14
Jisösnöŋ kawöl azi kun mem ölöwahök.
1 Jisösnöŋ Sabat kendon kunöŋ Farisi (Köna keugö kapaŋkölköl) yeŋgö jitŋememe kungö miriŋe öŋgöba nene neyök. Nemba tari tosatŋan galöm memba ektiget.
2 Miaŋgöreŋ yaŋgö jemesoholŋe kawöl azi kun köna böröŋi onöŋ ölököba qarii tarök.
3 Jisösnöŋ i eka könahiba Köna keugö böhi aka Farisi mi qesim eŋgiba kewö jiyök, “Sabat kendonöŋ azi mem ölöwak waŋgiba mewö miaŋön Köna keu oŋgitpin me qahö?”
4 Mewö jiyökmö, yeŋön göröŋ qeba tatket. Tatketka böröŋan azi mi misiriba mem ölöwaka melaii anök.
5 Ani kewö jii mötket, “Eŋgöreŋök kungöreŋ morö me bulmakau aziŋi mi Sabat kendonöŋ o lömnöŋ gema ewö, mi mönö ösumok örögetka kotma. Daŋön mi qahö öröi kotpawak?”
6 Mewö qesim eŋgii miaŋgö likepŋi meleŋbingö lömböriba numbuŋini muhungöba bök tatket. Mewö.
Jisösnöŋ sile mem-öŋgö-öŋgö mi qetalök.
7 Farisi (Köna keugö kapaŋkölköl) azinöŋ ambazip nenegöra köl öröm eŋgiyöhi, yeŋön dum qaikŋe eu meköba tatkeri, Jisösnöŋ mi eka miaŋgöra dopkeu kun kewö jii mötket,
8 “Kunŋan gi amembitkö lömbuaŋgöreŋ köl öröm gihii miaŋgöreŋ anda dum jegenŋeyök qahö memba tatman. Mewö akŋan ewö, tosatŋi köl öröm eŋgiyöhi, yeŋgöreŋök kunŋan gi goŋgita qetbuŋaŋambuk akapuk.
9 “Yaŋön kaŋgoriga lömbuaŋ toŋan göhöreŋ kaba kewö jibawak, ‘Gi dum ki mosötnöŋga öŋgöŋgöŋi yaŋön tatma.’ Mewö jima ewö, gi mönö wahöta bapŋe emu eta dum memba tata gamugi senjombuk mötpanbuk.
10 Mewö qahöpmö, kunöŋ köl öröm gihimawi, gi ölöp dum siminŋe emu anda tatman. Mewö tatnöŋga lömbuaŋ toŋan kota geka jima, ‘Alani, gi ölöp kaba dum jegenŋe eu anda tatman’. Mewö jiiga göŋön ambazip göbuk tata nene nezei, mönö körek yeŋgö jeŋine qetbuŋagabuk akŋan.
11 Mi kewögöra: Nanŋini uruŋini memba öŋgömei, Anutunöŋ i körek memba et al eŋgima. Kunŋan nanŋi uruŋi memba etmawi, Anutunöŋ mönö i memba öŋgöba al waŋgima.”
12 Farisi (Köna keugö kapaŋkölköl) azinöŋ ambazip köl öröm eŋgii lömbuaŋnöŋ tatketka Jisösnöŋ lömbuaŋ toŋi liliŋgöba eka kewö jii mörök, “Gi silimgö me suŋgemgö lömbuaŋ kun ohoba miaŋgöreŋ nangi alaurupki me darumunurupki mi kude köl öröm eŋgiman. Tinitosolomurupki me miri kasunŋaŋgö ambazip pomŋi qetbuŋaŋinambuk mi kude köl öröm eŋgiman. Mewöŋi lömbuaŋgöra köl öröm eŋginöŋi, i mewöŋanök köl öröm gihiba tosagi mi meköm gihiget teköma. Mewö akŋan ewö, Anutunöŋ mönö miaŋgö töwaŋi qahö gihima.
13 “Mewö qahöpmö, lömbuaŋ mözözömgöba ohomani, gi mönö ambazip etqeqeŋi mia köl öröm eŋgiman. Ambazip wanapŋi, simalokon aka jegömöl akzei, mönö mia eŋgoholnöŋga dop kölma.
14 Mi köl öröm eŋginöŋga yeŋön tosa meköm gihibingö osigetka gi miaŋgöra simbawoŋ aka malman. Tosaŋini mi öne ahöi malnöŋga solanŋi yeŋön kömupnöhök wahötketka nalö miaŋgöreŋ Anutunöŋ nanŋak mi göhöra meköm gihima.” Mewö.
Lömbuaŋ ali möndömöndö keu jiba tököget.
Mat 22.1-10
15 Jisösnöŋ mewö jiiga nene nemba tatket yeŋgöreŋök kunŋan mi möta kewö jii mörök, “Kunöŋ Anutugö bemtohoŋ uruŋe aŋgota nene nemba tatmawi, nöŋön yaŋgöra simbawoŋ jizal.”
16 Mewö jiiga kewö meleŋnök, “Azi kunŋan suŋgemgö lömbuaŋ ketaŋi mözözömgöba ohoba ambazip gwötpuk öröm eŋgiget kamegöra jiyök.
17 Lömbuaŋ nalöŋi kam kuŋgui welenqeqeŋi kun melaii köl öröm eŋgimamgö jiyöhi, yeŋgöreŋ anda jii mötket, ‘Yuai pakpak lök mözözömgöinga ahöza. Miaŋgöra mönö ölöp kame.’
