ལེའུ་དགུ༌པ།
འཇིག་རྟེན་གྱི་གུར་མཆོག་ལ་གཏོགས་པའི་བསྙེན༌བཀུར།
1 མ་གཞི་ཞལ་ཆད་སྔ་མར་བསྙེན་བཀུར་བྱེད་པའི་སྲོལ་ཡིག་དང་འཇིག་རྟེན་ལ་གཏོགས་པའི་གནས་མཆོག་མཆིས་སོ།།
2 ཅིའི་ཕྱིར་ཞེ་ན། དེ་རུ་སྟ་གོན་བྱས་པའི་གུར་མཆོག་ཡོད༌དེ། རིམ་པ་དང་པོ་ལ་གནས་དམ་པ་ཞེས་དང༌། དེའི་ནང་དུ་སྒྲོན་སྟེགས་དང་། སྒྲོག༌ཙེ། སྤྱན་བསྟར་བག་ལེབ་བཅས་ཡོད་ལ།
3 རིམ་པ་གཉིས་པའི་ཡོལ་བའི་རྒྱབ་ཏུ་ཡང་གུར་མཆོག་རིམ་པ་ཞིག་ཡོད་དེ། མིང་ལ་གནས་དམ་མཆོག་ཅེས་ཟེར་ཞིང༌།
4 དེ་རུ་གསེར་གྱི་སྤོས་ཁྲི་དང་གསེར་གྱིས་ཡོངས་སུ་བཏུམས་པའི་ཞལ་ཆད་ཀྱི་ཤུར་སྒམ་ཡོད༌ཅིང་། སྒམ་དེའི་ནང་དུ་མཱན་ནཱ་ཡོད་པའི་གསེར་གྱི་བུམ་པ་དང་། མྱུ་གུ་འབུས་མྱོང་བའི་ཨ་རོན་གྱི་ཕྱག་རྟེན། ཞལ་ཆད་ཀྱི་རྡོ་ལེབ་གཉིས་བཅས་ཡོད༌ལ།
5 ཤུར་སྒམ་གྱི་སྟེང་དུ་གཟི་བརྗིད་ལྡན་པའི་ཀེ་རུབ་ཀྱི་གཟུགས་བརྙན་གྱིས་གཡོགས་པའི་ཐུགས་རྗེའི་བཞུགས་ཁྲི་བཅས་ཡོད་མོད། འོན་ཀྱང་ད་ལྟ་ངེད་ཅག་གིས་དེ་དག་རེ་རེ་བཞིན་ཞིབ་པར་སྨྲ་མི་རུང་ངོ་།།
6 དངོས་པོ་འདི་དག་ཐམས་ཅད་སྟ་གོན་བྱས་ཚར་རྗེས། མཆོད་དཔོན་རྣམས་རྒྱུན་དུ་གུར་མཆོག་རིམ་པ་དང་པོའི་ནང་དུ་དཀོན་མཆོག་ལ་བསྙེན་བཀུར་ཞུ་བར་འགྲོའོ།།
7 འོན་ཀྱང་གུར་མཆོག་རིམ་པ་གཉིས་པའི་ནང་དུ་མཆོད་དཔོན་ཆེན་པོ་ལོ་རེར་ཐེངས་གཅིག་ལ་གཅིག་པུ་འགྲོ༌ཞིང༌། ཐེངས་རེར་ཁྲག་མ་འཁྱེར་བར་མི་འགྲོ་སྟེ། རང་ཉིད་ཀྱི་ཕྱིར་དང་མི་སྡེས་མ་ཤེས་པར་བསགས་པའི་སྡིག་པའི་ཆེད་དུ་ཁྲག་དེ་འབུལ་བར་འགྲོ་བ་ཡིན།
8 དམ་པའི་ཐུགས་ཉིད༌ཀྱིས་འདི་ལས་གུར་མཆོག་རིམ་པ་དང་པོ་སྔར་བཞིན་གནས་པའི་བར་དུ། གནས་དམ་མཆོག་ནང་དུ་འགྲོ་བའི་ལམ་ད་དུང་གསལ་པོར་མངོན་མེད་པ་བསྟན་ཏོ།།
9 གུར་མཆོག་རིམ་པ་དང་པོ་ནི་ད་ལྟའི་དུས་ཀྱི་དཔེ་མཚོན་ཡིན༌ལ། ཕྱག་རྟེན་དང་མཆོད་པ་ལ་བརྟེན་ནས་བསྙེན་བཀུར་བྱེད་མཁན་གྱི་བསམ་པ་ནི་ཡོངས་སུ་རྫོགས་པར་བྱ་མི་ནུས།
10 དོན་འདི་དག་ནི་བཟའ་བཏུང་དང་ཁྲུས་སྣ་ཚོགས་ལ་འབྲེལ་བའི་ལུགས་སྲོལ་ཙམ་ཡིན༌ལ། དེ་དག་ནི་ཤ་གཟུགས་ཀྱི་ཕུང་བོར་གཏོགས་པའི་སྒྲིག་སྲོལ་ཙམ་ཡིན་པས་གོ་རིམ་གསར་པའི་དུས་སླེབས་པའི་བར་དུ་བཀོལ་བའོ།།
