༄༅། །སྟོན་པའི་མདོ།
སྟོན་པའི་མདོ་ཞེས་བྱ་བའི་ངོ་སྤྲོད་མདོར་བསྡུས།
ཁ་བྱང་དང་ལོ་རྒྱུས་རྒྱབ་ལྗོངས།
སྟོན་པ་ཞེས་བྱ་བའི་གཞུང་འདིའི་ཁ་བྱང་ནི་ཨིབ་རི་པའི་སྐད་ནས་བྱུང་བ་ཡིན། དེ་ནི་འདུ་འཛོམས་སམ་ཡང་ན་ལྷན་ཚོགས་ཞེས་པའི་དོན་དང་འབྲེལ་བ་ཡོད། ཅིག་བྱས་ན་སྟོན་པ་ཁོང་ལ་ལྷན་ཚོགས་ཀྱི་གོ་གནས་ཡོད་ཀྱང་སྲིད། གྷི་རིག་གི་སྐད་དུ་བསྒྱུར་པའི་ཞལ་ཆད་རྙིང་པ་ལ་སིབ་ཐུ་ཨ་ཀྱན་ཏི་༼Septuagint༽ཞེས་ཟེར། དབྱིན་ཡིག་གི་འགྱུར་གྱི་ཁ་བྱང་མང་ཤོས་ཨེ་ཁི་ལེ་ཟི་ཨ་ཐི་སི་༼Ecclesiastes༽ཞེས་པའི་གྷི་རིག་གི་ཐ་སྙད་འདི་ལས་སྒྲ་བསྒྱུར་བྱས་པ་རེད།
ཡི་གེར་འགོད་མཁན་དང་འགོད་དུས།
གཞུང་འདིའི་ནང་དུ་ཡི་གེར་བཀོད་པའི་དུས་ནམ་ཡིན་པ་དང་ཡི་གེར་འགོད་མཁན་སུ་ཡིན་གང་ཡང་བརྗོད་མེད་ནའང་། དུམ་མཚམས་འགའ་ཤས་ཀྱི་ཚིག་འགྲོས་ལ་བལྟས་ན་གཞུང་འདི་ཡི་གེར་འགོད་མཁན་རྒྱལ་པོ་སོ་ལོ་མོན་ཡིན་པ་གསལ་པོ་རེད། མཁས་པ་འགའ་ཞིག་གིས་གཞུང་འདི་ཡི་གེར་བཀོད་པའི་ལོ་ཚིགས་ནི་སྤྱི་ལོ་སྔོན་གྱི་དུས་རབས་གསུམ་པའི་ནང་ཡིན་པར་གསུངས་ནའང་། གལ་ཏེ་སོ་ལོ་མོན་གྱིས་གཞུང་འདི་ཡི་གེར་བཀོད་པའི་དབང་དུ་བཏང་ན། བཀོད་པའི་ལོ་ཚིགས་ནི་སྤྱི་ལོ་སྔོན་གྱི་དུས་རབས་བཅུ་པའི་ནང་ཡིན་དགོས་པ་རེད།
བརྗོད་སྙིང་དང་གསུང་འཕྲིན།
མི་ཚེའི་སྙིང་པོའི་སྐོར་ནས་གླེང་ན། གལ་སྲིད་དཀོན་མཆོག་ལ་མ་བརྟེན་ན་མི་ཚེ་ལ་རེ་བ་མེད་ཅིང་དོན་སྙིང་གིས་སྟོངས་པ་ཡིན། མི་ཚེའི་ནང་དུ་དཀོན་མཆོག་མེད་ན་གཏན་ནས་ཡིད་ཚིམ་པར་མི་འགྱུར། དེའི་སྐོར་ལེའུ་གཉིས་པའི་ཚིག་རྐང་ཉེར་ལྔ་པར་གསལ་པོར་གསུངས་ཡོད། གཞན་ཡང་མི་ཚེའི་ནང་དུ་དཀོན་མཆོག་ཡོད་ན་རེ་བ་ཆེན་པོ་འབྱུང་ཞིང་། ཁོང་གིས་བདག་ཅག་ལ་གནང་སྦྱིན་སྣ་ཚོགས་གནང་བ་དང་དེ་དག་ཁོང་གི་བཀའ་དྲིན་ལ་བརྟེན་ནས་ཐོབ་དགོས་པ་ཡིན། གནང་སྦྱིན་དེ་དག་བདེ་སྐྱིད་ལྡན