ལེའུ་ཉེར་བརྒྱད༌པ།
ཕོལ་ལོལ་དང་བཅས་པ་མཱལ་ཏ་གླིང་ཕྲན་དུ་འབྱོར༌བ།
1 ངེད་རྣམས་ཉེན་ཁ་ལས་ཐར་བ་དང་ད་གཟོད་གླིང་ཕྲན་དེའི་མིང་ལ་མཱལ་ཏ་ཞེས་ཟེར་བ་ཤེས་སོ།།
2 གླིང་ཕྲན་དེའི་ཡུལ་མི་རྣམས་ཀྱིས་ངེད་ཅག་ལ་དགའ་བསུ་ཆེན་པོ༌བྱས་ཤིང་། དུས༌དེར། ཆར་བ་བབས་པ་དང་གནམ་གཤིས་ཀྱང་འཁྱགས་པས་མི་དེ་རྣམས་ཀྱིས་མེ་སྦར་ནས་ངེད་ཅག་ལ་སྣེ་ལེན་བྱས་སོ།།
3 སྐབས༌དེར། ཕོལ་ལོལ་གྱིས་མེ་ཤིང་ཕོན་པོ་ཞིག་བླངས་ནས་མེའི་སྟེང་དུ་བཞག་པ་དང་། དུག་སྦྲུལ་ཞིག་ཚ་བས་མ་བཟོད་པར་ཕྱིར་ཐོན་ཏེ་ཁོང་གི་ཕྱག་ལ་སོ་བཏབ་ནས་འབྱར་བ་རེད།
4 ཡུལ་མི་རྣམས་ཀྱིས་དུག་སྦྲུལ་དེ་ཁོང་གི་ཕྱག་ནས་མར་དཔྱངས་ཡོད་པ་མཐོང་སྟེ་ཕན་ཚུན་ན༌རེ། མི་འདི་ནི་ལག་དམར་ཞིག་ཡིན་པར་གདོན་མི་ཟ༌སྟེ། ཁོ་རང་རྒྱ་མཚོ་ལས་ཐར་ནའང་བདེན་ལུགས་ཀྱིས་ཁོ་རང་གསོན་དུ་མི་འཇུག་ཅེས་སྨྲས་སོ།།
5 འོན༌ཀྱང༌། ཕོལ་ལོལ་གྱིས་དུག་སྦྲུལ་དེ་མེའི་ནང་དུ་གཡུགས་ཤིང་རང་ལ་གནོད་པ་ཅི་ཡང་མ་བྱུང༌བ་རེད།
6 ཡུལ་མི་རྣམས་ཀྱིས་ཁོང་གི་ལུས་པོ་སྐྲངས༌པའམ། ཡང་ན་གློ་བུར་ས་ལ་འགྱེལ་ནས་འཆི་ངེས་པར་སྙམ༌ཞིང༌། ཡུན་རིང་ལ་བལྟས་ཀྱང་ཁོང་ལ་གནོད་པ་ཅི་ཡང་མེད་པ་མཐོང༌རྗེས། བློ་འགྱུར་ནས་ཁོང་ནི་ལྷ་ཞིག་རེད་ཅེས་སྨྲས་སོ།།
7 གནས་དེ་དང་ཐག་མི་རིང་བའི་སར། གླིང་ཕྲན་འདིའི་འགོ་དཔོན་ཕུབ་ལེ་ཨོ་བྱ་བའི་ས་ཞིང་ཞིག་ཡོད༌ཅིང༌། ཁོས་ངེད་ཅག་བསུས་ཏེ་ཉིན་གསུམ་ལ་སྣེ་ལེན་གཟབ་རྒྱས་བྱས།
8 དུས༌དེར། ཕུབ་ལེ་ཨོ་ཡི་ཕ་ལ་ཚ་ནད་དང་བཤལ་ནད་བྱུང་སྟེ་ཉལ་ཡོད༌པས། ཕོལ་ལོལ་ཁྱིམ་ནང་དུ་ཕེབས་ནས་དཀོན་མཆོག་ལ་གསོལ་བ་བཏབ༌ཅིང༌། ཁོའི་ལུས་ལ་ཕྱག་ཟུང་བཞག་སྟེ་ནད་གསོས་སོ།།
