འཕྲིན་ཡིག་འདི་ནི་འཕྲིན་ཡིག་དང་པོའི་གཞུག་གི་ཟླ་བ་འགའི་རྗེས་སུ་ཡི་གེར་བཀོད་པ་ཡིན། ཀོ་རིན་ཐུ་པའི་འཕྲིན་ཡིག་དང་པོའི་ནང་བརྗོད་པའི་འགལ་ཟླ་དང་ཉོག་དྲ་དག་ཀོ་རིན་ཐུ་ཆོས་ཚོགས་ཀྱི་ནང་དུ་སྔར་བཞིན་གནས་ཏེ། དགེ་རྒན་རྫུན་མ་དག་གིས་ཕོལ་ལོལ་གྱི་བྱ་སྤྱོད་ཡང་དག་དང་ཁོང་གི་སྐུ་ཚབ་པའི་དབང་ཆ་ལ་རྒོལ་བ་བཏང་ནས། ཁོང་ནི་སྐུ་ཚབ་པ་ངོ་མ་ཞིག་མིན་པ་དང་། ཡེ་རུ་སཱ་ལེམ་གྱི་དབུལ་པོ་དད་ལྡན་རྣམས་ཀྱི་ཆེད་དུ་བསྡུས་པའི་གཞུང་དངུལ་རྣམས་ཁོང་གིས་ལྐོག་ཟ་བྱས་པ་རེད་ཅེས་སྙད་བརྐོས།

འཕྲིན་ཡིག་འདི་ཡི་གེར་འགོད་མཁན་ནི་སྐུ་ཚབ་པ་ཕོལ་ལོལ་ཡིན་པ་དང་། འཕྲིན་ཡིག་འདི་ལ་ཁོང་གི་རྩོམ་སྟངས་ཀྱི་ཁྱད་ཆོས་ལྡན། གཞུང་འདིའི་ནང་དུ་རང་གི་སེམས་སུ་བྱུང་བའི་གནས་ཚུལ་རྣམས་ཇི་མ་ཇི་བཞིན་དུ་བཀོད་ཡོད་པས་འཕྲིན་ཡིག་གཞན་དག་དང་བསྡུར་ན་ཧ་ཅང་མངོན་གསལ་ཡིན། ཞིབ་འཇུག་དང་བདེན་དཔང་མཛད་པ་ལྟར་ན་ཀོ་རིན་ཐུ་པའི་འཕྲིན་ཡིག་དང་པོ་ནི་སྤྱི་ལོ་55ལོའི་དཔྱིད་ཀར་ཡི་གེར་བཀོད་པ་དང་། ཀོ་རིན་ཐུ་པའི་འཕྲིན་ཡིག་གཉིས་པ་ནི་ལོ་དེའི་སྟོན་དུས་སུ་ཡི་གེར་བཀོད་པ་ཡིན་པར་དགོངས།

འཕྲིན་ཡིག་གཞན་དང་བསྡུར་ན་འདིའི་ནང་དུ་ཕོལ་ལོལ་གྱིས་རང་གི་མྱོང་ཚོར་ཤུགས་ཆེན་པོས་བརྗོད་ཡོད་པ་དང་། ཁོང་གི་སེམས་སྐྱོ་བ་ནས་དགའ་སྤྲོ་དཔག་མེད་ཐོབ་པའི་སྐོར་བྲིས་ཡོད། འཕྲིན་ཡིག་འདི་ནི་སྡེ་ཚན་གསུམ་དུ་བཀར་ཡོད་པ་སྟེ།

༼1༽ ལེའུ་དང་པོ་ནས་བདུན་པའི་བར། ཕོལ་ལོལ་གྱིས་རང་གི་འགྲུལ་སྐྱོད་ཀྱི་འཆར་གཞི་ལ་འགྱུར་བ་བཏང་བའི་དགོས་པ་དང་རྒྱུ་མཚན་གསལ་བཤད་གནང་ཡོད།

༼2༽ ལེའུ་བརྒྱད་པ་ནས་དགུ་པའི་བར། ཁོང་གིས་ཀོ་རིན་ཐུ་པ་རྣམས་ལ་རང་ཉིད་གནས་དེར་མ་སླེབས་སྔོན་དུ་ཞལ་འདེབས་བསྡུ་ཆ་བརྒྱབ་ནས་ཚར་དགོས་པའི་སྐུལ་མ་བཏང་ཡོད།

༼3༽ ལེའུ་བཅུ་པ་ནས་བཅུ་གསུམ་པའི་བར། ཁོང་གནས་དེར་སླེབས་ལ་ཉེ་བ་དང་། ཁོང་ནི་སྐུ་ཚབ་པ་ངོ་མ་ཞིག་ཡིན་ལ། གལ་སྲིད་དགོས་པར་གྱུར་ན་སྐུ་ཚབ་པའི་གོ་གནས་བཞིན་སྒྲིག་ཁྲིམས་འཇོག་པར་སྟ་གོན་ཡང་བྱས་ཡོད་པ་བཅས་ནན་གྱིས་བརྗོད་ཡོད།

1. འཕྲིན་ཡིག་གི་ངོ་སྤྲོད་དེ། ཁམས་འདྲི་དང་བཀའ་དྲིན་ཞུ་བ། ༼1:1-11༽

2. ཕོལ་ལོལ་གྱིས་རང་གི་བྱ་སྤྱོད་དང་སྐུ་ཚབ་པའི་ལས་འགན་གསལ་བཤད་བྱས་པ། ༼1:12-7:16༽

3. ཡེ་རུ་སཱ་ལེམ་གྱི་ཡེ་ཤུའི་ཆོས་ལུགས་པ་རྣམས་ལ་ཞལ་འདེབས་ཀྱི་དངུལ་ཕུལ་བ། ༼8:1-9:15༽

4. ཕོལ་ལོལ་གྱིས་རང་ཉིད་སྐུ་ཚབ་པ་ཡིན་པར་བདེན་དཔང་བྱས་པ། ༼10:1-13:10༽

5. མཇུག་སྡོམ། ༼13:11-14༽