སྐྱབས་མགོན་མཱ་ཤི་ཀའི་སྐུ་ཁྲག་གི༌སྐོར།
11 འོན་ཀྱང་། ད་ལྟ་སྐྱབས་མགོན་མཱ་ཤི་ཀ་ནི་ཕེབས་ཟིན་པ༌དང༌། ཁོང་ནི་བྱུང་ཟིན་པའི་དོན་བཟང་པོ་དག་གི་མཆོད་དཔོན་ཆེན་པོར་མཛད་ཅིང༌། མིའི་ལག་པས་མ་བཟོས་ཤིང་འཇིག་རྟེན་འདི་ལའང་མི་གཏོགས་པར། སྔར་གྱི་གུར་མཆོག་ལས་ཀྱང་ཆེ་ཞིང་ཕུན་སུམ་ཚོགས་པའི་གུར་མཆོག་བརྒྱུད་ནས་ཕེབས་པར་མ་ཟད།
12 ར་མ་དང་བ་ཕྲུག་དག་གི་ཁྲག་ལ་མི་བརྟེན་པར། རང་ཉིད་ཀྱི་སྐུ་ཁྲག་ལ་བརྟེན་ནས་ཐེངས་གཅིག་ཁོ་ནར་གནས་དམ་མཆོག་ནང་དུ་ཕེབས་ཏེ། མཐའ་མེད་པའི་ཐར་པའི་དོན་དེ་འགྲུབ་པར་མཛད་དོ།།
13 གལ་ཏེ། ར་མ་དང་གླང་ཐུག་གི་ཁྲག་དང་། བ་གཞོན་གྱི་ཐལ་བ་དེ་མི་གཙང་བའི་མི་ཡི་ལུས་སྟེང་ལ་གཏོར་བས། ལུས་པོ་གཙང་མར་འགྱུར་བའི་ཆེད་དུ་མི་དེ་དམ་པར་བྱ་ནུས༌ན།
14 སྐྱབས་མགོན་མཱ་ཤི་ཀའི་སྐུ་ཁྲག་ནི་ལྟ་ཅི་སྨོས། ཁོང་གིས་མཐའ་མེད་པའི་ཐུགས་ཉིད་ལ་བརྟེན་ནས། རང་ཉིད་ཉེས་སྐྱོན་ཅི་ཡང་མི་མངའ་བར་དཀོན་མཆོག་ལ་ཕུལ༌བས། ཁོང་གི་སྐུ་ཁྲག་གིས་དེ་བས་ཀྱང་ཁྱོད་རྣམས་ཀྱི་བསམ་པ་ནི་དག་པར་མཛད༌ཅིང༌། འཆི་ལམ་དུ་འཇུག་པའི་སྤྱོད་པ་བསལ༌ཏེ། ཁྱོད་ཅག་གིས་གཏན་དུ་གསོན་པོར་བཞུགས་པའི་དཀོན་མཆོག་ལ་ཞབས་ཕྱི་སྒྲུབ་པར་མཛད༌པ་མ་ཡིན་ནམ།
15 དེར་རྟེན། ཁོང་ཉིད་ཞལ་ཆད་གསར་པའི་བར་མི་རུ་མཛད་ཅིང༌། རང་ཉིད་སྐུ་གྲོངས་པ་བརྒྱུད་ནས་ཞལ་ཆད་སྔ་མའི་དུས་སུ་མི་རྣམས་ཀྱིས་བསགས་པའི་ཉེས་པ་ཐམས་ཅད་བླུས་པ་ཡིན་པས། ཞལ་འབོད་ཐོབ་མཁན་རྣམས་ལ་ཞལ་བཞེས་གནང་བའི་རྟག་གཏན་གྱི་བགོ་སྐལ་འཐོབ་ངེས་སོ།།
16 སྤྱིར་ཁ་ཆེམས་ཡོད་ན་ངེས་པར་ཁ་ཆེམས་འཇོག་མཁན་ཚེ་ལས་འདས་ཟིན་པར་བདེན་དཔང་བྱེད་དགོས་སོ།།
17 ཅིའི་ཕྱིར་ཞེ་ན། མི་ཚེ་ལས་འདས་པ་ཡིན་ན་ད་གཟོད་ཁ་ཆེམས་ལ་བྱེད་ནུས་ཡོད་དེ། ཁ་ཆེམས་འཇོག་མཁན་གསོན་པོར་གནས་ན་ཁ་ཆེམས་ལའང་བྱེད་ནུས་མེད་པའི་ཕྱིར་ཡིན།
18 དེ་བས་ཞལ་ཆད་སྔ་མའང་ཁྲག་གིས་མ་བཞག་པ་མིན༌ནོ།།