9 དེ་ནས་གླིང་ཕྲན་སྟེང་གི་ནད་པ་གཞན་རྣམས་ཀྱང་ཡོང་བ་དང་ནད་ལས་ཐར་བ་རེད།
10 མི་དེ་རྣམས་ཀྱིས་གང་ཅིའི་ཐད་ནས་ངེད་ཅག་ལ་གུས་པ་བྱས་ཤིང༌། གྲུ་གཟིངས་སྐྱོད་རན་པའི་དུས་སུའང་ངེད་ཅག་ལ་མཁོ་བ་ཐམས་ཅད་གྲུའི་ནང་དུ་བསྐྱལ་ཡོང༌ངོ༌།།
རོ་མཱ་གྲོང་ཁྱེར་དུ་སླེབས༌པ།
11 དེ་ནས་ཟླ་བ་གསུམ་འགོར༌རྗེས། ངེད་རྣམས་ཨ་ལིག་སན་དྲི་ཡཱ་ཡི་གྲུ་གཟིངས་ལ་བསྡད་དེ་སོང་བ་ཡིན། གྲུ་དེའི་གྲུ་མགོར་ལྷའི་བུ་མཚེ་མ་ ཞེས་པའི་རྟགས་བཀོད༌ཡོད། དགུན་ཁར་གྲུ་གཟིངས་དེ་གླིང་ཕྲན་འདི་རུ་བསྡད་ཅིང་།
12 དེ་ནས་སི་ར་ཀུར་སླེབས་ནས་ཉིན་གསུམ་ལ་བསྡད་དོ།།
13 ཡང་དེ་ནས་མཚོ་ལམ་བརྒྱུད་དེ་རཱ་ག་ཨུམ་དུ་སླེབས་ནས་ཉིན་གཅིག་ལ་བསྡད་པ་དང་ལྷོ་རླུང་གཡུགས༌པས། དེའི་ཕྱི༌ཉིན་ཕུ་ཏོ་ལེ་རུ་ཕྱིན་པ་རེད།
14 གནས་དེར་སྤུན་ཟླ་རྣམས་དང་ཕྲད་ཅིང་ཁོ་རྣམས་ཀྱི་གདན་ཞུ༌ལྟར། ངེད་རྣམས་ཉིན་བདུན་ལ་ཁོ་རྣམས་དང་མཉམ་དུ་བསྡད་རྗེས་རོ་མཱ་ཡི་ལམ་ལ་ཆས་སོ།།
15 དེ་ནས་རོ་མཱ་ཡི་སྤུན་ཟླ་རྣམས་ཀྱིས་ངེད་ཅག་གི་གནས་ཚུལ་ཐོས༌ཏེ། ཨ་ཕེ་ཨོ་ཁྲོམ་ར་དང་མགྲོན་ཁང་གསུམ་ཞེས་པའི་གནས་སུ་ཡོང་ནས་ངེད་ཅག་ལ་བསུ་བ་བྱས། དེ་ནས་ཕོལ་ལོལ་གྱིས་མི་དེ་རྣམས་མཐོང་སྟེ་དཀོན་མཆོག་ལ་བཀའ་དྲིན་ཞུས་པ་དང་བློ་སེམས་བདེ་ཞིང་སྤོབས་པ་དང་ལྡན་པར་གྱུར་ཏོ།།
16 དེ་ནས་རོ་མཱ་གྲོང་ཁྱེར་དུ་སླེབས་པ་དང་ཕོལ་ལོལ་ལ་ཆོག་མཆན་ཐོབ་སྟེ། སྲུང་དམག་གཅིག་དང་མཉམ་དུ་མི་སྒེར་གྱི་ཁང་པ་ཞིག་ལ་སྡོད་དུ་བཅུག༌གོ།
ཕོལ་ལོལ་གྱིས་རོ་མཱ་གྲོང་ཁྱེར་དུ་ཆོས་གསུངས༌པ།
