20
A Vinara na Vure i Ravulu
(Vinara 5:1-21)
1 A Vure i taki e huriki a Israel i ta maea,
2 “Iau kunana e BAKOVI DAGI a Vure ne mua, a bole tala mua o Egipto, ra tanga ni vakavora mua vona.
3 “Mu ramai iau kunana, naha ni ramai a maka vure ranga.
4 “Naha ni kau na kai o na kedo a hanuna vure o a hanuna maki i tabuli polomeli na hunu, i tabuli polotano na malala, i tabuli polotano na dari.
5 Naha ni turume ni kavurike ria, a vuhuna iau e BAKOVI DAGI, iau a Vure ne mua, i uka ma ga matataroa tara vure ge kuloi iau. E huriki ri marikoi iau, bara ratapile e huriki a hamone ria ge harena ne tubune ria o ne tamarane ria.
6 E huriki ri ngaru iau, ri gi ramai a maka vinara nau, bara ngaru vakaroro ria, a ngaru a hamone ria i ravulu rangale (1,000).
7 “Naha ni kurahi tavulea a ragu, e BAKOVI DAGI, a Vure ne mua. A viri i kurahi tavulea a ragu bara i tahoka a ngava.
8 “Mu luhoi mulea a Parava Nimalo, mu ru herea ge a parava nau kunana.
9 Mu leho na parava i polotara, na vik i taku,
10 pali a poloruana parava ia a Parava Nimalo ne BAKOVI DAGI, a Vure ne mua. Ra parava iea naha ni leho, mu malo vona turane huriki e tune mua, a vora ne mua, a sipsip a bulmakau ne mua, e huriki a mosi ri made turane mua.
11 Mu rata mavonga, a vuhuna na parava i polotara, e BAKOVI DAGI i rata rike a hunu, a malala, a dari, a maki lobo i tabuli ne tou. Pali na poloruana parava, i malo, i gamaia a Parava Nimalo, i ratea i malamala.
12 “Mu togo e kinane mua e tamane mua, lakea bara mu made tabaka na malala e BAKOVI DAGI, a Vure ne mua i habia ne mua.
13 “Naha ni rabalaki a viri.
14 “Naha ni rata a naro na molenga.
15 “Naha ni panaho.
16 “Naha ni tami a turamu na ngava.
17 “Naha ni ngutu na ruma na viri tara o ne girihina, ne huriki a vora vona, a bulmakau a donki vona, a mahala vona.”
18 Na tahuna e huriki a Israel ri longoa a bubu i kururu, ri longoa a tavure i sidi, ri masia a pokona kanono i kavitagua a lolo, ri mangenge, i vakulu a tagane ria. Lakea ri karuku hamule, ri pesi basi,
19 ri takia e Moses, “Ioe kunana o ta turane mia mi gi longo. Pali a Vure nahea ge ta valai ne mia, ma mi gi mate.”
20 Lakea e Moses i taki ria, “Naha ni mangenge, a Vure i valai ge toni mua kunana, mu gu mangenge vona, nahea mu gu rata a naro hale.”
21 E huriki ri pesi basi, pali e Moses kunana i lokovonga tabukoi na hini i uvo vatubi i made vona a Vure.
A Vinara na Dede
22 Muri e Bakovi Dagi i takia e Moses, “O taki e huriki a Israel e BAKOVI DAGI i ta maea, ‘Mu matai pali iau a made na hunu a ta turane mua.
23 Naha ni rata a maka vure na gol a silva mu gu kavurike ria. Mu kavurike iau kunana.
24 Mu ratea na malala a dede, mu habi vonga a maka sipsip a bulmakau, ge a nihabi gutu-vuro, ge a nihabi na nivalemu. Na tahuna mu rata mavonga mu kavurike iau, bara rata kamumu mua.
25 Na tahuna mu hae a dede, naha ni haea na kedo ni ubikeve na modona a aen, a vuhuna i uka ma ge kamumu na matagu.
26 Naha ni ratea a dede ge rike hateka mu gu vakapesi a nirike vona, mu gu habi a nihabi. Na tahuna mu rike vona, ma ga ni matai a tagane mua.’ ”