ལེའུ་ཉེར་གཅིག༌པ།
ཕོལ་ལོལ་ཁོང་ཉིད་ཡེ་རུ་སཱ་ལེམ་དུ་ཆས༌པ།
1 དེ་ནས་ངེད་ཅག་མི་རྣམས་དང་ཁ་བྲལ༌ཏེ། གྲུ་གཟིངས་ལ་བསྡད་ནས་ཐད་ཀར་ཀོ་ཟི་རུ་ཕྱིན་པ་ཡིན། དེའི་ཕྱི༌ཉིན་རའོ་ཏི་རུ་སླེབས་ཤིང་དེ་ནས་ཕཱ་ཏ་ར་རུ་སླེབས་པ༌དང༌།
2 དེར་ཕོའོ་ནེ་ཀེ་ཡུལ་དུ་འགྲོ་བའི་གྲུ་གཟིངས་ཤིག་དང་ཕྲད་ནས་དེ་ལ་བསྡད་དེ་སོང་ངོ༌།།
3 ཀིབ་རིས་ཀྱི་མཐོང་སར་ཕྱིན༌ཅིང༌། དེའི་ལྷོ་ཕྱོགས་བརྒྱུད་ནས་སིར་ཡཱ་ཡུལ་དུ་སོང་སྟེ་ཐཱར་ཞེས་པར་སླེབས་པ༌དང༌། གྲུ་གཟིངས་ནང་གི་ཚོང་རྫས་རྣམས་དེ་རུ་མར་དབོག་དགོས་པས་ངེད་རྣམས་ཀྱང་གྲུ་ལས་བབས་སོ།།
4 དེ་ནས་ངེད་ཅག་གིས་རྗེས་འབྲང་པ་རྣམས་བཙལ་ནས་རྙེད་ཅིང་གནས་དེར་ཉིན་བདུན་ལ་བསྡད་པ༌དང༌། རྗེས་འབྲང་པ་རྣམས་ཀྱིས་དམ་པའི་ཐུགས་ཉིད་ཀྱི་སྒོ་ནས་ཕོལ་ལོལ་ལ་ཡེ་རུ་སཱ་ལེམ་དུ་མི་ཕེབས་པར་ཞུ་བ་ནན་གྱིས་ཞུས་སོ།།
5 ཉིན་དེ་དག་གི་རྗེས་སུ་ངེད་ཅག་ལམ་དུ་ཆས་པ༌ལ། རྗེས་འབྲང་པ་ཐམས་ཅད་དང་ཁོ་རྣམས་ཀྱི་ཆུང་མ་བུ་ཕྲུག་བཅས་ཀྱིས་ངེད་རྣམས་གྲོང་ཁྱེར་ཕྱི་རོལ་བར་སྐྱེལ་མ་བྱས༌ཤིང༌། ངེད་ཅག་གིས་རྒྱ་མཚོའི་འགྲམ་ནས་པུས་མོ་སར་བཙུགས༌ཏེ་གསོལ་བ་བཏབ་པ་དང་ཕན་ཚུན་ལ་གྱེས་ཕྱག་ཕུལ་བ་ཡིན།
6 དེ་ནས་ངེད་རྣམས་སླར་ཡང་གྲུ་གཟིངས་དེར་བསྡད་ནས་སོང་བ་དང་ཁོ་རྣམས་ཕྱིར་རང་ཁྱིམ་དུ་ལོག༌གོ།
7 ངེད་རྣམས་ཐཱར་ཞེས་པ་ནས་མཚོ་ལམ་བརྒྱུད༌དེ། ཕེ་ཏོ་ལེ་མཱ་རུ་སླེབས་པ་དང་མཚོ་ཐོག་གི་འགྲོ་ལམ་མཇུག་རྫོགས་པ་རེད། དེ་ནས་གནས་དེའི་སྤུན་ཟླ་རྣམས་ལ་འཚམས་འདྲི་བྱས༌ཤིང༌། ཁོ་རྣམས་དང་མཉམ་དུ་ཉིན་གཅིག་ལ་བསྡད།
8 དེའི་ཕྱི༌ཉིན། ངེད་ཅག་གནས་དེ་དང་ཁ་བྲལ་ནས་ཀེ་སར་ཡཱ་རུ་སླེབས་ཤིང༌། འཕྲིན་བཟང་སྒྲོག་མཁན་ཕི་ལིབ་ཀྱི་ཁྱིམ་དུ་སོང་ནས་ཁོ་དང་མཉམ་དུ་བསྡད། ཕི་ལིབ་ཅེས་བྱ་བ་ནི་ལས་འཛིན་པ་བདུན་ཡོད་པ་ལས་གཅིག་ཡིན།
