Ŋwaʼaŋlɨ
Fàʼa
Kāoŋ nu pa thɔ nnu
Ŋwaʼaŋlɨ fàʼa ghaŋ Ntaoŋ Jishɔ yei pɔ pi mbra ŋwaʼaŋlɨ ŋa Luka ni nāʼaŋ nɔ ghə̄ɨ nu shhɨ ni nnu ŋa a ni njɛ̄ fɨ̄ʼɨ nu moŋ fǔoŋ ŋwaʼaŋlɨ yi. Fǔoŋ ŋwaʼaŋlɨ yi ghɔ ni mbɔ Pwa Pishaʼakhɔ ŋkwaŋ Haʼaŋ Luka Fɨ̄ʼɨ nɛ. Mmɛ thɔ nnu ŋa a nāʼaŋ ŋwaʼaŋlɨ yei nɔ nɛ pɔ nɔ mfɨ̄ʼɨ nu ŋkwaŋ haʼaŋ ghaŋ ntaoŋ Jishɔ ni ŋgə̄ɨ shhɨ nchīi ŋkɨ̀nɨ pwa pishaʼakhɔ nɔ ligi Jishɔ moŋ Judia pugu pa Shamaria pugu pa ŋguoŋ lɨʼɨ ŋkuoŋ shhɛ nɛ. Luka chwīe pia ji ŋa pugu ni mfāʼa fàʼa yei ntɔgɔ pi moŋ ghrɨ́ Jijwɛ Minnwi. A fɨ̄ʼɨ ŋa Pita pugu Pɔɔ ni ntaoŋ mbɔ pa thishɨ chɔshi ndɨɨ ghɔ. Chɔshi ndɨɨ ghɔ ni ŋkuʼɔ nu ŋgaʼa njiʼi nthɛ pi nɔ haʼaŋ pichəɨ ni ntɔgɔ nu moŋ pa mooŋ nu llɔ mbhɔ pa thishɨ Juu pugu pa thishɨ ŋgwa Roma nɛ.
Minthɛ pi ghrà ŋwaʼaŋlɨ yei moŋ trɛi mɛmmɛ ghrà. Fǔoŋ ghrà pɔ pi ŋkwaŋ haʼaŋ nnu piŋ nu Jishɔ ni njɛ̄ Jɛrushalɛiŋ ndɨɨ ŋa Jishɔ ni ŋkwo kuʼɔ po nɛ. Mbra ghrà pɔ ŋkwaŋ haʼaŋ nnu piŋ Jishɔ nyīeŋ nii moŋ pichəɨ lɨʼɨ moŋ Palishitaiŋ nɛ. Ndugwi yi pɔ ŋkwaŋ haʼaŋ nnu piŋ Jishɔ nyīeŋ ti nchəɨŋ moŋ krao ŋgei pa laʼataoŋ Mediterenia ti ŋgə̄ɨ nchəɨŋ moŋ laʼataoŋ Roma.
Mmɛ nnu nɔ yəɨ nu moŋ ŋwaʼaŋlɨ yei pɔ pi fàʼa Jijwɛ Minnwi. Jijwɛ Minnwi ni nshwiʼi ni ghrɨ́ mbɨŋ pa ghaŋ piŋ llɛ́ Pentekɔ, ndɔ ŋgə̄ɨ shhɨ nthɔ nōoŋ ndaoŋ ni pugu ndɔ māʼaŋ ghrɨ́ yugu pugu pa thishɨ pi. Ŋkɨ̀nɨ ghaŋ piŋ llɛ́ shhɨ ghɔ pɔ moŋ pa chīi nu ŋkɨ̀nɨ Minnwi ŋa pugu ni nchīi nu moŋ ŋwaʼaŋlɨ yei nɛ. Ŋkɨ̀nɨ pighɔ ni nōoŋ ŋa ghrɨ́ pɔ moŋ ghɔ ntɔgɔ pi moŋ ŋkwaŋ haʼaŋ a ni ŋkāoŋ chɔmbhi ghaŋ piŋ pighɔ nɛ.
1
Minnwi kāʼa nɔ taoŋ nnu Jijwɛ yi
1 Moŋ fǔoŋ ŋwaʼaŋlɨ, ma Tiofilu, ŋki nāʼaŋ ŋguoŋ pa nnu ŋa Jishɔ ni nchwīe ndɔ ntɨgɨ nɛ,
2 ti ŋgə̄ɨ nchəɨŋ ndɨɨ ŋa Minnwi ki lɔ̄gɔ vi ŋkuʼɔ nɔ po nɛ. Ŋkaoŋ pi maa ŋkuʼɔ ni ju po, moŋ njɨ Jijwɛ Minnwi, a fɛ gɨ́ ni pa ghaŋ ntaoŋ pi ŋa a ni nchuʼɔ nɛ.
