (o Fero reta uria-du), eghá ririe, “Anona ririeta, imó kini urera-da bee mo, anda ano irugota gadi rea, kotú anda anode bingáde yata, endava natofo dano gigigari-du, anona ririeta, imó kini ureravore.” ririe.
18 Amindu, God da unomi enembo einidu neno mema ea sonembaita rouvie. Tago, uno ambi adua, God na ata-gea, enembo eini kini Fero da uria aghago gogore urota, neno jo kaverambi aita rouvie.
19-20 Avore, enembo einimi erea, andú besiga urota, eghá rasue, “Pol, inda retora-du rere: God da uno jo enembomi buregari katogo irambi re. Amindu God dodu namonde amó iruradu? Unda unonu egegeta rosora-du, namonde amó jo irurambi asue,” aghá rasua mo, jo taubana irambi re. Umó tefo enembo-gea, God dava uriga ari jo inono irambi re. Enemboda ingomi eini-eini uubu eta rouvia-mi jo erea, uubu ari katodava uriga ambi eta rouvie. Namonde aghago re. Namonde amó jo erea, God du “Dodu” o “Daiyaghagoro” rari katogo irambi re.
21 Anada isuri ari gaga eini evere: ovu uubu ari kato unda unonu eta rouvie. Fefera einiva umó enda bua, enda dabako anami ovu ungagha deraita rouvie. Ovu gari sembago eini undari bari denembea undari-du deria, ovu taubana eini, kokotofumi jijimu ari aghagonu deraita rouvie. Anada bee mo, umó barirari re.
22-23 God umó eto-bato aghago re. Unda anode neno akuagode irugaita simbuguturie-tago, namonde amó avodu neno mema eta rouvia-dava, unda durogha jojabenu irugea, namonde andava irari-du ririe. Aghá urota, umó durumuguturota, aná enembo avodu neno akuago urota, daita simbuguturia, jo tutomi data amburambi re.
24 Namonde amó unona gateguturie. “Namonde amó” rera mo, amó Iesu gaabee rousua enembo avona Jiusi enemboda rova vitia, kotú Jiusi enemboda gitofoda rova vitia-du, rere.
25 God na amindu ririeta, unda feroveta ragaro Hosea na, unda bukava eghá gefirie,
“Enembo dumeni, sei jo anda tofo ambi vitiria-du,
‘Númane anda natofo re.’ raitare.
Kotú ambova, abua eini, sei jo neno bambi eta urera-du,
‘Númane anda neno bari natofo re,’ raitare.”
26 Kotú Hosea da bukava God da Gaga eini evere:
“ ‘Nímane jo anda natofo ambi viteravore,’ rirere.
Tago, amó avodu aghá rirera, natofo ambova kambesi dabako anava jirota eghá raitare,
‘God jebuga vitia, aná amovie. Anona rere,
“Nímane anda sasingu re,” ’ raita rore.”
27 Kotú God da feroveta eini ragaro Aisaia na, námane Jiusi enembo nundubuturota, eghá gefirie. “Israel enemboda natofo, númane oruabe mangosago iririgasue-tago, daba-dabami jebuga tatambugaita rousue.”
28 Anada bee mo, endava abua-abua dano, númane aito donu fugeta rousua-da mino, God na tutomi furá utota bubugaita rousue.
29 Aisaia gaga dabako aghagonu sei kambesi einiva námane Jiusi enemboda mambube mane nundubuturota, eghá gefirie: “God Ano Tofona jo neno mema urota, namonde anda mambube mane daba-daba doasueta, jebuga irasua mo, namonde anda mambube mane seibe, eto-bato Sodom Gomora ghada enembo sirivu ea tefo egeguturia, aghagonu sirivu egegasue.”
9:30-10:21 Israel Enembo Oruabe Jo Iesu Da Gaga Ningia, Gaabee Egegambi Re.
30 Gaga retora-da bee, aná evere, námane Jiusi enemboda gitofo, God da nundubari taubana jo tava ea goghó ambi egeguturia-mi, Iesu gaabee egeguturia-du, God númandu “Taubana re.” ririe.
31 Tago, námane Jiusi enemboda dumeni Agho Dari kaifa ea goghó egegota, God númandu, “Imó taubana re” rea, ininigha egeguturie-tago, jebuga kasoviguturie.
32-33 Dodu jebuga kasoviguturi? Anada bee mo, tofo númanda aito fugarimi jebuga tava egeguturota, jo númanda gaabee arimi, jebuga tava ambi re. Aghá-gea, númane jujuguturie. God da Gaga retora-mi númandu reirie.
“Gigige, Saion* ootova amó singoi eini emborova itota, enembo iru-furu egeguturota, anami dumenida ekava data jua ya eraita rousue,
dumeni gofegea ya jua voraita rousue.
Avona ená singoi rera-nu gaabee egegadua, númane jo undú meka gigigambi aita rousue.”
Singoi itari gaa riria, aná Iesu du ririe.