Tai Dam Nả ꞌviạk ꞌpứng ꞌlam ꞌchạư 6

ꞌLưạk au chết ꞌcốn đu ꞌviạk păn dai khảu ꞌnặm ꞌcắm kin

1 ꞌKháo ꞌnặn ꞌpứng ꞌcốn ꞌtoi ꞌtáng Chảu ꞌGiê‑ꞌsu ꞌcọ ꞌmí tứm khửn#lai. Nẳng mốt sau ꞌmí ꞌcốn ꞌDiu pák ꞌquám Ca‑ꞌlịch đảy chốm hảư ꞌcốn ꞌDiu pák ꞌquám ꞌHệp‑ꞌlơ ꞌva, khảu ꞌnặm ꞌcắm kin păn dai lom ꞌmự hảư ꞌcốn ꞌcặt khó#ꞌnặn, báu#ꞌhọt ꞌpứng ꞌme mải ꞌcốn ꞌDiu pák ꞌquám Ca‑ꞌlịch. 2 Síp song ꞌlam ꞌchạư páo kháo Chảu ꞌGiê‑ꞌsu chắng khék au mết ꞌchu ꞌcốn ꞌtoi ꞌtáng ꞌTan chảu ꞌmá ꞌsúm căn ꞌlẹo cáo#ꞌva, “ꞌPi ꞌnọng#ꞌhới, ꞌsúm khỏi báu#ꞌchọ ꞌváng sia ꞌviạk bók son ꞌquám Chảu Pua ꞌPhạ#ꞌnặn, pay ꞌkhớng ꞌviạk păn dai khảu ꞌnặm ꞌcắm#kin. 3 ꞌSướng ꞌnặn hảư ꞌpi ꞌnọng ꞌlưạk au chết ꞌcốn cuông ꞌsúm#chảu, ꞌchu ꞌcốn hên#ꞌva ꞌhụ lắc#ꞌpó, chaư sau ꞌcọ ꞌmí Chảu Khuôn Saư dú#têm, ꞌsúm khỏi chắng ꞌchí dao ꞌviạk ꞌnị#hảư. 4 ꞌLẹo ꞌsúm khỏi lỏ#ꞌchí au chaư sáư nả ꞌviạk đé so ꞌhọt Chảu Pua ꞌPhạ kéng bók ꞌquám ꞌTan#chảu.”

5 ꞌPứng ꞌcốn ꞌtoi ꞌtáng Chảu ꞌGiê‑ꞌsu phaư ꞌcọ sôm chaư ꞌtoi ꞌquám síp song ꞌlam#ꞌchạư, sau chắng ꞌlưạk au chết ꞌcốn ꞌmí ꞌchư ꞌsướng#ꞌnị:

ꞌTan ꞌSa‑tê‑ꞌphôn phủ ꞌmí chaư ꞌchưa#nẻn, chaư ꞌtan ꞌcọ ꞌmí Chảu Khuôn Saư dú#têm

ꞌTan ꞌPhi‑ꞌlịp

ꞌTan Pô‑ꞌkhô‑ꞌlô

ꞌTan ꞌNi‑ca‑ꞌnô

ꞌTan Ti‑ꞌmôn

ꞌTan Pa‑ꞌmê‑ꞌna

ꞌTan ꞌNi‑cô‑ꞌla ꞌcốn táng ꞌphắn dú ꞌmướng Ăn‑ti‑ô khảu ꞌhuôm ꞌtáng ꞌcốn#ꞌDiu.

6 ꞌSúm ꞌhốm chắng au phen chết ꞌcốn ꞌnặn ꞌmá ók nả ꞌpứng ꞌlam ꞌchạư páo kháo Chảu ꞌGiê‑ꞌsu. ꞌPứng ꞌlam ꞌchạư chắng cáo ꞌquám đé so ꞌhọt Chảu Pua ꞌPhạ ꞌlẹo pông ꞌmứ sáư#sau.

