ལེའུ་བཞི་པ།
ཡེས་ར་ཨེལ་པ་རྣམས་དཀོན་མཆོག་གི་ཕྱོགས་སུ་མ་འཁོར་བའི་སྐོར།
1 ཁྱོད་ཅག་དབུལ་པོར་བརྙས་བཅོས་དང་། དཀའ་སྡུག་ཅན་ལ་བཙན་གནོན་བྱེད་མཁན། ཡང་རང་གི་སྐྱེས་པར་ན་རེ། ངེད་རྣམས་ཀྱིས་འཐུང་བའི་ཕྱིར་དུ་ཆང་འཁྱེར་ཤོག་ཅེས་སྨྲ་བའི་སཱ་མར་ཡའི་རི་ལ་གནས་པའི་པཱ་ཤན་གྱི་བ་མོ་དང་འདྲ་བ་དག་གིས་གཏམ་འདི་ལ་ཉོན་ཅིག
2 གཙོ་བོ་ཡ་ཝཱེས་ཁོང་གི་དམ་པ་ཉིད་དཔང་དུ་བཙུགས་ནས་དབུ་མནའ་བཞེས་ཏེ་འདི་སྐད་དུ། ལྟོས་ཤིག ཁྱོད་ཅག་འཛིན་པའི་ཉིན་སླེབས་ལ་ཉེ་བ་དང་། མི་ཡིས་ཁྱོད་རྣམས་ལྕགས་ཀྱུས་བཟུང་ནས་འཁྱེར་འགྲོ་ཞིང་། ཆེས་མཐའ་མ་དེ་ཡང་མི་ཡིས་ཉ་ཀྱུས་བཟུང་ནས་འཁྱེར་འགྲོའོ། །
3 ཁྱོད་རྣམས་མཁར་གྱང་གི་བུ་ག་བརྒྱུད་དེ་ཕྱི་རུ་འདྲུད་ཅིང་། ཧར་མོན་དུ་འདོར་བར་འགྱུར་ཞེས་གསུངས་ཏེ། དཀོན་མཆོག་ཡ་ཝཱེས་འདི་སྐད་གསུངས་སོ། །
4 ཁྱོད་རྣམས་པེད་ཨེལ་དུ་སོང་ནས་སྡིག་པ་གསོགས་དང་། གིལ་གལ་དུ་ཉེས་ཆད་ཇེ་མང་དུ་ཐོངས་ཤིག ནངས་མོ་རེ་རེར་རང་གི་མཆོད་རྫས་ཕུལ་ལ། ཉིན་མོ་གསུམ་རེར་རང་གི་བཅུ་ཆའི་གཅིག་ཕུལ་ཞིག
5 ཀྱེ་ཡེས་ར་ཨེལ་པ་རྣམས། བཀའ་དྲིན་གྱི་མཆོད་པ་རུ་སྐྱུར་ལྡན་པའི་བག་ལེབ་ཕུལ་ཞིག་དང་། ཡིད་མོས་མཆོད་པ་ཕུལ་བ་སྐད་མཐོན་པོས་སྒྲོགས་ཤིག ཅིའི་ཕྱིར་ཞེ་ན། འདི་ལྟར་སྤྱོད་པར་ཁྱོད་དགའོ་ཞེས་གཙོ་བོ་ཡ་ཝཱེས་གསུངས་སོ། །
6 ཡང་ངས་ཁྱོད་ཅག་གི་གྲོང་ཁྱེར་ཐམས་ཅད་ཀྱི་མི་ལ་བཟའ་བཏུང་མེད་པ་དང་། གནས་སོ་སོ་རུ་འབྲུ་རིགས་དཀོན་པར་བྱས་ཀྱང་། ཁྱོད་རྣམས་ངའི་ཕྱོགས་སུ་མ་འཁོར་ཞེས་དཀོན་མཆོག་ཡ་ཝཱེས་འདི་སྐད་གསུངས་པ་དང་།
7 ངས་ཁྱོད་རྣམས་ལ་སྟོན་ཐོག་ལེན་པའི་ཟླ་གསུམ་གྱི་སྔོན་ལ་ཆར་ཆུ་མ་བྱིན་པར། གྲོང་ཁྱེར་གཅིག་ལ་ཆར་ཆུ་བྱིན་ཡང་། གྲོང་ཁྱེར་གཞན་པར་མ་བྱིན་ཏེ། ས་ཆ་ཞིག་ལ་ཆར་ཆུ་བྱིན་ཡང་། ས་ཆ་གཞན་པར་ཆར་ཆུ་མ་བྱིན་པར་སྐམ་པས་ན།