3 A ni ŋga ŋkwo yəɨ ŋgəʼɨ ti ŋkhu ŋkuʼɔ moŋ gu, nōoŋ noŋ yi ni pugu nɔ khwɛ wuŋ llɛmbhi ntou ndɨɨ moŋ pa shɛndaoŋ ŋa a ni nōoŋ ki khuthɔ lɔ mbɔ ŋa a yi maoŋ. Pugu ni njəɨ vi, a chrà ni pugu nthɛ Shaʼafuoŋ Minnwi.
4 Pugu pugu ni ŋga mbɔ taʼa lɨʼɨ, a fɛ gɨ́ ni pugu ŋa, “Kiʼi pəɨ lɔllɔ Jerushalɛiŋ, pəɨ kɨna fɔ njwɛrɛ fɛ́ yɛ ŋa ŋki shwei vəɨ nɔ nɛ, fɛ́ ŋa Tǎa a ni ŋkāʼa nɛ.
5 Kwe ŋkhǐ Jouŋ ni mbɔ pi yi moŋ ŋkhǐ, ndɔ nɔ kuo ndɨɨ, pəɨ shi mfāʼo kwe ŋkhǐ moŋ Jijwɛ Minnwi.”
Minnwi lɔ̄gɔ Jishɔ ŋkuʼɔ nɔ po
6 Pa ghaŋ ntaoŋ Jishɔ ni ŋga mbɔ taʼa lɨʼɨ pugu pa Jishɔ, pugu pie vi ŋa, “Taathɔ, ɔ shi nduʼu shaʼafuoŋ ndwɛ mbhɔ Ishrae?”
7 Jishɔ khwɛ̄ ni pugu ŋa, “Pəɨ lɔ mfāʼo nɔ ji nu ndɨɨ ki llɛ́ ŋa Tǎa nūʼɔŋ pi ni ji njɨ nɛ.
8 Ndɔ pəɨ shi mfāʼo ghrɨ́ ndɨɨ ŋa Jijwɛ Minnwi shwiʼi mbɨŋ pəɨ nɛ. Pəɨ shi mbɔ pa miŋkwentie paŋ llɔ Jerushalɛiŋ, pugu pa moŋ Judia ni Shamaria, ti ŋgə̄ɨ nchəɨŋ moŋ ndugwi mbhi.”
9 A ni ŋga mīʼɛŋ chhu nu nnu pei, Minnwi lɔ̄gɔ vi ŋkuʼɔ ni ju po, ti a nuʼuŋ mbhɛ ligi pugu moŋ lúluŋ.
10 Nɔ haʼaŋ pugu ni ŋguʼɔ mbɛʼi po nɔ haʼaŋ a ni ŋgə̄ɨ nu nɛ, ŋga njəɨ nu, paa ŋgwa thi yəɨ pugu moŋ ndhwí fhu,
11 nchhu ni pugu ŋa, “Ŋgwa Galili, pəɨ thi hɛiŋ mbɛʼi pi khɔ po? Jishɔ vei ŋa pi lɔ̄gɔ vi ligi pəɨ ŋkuʼɔ nɔ po nɛ, shi ndɛ mbɨnɨ wuʼɔ nɔ haʼaŋ pəɨ nuʼuŋ njəɨ vi a ghə̄ɨ po nɛ!”
Njɨnda Judashi
12 Pa ghaŋ ntaoŋ Jishɔ pɨ̄nɨ Jerushalɛiŋ lɔ ŋkuoŋ mbra ŋa pi mɛ̄iŋ ni Olive nɛ, mbɔ nɔ taʼa ŋkaŋ kwò llɔ Jerushalɛiŋ.
13 Pugu ni ŋga nii fɔ, ŋkuʼɔ moŋ njiɛŋ nda tɔthɨ lɨʼɨ haʼaŋ pugu ni ndaʼa nu nɛ. Pugu ni mbɔ:
Pita
ni Jouŋ
ni Jɛiŋ
ni Andru,
Fili
pugu Toma,
Batolomiu
pugu Matio,
Jɛiŋ muuŋ Afioshi
ni Shemu, mbɔ kwìni laʼa,
ni Judashi, mbɔ muuŋ Jɛiŋ.
