Ŋwaʼaŋlɨ Kɨǹ a Fhi 1 Koriŋ 1

Fǔoŋ ŋwaʼaŋlɨ chɔshi

Koriŋ

Kāoŋ nu pa thɔ nnu

Ŋwaʼaŋlɨ yei ni nāʼaŋ Pɔɔ mfɛ ni chɔshi laʼataoŋ Koriŋ. A ni nāʼaŋ ŋwaʼaŋlɨ yei ndɨɨ yɛ ŋa pa ghaŋ piŋ moŋ chɔshi Koriŋ ni ŋkwo nāʼaŋ chəɨ ŋwaʼaŋlɨ mfɛ ghɔ nchhɔ mfɨ̄ʼɨ pichəɨ pa nnu ghɔ nɛ. Pa ŋgwa laʼataoŋ Koriŋ ni nthi ŋkuoŋ pichəɨ pa nnu ŋa, pa maoŋ ŋa minthɛ pi kaoŋkaoŋ nɛ, pɔ pi maoŋ pɨphɨ. Nthɛ yie ghɔ, pugu tāʼa nu mfuʼu jijwɛ yugu moŋ noŋ pugu. Pugu ni ndhɔ ni ŋkwaŋ yaoŋ yɛʼi təɨtəɨ yei mbhɔ pa ŋgwa Gri. Nthɛ yie ghɔ pugu ni nthɔ ndīi pa yaoŋ nɔ láŋ, pugu pa kuʼɔ nu Jishɔ moŋ gu, pugu pa ghə̄ɨ nu lɨʼɨ pa jɨ, pi yichəɨ ŋkwaŋ. Nthɛ yie ghɔ, Pɔɔ nāʼaŋ ŋwaʼaŋlɨ yei kiʼɛ ŋkāoŋ pa nnu pei moŋ ghɔ pugu pa ŋkwaŋ nɔ haʼaŋ nnu chīri nnu ŋgaʼo Minnwi pie ŋa a pɔ nɛ.

Pɔɔ nāʼaŋ moŋ ŋwaʼaŋlɨ yei ŋa ŋgwa pɛ ŋa pugu piŋ Jishɔ Krishto mfɛ noŋ yugu ni fāʼa nu fàʼa yi nɛ shi ndɛ ŋkuʼɔ moŋ gu mfāʼo kɨ̀nɛiŋ. Nnɛ, ŋgɛ̄ pa ghaŋ chɔshi Koriŋ ŋa pugu fɛ noŋ yugu ki lɔ ŋgīʼɛ ni fàʼa Jishɔ Taathɔ, nthɛ ŋa a yie mbɔ shɛndaoŋ ŋa pugu shi mfāʼo kɨ̀nɛiŋ nɛ. Pugu shi mfāʼo ŋkiɛŋ mmɛ kɨ̀nɛiŋ ndɨɨ ŋgwa lɛ ŋkuʼɔ moŋ gu nɛ.

Māʼaŋ nu chrà

1 Ŋwaʼaŋlɨ yei llɔ pi mbhɔ mu Pɔɔ. Minnwi chuʼɔ a ntɔgɔ pi ŋkuoŋ khwǎ njùʼɔ yi nɔ pɔ nu ŋgaŋ ntaoŋ Krishto Jishɔ. A llɔ mbhɔ pigi Shoshtene ndǐŋ via, 2 ŋgə̄ɨ nu ni chɔshi Minnwi ŋa a pɔ laʼataoŋ Koriŋ nɛ, ni pa ŋgwa pɛ ŋa Minnwi gɛ̄ vugu ŋa pugu pɔ ŋgwa taoŋtaoŋ ntɔgɔ pi moŋ pɔ nu taʼa yi pugu pa Krishto Jishɔ, pugu pa ŋguoŋ ŋgwa pɛ ŋa pugu pɔ moŋ ŋguoŋ lɨʼɨ ŋa pugu ghà ŋgaʼo Taathɔ mbɔ Jishɔ Krishto ŋa a Taathɔ yugu mbɨnɨ mbɔ yia nɛ.

