2
Ŋgùʼɔ ŋa a yi maoŋ pugu pa ŋgwa taoŋtaoŋ
1 Nnɛ, p̂əɨ mīʼaŋ ŋguoŋ mbha nnu pɨphɨ ghao, pugu pa lɛʼiŋgiɛŋ, pugu pa mbha nnu mifɨɨ, ni kighɨʼə, pugu pa chhu nu phɨ thɔ ŋgwa.
2 Nɔ puoŋ prɔ ŋa pi wuʼɔ ŋka phi vugu phi nɛ, p̂əɨ shigi nuaŋ nu ŋkiɛŋ pɨnɨ shiʼi mbɔ yi jijwɛ nnɛ ŋa pəɨ shi ntɔgɔ ŋkuoŋ ghɔ ŋkuʼɔ moŋ lūgu nu.
3 Ŋa Ŋwaʼaŋlɨ Minnwi chhu ŋa, “Pəɨ ŋkaa pəɨ ni njwɛʼi njəɨ ŋa Taathɔ ya mbwa.”
4 Nɔ haʼaŋ pəɨ thɔ nu njəɨ vi nɔ ŋgùʼɔ ŋa a yi maoŋ, ŋgwamishua lāa, ndɔ ŋga mbɔ ligi Minnwi nɛ, mbɔ pi ŋgùʼɔ ŋa pi chuʼɔ ndɔ mbɔ ŋkiɛŋ yi.
5 Pəɨ nduthɔ yəɨ pɔ nɔ pa ŋgùʼɔ maoŋ ŋa pi thɔ ŋkrao nu ŋkuʼɔ nu nɔ ghɔ nɔ nda moŋ Jijwɛ nɔ pɔ nu ghaŋ fɛʼiŋgiɛŋ Minnwi yi taoŋtaoŋ, nɔ fɛ nu maoŋ fɛʼiŋgiɛŋ ŋa Minnwi piŋ nɛ, mbɔ yi moŋ jijwɛ ntɔgɔ pi mbhɔ Jishɔ Krishto.
6 Nthɛ ŋa a pɔ moŋ Ŋwaʼaŋlɨ Minnwi ŋa,
“Līi njəɨ, ǹūʼɔŋ ŋgùʼɔ chəɨ Shayaoŋ,
mbɔ ŋgùʼɔ nchini nda ŋa nchuʼɔ nūʼɔŋ, mbɔ ŋgùʼɔ pwapwa.
Shesheŋoŋ ŋa a piŋ vi nɛ
mbaʼa a lɛ ma mfāʼo lrithɔ.”
7 Nnɛ ndighaʼo ghɔ pɔ pi ni pəɨ ŋa pəɨ piŋ nɛ, ndɔ ni ŋgwa pɛ ŋa pugu lɔ njiʼi mbiŋ nɛ,
“Ŋgùʼɔ yɛ ŋa
ghaŋ krao nda ni ndāa nɛ pɨnɨ mbɔ ju ndugwi ŋgùʼɔ shiʼi,”
8 mbɨnɨ mbɔ,
“Ŋgùʼɔ kɨʼɨŋgɨnɨ,
mbɨnɨ mbɔ ŋgùʼɔ māʼaŋ ŋgwa shhɛ.”
Pugu kɔ̄rɔ nthɛ ŋa pugu chɨ̄ʼə chrà Minnwi, nɔ haʼaŋ pi ni nūʼɔŋ vugu ŋa pugu chwīe nɛ.
9 Ndɔ pəɨ pɔ pi ŋgwrɛiŋgwa ŋa pi chuʼɔ, mbɔ ghaŋ fɛʼiŋgiɛŋ Minnwi ndɔ mbɔ pa pifuoŋ, ŋgwa taoŋtaoŋ, ŋgwa ŋa pugu pɔ pi ji nɛ, ŋa pəɨ chīi ndìpwa Ju ŋa a gɛ̄ vəɨ mfuʼu vəɨ moŋ njiŋ niʼiŋ vəɨ moŋ líʼɛ pwapwa yi.
10 Yichəɨ ndɨɨ ni mbɔ paʼa pəɨ lɔ njiʼi mbɔ ŋgwa Minnwi, ndɔ ndwɛ pəɨ ŋgwa pi, yichəɨ ndɨɨ ni mbɔ paʼa pəɨ lɔ nji kwoshɨnɨ Minnwi ndɔ ndwɛ pəɨ fāʼo kwoshɨnɨ yi.
11 Pa ŋkiɛŋ lǐŋ paŋ, ǹdɨ̄gəɨ vəɨ, pəɨ nɔ pa ghɨ̀nɨ ndɔ mbɔ nɔ ŋgwa ŋa pi yōu vugu nɛ, p̂əɨ ləʼɨ pa nnu khwā nu pa nnu tɔtrɔ ŋa pugu thɔ māʼaŋ nchhɔ̀ pugu pa nchə̌ɨ yəɨ nɛ.
