ལེའུ་བཅུ་གཉིས་པ།
1 ཁྱོད་ལོ་ན་གཞོན་པ་དང་རྒས་པའི་ཉིན་མོ་སྟེ། ང་ལ་དགའ་སྤྲོ་གང་ཡང་མེད་ཟེར་བའི་ཉིན་དེ་ད་དུང་མ་སླེབས་པའི་སྔོན་ལ། རང་ཉིད་མཛད་མཁན་གཙོ་བོ་དྲན་པར་འོས།
2 ཉི་མ་དང་འོད། ཟླ་བ་དང་སྐར་མ་བཅས་འགྲིབ་པ་དང་། ཆར་བའི་རྗེས་སུ་སྤྲིན་རྣམས་ཕྱིར་འཁོར་བའི་བར་དུ་མ་སྒུག་ཅིག
3 སྐབས་དེར་ཁང་པ་སྲུང་མཁན་འདར་ཞིང་སྟོབས་ཅན་རྣམས་མགོ་བསྒུར་བ་དང་། རང་འཐག་སྐོར་མཁན་རྣམས་ཀྱིས་མི་ཉུང་བའི་རྐྱེན་གྱིས་ལས་མཚམས་འཇོག་ཅིང་། དཀར་ཁུང་ལས་ཕར་ལྟ་མཁན་རྣམས་ཀྱི་མིག་མདངས་ཀྱང་ཉམས་པར་འགྱུར་ཏེ།
4 སྲང་ལམ་གྱི་སྒོ་རྣམས་བརྒྱབ་པ་དང་རང་འཐག་གི་སྒྲ་ཡང་ཆུང་སྟེ། བྱ་ཡིས་སྐད་འབྱིན་དུས་མི་རྣམས་ཡར་ལང་ཞིང་། གླུ་མ་ཐམས་ཅད་རྒུད་པའོ། །
5 མི་རྣམས་མཐོ་སར་འཇིགས་ཏེ་ལམ་ལ་འཇིགས་སྐྲག་རྣམས་འོང་ཞིང་། སྟར་སྡོང་གི་མེ་ཏོག་བཞད་པ་དང་། ཆ་ག་འབུ་རྣམས་ཁྱར་ཁྱོར་དུ་སྐྱོད་ཅིང་། འདོད་པ་རྣམས་ཡལ་བར་འགྱུར། ཅིའི་ཕྱིར་ཞེ་ན། མི་ནི་རང་གི་དུས་གཏན་གྱི་སྡོད་གནས་སུ་འགྲོ་བས། མྱ་ངན་ཞུ་མཁན་རྣམས་སྲང་ལམ་དུ་རྒྱུ་བར་འགྱུར་རོ། །
6 ཡང་དངུལ་ཐག་ཆད་ཅིང་གསེར་ཕོར་ཆག་པ་དང་། བུམ་པ་ཆུ་མིག་གི་རྩར་ཆག་ནས་འཁོར་ལོ་ཆུ་དོང་གི་རྩར་ཆག་པར་འགྱུར།
7 ས་རྡུལ་ནི་ཕྱིར་ས་ལ་འཐིམ་པ་དང་སེམས་ཉིད་ནི་དེ་གནང་མཁན་གྱི་དཀོན་མཆོག་གི་དྲུང་དུ་ལོག་པར་འགྱུར་རོ། །
8 སྟོང་པའི་སྟོང་པ། ཡོད་ཚད་སྟོང་པ་ཡིན་ཞེས་སྟོན་པས་གསུངས་སོ། །
སྡོམ་ཚིག
9 སྟོན་པར་ཤེས་རབ་ལྡན་པས། མི་རྣམས་ལ་རིག་པ་མང་དུ་བསླབས་ཏེ། དེས་བསམ་བློ་ཞིབ་པར་བཏང་ནས་བརྟག་དཔྱད་བྱས་པ་དང་། ལེགས་བཤད་མང་པོ་རིམ་པར་བཀོད་པ་ཡིན་ནོ། །
10 སྟོན་པས་ཡིད་དུ་འོང་བའི་ཚིག་རྣམས་བཙལ་ཞིང་། བློ་དྲང་པོས་བདེན་ཚིག་ལ་བརྟེན་ནས་བྲིས་པ་ཡིན།
11 མཁས་པའི་གཏམ་ནི་དབྱུག་ལྕག་དང་། ལེགས་བཤད་འདི་དག་ནི་བརྡབས་པའི་འཛེར་མ་དང་མཚུངས་ཏེ། དེ་རྣམས་རྫི་བོ་གཅིག་གིས་གནང་བའོ། །
12 དེ་བས་ན་ངའི་བུ་ལགས། གདམས་ངག་འདི་དང་དུ་ལོངས་ཤིག གཞུང་མང་པོ་རྩོམ་པར་རྫོགས་མཐའ་མེད། སློབ་སྦྱོང་མང་བས་ལུས་དུབ་ཏུ་འཇུག
13 ཐོས་པར་གྱུར་པ་ཐམས་ཅད་ཀྱི་མཐར་ཐུག་ནི་འདི་ལྟ་སྟེ། དཀོན་མཆོག་ལ་གུས་ཤིང་འཇིགས་པ་དང་ཁོང་གི་བཀའ་རྒྱ་རྣམས་སྲུངས་ཤིག འདི་ནི་མི་རྣམས་ཀྱིས་བསྒྲུབ་དགོས་པའི་འོས་འགན་དེ་ཡིན་ནོ། །
14 ཅིའི་ཕྱིར་ཞེ་ན། ལས་ཐམས་ཅད་དེ་ཐ་ན་གསང་བའི་དོན་ཡོད་ཚད་བཟང་ངན་གང་ཞིག་ཡིན་རུང་། དཀོན་མཆོག་གིས་དེར་འདྲི་གཅོད་གནང་བར་འགྱུར་རོ།། །།