ལེའུ་དྲུག༌པ།
ཀུན་ལ་དོན་བཟང་པོ་བྱེད་པར་བསྐུལ་བ།
1 སྤུན་ཟླ༌རྣམས། ཁྱོད་རྣམས་ལས་མི་ཞིག་གློ་བུར་སྡིག་པའི་དབང་དུ་ལྷུང༌བ་ཡིན་ན། དམ་པའི་ཐུགས་ཉིད་དང་ལྡན་པ་ཁྱོད་རྣམས་ཀྱིས་ཞི་འཇམ་གྱི་སེམས་དང་བཅས་མི་དེ་བསྐྱབ་འོས་སོ།། འོན༌ཀྱང༌། ཁྱོད་རྣམས་བསླུ་བྲིད་ཀྱི་དབང་དུ་མི་ལྷུང་བའི་ཕྱིར་རང་གིས་ཀྱང་སེམས་ཆུང་བྱ་འོས།
2 ཁྱོད་རྣམས་ཀྱིས་ཕན་ཚུན་ལ་སྡུག་གི་ཁུར་པོ་མཉམ་ཁུར་བྱེད་དགོས༌ཏེ། འདི་ལྟར་བྱས་ན། ད་གཟོད་སྐྱབས་མགོན་མཱ་ཤི་ཀའི་བཀའ་དེ་བསྒྲུབས་པ་ཡིན།
3 གལ༌ཏེ། མི་ཞིག་ཅི་ཡང་མིན་ནའང་རང་ཉིད་ཆེན་པོར་རློམ་ན། དེ་ནི་རང་མགོ་རང་གིས་གཡོག༌པ་ཡིན།
4 ཡང་མི་སུ་ཞིག་ཡིན་རུང་རང་གི་བྱ་སྤྱོད་ལ་ཞིབ་བཤེར་བྱ་དགོས༌ཏེ། ལས་བཟང་པོ་བསྒྲུབས་ན་རང་གི་ཡིད་ཚིམ་པར་འགྱུར༌ཡང༌། དེ་ནི་མི་གཞན་གྱི་བྱ་སྤྱོད་ལ་བསྡུར་མི་དགོས་སོ།།
5 ཅིའི་ཕྱིར་ཞེ་ན། མི་ཀུན་གྱིས་རང་གི་ཁུར་པོ་རང་གིས་འཁུར་དགོས་པའི་ཕྱིར༌རོ།།
6 ཆོས་སློབ་མཁན་གྱིས་ཆོས་འཆད་མཁན་གྱི་སློབ་དཔོན་ལ་གང་མཁོ་བའི་རྒྱུ་ནོམ་པ་ཐམས་ཅད་འབུལ་དགོས་སོ།།
7 རང་མགོ་རང་གིས་གཡོག་མི༌རུང༌། དཀོན་མཆོག་ལ་འཕྱ་དམོད་བྱ་མི༌རུང༌། རྒྱུ་མཚན་ནི་མིས་ས་བོན་གང་ཞིག་བཏབ་ན་འབྲས་བུའང་དེ་འབྱུང་བའི་ཕྱིར༌རོ།།
8 སུ་ཞིག་གིས་ཤ་གཟུགས་ཀྱི་ཕུང་བོ་ལ་བསྟུན་ནས་ས་བོན་བཏབ་ན། ཤ་གཟུགས་ཀྱི་ཕུང་བོ་ལས་འཇིག་པའི་འབྲས་བུ་འབྱུང༌ལ། སུ་ཞིག་གིས་དམ་པའི་ཐུགས་ཉིད་ལ་བསྟུན་ནས་ས་བོན་བཏབ་ན། དམ་པའི་ཐུགས་ཉིད་ལས་མཐའ་མེད་པའི་ཚེ་སྲོག་འཐོབ་ངེས༌སོ༎
9 བདག་ཅག་གིས་དོན་བཟང་པོ་གང་ཞིག་བྱེད་ནའང་ཡིད་ཕམ་མི་རུང༌སྟེ། ཡིད་མ་ཕམ་ན་དུས་གང་ཞིག་སླེབས་པ་དང་འབྲས་བུ་དེའང་ལེན་ཐུབ།