19 ཅིའི་ཕྱིར་ཞེ་ན། དེའི་དུས་སུ་མོ་ཤེ་ཡིས་བཀའ་ཁྲིམས་བཞིན་དུ་བཀའ་རྒྱ་རེ་རེ་འབངས་མི་ཐམས་ཅད་ལ་བསྒྲགས་པ༌དང༌། ཁུ་ལུ་དམར་པོ་དང་ཨི་སོབ་རྩྭ་ཤིང་བླངས་ཏེ། བ་ཕྲུག་དང་ར་མ་དག་གི་ཁྲག ཆུ་དང་བཅས་གླེགས་བམ་སྟེང་དུ་གཏོར་བ་དང་འབངས་མིའི་ལུས་སྟེང་ལའང་གཏོར་བཞིན་འདི་སྐད༌དུ།
20 འདི་ནི་དཀོན་མཆོག་གིས་ཁྱོད་ཅག་ལ་བཞག་པའི་ཞལ་ཆད་ཀྱི་ཁྲག་ཡིན་ཞེས་གསུངས་སོ།།
21 ཡང་ཁོང་གིས་དེ་བཞིན་གུར་མཆོག་དང་བསྙེན་བཀུར་འབུལ་བྱེད་སྣོད་ཆས་མཐའ་དག་གི་སྟེང་དུ་ཁྲག་གཏོར༌བའོ།།
22 བཀའ་ཁྲིམས་ལྟར༌ན་དངོས་པོ་ཐམས་ཅད་ནི་ཕལ་ཆེར་ཁྲག་གིས་གཙང་མར་བྱེད་པ་ཡིན༌ལ། ཁྲག་མ་བཞུར་བར་སྡིག་པ་བསལ་བ་མེད་དོ།།
23 དེའི་ཕྱིར། ནམ་མཁའི་ཞིང་ཁམས་ཀྱི་གཟུགས་དབྱིབས་བཞིན་དུ་བཟོས་པའི་དངོས་པོ་ནི་ངེས་པར་མཛད་སྒོ་འདི་དག་གིས་གཙང་མར་བྱེད་དགོས༌པ་ཡིན་མོད། འོན་ཀྱང་ནམ་མཁའི་ཞིང་ཁམས་ཀྱི་དངོས་པོ་ནི་དེ་ལས་ཁྱད་དུ་འཕགས་པའི་མཆོད་པས་གཙང་མར་བྱེད་དགོས་སོ།།
24 ཅིའི་ཕྱིར་ཞེ་ན། སྐྱབས་མགོན་མཱ་ཤི་ཀ་ནི་གནས་དམ་པ་དངོས་ཀྱི་སྣང་བརྙན་ཙམ་ལས། མིའི་ལག་པས་བཟོས་པའི་གནས་དམ་པའི་ནང་དུ་ཕེབས་པ་མིན་ཏེ། ནམ་མཁའི་ཞིང་ཁམས་སུ་ཕེབས་ཤིང་ད་ལྟ་བདག་ཅག་གི་དོན་དུ་དཀོན་མཆོག་གི་དྲུང་དུ་སླེབས༌པ་དང་།
25 ཡང་མཆོད་དཔོན་ཆེན་པོས་རང་གི་ཁྲག་མ་ཡིན་པ་ཁྱེར་ནས་ལོ་རེ་བཞིན་གནས་དམ་མཆོག་ནང་དུ་འགྲོ་བ༌ལྟར། སྐྱབས་མགོན་མཱ་ཤི་ཀས་རང་ཉིད་ཐེངས་མང་པོར་ཕུལ་བ་མིན་པའི་ཕྱིར་རོ།།
26 གལ་སྲིད། དེ་ལྟར་ཡིན་ན། འཇིག་རྟེན་ཁམས་བཀོད་པའི་ཚུན་ལ། ཁོང་གིས་ཐེངས་མང་པོར་སྡུག་བསྔལ་མྱང་དགོས་པ་ཡིན༌མོད། འོན་ཀྱང་ད་ལྟ་བསྐལ་པའི་མཐའ་མའི་དུས་འདིར་ཁོང་ཉིད་ཐེངས་གཅིག་ཁོ་ནར་མངོན་ཞིང༌། མིའི་སྡིག་པ་བསལ་པའི་ཕྱིར་རང་ཉིད་མཆོད་པར་ཕུལ༌བ་ཡིན།
27 ཚེ་སྲོག་གི་གཏན་ཁེལ་ལྟར་ན། མི་རེ་རེ་ལན་གཅིག་ཚེ་ལས་འདའ་དགོས་ཤིང་། ཚེ་ལས་འདས་རྗེས་ལེགས་ཉེས་ཀྱི་ཁྲིམས་ཐག་གཅོད་པར་འགྱུར༌རོ།།
28 དེ་ལྟར་སྐྱབས་མགོན་མཱ་ཤི་ཀའང་ལན་གཅིག་ལ་མཆོད་པར་ཕུལ་ཏེ་མི་མང་པོའི་སྡིག་པ་ཁུར༌བ་དང༌། མ་འོངས་པར་ཁོང་ཉིད་ཐེངས་གཉིས་པར་མངོན་ཞིང༌། དེའི་དུས་སུ་སྡིག་པ་དང་འབྲེལ་བ་མེད་དེ། ཁོང་ལ་རེ་བ་ཆེན་པོས་སྒུག་མཁན་རྣམས་སྐྱོབ་པའི་ཕྱིར་ཡིན་ནོ།།