ལེའུ་བརྒྱད༌པ།
མཆོད༌རྫས་ཀྱི་སྐོར།
1 དེ་ཡང་སྐུ་འདྲ་ལ་ཕུལ་བའི་མཆོད་རྫས་སྐོར་སྨྲས་ན། བདག་ཅག་ཐམས་ཅད་ལ་ཤེས་བྱ་ངེས་ཅན་ཞིག་ཡོད་པ་དེ་བདག་ཅག་གིས་ཤེས་སོ།། འོན༌ཀྱང༌། ཤེས་བྱ་ཡིས་ང་རྒྱལ་སྐྱེ་རུ་འཇུག༌ཅིང༌། བྱམས་པ་ཡིས་མི་སྐྱེད་བསྲིང་བྱེད༌པ་ཡིན།
2 མི་ཞིག་གིས་རང་ཉིད་ནི་ཤེས་མཁན་ཞིག་ཡིན་སྙམ༌ན། ཁོས་ཤེས་དགོས་པ་ལྟར་ད་དུང་ཅི་ཡང་མི་ཤེས།
3 མི་ཞིག་གིས་དཀོན་མཆོག་ལ་གཅེས་པར་བྱེད༌ན། དཀོན་མཆོག་གིས་མི་དེ་ཉིད་མཁྱེན༌ཏོ།།
4 ད་ལྟ་སྐུ་འདྲ་ལ་ཕུལ་བའི་མཆོད་རྫས་བཟའ་བའི་སྐོར་བརྗོད༌ན། འཇིག་རྟེན་འདིའི་སྐུ་འདྲ་ལ་སྙིང་པོ་ཅི་ཡང་མེད་པ༌དང༌། དཀོན་མཆོག་གཅིག་རང་ལས་གཞན་མེད་པ་བདག་ཅག་གིས་ཤེས༌སོ།།
5 ཅིའི་ཕྱིར་ཞེ་ན། གནམ་ས་གཉིས་སུ་ལྷ་བྱ་བ་ཞིག་ཡོད་ཟེར་ཀྱང་། ལྷ་མང་པོ་དང་གཞི་བདག་མང་པོ་ཡོད༌པའི་དབང་དུ་བཏང་ནའང༌།
6 བདག་ཅག་ལ་དཀོན་མཆོག་གཅིག་རང་ཡོད་པ་ནི་ཡབ་ལགས༌ཏེ། འཇིག་རྟེན་གྱི་དངོས་པོ་ཐམས་ཅད་ནི་ཁོང་ནས་བྱུང་ཞིང་། བདག་ཅག་ཀྱང་ཁོང་གི་ཆེད་དུ་གནས་པ་ཡིན། བདག་ཅག་ལ་གཙོ་བོ་གཅིག་རང་ཡོད་པ་ནི་ཡེ་ཤུ་མཱ་ཤི་ཀ་ཡིན༌ཏེ། དངོས་པོ་ཐམས་ཅད་ནི་ཡེ་ཤུ་མཱ་ཤི་ཀ་བརྒྱུད་ནས་བྱུང་བ་དང་། བདག་ཅག་ཀྱང་ཁོང་ལ་བརྟེན་ནས་གནས་པ་ཡིན་ནོ།།
7 འོན༌ཀྱང༌། མི་ཐམས་ཅད་ལ་ཤེས་བྱ་འདི་ཡོད་པ་མིན༌ཏེ། མི་ལ་ལ་ནི་ད་ལྟའི་བར་དུ་སྐུ་འདྲ་ལ་དད་གུས་བྱས་ནས་གོམས་ཡོད༌པས། ཁོ་རྣམས་ཀྱིས་ཟོས་པ་ནི་སྐུ་འདྲ་ལ་ཕུལ་བའི་མཆོད་རྫས་ཡིན་པར་འདོད༌དེ། ཁོ་རྣམས་ཀྱི་སེམས་ཉམས་པ་དང་རང་ཉིད་ཀྱང་མི་གཙང་བར་གྱུར་པ་རེད་སྙམ།
8 དོན་དམ་དུ་ཟས་ལ་བརྟེན་ནས་བདག་ཅག་དཀོན་མཆོག་གི་ཐུགས་སུ་འཛིན་པ་མིན༌ཏེ། བདག་ཅག་གིས་ཟས་མ་ཟོས་ཀྱང་གནོད་པ་མེད་ལ་ཟོས་ནའང་ཕན་ཐོགས་མེད་པའི་ཕྱིར༌རོ།།
9 འོན༌ཀྱང༌། ཁྱོད་ཅག་གི་རང་དབང་འདི་དད་པ་བརྟན་པོ་མེད་པ་རྣམས་ལ་བཀག་རྡོ་རུ་མི་འགྱུར་བའི་ཕྱིར་གཟབ་གཟབ༌གྱིས།
10 གལ་ཏེ། དད་པ་མི་བརྟན་པ་ཞིག་གིས་ཤེས་བྱ་དེ་ལྟ་བུ་ལྡན་མཁན་ཁྱོད་ཀྱིས་ལྷ་ཁང་ནས་མཆོད་རྫས་ཟ་བཞིན་ཡོད་པ་མཐོང༌ཞིང་མི་དེའི་སེམས་ཉམས་ཞན་ཡིན་ཚེ། ཁོས་སྙིང་སྟོབས་བསྐྱེད་ནས་སྐུ་འདྲ་ལ་ཕུལ་བའི་མཆོད་རྫས་བཟའ་བ་མ་ཡིན་ནམ།
11 དེ་བས་ཁྱོད་ཀྱི་ཤེས་བྱའི་དབང་གིས་དད་པ་མི་བརྟན་པའི་སྤུན་ཟླ་དེ་འཇིག་པར་བྱས་པ༌དང༌། སྐྱབས་མགོན་མཱ་ཤི་ཀ་ནི་ཁོའི་དོན་དུ་སྐུ་གྲོངས་པ་ཡིན།
12 ཁྱོད་ཀྱིས་དེ་ལྟར་སྤུན་ཟླ་རྣམས་ལ་འགལ་བའི་སྡིག་པ་བྱེད་ཅིང༌། ཁོ་རྣམས་ཀྱི་ཉམས་ཞན་དུ་གྱུར་པའི་སེམས་ལ་གནོད་པ་བསྐྱལ༌ན། སྐྱབས་མགོན་མཱ་ཤི་ཀ་ལ་འགལ་བའི་སྡིག་པའང་བྱས༌པ་ཡིན།
13 དེའི༌ཕྱིར། ཁ་ཟས་ཀྱིས་བདག་གི་སྤུན་ཟླ་སར་འགྱེལ་དུ་འཇུག༌ན། ངས་རང་གི་སྤུན་ཟླ་སར་འགྱེལ་དུ་མི་འཇུག་པའི་ཕྱིར་ནམ་ཡང་ཤ་མི༌ཟའོ།།