་པའི་ངང་སྤྱོད་དགོས། དེའི་སྐོར་ལེའུ་གཉིས་པའི་ཚིག་རྐང་ཉེར་དྲུག་པ་དང་། ལེའུ་བཅུ་གཅིག་པའི་ཚིག་རྐང་བརྒྱད་པ་བཅས་སུ་གསལ་པོར་གསུངས་ཡོད། གཞུང་འདིའི་ནང་དུ་རྒྱལ་པོ་སོ་ལོ་མོན་གྱི་མཚན་ཉིད་རིག་པ་དང་ཆོས་ཀྱི་གཞུང་ལུགས་སྐོར་གྱི་ལྟ་ཚུལ་རྣམས་བཀོད་ཡོད། ཁོའི་མི་ཚེ་ཕལ་ཆེར་དོན་སྙིང་གིས་སྟོངས་པ་དང་། དེའི་རྒྱུ་མཚན་ནི་ཁོས་དཀོན་མཆོག་མ་བསྟེན་པས་རེད།
འཆར་ཟིན།
1. རང་གི་ཆེད་དུ་དངོས་པོ་སྤུངས་ནས་བདེ་སྐྱིད་བསྐྲུན་འདོད་པ་ལ་དོན་སྙིང་མེད་ཅེས་ངོ་སྤྲོད་གྱི་གཏམ་དུ་བརྗོད་ཡོད། ༼1:1-11༽
2. དཀོན་མཆོག་གི་གནང་སྦྱིན་བཞིན་མི་ཚེའི་བདེ་སྐྱིད་ལ་རོལ་དགོས་པའི་སྐོར། ༼1:12-11:6༽
3. སྐྱེ་བོ་རྣམས་ཀྱིས་གཞོན་ནུའི་སྐབས་སུ་འཚོ་བ་སྐྱིད་པོ་རོལ་བའི་འགོ་རྩོམ་པ་དང་ཆབས་ཅིག དཀོན་མཆོག་གིས་ལེགས་ཉེས་ཀྱི་ཁྲིམས་ཐག་གཅོད་ངེས་པ་རྒྱུན་དུ་ཡིད་ལ་འཛིན་དགོས། ༼11:7-12:7༽
4. དད་གུས་ཀྱི་ངང་ནས་དཀོན་མཆོག་ལ་ཡིད་ཆེས་བྱེད་པ་དང་ཁོང་གི་བཀའ་བརྩི་དགོས་ཞེས་མཇུག་གི་གཏམ་དུ་བརྗོད་ཡོད། ༼12:8-14༽
ལེའུ་དང་པོ།
ཐམས་ཅད་སྟོང་པ་ཡིན་པ།
1 ཡེ་རུ་སཱ་ལེམ་གྱི་རྒྱལ་པོ་སྟེ་དཱ་བིད་ཀྱི་སྲས་སྟོན་པ་ལགས་པའི་གཏམ་ནི་འདི་ལྟ་སྟེ།
2 སྟོང་པ་དང་ནི་སྟོང་པའི་སྟོང་པ་སྟེ། ། ཐམས་ཅད་སྟོང་པ་ཡིན་ཞེས་སྟོན་པས་གསུངས། །
3 མི་ཡིས་ཉི་མའི་འོག་ཏུ་སྡུག་མྱངས་ནས། ། དཀའ་བ་སྤྱད་པར་ཕན་ཐོགས་ཅི་ཞིག་ཡོད། །
4 མི་རབས་འདའ་ཞིང་མི་རབས་འབྱུང་མོད་ཀྱང་། ། ས་གཞིར་འགྱུར་བ་མེད་ཅིང་རྟག་ཏུ་གནས། །
5 ཉི་མ་འཆར་ཞིང་ཉི་མ་ནུབ་པ་དང་། ། མཇུག་མཐར་ལམ་སང་ཤར་སའི་གནས་སུ་བཞུད། །
6 རླུང་ནི་ལྷོ་རུ་གཡུག་ཅིང་བྱང་དུ་འཁོར། ། སྐོར་བ་བརྒྱབ་ནས་འཁོར་ཞིང་མཚམས་མི་ཆད།
7 གཙང་པོ་མཐའ་དག་རྒྱ་མཚོར་ཞུགས་ན་ཡང་། ། རྒྱ་མཚོ་ནམ་ཡང་གང་བར་མ་གྱུར་ཏེ། ། གཙང་པོ་ཐོན་སའི་གནས་སུ་ཕྱིར་ལོག་གོ །