9 ཁོ་ལ་ན་ཆུང་བུ་མོ་བཞི་ཡོད་པ་རེ་རེ་བཞིན་ལུང་སྟོན་མཁན་ཡིན༌པ་རེད།
10 ངེད་རྣམས་དེ་ནས་ཉིན་འགར་བསྡད་པ་ལ་ཨ་གཱ་པུ་ཞེས་པའི་ལུང་སྟོན་པ་ཞིག་ཡ་ཧུ་དཱའི་ཡུལ་ནས་ཡོང་བ༌དང༌།
11 ཁོ་རང་ངེད་ཅག་གི་གནས་འདིར་སླེབས་རྗེས། ཕོལ་ལོལ་གྱི་སྐེ་རགས་བླངས་ནས་རང་གི་རྐང་ལག་བསྡམས་ཏེ་ན༌རེ། དམ་པའི་ཐུགས་ཉིད་ཀྱིས་འདི་སྐད་དུ་གསུངས་པ་སྟེ། ཡ་ཧུ་དཱ་པ་རྣམས་ཀྱིས་ཡེ་རུ་སཱ་ལེམ་དུ་སྐེ་རགས་འདིའི་བདག་པོའང་འདི་ལྟར་བསྡམས༌ཏེ་ཕྱི་ཕྱོགས་པ་རྣམས་ཀྱི་ལག་ཏུ་སྤྲོད་པར་འགྱུར་ཞེས་པའོ་ཞེས་སྨྲས་སོ།།
12 ངེད་ཅག་དང་གནས་དེའི་མི་རྣམས་ཀྱིས་ལུང་བསྟན་འདི་ཐོས༌རྗེས། ཕོལ་ལོལ་ཁོང་ཉིད་ཡེ་རུ་སཱ་ལེམ་དུ་མི་འགྲོ་བར་ཞུ་བ་ནན་གྱིས་ཞུས༌ནའང༌།
13 ཕོལ་ལོལ་གྱིས་འདི་སྐད༌དུ། ཁྱོད་རྣམས་འདི་ལྟར་ངུས་ཏེ་ངའི་སེམས་སྐྱོ་རུ་འཇུག༌པ་ཅི་ཡིན་ནམ། ང་རང་ནི་གཙོ་བོ་ཡེ་ཤུའི་མཚན་གྱི་དོན་དུ་མི་གཞན་གྱིས་བཙན་བཟུང་བྱེད་པ༌དང༌། ཐ་ན་ཡེ་རུ་སཱ་ལེམ་ནས་རང་སྲོག་འཆོར་དགོས་ཀྱང་འགྱོད་པ་སྤུ་ཙམ་ཡང་མེད་ཅེས་གསུངས་སོ།།
14 ཁོང་གིས་མི་གཞན་གྱི་ངག་ལ་མི་ཉན་པས་ངེད་རྣམས་ཀྱང་འུ་ཐུག༌ནས། གཙོ་བོའི་དགོངས་པ་བཞིན་དུ་འགྲུབ་པར་སྨོན་ཞེས་སྨྲས་པ་དང་ཞུ་བ་བྱེད་མཚམས་བཞག༌གོ།
15 ཡང་ཉིན་དེ་དག་གི་རྗེས༌སུ། ངེད་རྣམས་ཀྱིས་གྲ་སྒྲིག་བྱས་ཏེ་ཡེ་རུ་སཱ་ལེམ་དུ་ཆས་པའི་ཚེ།
16 ཀེ་སར་ཡཱ་ཡི་རྗེས་འབྲང་པ་འགའ་ཡང་ངེད་ཅག་དང་མཉམ་དུ་སོང༌ཞིང༌། ངེད་ཅག་ཀིབ་རིས་གླིང་ཕྲན་གྱི་མཱ་སིན་ཞེས་པའི་ཁྱིམ་དུ་སྡོད་པའི་ཕྱིར་ཁྲིད་པ་ཡིན། མཱ་སིན་ནི་སྔ་རོལ་ནས་རྗེས་འབྲང་པ་ཞིག་ཡིན༌ནོ།།
ཕོལ་ལོལ་ཁོང་ཉིད་ཡེ་རུ་སཱ་ལེམ་དུ་སླེབས༌པ།
17 དེ་ནས་ངེད་རྣམས་ཡེ་རུ་སཱ་ལེམ་དུ་སླེབས་པ་དང་སྤུན་ཟླ་རྣམས་ཀྱིས་དགའ་སྤྲོའི་ངང་ནས་བསུ་བ་བྱས་སོ།།