18 Jii mötketmö, mi möta yeŋön körekmakörek könahiba yuai tosatŋe möndöba tököget. Mutukŋan jiyök, ‘Ni arö kun söŋgöröŋi mealaŋgöra miaŋgöreŋ anda ekŋamgö mötzal. Miaŋön jöhöm niŋgiza. Miaŋgöra ölöp anda jinöŋga möta kude möt bölim niŋgima.’
19 Kunŋan jiyök, ‘Ni bulmakau aziŋi 10 söŋgöröŋini meali, mi kösönöŋ ilikŋine jöhöbi kinoŋ örögetka anda nup esapköba qeba qindipkömam. Miaŋön jöhöm niŋgizawaŋgöra ölöp jinöŋga möta kude möt bölim niŋgima.’
20 Kunŋan toroqeba kewö jiyök, ‘Ni ambi urandöpki bohonŋi mealaŋgöra kamamgö osizal.’
21 “Mewö jigetka welenqeqenöŋ liliŋgöba azi kembuŋaŋgöra buzup mi jii mörök. Möta uruŋi könöp jeiga welenqeqeŋi kewö jim kutum waŋgiyök, ‘Gi mönö wölaŋ taongö köna namŋe aka sombemnöŋ anda ambazip etqeqeŋi, wanapŋi, köna böröŋini titiŋgitŋi, jegömöl aka simalokon ambazip mi mönö eŋguaŋgitnöŋga lömbuaŋ miri uruŋe ki kame.
22 Jiyöhaŋgö dop ak teköba kaba kewö jiyök, ‘Kembuni, jim kutum niŋgizanaŋgö dop akzalmö, dum tiŋi tok ahöza.’
23 “Mewö jiiga azi kembunöŋ jiyök, ‘Gi mönö könanöŋ aka rowoŋqeqeŋine anda ambazip tat anjei, mi kapaŋ köla kuŋgum eŋginöŋga lömbuaŋ miri uruŋe kaŋgota kokolak qeme.
24 Nöŋön kewö jibi mötket: Ambazip mutuk köl öröm eŋgimamgö jiali, yeŋgöreŋök kunŋan kun nöŋgö lömbuaŋnöŋ qahö kaŋgota nemba nahömŋi mötma.’ ” Mewö.
Jisösgö gwarek malmalgö könaŋi
Mat 10.37-38
25 Jisösnöŋ ani ambazip kambu ketaŋi yeŋön wuataŋgöba angetka liliŋgöba kewö jii mötket,
26 “Kunŋan nömbuk kaba malmam jiba ni göragöra al niŋgiba iwinamŋi, anöm-moröŋi, darumunŋi, nenbehötŋi aka nanŋi malmalŋi mewöyök jegep ala jöpakömakzawi, yaŋön mönö nöŋgö gwarekni akŋamgö osima.
27 Sisitŋini megetka kunŋan ni nuataŋgöba sihimbölö möta maripomnöŋ kömumamgö qahö jöjörömawi, yaŋön mönö nöŋgö gwarekni akŋamgö osima.
28 “Eŋgöreŋök kunŋan miri köröpŋi memamgö mötza ewö, yaŋön mönö mutuk eta tata moneŋi miri mem tekömawaŋgö dop akza me qahö, miaŋgö könaŋi kewöta ek kutuma.
29 Mewö qahö aka miri tandöŋi kömöta mi mem tekömamgö köhököhöiŋi qahö ahöm waŋgiiga mosöri öne kiniga ambazip pakpak mi eka könahiba jiji-ilit jiba mepaik waŋgibepuk.
30 Mewö ak waŋgiba kewö jibepuk, ‘Azi mi könahiba miriŋi meyökmö, mi mem tekömamgö qahö köhöiyök.’ Miaŋgö dop Jisös wuataŋgöman me qahö, mi törörök kewöta möt kutuman.” Mewö
31 Jisösnöŋ keu mi toroqeba kewö jiyök, “Mewöyök kiŋ azi kembu kunŋan kiŋ kunbuk aröŋda ‘Bim qemam,’ jiba denöwö akŋa? Yaŋön zilaŋök kerök qahö al waŋgimapmö, mutuk jembonurupŋi öröm tokom eŋgii tata qambaŋ keu kewö eraum mötme, ‘Nanine aziurupnini 10.000 maljin aiga likepŋe kerökurupnini mi 20.000 malje. Azi kembuŋinan i eŋguaŋgita kaget eŋgeka ölöp köhöiba eŋgubin me qahöpto?’
32 ‘Qahö köhöibin,’ jime ewö, yaŋön kerök kiŋnöŋ köröwen tariga miaŋgöreŋök jitŋememeurupŋi melaim eŋgii yaŋgöreŋ anda luai qebingö goro eraum mötme.
33 Mewöyök eŋgöreŋök kunŋan yuai pakpak ahöm waŋgizawi, mi jegep almawaŋön mönö nöŋgö gwarekni akŋamgö osima. Miaŋgöra mönö nia jegep al niŋgigetka dop kölma.” Mewö.
Howe nahömŋi qahö mi yuaia omaŋi kötökŋi.
Mat 5.13; Mak 9.50
34 “Howe mi ölöpŋi akzapmö, sihimŋi mosötma ewö, mi mönö denöwö möhamgöinga kunbuk sihimŋambuk akawak?
35 Nesak omaŋi mi gölme kelökŋambuk akŋapköra tokoba isoŋbasoŋ alakzinmö, howe nahömŋi qahö mi yuai kungöra qahö dop kölma. Qahö! Mi mönö önewat gölmenöŋ gilinga geba öne töhöntöhön ahöma. (Gi mewöŋanök nöŋgö gwarekni aka kembaŋe kutuba nömosötman ewö, mönö yuai omaŋi akŋan.) Kunŋan kezapŋambuknöŋ malja ewö, yaŋön mönö keu mi möt kutuma.” Mewö.