8 བྱ་བ་ཀུན་གྱིས་མི་ལ་སུན་སྣང་བསྐྱེད། ། དེ་ནི་མི་ཡིས་བརྗོད་གྱིས་མི་ལང་ངོ་། ། མིག་གིས་བལྟས་ཀྱང་ནམ་ཡང་མི་ངོམས་ལ། ། རྣ་བས་མཉན་ཡང་ཚིམ་པ་ཡེ་ནས་མེད། །
9 སྔར་བྱུང་དོན་རྣམས་ཡང་བསྐྱར་འབྱུང་ངེས་ལ། ། བྱས་ཟིན་དོན་རྣམས་ཡང་བསྐྱར་བྱེད་འགྱུར་བས། ། ཉི་མའི་འོག་ཏུ་གསར་པ་ཅི་ཡང་མེད། །
10 མི་ཡིས་འདི་ནི་གསར་པ་ཡིན་ནོ་ཞེས། ། སྨྲ་བར་ནུས་པའི་བྱ་བ་ཅི་ཡོད་དམ། ། མ་གཞི་དེ་ནི་རང་ཅག་ཡར་སྔོན་ལ། ། སྔ་མོའི་དུས་ནས་ཡོད་པ་ཡིན་ལགས་སོ། །
11 འདས་ཟིན་མི་རབས་སུས་ཀྱང་མི་དྲན་ལ། ། མ་འོངས་འབྱུང་འགྱུར་མི་རབས་དག་ཀྱང་ནི། ། རྗེས་མ་རྣམས་ཀྱིས་དྲན་པར་མི་འགྱུར་རོ། །
སྟོན་པའི་ཉམས་མྱོང་།
12 སྐབས་དེར་སྟོན་པ་བདག་ནི་ཡེ་རུ་སཱ་ལེམ་དུ་ཡེས་ར་ཨེལ་གྱི་རྒྱལ་པོ་བྱེད་དུས།
13 བདག་གིས་རང་གི་ཤེས་རབ་ཀྱིས་གནམ་འོག་ཏུ་བྱུང་བའི་དོན་ཐམས་ཅད་ལ་སེམས་རྣལ་དུ་ཕབ་ནས་བརྟགས་པ་ན། དཀོན་མཆོག་གིས་མི་ལ་ཁུར་བོ་ལྗིད་པོ་གནང་ནས་ཁོ་ཚོར་དཀའ་སྡུག་མྱང་བར་མཛད་པའོ། །
14 ངས་ཉི་མའི་འོག་ཏུ་བྱུང་བའི་དོན་ཐམས་ཅད་ལ་བལྟས་པ་ན། ཐམས་ཅད་སྟོང་པ་ཡིན་པ་དང་། རླུང་ལ་ཞགས་པ་འཕེན་པ་ཙམ་ཡིན་པ་རྟོགས།
15 འཁྱོག་པོ་ཡིན་པ་བསྲང་མི་ནུས་ལ། མེད་པ་དེ་རྩི་བར་ཡང་མི་ནུས།
16 ངའི་སེམས་སུ་ང་ལ་ཤེས་རབ་ཆེན་པོ་ཐོབ་ཅིང་། ངའི་ཡར་སྔོན་དུ་ཡེ་རུ་སཱ་ལེམ་ལ་དབང་སྒྱུར་མཁན་ཐམས་ཅད་ལས་ཀྱང་ལྷག་པ་ཡིན་ཏེ། ངའི་སེམས་སུ་ཤེས་རབ་དང་ཤེས་བྱ་ཉམས་ལེན་ཐོབ་བྱུང་སྙམ།
17 བདག་གིས་ཡང་བློ་སེམས་རྩེ་གཅིག་གིས་ཤེས་རབ་དང་ཤེས་བྱ་དང་། ཁེངས་དྲེགས་དང་བླུན་རྨོངས་ཅི་ཡིན་པར་ཞིབ་ཏུ་བརྟགས་པ་ན། ད་གཟོད་དེ་ཡང་རླུང་ལ་ཞགས་པ་འཕེན་པ་ཙམ་ཡིན་པ་རྟོགས་བྱུང་།
18 ཅི་ལ་ཞེ་ན། ཤེས་རབ་འཕེལ་ན་སེམས་སྡུག་དེ་ལས་མང་ཞིང་། ཤེས་བྱ་མང་ན་མྱ་ངན་དེ་ལས་ཆེ་བ་འོ། །