18 དེའི་ཕྱི༌ཉིན། ཕོལ་ལོལ་དང་ངེད་རྣམས་ལྷན་དུ་ཡ་ཀོབ་ཀྱི་དྲུང་དུ་ཕྱིན་པ་དང་ཆོས་ཚོགས་ཀྱི་རྒན་པོ་ཐམས་ཅད་ཀྱང་དེར་བཞུགས༌པ་རེད།
19 ཕོལ་ལོལ་གྱིས་དེ་རྣམས་ལ་འཚམས་འདྲི་བྱས་ཤིང་དཀོན་མཆོག་གིས་ཕོལ་ལོལ་གྱི་ལས་འགན་བརྒྱུད་ནས་ཕྱི་ཕྱོགས་པའི་ཁྲོད་དུ་དོན་ཇི་ལྟར་མཛད་པ་རྣམས་རེ་རེ་བཞིན་སྨྲས་སོ།།
20 རྒན་པོ་རྣམས་ཀྱིས་གཏམ་དེ་ཐོས་ནས་དཀོན་མཆོག་ལ་བསྟོད་བསྔགས་བརྗོད་ཅིང་ཕོལ་ལོལ་ལ་འདི་སྐད༌དུ། སྤུན་ཟླ༌ལགས། ཁྱེད་ཀྱིས་གཟིགས༌དང༌། ཡ་ཧུ་དཱ་པའི་ཁྲོད་དུ་གཙོ་བོ་ཡེ་ཤུ་ལ་དད་པ་བྱེད་མཁན་ཁྲི་ཕྲག་མང་ཙམ་ཡོད་པ༌དང༌། དེ་ཐམས་ཅད་ཀྱིས་བརྩོན་སེམས་སྒོས་བཀའ་ཁྲིམས་སྲུང་བཞིན་ཡོད།
21 ཡ་ཧུ་དཱ་པའི་དད་ལྡན་དེ་རྣམས་ཀྱིས་ཁྱེད་ཀྱི་སྐོར་ཐོས༌འདུག་སྟེ། ཁྱེད་ཀྱིས་ཕྱི་ཕྱོགས་སུ་ཡོད་པའི་ཡ་ཧུ་དཱ་པ་ཐམས་ཅད་ལ་མོ་ཤེ་འདོར་རུང༌ཞིང་། བྱིས་པ་རྣམས་ཀྱི་མཚན་སྐྱི་མ་གཅོད་ཅེས་པ་དང༌། གོམས་སྲོལ་ཡང་བསྲུང་མི་དགོས་ཞེས་སྨྲས་པ་དེ་ཡིན།
22 ཡ་ཧུ་དཱ་པ་དེ་དག་གིས་ད་ལྟ་ཁྱེད་རང་འདིར་ཕེབས་པའང་ཤེས་ངེས་པས་ཅི༌བྱའམ།
23 དེ་བས་ཁྱེད་ཀྱིས་ངེད་ཅག་གིས་སྨྲས་པ་བཞིན་དུ་བསྒྲུབ་པར༌མཛོད། འདིར་དམ་བཅའ་པ་བཞི་ཡོད༌དེ།
24 ཁྱེད་ཀྱིས་དམ་བཅའ་པ་དེ་རྣམས་ཁྲིད་ནས་མཉམ་དུ་ཆོས་ཀྱི་གཙང་སྦྲ་བྱོས༌དང༌། ཁོ་རྣམས་ཀྱི་སྐྲ་གཞར་བའི༌ཕྱིར། ཁོ་རྣམས་ཀྱི་ཚབ་ཏུ་འགྲོ་སོང་ཐམས་ཅད་ཕུལ༌ཅིག དེ་ལྟར་བྱས་ན་མི་ཐམས་ཅད་ཀྱིས་དེ་སྔར་ཁྱེད་ཀྱི་སྐོར་ཐོས་པའི་གཏམ་དེ་མི་བདེན་པ༌དང༌། ཁྱེད་རང་བག་ཡོད་ཚུལ་ལྡན་ཡིན་པ་དང་ཁྱེད་ཀྱིས་ཀྱང་མོ་ཤེའི་བཀའ་ཁྲིམས་བཞིན་སྒྲུབ་པ་ཤེས་ཐུབ་བོ།།
