12
Anutunöŋ iwi aka mindiŋgöm neŋgimakza.
1 Ambazip kambu keta bölökŋi mewöŋan mötnaripkö könaŋi naŋgöba jiba kousu ewö liliköm neŋgiba kinjei, mi mötzin. Miaŋgöra neŋön mewöŋanök mönö lömbötnini pakpak aka siŋgisöndok awamŋanök köpeim neŋgimakzawi, mi gilin anma. Anutunöŋ nini mötnaripkö bimŋi qeba Satan luhut al waŋgibingö areŋi ali ahöza. Miaŋgöra malmal sutŋi ki malagun kömumbini, sutŋi mi mönö aoŋgit tandök kapaŋ köla bim qeba ösumninan anbin.
2 Jisösnöŋ mötnaripnini mem letori ahui mem qarii köhöiba aködamunŋambuk ahakzawi, Toŋi mi mönö jeninan uba törörök ehakin. Yaŋön ölöp toroqeba Suep mire mala söŋgaibawakmö, mi mosöta eta miaŋgö salupŋe sihimbölö mörök. Maripomnöŋ kegwek-kahasililiŋ ewö kömumamgö gamu möta qahö tököyökmö, mi qenjaröknöŋ möta mökösöŋda kömuyök. Kömumba Anutugö jakömbuak dum tatatnöŋ öŋgöba böröŋi ölŋe tatza.
3 Siŋgisöndok ambazip yeŋön mewö tuarenjoŋ ak waŋgigetka sihimbölö möröhi, eŋön mönö i mötmöriba malme. Sörauba löwöriba urueret aka kinda mötnaripŋini aka jörömqörömŋini mosötpepuköra mönö mewö ahakŋe.
4 Siŋgisöndok akinbuköra aum-möriba bim qeba malgetka miaŋgöreŋ siŋgisöndokö Toŋan mönö sepgwörörök (gulibambam) qahö eŋguyök.
5 Iwinöŋ nahönböraturupŋi yeŋgöra qambaŋ keu eŋgizawi, Anutunöŋ miaŋgö dop keu kun eŋgöra kewö jiiga mönö mi ölum eŋgui malje, “O nahöni, Kembunöŋ mindiŋgöm gihimakzawi, miaŋgöra mönö mötnöŋga silebile kude akŋa. Keu jim gihiiga miaŋgöreŋ mönö urueret kude aka malman.
6 Kembunöŋ ambazip jöpaköm eŋgimakzawi, ia mindiŋgöm eŋgimakza. Ambazip morö ewö eŋgömemba köyan köl eŋgimakzawi, mi körek kömbinöŋ eŋgumakza.”
7 Morö kun iwiŋan qahö mindiŋgöi laŋ malbawak, mewö mönö yaŋgö moröŋi qahö akawak. Miaŋgöra Anutunöŋ iŋini nahön-böratŋi ewö tandök ak eŋgimakza. Miaŋgöra lömböt eŋgii mi mönö mindiŋgöm eŋgimapkö tandök mötmöriba möta mökösöŋda diŋgiba malme.
8 Anutunöŋ nahönböraturupŋi pakpak mindiŋgöm eŋgimakzawaŋgö dop iŋini qahö mindiŋgöm eŋgibawak ewö, mönö yaŋgö nahönböraturupŋi ölŋi qahö akeak. Mewö mönö iwi qahö wilin morö (bastet) akeak.
9 Keu mi kunbuk kewö jimam: Gölmegö iwininan mindiŋgöm neŋgigetka yeŋgöra göda qem eŋgiba malin. Silegö iwininan korembiŋi akzemö, uruninaŋgö Iwininan mönö ölŋi aka öŋgöŋgöŋi akza. Miaŋgöra mönö yaŋgö keu bapŋe anda diŋgiba mal köhöininga dop kölma.
10 Silegö iwininan mönö nanŋini mötmötŋinaŋgö dop kapaŋ köla gölmenöŋ nalö töröpŋi malbingöra aka mindiŋgöm neŋgiba malakze. Yeŋön mewö malakzemö, Anutunöŋ mönö tök kutum neŋgii yaŋgö dop sarakŋi akingöra aka mindiŋgöm neŋgimakza. Mewö aka ölŋa ölöwaka oyaeŋkoyaeŋ akingöra mötza.