14 Ŋguoŋ pa ghaŋ ntaoŋ Jishɔ pei ni mbɔ ni taʼaŋggi nthɔ nduoŋ Minnwi pugu pa pichəɨ piŋgɛ ŋa pugu ni ŋgɛ̄rɛ Jishɔ nɛ, ni Meri mǔuŋ Jishɔ pugu pa lǐŋ pi pi pimbia.
15 Moŋ llɛ́ pighɔ Pita lɔllɔ ntithi shɨna taʼa ŋkɨɨ ni pa wuŋ ghaŋ piŋ, nchhu ŋa,
16 “Lǐŋ paŋ! A ni mbie ŋa nchò Ŋwaʼaŋlɨ Minnwi chəɨŋ ŋkwaŋ haʼaŋ Jijwɛ Minnwi ni ŋkāoŋ Devi a nāʼaŋ nthɛ Judashi ŋa a ni ŋgə̄ɨ nōoŋ Jishɔ ni ŋgwa pɛ ŋa pugu ni nthɔ nu ŋgwɛ̄iŋ vi nɛ.
17 Judashi ni mbɔ taʼa ŋoŋ via, nthɛ ŋa pi ni nchuʼɔ vi ŋkaa yu ŋa a fāʼa pia pugu.”
18 A ni njuoŋ shhɛ ni pe ŋa pi ni mfɛ ghɔ nthɛ mbha nnu pɨphɨ yi nɛ, ndhɔ tɔthɨ ŋgū mfūŋ ni thɔ yi, nshɨna titri, maoŋ puŋ pi taoŋ.
19 Ŋguoŋ ŋgwa Jerushalɛiŋ ni njaʼo nnu ghɔ, nɛnnɛ mɛ̄iŋ shhɛ ghɔ moŋ chrà laʼa yugu ŋa Hakɛldama njiŋ yi pɔ ŋa, “Shhɛ Chhǐ.”
20 Pita chhu ŋa, “Nthɛ ŋa pi nāʼaŋ moŋ Ŋwaʼaŋlɨ Ŋkhǐ ŋa, ‘Nda yi kuʼɔ fùŋ. Kiʼi ŋoŋ ma ndaʼa fɔ.’ Pi pɨnɨ nāʼaŋ ŋa, ‘Ŋoŋ nduoŋ lɔ̄gɔ lɨʼɨ yi.’
21 Nnɛ, a pie ŋa pia chuʼɔ taʼa ŋoŋ mbīgi mbɨŋ pia, mbɔ ŋoŋ ŋa a ni mbɔ pia pugu jɛ̄ ndɨɨ ŋa pia pa Jishɔ Taathɔ ni nyīeŋ nu kaʼa nɛ,
22 mbɔ ŋoŋ ŋa pia pugu ni mbɔ jɛ̄ ndɨɨ ŋa Jouŋ ni nthɔ mfɛ ŋkhǐ ni ŋgwa nɛ, ti ŋgə̄ɨ nchəɨŋ ndɨɨ ŋa Minnwi ni mfuʼu Jishɔ ghɔ shɨna pia ŋkuʼɔ nɔ po nɛ. Pia pa ŋoŋ vei pɔ pa ghaŋ kwentie ŋa Jishɔ ni mbɨnɨ ŋkuʼɔ moŋ gu.”
23 Nnɛ pugu tɛrɛ Joshɛ, mbɔ Bashaba ŋa pi ni mɛ̄iŋ vi ni Jushitu nɛ, mbɨnɨ ntɛrɛ Matia.
24 Nduoŋ Minnwi nchhu ŋa, “Taathɔ, ɔ ji njùʼɔ shesheŋoŋ. Nōoŋ yɛ ŋoŋ ŋa ɔ chuʼɔ shɨna paa ŋgwa pei nɛ,
25 ŋa a lɔ̄gɔ fàʼa Judashi nɔ ŋgaŋ ntaoŋ Jishɔ ŋa a ni ŋkhu mieŋ ŋgə̄ɨ lɨʼɨ ŋa a ni mbie ŋa a ghə̄ɨ nɛ.”
26 Pugu māʼaŋ yaoŋ nɔ ji nu ŋoŋ ŋa Minnwi chuʼɔ nɛ, a gū mbɨŋ Matia, nnɛ pugu pigi vi mbɨŋ pa taʼanchrɔ *ghaŋ ntaoŋ Jishɔ.