ལེའུ་བདུན་པ།
མཁས་བླུན་གཉིས་ཀྱི་ཁྱད་པར།
1 ཕུལ་དུ་བྱུང་བའི་བྱུག་སྣུམ་ལས། ། མཚན་དང་སྙན་གྲགས་རྒྱས་པ་ལེགས། ། སྐྱེས་དུས་ལས་ནི་འཆི་དུས་ལེགས། །
2 སྟོན་མོའི་ཁྱིམ་དུ་འགྲོ་བ་ལས། ། མྱ་ངན་བྱེད་སར་འགྲོ་བ་ལེགས། ། གང་ལ་ཞེ་ན་འཆི་བ་ནི། ། མི་བུ་ཀུན་གྱི་མཐའ་འབྲས་ཡིན། ། གསོན་པོ་རྣམས་ཀྱིས་དོན་དེ་ཉིད། ། རྟག་ཏུ་ཡིད་ལ་ངེས་དགོས་སོ། །
3 དགའ་བ་ལས་ནི་སྐྱོ་བ་ལེགས། ། རྒྱུ་མཚན་སྐྱོ་བའི་ངོ་གདོང་གིས། ། མི་ཡི་སེམས་ལ་ཕན་ཐོགས་སོ། །
4 མཁས་པའི་སེམས་ནི་མྱ་ངན་ཁྱིམ་དུ་ཡོད། ། བླུན་པོའི་སེམས་ནི་སྤྲོ་སྐྱིད་ཁྱིམ་དུ་ཡོད། །
5 བླུན་པོའི་བསྟོད་གླུར་ཉན་པ་ལས། ། མཁས་པའི་བཀའ་བཀྱོན་ཐོས་ན་ལེགས། །
6 བླུན་པོ་གད་མོ་དགོད་པའི་སྒྲ། ། ཚེར་མ་མེ་ལ་བསྒྲོན་དང་མཚུངས། ། དེ་ལ་སྙིང་པོ་གང་ཡང་མེད། །
7 བཙན་འཕྲོག་གིས་ནི་མཁས་པ་བླུན་པོར་བསྒྱུར། ། ལྐོག་རྔན་གྱིས་ནི་མི་སེམས་བརླག་པར་བྱེད། །
8 དོན་གྱི་ཐོག་མ་ལས་ནི་ཕུགས་འབྲས་ལེགས། ། ང་རྒྱལ་ལས་ནི་བཟོད་སྒོམ་བྱེད་པ་ལེགས། །
9 ཁོང་ཁྲོ་བླུན་པོའི་སེམས་སུ་གནས་པས་ན། ། རང་སེམས་རང་དགར་ཁྲོ་བར་མི་བྱ་འོ། །
10 ཁྱོད་ཀྱིས་སྔ་མའི་དུས་ནི་ད་ལྟ་ལས། ། ལེགས་པ་ཅི་ཞིག་ཡིན་ནམ་མ་ཟེར་ཞིག ། དེ་བཞིན་འདྲི་བ་མཁས་རྟགས་མ་ཡིན་ནོ། །
11 ཤེས་རབ་དང་ནི་ནོར་སྐལ་གཉིས་ཀ་བཟང་། ། ཉི་མ་མཐོང་བ་དག་ལ་ཕན་ཐོགས་ཆེ། །
12 རྒྱུ་ཡིས་མི་ནི་སྲུང་བ་ལྟར། ། ཤེས་རབ་ཀྱིས་ཀྱང་བསྲུང་བར་མཛད། ། དེ་ཡང་ཤེས་རབ་འབའ་ཞིག་གིས། ། ཤེས་རབ་དང་ནི་ལྡན་པ་ཡི། ། ཚེ་སྲོག་གཅེས་སྲུང་མཛད་ནུས་ཤིང་། ། དེ་ནི་ཤེས་བྱའི་ཕན་ཡོན་ཡིན། །
13 དཀོན་མཆོག་མཛད་པར་ཞིབ་ཏུ་ལྟོས། ། ཁོང་གིས་གང་ཞིག་བཀུག་པ་དེ། ། སུ་ཡིས་བསྲང་བར་བྱ་ནུས་སམ། །
14 བདེ་བླག་ཡིན་པའི་དུས་སུ་དགའ་བར་གྱིས། ། དཀའ་སྡུག་མྱོང་བའི་དུས་སུ་བསམ་བློ་ཐོངས། ། དཀོན་མཆོག་ཉིད་ཀྱིས་འདི་གཉིས་འབྱུང་བར་མཛད། ། མི་ཡིས་འབྱུང་འགྱུར་མི་ཤེས་ཆེད་དུ་ཡིན། །
15 དྲང་བདེན་ཅན་ནི་དྲང་བདེན་ནང་དུ་འཆི་བ་དང་། ངན་པས་སྡིག་པའི་ནང་དུ་མི་ཚེ་བཏང་ནས་ཚེ་ལོ་མཐར་ཕྱིན་པ་ཐམས་ཅད་ངས་སྙིང་པོ་མེད་པའི་མི་ཚེ་ལ་རོལ་བའི་དུས་སུ་མཐོང་བྱུང་།