17 དེ་ནས་ཉིན་གསུམ་འགོར༌རྗེས། ཕོལ་ལོལ་གྱིས་ཡ་ཧུ་དཱ་པའི་དཔོན་རིགས་རྣམས་བོས་ཤིང་དེ་རྣམས་ལྷན་དུ་འདུས་ཚེ་འདི་སྐད༌དུ། སྤུན་ཟླ༌རྣམ་པ། ངས་རང་རེའི་ཡུལ་གྱི་མི་རྣམས་དང་བདག་ཅག་གི་ཕ་མེས་ཀྱི་ལུགས་སྲོལ་དང་འགལ་བའི་ལས་ཅི་ཡང་མ་བྱས༌ཀྱང༌། ང་རང་ཡེ་རུ་སཱ་ལེམ་ནས་བཙོན་དུ་བཅུག་ཅིང་རོ་མཱ་པའི་ལག་ཏུ་སྤྲད་པ༌དང༌།
18 ང་རང་ལ་སྲོག་ཆད་གཅོད་དགོས་པའི་ཉེས་པ་ཅི་ཡང་མེད༌པས། དེ་དག་གིས་འདྲི་གཅོད་བྱས་རྗེས་ང་རང་བཙོན་ལས་དགྲོལ་བར་བསམས༌ནའང༌།
19 ཡ་ཧུ་དཱ་པ་རྣམས་ཀྱིས་དོན་དེར་དགྲ་བྱས༌པས། ངས་ཀྱང་སེ་བཟིར་ལ་གཏུག་བཤེར་མི་ཞུ་ཀ་མེད༌བྱུང༌། འོན༌ཀྱང༌། རང་གི་མི་རིགས་གཏུག་བཤེར་བྱེད་པའི་དོན་ཅི་ཡང༌མེད་དོ།།
20 དེའི༌ཕྱིར། ངས་ཁྱོད་རྣམས་བོས་ཏེ་ཁ་རི་ཁ་ཐུག་ཏུ་གཏམ་སྨྲ་བར་འདོད། སྤྱིར་ང་རང་ནི་ཡེས་ར་ཨེལ་གྱི་མི་རྣམས་ཀྱི་རེ་བ་དེའི་ཆེད་དུ་ལྕགས་སྒྲོག་གིས་བཀྱིགས་པ་ཡིན་ཞེས་གསུངས་པ༌ན།
21 དེ་རྣམས་ན༌རེ། ངེད་ཅག་ལ་ཡ་ཧུ་དཱའི་ཡུལ་ནས་ཁྱོད་ཀྱི་སྐོར་གླེང་བའི་འཕྲིན་ཡིག་མ་འབྱོར༌ལ། གནས་འདིར་ཡོང་བའི་སྤུན་ཟླ་གཞན་གྱིས་ཀྱང་ཁྱོད་ཀྱི་སྐོར་ལ་གཏམ་ངན་སྨྲས་པ་མེད།
22 འོན་ཀྱང་ངེད་རྣམས་ཀྱིས་ད་ལྟ་ཁྱོད་ཀྱི་བསམ་འཆར་ག་འདྲ་ཡིན་པར་མཉན་འདོད༌དེ། རྒྱུ་མཚན་ནི་ཆོས་ལུགས་གྲུབ་མཐའ་དེ་ལ་ཡུལ་ཀུན་གྱི་མི་རྣམས་ཀྱིས་དམའ་འབེབས་བྱེད་བཞིན་ཡོད་པ་ངེད་ཅག་གིས་ཤེས་པ་ཡིན་ཞེས་སྨྲས༌སོ།།
23 དེ་ནས་དཔོན་རིགས་རྣམས་ཀྱིས་ཕོལ་ལོལ་དང་ཉི་ཆད་བགོས༌ཤིང༌། ཉིན་དེར་མི་མང་པོའང་ཁོང་གི་ཤག་ཏུ་ཡོང་བ༌དང༌། ཕོལ་ལོལ་གྱིས་ཞོགས་པའི་དུས་ནས་མཚན་མོའི་བར་དུ་དོན་རྣམས་འགྲེལ་ཞིང་དཀོན་མཆོག་གི་རྒྱལ་སྲིད་ལ་བདེན་དཔང་བྱས་པ༌དང༌། མོ་ཤེའི་བཀའ་ཁྲིམས་དང་ལུང་སྟོན་པ་རྣམས་ཀྱི་མདོ་ལས་སྐྱབས་མགོན་ཡེ་ཤུའི་སྐོར་གྱི་ཆོས་གསུངས་ཏེ་ཁོ་རྣམས་ལ་སྐུལ་མ་མཛད་དོ།།