11 Kunöŋ mindiŋgöm neŋgiiga nalö miaŋgöreŋök mönö sösöŋgai tandök qahö ahakzinmö, wösöbirik sihimbölöŋambuk mörakzin. Keu mi ölŋapmö, miaŋgö ölŋan mönö könaŋgep kewö asuhuma: Anutunöŋ ambazip mewö miaŋön köl gulim eŋgimakzawi, yeŋgö ahakmemeŋinan diŋgiiga luai qem eŋgii möta malme. Mewö.
Qambaŋ aka galöm meme keu tosatŋi
12 Miaŋgöra “awötŋini teköi böröŋini lömböriba sörörauba kinjawi, mi mönö memba wahöta mindiŋgöme. Tambuŋini jula siminŋini suljawi, mi mönö mem köhöime.” Buŋa keu kun mewö ahöza.
13 Kekporörökŋambuknöŋ (kerekporikŋambuknöŋ) töwölatiba eta qeiga könaŋan sula bölim teköbapuk. Keu miaŋgö dop alaŋini aŋgösirip kude ak waŋgimemö, mönö ölöwakŋapköra kapaŋ köla malme. Buŋa keu kun kewö ahöza, “Köna tiba anangö könaŋini mönö mem qölöleigetka diŋdiŋi akŋe.”
Keu miaŋgö dop mönö uru ölöwak qem aŋguba malme.
14 Ambazip körek yembuk luainöŋ urumohot malmegöra mönö köhöiba kapaŋ köla malme. Kunŋan malmal sarakŋi qahö miwikŋaimawi, mönö öne Kembu qahö ekŋa. Miaŋgöra Anutunöŋ mem sarahim eŋgimapköra mönö kapaŋ köla kinme.
15 Kunöŋ Anutugö kalem möriamŋi oŋgita qahö buŋa qem aŋgubapuköra mönö galöm mem aŋguba malme. Nene nupnöŋ siriuret kömbukŋambuk mi jalöŋinambuk qözölmakzin. Miaŋgö dop uru mötökömbukö könaŋi pakpak mi qeapköme. Qahö qeapkögetka miaŋön qariba kota eŋololoŋ mem eŋgii gwötpuk eŋgö uruŋinan tölöhobapuk.
16 Mewöyök kunöŋ kaisero akapuk me Iso (Esau) ewö aŋgöjörakŋambuk malbapuköra mönö galöm mem aŋguba malme. Isonöŋ morönahön mutukŋi ahöhaŋgö börösamot toŋi ahökmö, keu mi nene indim mohot nemapköra aka qeapköyök. Qeapköiga munŋi Jeikobnöŋ börösamotkö keuŋi mi nene miaŋön bohonŋi memba buŋa qem aŋguyök.
17 Könaŋgep jöhöjöhö keuŋiraŋgö dop asuhui Iwiŋaŋgö kötumötuetŋan mönö Jeikob qakŋe öŋgöyök, mi mötze. Mewö öŋgöi Isonöŋ kötumötuet mi buŋa qem aŋgumamgö möta uleta sahöri imbilŋan erök. Mewö kapaŋ köla ulerökmö, töndup keu munŋambuk jöhöyohori, mi utekömamgö köna kun qahö miwikŋaiyök. Miaŋgöra morö mutukŋaŋgö kötumötuetŋi mi buŋa qem aŋgumamgö mörökmö, miaŋgöreŋ qaköba osiyök.
18 Mönöwök Israel könagesö yeŋön Sainai (Sinai) kösutŋe kaba kingetka kunduŋi miaŋön könöp bölamnöŋ jeyök. Jeba köwak-köwak eta panaman meiga raidimbom qeiga Anutunöŋ miaŋgöreŋ yembuk jöhöjöhö areŋ ahök. Sainai (Sinai) kunduŋi miaŋön börönöŋ oseibinaŋgö dop akzapmö, eŋön kunduŋi mewö miaŋgö kösutŋe qahö kaba malje.
19 Anutunöŋ jöhöjöhö areŋi mi Sainai kunduŋe kewö ahök: Garataurupŋan tömun qainŋi kun ugetka aŋgötömualŋi azöŋda kaiga keu köhöikŋi jiyöhaŋgö kourukŋi mötket. Mi möta keu mewöŋi kunbuk kude jii mötmegöra uletket. Eŋön kunduŋi mewö miaŋgö kösutŋe qahö kaba malje.