3 Pwapuŋ pugu pa ghɨghrɨ llɔ mbhɔ Minnwi mbɔ Tǎa via pugu Jishɔ Krishto, mbɔ Taathɔ, pɔ ni pəɨ.

Pɔɔ tōo Minnwi nthɛ ŋgwa Koriŋ

4 Ǹtōo Minnwi a ŋguoŋ ndɨɨ nthɛ vəɨ, nthɛ fɨʼɨ pwapuŋ ŋa a nōoŋ ni pəɨ moŋ Krishto Jishɔ nɛ. 5 Moŋ pɔ nu taʼa yi pəɨ pa Krishto Jishɔ, pəɨ gū ghaŋ fàʼo moŋ ŋguoŋ nnu ghao, moŋ ŋkwaŋ haʼaŋ pəɨ ghà nchrā nɛ pugu pa ji nu nnu məɨ. 6 Yei ŋkwaŋ nɔ haʼaŋ Minnwi ni nōoŋ ni pəɨ ŋa chrà ŋa pigi ni nchrā ni pəɨ nthɛ Krishto nɛ, nnu shini, 7 nnɛ ŋa kiʼi pəɨ pou sheshe fɛ́ moŋ Jijwɛ nɔ haʼaŋ pəɨ thɔ njwɛrɛ nu ŋa pi nōoŋ Taathɔ via mbɔ Jishɔ Krishto nɛ. 8 Jishɔ Krishto ju ŋa a shi nūʼɔŋ vəɨ, pəɨ thi a tɨnɨ ti ŋgə̄ɨ nchəɨŋ nɔ ndugwi yi, ki lɔ mfāʼo krɛ̄i nu moŋ llɛ́ ŋa Taathɔ via mbɔ Jishɔ Krishto shi nthɔ nɛ. 9 Minnwi pɔ pi kàʼa ki fɨ̄ɨ, mbɔ ju ŋa a ni mɛ̄iŋ vəɨ ŋa pəɨ pɔ kaʼa pəɨ pa muuŋ vi, Jishɔ Krishto mbɔ, Taathɔ via nɛ.

Pa minduoŋnduoŋ moŋ chɔshi

10 Ǹdɨ̄gəɨ vəɨ, ma pa lǐŋ paŋ, pi ni ligi Taathɔ via mbɔ Jishɔ Krishto, ŋa ŋguoŋ vəɨ pɔ ni taʼaŋggi, pugu pa ŋa kiʼi minduoŋnduoŋ nuʼuŋ mbɔ shɨna pəɨ, ŋa p̂əɨ pɔ taʼa yi moŋ lɨna pugu pa mbīʼi nu nnu məɨ. 11 Ǹchhu nɛiŋ, ma pa lǐŋ paŋ, nthɛ ŋa ŋgwa ŋa pugu llɔ nda Kloe kwo chhu vəɨ ŋa fɛ̀ʼi pɔ shɨna pəɨ. 12 Nnu ŋa ǹchhu nu nɛ pɔ pi ŋa shesheŋoŋ vəɨ thɔ nchhu pi ŋa, “Ǹshi njōu nyaŋ pi njiŋ Pɔɔ,” ki ŋa, “Ǹjōu pi njiŋ Apolo,” ki ŋa, “Ǹjōu pi njiŋ Kefa*,” ki ŋa, “Ǹjōu pi njiŋ Krishto.”

13 Krishto pɔ pi moŋ pa chuʼuchuʼu? Pi ni ŋkwīŋ Pɔɔ ŋkuoŋ wáʼa nthɛ vəɨ? Ki ɔ ni ŋkwe ŋkhǐ nɔ ligi Pɔɔ? 14 Ǹtōo Minnwi nthɛ ŋa ǹshini ndɔ ŋkwe mmu ŋkwe vəɨ ni ŋkhǐ. Ŋ̀ki wuʼɔ ŋkwe pi Krishpu pugu Gayu ni ŋkhǐ. 15 Nnɛ yichəɨ ŋoŋ nthɛ paʼa a lɔ njiʼi nchhu ŋa a ni ŋkwe ŋkhǐ pi ni ligi a. 16 (Mi ni mbɨnɨ ŋkwe mbaanda Shitefana ni ŋkhǐ ŋkaa pugu. Ntɔgɔ yie, ǹdɔ nuʼuŋ nji ŋa mi ni mfɛ ŋkhǐ ni yichəɨ ŋoŋ nduoŋ.) 17 Nthɛ ŋa Krishto shini ndɔ ntaoŋ a pi ŋa ǹthɔ ŋkwe ŋgwa ni ŋkhǐ, a ni ntaoŋ pi ŋa ǹthɔ nchīi chrà pwa pishaʼakhɔ, ki lɔ nchīi pi ni chrà shiethɔ ŋgwamishua, nnɛ ŋa kiʼi gu Krishto ŋkuoŋ wáʼa phɛ ghrɨ́ ŋa a pɔ moŋ ghɔ nɛ.