25 ཡང་ངེད་ཅག་གིས་གཙོ་བོ་ཡེ་ཤུར་དད་པ་ཡོད་པའི་ཕྱི་ཕྱོགས་པ་རྣམས་ཀྱི་སྐོར་སྨྲ་བར༌བྱ་སྟེ། ལྷ་སྐུའི་མདུན་དུ་ཕུལ་བའི་མཆོད་རྫས་དང༌ཁྲག མིད་པ་བསྒགས་ནས་བསད་པའི་ཕྱུགས་ཟོག་གི་ཤ༌དང༌མི་ཚངས་སྤྱོད་པ་བཅས་སྤང་དགོས་པར་ཐག་གིས་བཅད་པ་ལྟར་འཕྲིན་ཡིག་བྲིས་ཟིན་ཞེས་སྨྲས།
26 དེ་ནས་ཕོལ་ལོལ་གྱིས་མི་དེ་བཞི་པོ་ཁྲིད་ཅིང་དེའི་ཕྱི་ཉིན་ཁོ་རྣམས་དང་མཉམ་དུ་ཆོས་ཀྱི་གཙང་སྦྲའི་ལས་བསྒྲུབས༌རྗེས། མཆོད་ཁང་དུ་སོང༌སྟེ་ཁོ་རྣམས་རེ་རེའི་ཆེད་དུ་མཆོད་པ་འབུལ་བ་དང་གཙང་སྦྲ་འགྲུབ་པའི་དུས་སླེབས་ལ་ཉེ་བའི་དོན་དེ་མཆོད་དཔོན་ལ་སྨྲས༌སོ།།
ཕོལ་ལོལ་བཟུང་བ།
27 དེ་ཡང་ཉིན་བདུན་པོ་མཇུག་རྫོགས་ལ་ཉེ་བའི་དུས༌སུ། ཨེ་ཞི་ཡཱ་ཡུལ་ནས་ཡོང་བའི་ཡ་ཧུ་དཱ་པ་རྣམས་ཀྱིས་ཕོལ་ལོལ་མཆོད་ཁང་དུ་ཡོད་པ་མཐོང༌སྟེ། མི་ཚོགས་ཐམས་ཅད་ལ་ངན་སྐུལ་བྱས་ཤིང་ཁོང་ཉིད་འཛིན༌པའི་ཚེ།
28 སྐད་ཆེན་པོ་བརྒྱབ་སྟེ་ན༌རེ། ཡེས་ར་ཨེལ་པ་རྣམས་ཀྱིས་ངེད་ཅག་ལ་རོགས་རམ་བྱོས༌ཤིག མི་འདི་ནི་ཡུལ་ཕྱོགས་ཀུན་གྱི་མི་ཐམས་ཅད་ལ་ཆོས་བསྒྲགས་ནས་བདག་ཅག་གི་མི་སེར་དང་བཀའ༌ཁྲིམས། གནས་འདི་བཅས་ལ་དམའ་འབེབས་བྱེད་མཁན་ཞིག་གོ། ཡང་ཁོས་གྷི་རིག་པ་རྣམས་མཆོད་ཁང་ནང་དུ་ཁྲིད་ནས་གནས་མཆོག་འདི་མི་གཙང་བར་བྱས་ཞེས་སྨྲས་སོ།།
29 ཡ་ཧུ་དཱ་པ་རྣམས་ཀྱིས་དེ་སྔར་ཨེ་ཕེ་སི་པ་ཏྲོ་ཕེ་མུ་ཞེས་པ༌དང༌ཕོལ་ལོལ་གཉིས་མཉམ་དུ་གྲོང་ཁྱེར་འདིར་ཡོད་པ་མཐོང༌བས། ཕོལ་ལོལ་གྱིས་ཁོ་རང་མཆོད་ཁང་དུ་ཁྲིད་པ་ཡིན་པར་བསམས་ཏེ་འདི་ལྟར་སྨྲས༌པ་རེད།
30 དེ་ནས་གྲོང་ཁྱེར་ཡོངས་ལ་ཟིང་ཆ་བྱུང་ཞིང་མི་རྣམས་བརྒྱུགས་ནས་ཕོལ་ལོལ་བཟུང་སྟེ། མཆོད་ཁང་ལས་ཕྱིར་དྲུད་མ་ཐག་ཏུ་མཆོད་ཁང་གི་སྒོ་ཐམས་ཅད་བརྒྱབ།
31 མི་ཚོགས་དེས་ཕོལ་ལོལ་གསོད་རྩིས་བྱས་པ༌ལ། མི་གཞན་གྱིས་སྟོང་དཔོན་ལ་ཡེ་རུ་སཱ་ལེམ་ཡོངས་སུ་ཟིང་ཆ་བྱུང་བའི་གཏམ་ཞུས་པ༌དང༌།