20 Anutunöŋ keu köhöikŋi jiba kewö jim kutum eŋgiyök, “Kunŋan kun ambazip me bau sömbup kunöŋ kunduŋi mi oseima ewö, i mönö kötnöŋ qegetka kömuma.” Mewö jim kutum eŋgiiga keu mi wuataŋgöbingö möt lömböriba osiget. Miaŋgöra keu kunbuk kude jimapköra uletket.
21 Yuai kanjamŋambuk kötökŋi mi uba eketka Mosesnöŋ kewö jiyök, “Ni mönö keŋgötni möta jönömni undui kinjal.”
22 Eŋön mewö qahöpmö, mönö uruŋini meleŋda Zaion kunduŋi dopdowiba kaŋgota malje. Anutu malmal Toŋaŋgö sitiŋi qetŋi Jerusalem Suepnöŋ ahözawi, miaŋgöreŋ garataurupŋi ten tausenŋi ten tausenŋi yeŋön kambuŋi kambuŋi köla unduba sösöŋgai ahakzei, eŋön mönö siti mi dopdowiba malje.
23 Mutuk ahuahu dölökŋi ahuba urumeleŋ könagesö aketka qetŋini malmalgö buknöŋ ohogetka Suepnöŋ ahözawi, eŋön mönö yeŋgö kambuŋini toroqeba malje. Anutunöŋ ambazip körek neŋgö keunini kewöta jim tekömakzawi, eŋön mönö bemnini yambuk toroqeba malje. Anutunöŋ ambazip solanŋi mem letot eŋgiiga aködamunŋinambuk aka kömugeri, eŋön mönö yeŋgö uŋaŋinambuk toroqeba malje.
24 Eŋön jöhöjöhö areŋ dölökŋaŋgö galömŋi Jisös yaŋgöreŋ kaba yambuk qekötahöba kinje. Yaŋön sepŋan qewösahöi eŋgömirimakzawi, mönö malmal mewöŋe kaŋgota malje. Abelnöŋ sepŋi mokoyökmö, Jisösgö sepŋan Abelgö sepŋi oŋgita keu aködamunŋambukö muŋgemŋi akza.
25 Mutuk azi kunöŋ gölmenöŋ mala Anutugö keu jitsihitŋi ambazip indel eŋgiiga gwötpukŋan mi mötpingö tökögetka Anutunöŋ likepŋi meleŋni qakŋine öŋgöyök. Yeŋön miaŋgöreŋök kök albingö osiget ewö, neŋön mönö denöwö kök albinak? Nalö kewöŋe alanini kunöŋ Anutugö keu jitsihitŋi Suepnöhök indela jimakzawi, nini i nönöŋgan aka mosötzin ewö, mönö lömbötnöhök kök qahöpmahöp albin. Qeqetalninaŋgö likepŋi mönö ölŋa qaknine öŋgömapkö mötzin. Miaŋgöra kunŋan saŋep qei mötzei, eŋön keu mi mötpingö kezapölök kude akŋe. Kezapölök malbepuköra mönö galöm mem aŋguba malme.
26 Mönöwök keuŋi jiiga mötketka gölme utuköba memenjaliyökmö, kezapqetok keuŋi kun jiba jöhöiga nalö kewöŋe kewö ahöza, “Nalö kungen dumŋe kunbuk gölme utuköba memenjalimam. Gölmeyök qahöpmö, yuai akiga suepnöŋ mewöyök utuköma.”
27 Keu mewö ahözapmö, “Nalö kungen mönö dumŋe kunbuk” jizawi, keu miaŋgö könaŋi kewö: Anutunöŋ öröyuai miwikŋaiiga ahözawi, miaŋönök mönö utuköba utekömapmö, Suep mirigö öröyuai qahö utukömawi, miaŋön mönö kin köhöiba ahöm öŋgöma.
28 Neŋön bemtohoŋ qahö utukömawi, mia buŋa qem aŋguba kinjin. Miaŋgöra mönö “Anutu saiwap!” jiba mewö miaŋön waikŋi memba möpöseiba uru ölöwak mem waŋgimakin. Mi jitŋi oŋgitpinbuköra keŋgötnini möta aka gödaŋi qeba malbin.
29 Neŋgö Anutuninan mönö könöp bölam ewö akza. Miaŋgöra neŋgohoi sihimbölö mötpinbuköra mönö keŋgöt mötmöt qakŋe göda qem waŋgimakin. Mewö.