48
Lakea e Iosep i kaba na matane Israel. Muri i marore rike na kiri vona, i vasileki.
E Manase Rua e Epraim
1 Muri na parava ranga ni vakalongo maea e Iosep, “E tamamu i giloa.”
Lakea i tuli e tuna rua, e Manase e Epraim, to go masia.
2 Na tahuna e Iosep i bele, ri takia e Iakop, ri ta maea, “E tumu e Iosep i valai ge matai ioe.”
Lakea e Israel i makali kamumu, i made rike na kiri.
3 Muri i takia e Iosep i ta maea, “A Vure Tuhaka i bele nau na tanga e Lus, na robo e Kenan i gamai iau vonga,
4 i ta maea, ‘Ga rata ioe go tahoka a maka maki, ge bele kupo a hamomu. Ga vakamade palupu e huriki a hamomu ga habia ne ria a malala ge vona e ria liu muri ma.’
5 E tumu e Epraim rua e Manase, ra ni poda koea o Egipto muga ne iau a valai koea, ngane ga pau, ge nau. Bara ru manga e Reuben rua e Simion ra rua e tugu.
6 E huriki a koma o vakabele muri ne rua ne vomu ngi. Na tahuna ri vaveru a malala takutaku ne ria, e huriki a koma nga bara ri pesi muri ne Epraim e Manase.
7 Na tahuna a hamule o Padan, a dodo hatekea e kinamu e Resel i mate tabukoi o Eprata na robo e Kenan. Lakea a tanu tabukoi ia na dala lakea o Eprata, re Betlehem.”
8 Na tahuna e Iakop i matai e tune Iosep ala rua, i nana, “E rei a koma nga?”
9 Lakea e Iosep i vakalongoa e tamana i ta maea, “Ra koma nga, e tugu a bakovi i habi nau a Vure koea.”
Lakea e Iakop i ta maea, “O bole valai nau, ga gamai rua.”
10 E Israel i kepa, i uka ma i matai kamumu a maki, a vuhuna i gare. Lakea e Iosep i vakapesi tabukoi ne Iakop e tuna rua, lakea e Israel i rako i nguru rua.
11 Muri e Israel i takia e Iosep i ta maea, “A luhoi i uka ma ga matai tabu a matamu, pali ngane a Vure i tuhori iau, a matai ioe turane tumu rua.”
12 Muri e Iosep i tuli tala rua na vahane Israel, i lolu puru na ngalane tamana, i padoi a malala a gina.
13 Muri e Iosep i tulia e Epraim, i laho lokovoga na maurina e Israel, i tulia e Manase i laho lokovonga na limana kanena e Israel.
14 Pali e Israel i toto vahau a limana. I nugua na limana kanena a gine Epraim ra viri i pahamuri a tabua, i nugua na limana maurina a gine Manase a tabua.
15 Lakea i gamaia e Iosep i ta maea, “A Vure ne sisi e Abraham, ne tata e Isak, i matakari iau na parava vakaroro i valai i harena mona.
16 I bele manga a agelo i kori iau na maki hale, ge gamai a koma nga. Ge rata a hamone rua ge bele kupo. Muri bara ri luhoi a ragu, a rane tata e Isak, e sisi e Abraham.”
17 Na tahuna e Iosep i masia e tamana i ru langa a limana a kanena na gine Epraim, i marikoi, lakea i bolea a limane tamana i kalia na gine Epraim ge lakea na gina e Manase.
18 Lakea e Iosep i takia e tamana i ta maea, “O tata, i uka ma ge mavonga. A tabua ra iea, o ru langea na gina a limamu a kanemu.”
19 Pali e tamana i koi, i ta maea, “O tugu, a lohoka vona a hini ngi. A lohoka vona e huriki a hamona bara ri kupo. Pali a hamone tarina bara ri ala kupo hateka, ge manga e huriki a kabu ri ala kupo, ri vadili vapopo.”
20 Na parava iea, e Israel i gamai rua i ta maea, “Na tahuna e huriki a kabu ne Israel, ri ngaru ni gamai a viri, bara ri ta maea, ‘A Vure ge matakari ioe i manga a hini i matakari e Epraim rua e Manase.’ ”
Na naro iea kunana, i ru mugea ne Manase e Epraim.
21 Muri e Israel i takia e Iosep, i ta maea, “Iau a tabukoi ga mate. Pali a Vure ge turamu ge bole hamule ioe na robo ne huriki a gare vomu.
22 Ioe kunana, naha e huriki e turamu, ga habia vomu a robo a bolea ne huriki a Amor na tahuna a vaubi turane ria na bainat, na kiniperi nau.”