7 ꞌSướng ꞌnặn ꞌquám Chảu Pua ꞌPhạ ꞌcọ ꞌnhương ꞌmự mả ꞌpe#ók, ꞌcốn ꞌmướng ꞌGiê‑ꞌlu‑ꞌsa‑ꞌlêm đảy khảu ꞌmá ꞌtoi ꞌtáng Chảu ꞌGiê‑ꞌsu ꞌcọ tứm ꞌtén khửn#lai, ꞌpứng mo lai ꞌcốn ꞌcọ đảy ꞌphắng ꞌquám ꞌTan#chảu.

ꞌTan ꞌSa‑tê‑ꞌphôn ꞌchọ pắt

8 Công ꞌphún Chảu Pua ꞌPhạ phớng ꞌdứa hảư ꞌtan ꞌSa‑tê‑ꞌphôn ꞌmí phép ꞌquiến ꞌpó ꞌdệt mai ꞌnéo lák lai hảư ꞌcốn ꞌtếng lai#hên. 9 ꞌMí ꞌsán ꞌcốn ꞌmá té ꞌhướn ꞌsúm ꞌcốn ꞌDiu khék#ꞌva ꞌhướn ꞌsúm ꞌcốn ꞌtứ#ꞌtang, sau đảy ꞌcại thiêng cắp ꞌtan ꞌSa‑tê‑ꞌphôn. Cuông mốt sau ꞌmí ꞌcốn ꞌmá té ꞌmướng ꞌSi‑ꞌlê‑ꞌnê, ꞌmướng ꞌA‑ꞌlệc‑ꞌsăn‑đia, tỉnh Ki‑ꞌli‑kia kéng tỉnh ꞌA‑ꞌsia. 10 Hák#ꞌva sau ꞌcọ báu#ꞌmí ꞌluống đaư kẻ ꞌquám ꞌhụ lắc Chảu Khuôn Saư uôn ꞌpá ꞌtan ꞌSa‑tê‑ꞌphôn đảy. 11 Sau chắng ꞌlặc ꞌchuốn chaư kỉ ꞌcốn bắc ꞌquám sáư ꞌtan#ꞌva, đảy ꞌnghín ꞌtan pák đu ꞌngai pú ꞌMô‑ꞌsê ꞌmưa ꞌláng ꞌtếng#cá Chảu Pua#ꞌPhạ. 12 ꞌSướng ꞌnặn sau chắng ꞌnhuốn dên#ꞌpay, ꞌpứng thảu ké bản ꞌmướng kéng ꞌsáy bók ꞌluột ꞌláng#ꞌnặn, đủm ꞌmá pắt ꞌtan ꞌSa‑tê‑ꞌphôn ꞌlẹo ꞌnẹp pay ha mốt sét ꞌván sung#sút. 13 Sau téng au ꞌcốn ꞌmá bắc ꞌquám sáư ꞌtan ꞌSa‑tê‑ꞌphôn ꞌva, “Phủ ꞌnị ꞌlớng ꞌvạu ꞌnéo báu#nể dăm ꞌhướn vảy ꞌsớ ꞌtếng#cá ꞌluột ꞌláng Chảu Pua ꞌPhạ bók ꞌvạy#ꞌnặn. 14 ꞌSúm khỏi đảy ꞌnghín ꞌmắn ꞌvạu#ꞌva, ꞌGiê‑ꞌsu ꞌtáy ꞌmướng ꞌNa‑ꞌsa‑ꞌlệt ꞌnặn ꞌchí pé ꞌhướn vảy ꞌsớ hảư đắp siêu sia ꞌlẹo ꞌchí piến ꞌhịt ꞌkhóng pú ꞌMô‑ꞌsê đảy ꞌchiến ꞌvạy hảư ꞌháu ꞌnặn sia#máư.”

15 Mốt ꞌcốn sét ꞌván phaư ꞌcọ ꞌlé bớng ꞌtan ꞌSa‑tê‑ꞌphôn, hên nả ꞌtan ꞌhung pék ꞌsướng nả tiên ꞌchạư Chảu Pua#ꞌPhạ.