24 ཁོང་གི་གསུང་དེར་ལ་ལ་ཡིད་ཆེས་ཤིང་ལ་ལ་ཡིད་མ་ཆེས་སོ།།
25 དེ་རྣམས་ཕན་ཚུན་ལྟ་བ་མ་མཐུན་པར་སོ་སོར་གྱེས༌ཤིང༌། སོ་སོར་མ་གྱེས་པའི་སྔོན་ལ་ཕོལ་ལོལ་གྱིས་འདི་སྐད༌དུ། དམ་པའི་ཐུགས་ཉིད་ཀྱིས་ལུང་སྟོན་པ་ཡེ་ཤ་ཡཱ་བརྒྱུད་ནས་ཁྱོད་ཅག་གི་ཕ་མེས་ལ་ལེགས་པར་གསུངས༌ཤིང༌།
26 འདི་སྐད༌དུ།
ཁྱོད་ཀྱིས་མི་རྣམས་དེ་ལ་འདི་ལྟར༌ཤོད།།
ཁྱོད་ཚོས་རྣ་བས་ཐོས་ཀྱང་དོན་མི༌རྟོགས།།
འདྲེན་བྱེད་མིག་གིས་མཐོང་ཡང་ཤེས་མི༌འགྱུར།།
27 དེ་རྣམས་སེམས་ནི་གྱོང་པོར་གྱུར་པ༌དང༌།།
རྣ་བས་མི་མཉན་མིག་ཟུང་བཙུམས་པས༌སོ།།
དེ་ལྟར་མིན་ཚེ་མིག་གིས་མཐོང་བ་དང་༎
རྣ་བས་ཐོས༌ཤིང་བློ་ཡིས་རྟོགས་པ་དང་༎
ཕྱིར་དུ་འཁོར་ནས་ངས་ཀྱང་དེ་རྣམས་ནི༎
གསོ་ཞིང་དྲག་པར་བྱེད་པ་ཡིན་ལགས་སོ༎
ཞེས༌པའོ།།
28 དེའི༌ཕྱིར། དཀོན་མཆོག་གི་ཐར་པའི་ཆོས་འདི་ནི་ད་ལྟ་ཕྱི་ཕྱོགས་པ་རྣམས་ལ་གསུངས༌ཤིང༌། དེ་རྣམས་ཀྱིས་ཀྱང་མཉན་ཞིང་དང་དུ་ལེན་ངེས་པ་ཁྱོད་ཅག་གིས་ཤེས་དགོས་ཞེས་གསུངས་སོ།།
29 ཁོང་གིས་དེ་སྐད་གསུངས་པ་དང་ཡ་ཧུ་དཱ་པ་རྣམས་ཀྱིས་དོན་དེར་རྩོད་གླེང་ཆེན་པོ་བྱེད་བཞིན་སོང༌ངོ༌།།
30 དེ་ནས་ཕོལ་ལོལ་མཆོག་རང་གིས་གླས་པའི་ཁང་པ་ནས་ལོ་གཉིས་ཏག་ཏག་ལ་བཞུགས༌ཤིང༌། རང་གི་ཁང་པའི་ནང་དུ་ཡོང་བའི་མི་ཐམས་ཅད་ལ་སྣེ་ལེན་བྱས་པ༌དང༌།
31 སྙིང་རུས་བསྐྱེད་ནས་དཀོན་མཆོག་གི་རྒྱལ་སྲིད་ཀྱི་ཆོས་བསྒྲགས་པ༌དང༌། གཙོ་བོ་ཡེ་ཤུ་མཱ་ཤི་ཀའི་སྐོར་གསུངས་པ་ལ་བར་ཆད་ཅི་ཡང་མ་བྱུང༌ངོ༌།། །།