16 དྲང་བདེན་ཚད་ལས་བརྒལ་དུ་མ་འཇུག སྤྱང་གྲུང་ཚད་ལས་བརྒལ་དུའང་མ་འཇུག རང་གིས་རང་ཉིད་འཕུང་བར་ཅི་ལ་བྱེད།
17 ཚོད་མེད་པར་སྤྱོད་ངན་མ་བྱེད། བླུན་པོར་མ་གྱུར་ཅིག དུས་མ་སླེབས་པར་འཆི་དགོས་དོན་ཅི་ཡོད།
18 འདི་བསྲུང་བར་མ་ཟད་གཞན་དེ་ཡང་ལག་པས་མ་ལྷོད་ཅིག ཅི་ལ་ཞེ་ན། དཀོན་མཆོག་ལ་གུས་ཤིང་འཇིགས་པ་རྣམས་ནི་འདི་གཉིས་ལ་གཡོལ་ངེས་ཡིན།
19 ཤེས་རབ་ཀྱིས་ནི་གྲོང་ཁྱེར་ལ་ཡོད་པའི་འགོ་དཔོན་བཅུ་ལས་མཁས་པ་ལ་ནི་ལྷག་པར་སྟོབས་དང་ལྡན་པར་བྱེད།
20 ས་སྟེང་དུ་རྟག་ཏུ་བཟང་པོ་བྱེད་ཅིང་ཉེས་པ་གང་ཡང་མི་བྱེད་པའི་མི་དྲང་པོ་ནི་གཅིག་ཀྱང་མེད།
21 གཏམ་ཐམས་ཅད་ལ་དོ་སྣང་མ་བྱེད་ཅིག ཇི་སྟེ་བྱས་ན་གཡོག་པོས་ཁྱོད་ལ་ངན་སྨྲ་བ་ཐོས་པར་འགྱུར།
22 དེ་ཅིའི་ཕྱིར་ཞེ་ན། ཁྱོད་ཀྱིས་ཀྱང་ལན་དུ་མར་གཞན་ལ་དེ་བཞིན་དུ་ངན་སྨྲས་པ་ནི་ཁྱོད་རང་གི་སེམས་ཀྱིས་ཤེས་སོ། །
23 ངས་དེ་སྔར་འདི་ཐམས་ཅད་ལ་ཤེས་རབ་ཀྱི་སྒོ་ནས་དཔྱད་པ་ཡིན། ང་མཁས་པར་འགྱུར་འདོད་ཅེས་སྨྲས་ཀྱང་། དེ་ནི་ང་དང་རྒྱང་རིང་དུ་མཆིས་ཏེ།
24 བྱ་བ་ཡོད་ཚད་རབ་ཏུ་རྒྱང་རིང་ཞིང་ཤིན་ཏུ་གཏིང་ཟབ་པས། སུ་ཞིག་གིས་དེ་རྟོགས་ནུས་སམ།
25 ངས་རང་གི་བློ་ཁ་བསྒྱུར་ཏེ། སེམས་གཏིང་ནས་ཤེས་རབ་དང་བྱ་བ་ཡོད་ཚད་ཀྱི་འབྱུང་རྐྱེན་རྟོགས་འདོད་པ་དང་དཔྱོད་འདོད་པ། བཙལ་འདོད་པ་ཡིན། ཡང་བླུན་པོའི་ལུགས་ནི་ངན་པ་དང་། ཁེངས་དྲེགས་ནི་བླུན་རྨོངས་ཡིན་པ་རྟོགས་འདོད་པ་ཡིན།
26 ཡང་ངས་བུད་མེད་ལ་ལ་ནི་འཆི་བ་ལས་ཀྱང་ཁ་ཏིག་ཡིན་པ་དང་། སེམས་ནི་རྙི་རྒྱ་དང་ལག་པ་ནི་ལྕགས་ཐག་ལྟ་བུ་ཡིན་པ་རྟོགས་ཤིང་། དཀོན་མཆོག་ཐུགས་མཉེས་པ་རྣམས་ནི་མོ་ལས་ཐར་བ་དང་། སྡིག་ཅན་རྣམས་ནི་མོས་འཛིན་པར་འགྱུར།
27 ཀྱེ་ཧོ་སྟོན་པས་འདི་སྐད་དུ། ངས་མཐར་ཐུག་དེ་རྟོགས་པའི་དོན་དུ་རེ་རེ་བཞིན་བསྡུར་ནས་བརྩད་ཆོད་པ་ནི། བྱ་བ་ཡོད་ཚད་ཀྱི་འབྱུང་རྐྱེན་ཤེས་འདོད་པ་ཡིན་ཏེ།
28 ད་ཙམ་གྱི་བར་དུ་ངའི་སེམས་ཀྱིས་བཙལ་ཡང་མ་ཐོབ། སྐྱེས་པ་སྟོང་ཕྲག་གི་ནང་ནས་གཞུང་དྲང་གཅིག་རང་ངས་རྙེད་ཀྱང་། བུད་མེད་ཐམས་ཅད་ལས་གཞུང་དྲང་གཅིག་ཀྱང་རྙེད་མ་བྱུང་།
29 དཀོན་མཆོག་གིས་མི་ནི་དྲང་པོར་བཀོད་ཀྱང་། དེ་དག་གིས་བྱུས་ངན་མང་པོ་བཙལ་ཡོད་པ་ཁོ་ན་ངས་རྙེད་པ་ཡིན་ནོ། །