12 Mbha nnu pəɨ shɨna pa ŋgwa pɛ ŋa pugu lɔ njiʼi mbiŋ Minnwi nɛ pɔ yi chɨɨchɨɨ, nnɛ ŋa ndɨɨ ŋa pugu chrā nthɛ vəɨ nɔ ghaŋ phɨ nɛ, pugu nthɛ pugu yəɨ mbha nnu shiʼi pəɨ ŋgaʼo Minnwi llɛ́ ŋa a lɛ nthɔ nɛ.
Yaʼo nu nchò pa thishɨ
13 Nthɛ pi Taathɔ, p̂əɨ yaʼo nchò ŋguoŋ pa thishɨ ŋa ŋgwamishua nūʼɔŋ nɛ. Yaʼo nchò fùoŋ Roma, mbɔ mmɛ taathɔ,
14 njaʼo nchò ghaŋ shaʼa ŋgwa nɔ ŋgwa ŋa Minnwi tɔgɔ mbɔ fùoŋ Roma ntaoŋ vugu nɔ fɛ nu njɔ́ ni ŋgwa pɛ ŋa pugu chwīe phɨ nɛ, ndɔ mbɨnɨ ŋgaʼo ŋgwa pɛ ŋa pugu chwīe shiʼi nɛ.
15 Nthɛ ŋa a nnu ŋa Minnwi tāʼa nu nɛ, ŋa pəɨ kie ŋkuoŋ chwīe nu shiʼi, nchri chrà ki ji ŋa pa nàna ghà nchrā nɛ.
16 P̂əɨ chhɔ chɔmbhi yəɨ nɔ pa ŋgwa ŋa pugu lɔ njiʼi mbɔ pa kǔna, ndɔ ki lɔ ndɔ̄gɔ ji nu ŋa pəɨ lɔ njiʼi mbɔ pa kǔna nɛ ŋkuru pi nnu pɨphɨ nɔ ghɔ, pəɨ chhɔ pi nɔ puoŋ fàʼa Minnwi.
17 P̂əɨ ghaʼo ŋguoŋ ŋgwa ghao. Ŋkhwā pa lǐŋ moŋ piŋ, mfāʼo pɔgɔ Minnwi, ŋgɨnɔ fùoŋ Roma.
Ntɨ́gɨ ni pa puoŋ fàʼa
18 Pa puoŋ fàʼa, p̂əɨ yaʼo mbhɔ taathɔ pəɨ ni ŋguoŋ ghaʼo nu ghao, njaʼo nchò yugu ki lɔ ŋguʼɔ mbɔ pi pɛ taathɔ ŋa pugu ŋgwa shiʼi mbɨnɨ mbɔ ŋgwa juju nɛ, njiʼi nthɛ pi pi pɨphɨ ŋkaa pugu.
19 Minnwi shi mfɛ mbɔrɔ ni pəɨ nthɛ yie, nɔ haʼaŋ pəɨ ntīi shii moŋ ŋgəʼɨ ki mbhɔ yəɨ lɔ mbɔ nɔ ghɔ, nthɛ pi ŋa pəɨ ji nnu ŋa Minnwi tāʼa nu nɛ.
20 Nthɛ ŋa pəɨ shi nshei pi khɔ nɔ haʼaŋ pəɨ nchwīe phɨ, pi wie vəɨ, pəɨ tīi shii moŋ ghɔ? Ndɔ ti p̈əɨ nchwīe shiʼi pi wie vəɨ, Minnwi fāʼo pwatua ni pəɨ nthɛ yie.
21 Nthɛ ŋa pi gɛ̄ vəɨ nthɛ pi yei, nthɛ ŋa Krishto ni njəɨ ŋgəʼɨ nthɛ vəɨ, mieŋ lì ni pəɨ, nnɛ ŋa pəɨ chuʼɔ chhɨkwo yi.
22 A shini ndɔ nchwīe phɨ, ndɔ paʼa kaŋ taʼa chrà mifɨɨ lɔ mbɔ nchò yu.
23 Ndɨɨ ŋa pi ni ŋgwɛʼi vi nɛ, a shini ndɔ nduʼu, ndɨɨ ŋa a ni njəɨ ŋgəʼɨ nɛ, a shini ndɔ ŋgūru ŋoŋ, a ni ŋguʼɔ ŋgə̄ɨ shhɨ nthɔ mfɛ noŋ yi ni Minnwi, mbɔ ŋoŋ ŋa a ghà nshaʼa ŋgwa ni ndɨndɨ nɛ.
24 Ju nduthɔ yi ni ntiɛŋ phɨ yia mbɨŋ yu ŋkuoŋ wáʼa nnɛ ŋa pia khu nthɛ phɨ, mbɔ yi maoŋ moŋ ndɨndɨ. Ntɔgɔ pi ŋkuoŋ pa fɨ́ pi, ghɨ̌nɔ yəɨ pɔ yi yɨ̄gɨ.
25 Pəɨ ni nchhɔ fāaŋ ndaoŋ nɔ pa minjɨɨ, ndɔ ŋkwo pɨ̄nɨ ndwɛ njəɨ ŋkɛ̄ʼi vəɨ, mbɔ ŋgaŋ lɨna ni nchə̌ɨ yəɨ.