32 སྟོང་དཔོན་གྱིས་མྱུར་དུ་བརྒྱ་དཔོན་འགའ་དང་དམག་མི་ཁྲིད་ནས་བརྒྱུགས་ཏེ་མི་ཚོགས་ཀྱི་གམ་དུ་སླེབས། དེ་རྣམས་ཀྱིས་སྟོང་དཔོན་དང་དམག་མི་མཐོང་བ་དང་ཕོལ་ལོལ་ལ་གཅར་རྡུང་བྱེད་མཚམས་བཞག་གོ།
33 དེ་ནས་སྟོང་དཔོན་གྱིས་ཕོལ་ལོལ་བཟུང་བ་དང་ལྕགས་སྒྲོག་གཉིས་ཀྱིས་བསྒྲོག་པའི་བཀའ་བསྒྲགས༌ཤིང༌། ཁོང་སུ་ཡིན་པ་དང་ལས་ཅི་ཞིག་བྱས་པའི་གཏམ་དྲིས་སོ།།
34 མི་ཚོགས་ཀྱི་ཁྲོད་ནས་ཅི་བཤད་འདི་བཤད་མེད་པར་སྐད་ཅོར་བརྒྱབ་པ༌ལ། སྟོང་དཔོན་གྱིས་འུར་སྒྲའི་ཁྲོད་ནས་གནས་ཚུལ་དངོས་དེ་ཤེས་མ་ཐུབ༌པས། ཕོལ་ལོལ་དམག་སྒར་དུ་འཁྲིད་པའི་བཀའ་བབས་སོ།།
35 དེ་ནས་ཕོལ་ལོལ་ཁྲིད་དེ་རྡོ་སྐས་ཡོད་སར་སླེབས་པ༌དང༌། མི་ཚོགས་ཀྱིས་ཀྱང་རྗེས་དེད་ནས་འཚང་ཁ་ཤིག་ཤིག་བརྒྱབ་པས། དམག་མི་རྣམས་ཀྱིས་ཁོང་ཉིད་ཡར་བཏེགས་ནས་མི་འགྲོ་ཐབས་མེད་བྱུང༌།
36 མི་ཚོགས་རྗེས་སུ་འབྲངས་པ་དང་ཁོ་རང་སོད་ཅིག་ཅེས་འུར་བརྒྱབ་པའོ།།
37 ཕོལ་ལོལ་དམག་སྒར་གྱི་ནང་དུ་འཁྲིད་བཞིན་པའི་དུས༌སུ། ཁོང་གིས་སྟོང་དཔོན་ལ་འདི་སྐད༌དུ། ངས་ཁྱེད་ལ་གཏམ་ཞིག་ཞུས་ན་ཆོག་གམ་ཞེས་གསུངས་པ༌ན། དམག་དཔོན་ན༌རེ། ཁྱོད་ཀྱིས་གྷི་རིག་སྐད་སྨྲ་ཤེས༌སམ།
38 དེས་ན་ཁྱོད་ནི་སྔོན་ཆད་མི་རྣམས་ལ་ཟིང་ཆ་ལངས་སུ་བཅུག་པ་དང་། ལག་དམར་བཞི་སྟོང་དབེན་གནས་སུ་ཁྲིད་པའི་ཨེ་ཅིབ་པ་དེ་མ་ཡིན་ནམ་ཞེས་དྲིས༌སོ།།
39 ཡང་ཕོལ་ལོལ་གྱིས་འདི་སྐད༌དུ། ང་རང་ཀི་ལིག་ཡཱ་ཡུལ་གྱི་ཐཱར་ཟི་ནས་སྐྱེས་པའི་ཡ་ཧུ་དཱ་པ་ཞིག་ཡིན༌ལ། གྲོང་ཁྱེར་ཕལ་བ་ཞིག་གི་མི་མ་ཡིན༌ནོ།། ང་མི་འདི་རྣམས་ལ་གཏམ་ཞིག་བརྗོད་དུ་འཇུག་པར་མཛོད་ཅེས་ཞུས་པ༌ལ།
40 སྟོང་དཔོན་གྱིས་ཀྱང་ཆོག་མཆན་གནང༌བས། ཕོལ་ལོལ་རྡོ་སྐས་ཀྱི་སྟེང་དུ་ཡར་ལངས་ནས་མི་རྣམས་ལ་ཕྱག་བརྡ་བྱས་པ་དང་མི་ཐམས་ཅད་དལ་ཅག་གེར་བསྡད༌དོ།།