8 གྲོང་ཁྱེར་གཉིས་སམ་གསུམ་གྱི་མི་རྣམས་གྲོང་ཁྱེར་གཅིག་ལ་ཆུ་འཐུང་དུ་འོངས་ན་ཡང་ཆུས་མ་ངོམས། དེ་འདྲ་ཡིན་ཡང་ཁྱོད་རྣམས་ངའི་ཕྱོགས་སུ་མ་འཁོར་ཞེས་དཀོན་མཆོག་ཡ་ཝཱེས་འདི་སྐད་གསུངས།
9 ངས་ཐེངས་མང་པོར་བཙའ་ཐན་དང་ཧམ་སྤུ་ཡིས་ཁྱོད་ཀྱི་ལྡུམ་ར་དང་རྒུན་ཚལ་ལ་བརྡུངས་ཏེ། ཆ་ག་པ་ལ་ཁྱོད་ཅག་གི་སེ་ཡབ་ཤིང་དང་། སྐྱུ་རུ་ཤིང་ཟོས་ཚར་བཅུག་ཀྱང་ཁྱོད་རྣམས་ངའི་ཕྱོགས་སུ་མ་འཁོར་ཞེས་དཀོན་མཆོག་ཡ་ཝཱེས་འདི་སྐད་གསུངས་སོ། །
10 ཨེ་ཅིབ་ཡུལ་ལ་བྱུང་བ་དང་འདྲ་བའི་རིམས་ནད་ངས་ཁྱོད་ཀྱི་ཁྲོད་དུ་སླེབས་བཅུག་སྟེ། ངས་ཁྱོད་ཀྱི་གཞོན་ནུ་རྣམས་རལ་གྲིས་བཀུམ་ཞིང་། ཁྱོད་ལས་རྟ་རྣམས་ཀྱང་ཕྲོགས་པ་དང་། ངས་ཁྱོད་ཀྱི་དམག་སྒར་ནང་དུ་རོ་ཡི་དྲི་ངན་འཐུལ་བར་བཅུག་ཀྱང་ཁྱོད་རྣམས་ངའི་ཕྱོགས་སུ་མ་འཁོར་ཞེས་དཀོན་མཆོག་ཡ་ཝཱེས་འདི་སྐད་གསུངས་སོ། །
11 ངས་སཱ་དོམ་དང་གཱ་མོ་ར་གཉིས་ཕམ་པར་བརྒྱབ་པ་བཞིན་དུ་ཁྱོད་རྣམས་ཀྱང་ཕམ་པར་རྒྱག་སྟེ། ཁྱོད་ཅག་ནི་མེ་ལས་ཕྱུང་བའི་བུད་ཤིང་ཞིག་དང་འདྲ་ཡང་ཁྱོད་རྣམས་ངའི་ཕྱོགས་སུ་མ་འཁོར།
12 དེ་བས་ཀྱེ་ཡེས་ར་ཨེལ། ངས་ཁྱོད་ལ་འདི་ལྟར་བྱ་སྟེ། ཀྱེ་ཡེས་ར་ཨེལ་ངས་ཁྱོད་ལ་དེ་ལྟར་བྱེད་པས། ཁྱོད་རང་གི་དཀོན་མཆོག་དང་མཇལ་བར་གྲ་སྒྲིག་བྱོས་ཤིག་ཅེས་དཀོན་མཆོག་ཡ་ཝཱེས་འདི་སྐད་གསུངས།
13 ལྟོས་དང་། ཁོང་ནི་རི་བོ་རྣམས་མཛད་མཁན་དང་། རླུང་མཛད་མཁན། ཉིད་ཀྱི་ཐུགས་དགོངས་མི་ལ་མངོན་པར་མཛད་མཁན་ཡིན་ཞིང་། ཁོང་ནི་ཞོགས་པ་མུན་པར་མཛད་མཁན་དང་། ས་གཞིའི་མཐོ་སར་ཞབས་འཆག་མཁན་ཡིན་པས། ཁོང་གི་མཚན་ནི་དཔུང་ཚོགས་ཀུན་གྱི་དཀོན་མཆོག་ཡ་ཝཱེ་ལགས་སོ། །