10 དེའི༌ཕྱིར། ད་ལྟ་བདག་ཅག་ལ་གོ་སྐབས་བྱུང༌ན་མི་ཐམས་ཅད་ལ་ལས་བཟང་པོ་བྱེད་དགོས༌པ་དང༌། ནང་སྒོས་སུ་དད་ལྡན་ཁྱིམ་མི་རྣམས་ལ་ལྷག་པར་ལས་བཟང་པོ་བྱེད་དགོས༌སོ།།
མི་གསར་པ་ཞིག་ཡིན་པའི༌སྐོར།
11 བདག་གིས་དངོས་སུ་བྲིས་པའི་ཡི་གེ་ཆེན་པོ་འདིར་ཁྱོད་རྣམས་ཀྱིས་ལྟོས༌ཤིག
12 ཡང་སྐྱབས་མགོན་མཱ་ཤི་ཀའི་ཤིང་རྒྱ་གྲམ་གྱི་དོན་དེ་ལས་རང་རང་ལ་གནོད་འཚེ་ཐེབས་པར་འཇིགས་པའི་ཕྱིར། མིའི་ཕྱི་ཚུགས་འདྲ་ཆགས་པོར་བཅོས་པ་དག་གིས་ཁྱོད་རྣམས་ལ་མཚན་སྐྱི་གཅོད་དགོས་པར་ནན་གྱིས་བསྐུལ་ལོ༎
13 མཚན་སྐྱི་བཅད་ཟིན་པའི་མི་དེ་དག་རང་གིས་བཀའ་ཁྲིམས་མི་སྲུང༌ནའང༌། ཁྱོད་ཅག་གི་ཤ་ཁྲག་གི་ཕུང་བོར་བརྟེན་ནས་ཁ་ཕོ་བཤད་པའི༌ཕྱིར། ཁྱོད་རྣམས་ལ་མཚན་སྐྱི་གཅོད་པར་རེ་བ་བྱེད་དོ།།
14 འོན༌ཀྱང༌། བདག་གིས་བདག་ཅག་གི་གཙོ་བོ་ཡེ་ཤུ་མཱ་ཤི་ཀའི་ཤིང་རྒྱ་གྲམ་སྐོར་ལ་བསྟོད་བསྔགས་བརྗོད་པ་ལས་གཞན་འཆད་པར་མི་འགྱུར་བར་སྨོན། ཤིང་རྒྱ་གྲམ་གྱི་དབང་གིས། བདག་ལ་མཚོན་ན་འཇིག་རྟེན་འདི་ནི་སྔར་ནས་ཤིང་རྒྱ་གྲམ་གྱི་སྟེང་དུ་བརྡབས་ཟིན། འཇིག་རྟེན་ལ་མཚོན་ན་ང་རང་ཡང་སྔར་ནས་ཤིང་རྒྱ་གྲམ་གྱི་སྟེང་དུ་བརྡབས་ཟིན།
15 མཚན་སྐྱི་གཅོད་མིན་ལ་སྙིང་པོ་ཅི་ཡང་མེད༌དེ། གལ་ཆེ་བ་ནི་གསར་དུ་བསྐྲུན་པའི་མི་ཞིག་ཡིན་པ་དེའོ།།
16 གནས་ལུགས་དེ་བཞིན་དུ་སྒྲུབ་མཁན་རྣམས་དང་དཀོན་མཆོག་གི་ཡེས་ར་ཨེལ་པ་རྣམས་ལ་ཞི་བདེ་དང་ཐུགས་རྗེ་འཐོབ་པར༌སྨོན།
17 བདག་གི་ལུས་སྟེང་དུ་སྐྱབས་མགོན་ཡེ་ཤུའི་རྟགས་མཚན་ཡོད་པས། དུས་ད་ནས༌བཟུང༌། ཁྱོད་རྣམས་ཀྱིས་མི་སུ་ལའང་བདག་ལ་བར་ཆད་བཟོ་རུ་མ་འཇུག་ཅིག།
18 སྤུན་ཟླ༌རྣམས། བདག་ཅག་གི་གཙོ་བོ་ཡེ་ཤུ་མཱ་ཤི་ཀའི་ཐུགས་རྗེ་ནམ་ཡང་ཁྱོད་ཅག་གི་སེམས་སུ་གནས་པར༌སྨོན། །ཨ༌མེན།། །།