Krishto pɔ pi ghrɨ́ pugu pa shiethɔ Minnwi

18 Nthɛ ŋa ŋkɨ̀nɨ nthɛ gu Krishto ŋkuoŋ wáʼa pɔ pi nnu na ni ŋgwa pɛ ŋa pugu phɛ nu gha nɛ, ndɔ ni pia ŋa pia lūgu nu nɛ, a ghrɨ́ Minnwi. 19 Nthɛ ŋa Ŋwaʼaŋlɨ Minnwi chhu ŋa,

“Ǹshi mbɨrɨ shiethɔ ghaŋ shiethɔ,

ndāa lɨna ghaŋ ji nnu.”

20 Ghaŋ shiethɔ pighɔ hɨŋ? Ghaŋ ji ŋwaʼaŋlɨ pighɔ pɔ pi hɨŋ? Ki pa ghaŋ lōu pa nnu ni shiethɔ mbhi hɛiŋ pɔ pi hɨŋ? Minnwi lɔ ŋkwo chwīe shiethɔ ŋkuoŋ mbhi yei taoŋ nnu na? 21 Ŋa moŋ shiethɔ Minnwi, ŋgwa ŋkuoŋ mbhi shini ndɔ nji Minnwi ntɔgɔ pi ŋkuoŋ shiethɔ, Minnwi ni mfāʼo pwatua ntɔgɔ pi ŋkuoŋ chrà nnu na ŋa pigi chīi nu nɛ, nɔ kwe nu ŋgwa pɛ ŋa pugu piŋ nɛ. 22 Nthɛ ŋa ŋgwa Juu tāʼa pi lì, pa ŋgwa Gri tāʼa yugu pi shiethɔ. 23 Ndɔ pigi ghà nchīi pi Krishto ŋa pi kwīŋ vi ŋkuoŋ wáʼa, mbɔ kɨʼɨŋgɨnɨ ni ŋgwa Juu mbɨnɨ mbɔ nnu na ni ŋgwa taoŋ nduoŋ.

24 Ndɔ ni pa ŋgwa haʼaŋ pi gɛ̄ vugu nɛ, pa Juu pugu pa ŋgwa taoŋ nduoŋ, Krishto pɔ pi njɨ Minnwi pugu pa shiethɔ Minnwi. 25 Nthɛ ŋa yaoŋ Minnwi ŋa a pɔ pi nɔ nnu na ni ŋgwamishua nɛ, fāʼo shiethɔ moŋ ghɔ ŋa a chaa yi ŋgwamishua nɛ, ndɔ yaoŋ Minnwi ŋa a pɔ nɔ kɨ̌ʼɨ ni ŋgwamishua nɛ, tɨnɨ nchaa njɨ ŋgwamishua.

26 Pa lǐŋ paŋ, pəɨ pīʼi yaoŋ ŋa pəɨ ni mbɔ yie ghɔ ndɨɨ ŋa Minnwi ni ŋgɛ̄ vəɨ nɛ. Ŋgwamishua shini ndɔ ndīi ntou yəɨ nɔ pa ghaŋ shiethɔ, paʼa ntou yəɨ lɔ mbɔ pa ghaŋ njɨ, paʼa ntou yəɨ lɔ mbɔ pa ŋgwa liɛŋliɛŋ. 27 Ndɔ Minnwi chuʼɔ pa ŋgwa ŋa ŋkuoŋ mbhi pīʼi ŋa pugu ŋgwa gha nɛ, nɔ shhū nu pa ghaŋ shiethɔ nɔ ghɔ, Minnwi chuʼɔ ŋgwa ŋa pugu pa ŋkɨ̌ʼɨ moŋ mbhi nɛ nɔ shhū nu pa ghaŋ njɨ nɔ ghɔ. 28 Minnwi chuʼɔ pa yaoŋ ŋa nthɨŋkwo yugu lɔ ŋkə̄rə, pi lɔ nchɨ̄ʼə vugu moŋ mbhi nɛ, pa yaoŋ ghagha nɔ shwiʼi, nu pa yaoŋ ŋa ŋkuoŋ mbhi pīʼi ŋa a yi liɛŋ nɛ, shhɛ. 29 Minnwi chwīe nnɛ ŋa kiʼi yichəɨ ŋoŋ kwēi njùʼɔ yi shhɨ yu.

30 Ndɔ a chwīe Minnwi ŋa pəɨ pɔ taʼa yi pəɨ pa Krishto Jishɔ. Minnwi chwīe ŋa Krishto pɔ yia shiethɔ, pugu pa ndɨndɨ yia, mbɔ ŋgaŋ chwīe pia pɔ yi taoŋtaoŋ ndɔ mbɔ njaʼandiʼi yia. 31 Nɛnnɛ, nɔ haʼaŋ Ŋwaʼaŋlɨ Minnwi chhu nɛ, “Ŝhesheŋoŋ ŋa a kwēi njùʼɔ yi nɛ, kwēi njùʼɔ yi nthɛ pi Taathɔ.”