4
Anutunöŋ könagesöŋi sonda kendon neŋgima.
1 Anutugöreŋ aŋgota luainöŋ luhut memba malbingö keu jöhöyöhi, keu miaŋön mönö pöwöwöm köhöikŋi ahöm neŋgiza. Miaŋgöra eŋgöreŋök kunŋan löwöriba nanŋi Suep köna ananŋi mi kembaŋe kutui mewö miwikŋaim waŋgibinbuk. Miaŋgöra mönö sutnine galöm mem aŋgubin.
2 Gölme qararaŋkölkölŋe kagetka Ölöwak Buŋa jim asarim neŋgiget ewö jiget mötketmö, keu mi mönö silesile mötketka uruŋine qahö geyök. Miaŋgöra mötnaripŋini qahö qiwikŋaiiga tönpin öne malgetka qahö bauköm eŋgiba pömsöm qeyök.
3 Urunini meleŋda möt nariba maljini, neŋön mönö Anutugöreŋ aŋgota luhut memba oyaeŋkoyaeŋ malbin, mi mötzin. Anutunöŋ miaŋgö Buŋa keuŋi mi kewö jii ahöza, “Mewö jiba irimsesewöl qakŋe keuni jim kutuba jöjöpaŋ keunan mi jöhöba kewö jial, ‘Luhut memba malmegö areŋ al eŋgialmö, yeŋön mönö oyaeŋko-yaeŋ miaŋgöreŋ qahö aŋgotme.’ ”
Anutunöŋ Suep gölme miwikŋaim etkii nalö miaŋgöreŋök könahiba oyaeŋkoyaeŋ miriŋan lök memteköteköŋi ahözapmö, töndup keu mewö jiyök.
4 Anutunöŋ silim 7:ŋaŋgö keuŋi jiiga Buŋa Kimbigö kembaŋi kunöŋ kewö ahöza, “Sömaŋi 7 aiga Anutunöŋ nupŋi pakpak mem teköyöhaŋgö luhut memba kendon tarök.”
5 Anutunöŋ Buŋa keu mi toroqeba kewö jii ahöza, “Luhut memba malmegö areŋ al eŋgialmö, yeŋön mönö oyaeŋkoyaeŋ miaŋgöreŋ qahö aŋgotme.”
6 Ambazip tosatŋan Anutugö oyaeŋkoyaeŋ miwikŋaiba luhut memba malmei, keu miaŋön mönö pöwöwöm köhöikŋi ahöm neŋgiza. Ölöwak Buŋa mutuk könagesö jim asarim eŋgigeri, yeŋön mönö qeqetalŋinaŋgöra aka oyaeŋkoyaeŋnöŋ qahö aŋgota luhut qahö meget.
7 Luhut qahö megeraŋgöra aka Anutunöŋ mönö kunbuk nalö kun ala qetŋi Nalö dölkewöŋi qerök. Nalö köröpŋi teköiga nalö miaŋgö Buŋa keuŋi dölki jiba ohozali, mi mönö Deiwidköreŋ indeli kewö jiyök, “Dölkewöŋe Anutunöŋ eŋgohola keuŋi saŋep ali mötze ewö, uruŋini mönö kude gwözöŋme.”
8 Mewö jiiga Josuanöŋ eŋguaŋgiri oyaeŋkoyaeŋnöŋ aŋgota luhut membeak ewö, Anutunöŋ mönö nalö kungö keuŋi mi könaŋgep qahö jibawak.
9 Mi qahö jibawakmö, Anutunöŋ mönö ölŋa könagesö luhut meme neŋgii oyaeŋkoyaeŋ miwikŋaibin. Keu miaŋön mönö pöwöwöm köhöikŋi ahöm neŋgiza.
10 Miaŋgö könaŋi kewö: Anutunöŋ nanŋi nupŋi meyöhaŋgö luhut memba kendon taröhi, miaŋgö dop kunöŋ Anutugö oyaeŋkoyaeŋnöŋ aŋgota luhut memawi, yaŋön mönö nanŋi nupŋi meyöhaŋgö luhutŋi mi mewöŋanök memba oyaeŋkoyaeŋ malma.
11 Miaŋgöra nini mönö Anutugö oyaeŋkoyaeŋnöŋ aŋgota luhut memeŋi miwikŋaibingö kapaŋ kölbin. Eŋgöreŋök kunöŋ et qeba könagesö walŋi yeŋgö qeqetal tandökŋini miyöhök wuataŋgöbapuköra mönö kapaŋ kölbin.
12 Anutugö keuŋi mi memguliguligö könaŋi aka kukösum-ŋambuk akza. Bimgö sou ketaŋi mi likep likep jitŋirambuk akzapmö, Anutu keuŋaŋgö jitŋan mönö sou ketaŋi pakpak eŋgoŋgita jit kötök aiga jitŋi bahöbahö mi mauŋambuk akzahot. Keu miaŋön mönö uru uŋanini kutuba ömenöŋ me Anutugö Uŋaŋan inahöm neŋgimakzawi, mi undeŋda kuŋgum neŋgimakza. Sile kitip toroqeqenini aka sihitninaŋgö digonŋi mi mewöyök kewöta (keunini asa-asambötŋi miwikŋaiba) ölöpŋi aka bölöŋi mendeŋ etkimakza. Urukönömnini aka mötkutukutu areŋnini mi kewöta keunini jim tekömakza.
13 Anutunöŋ yuai pakpak miwikŋaii ahözawi, miaŋgöreŋök yuai kun mi asa-asambötŋe qahö ahöiga ölöpŋanök ehakza. Yuai kun esuhuinga Anutunöŋ esunini mi ölöp luluŋda ehi yaŋgö jemesoholŋe aukŋeyök ahöza. Ahakmemeninaŋgö kösohot pakpak mi mönö yaŋgöra jim asaribinaŋgö dop akzin. Mewö.
Jisösnöŋ jike nup galömnini öŋgöŋgöŋi akza.
14 Jisösnöŋ jike nup galöm bohonŋi öŋgöŋgöŋi ak neŋgiza-waŋgöra aka neŋön “Möt narim waŋgizin,” jiba jim miwik-ŋaimakzini, miaŋgöreŋ mönö köhöiba kinbin. Jisös Anutugö Nahönŋan mönö Suep jakeŋi jakeŋi eŋgoŋgita öŋgöba tatza.
15 Urumötmötnini tosatŋan lölöwöröŋi aketka jike nup galöm tosatŋan miaŋgöra wösömötmöt qahö ak neŋgimakzemö, nanine jike nup galömninan mönö qainŋi kun kewö akza: Yaŋön mönö nini ewö ahakmeme pakpak miaŋgöreŋ nembuk tandök mohot esapköm waŋgiba malgetmö, mi töndup siŋgisöndok kun qahö ahök.
16 Jike galömninan mönö eu kalem möriamgö dum tatatŋe tata ak kömum neŋgimamgö mörakza. Miaŋgöra mönö awösamkakak qakŋe kinda yaŋgö kösutŋe anbin. Yaŋgö kösutŋe aninga kalem möriamgöra osizini, miaŋgö nalö diŋdiŋe mönö bauköm neŋgiiga mi ölöp miwikŋaibin. Mewö.