གཞུང་འདིའི་ཁ་བྱང་ནི་ཡི་གེར་འགོད་མཁན་གྱི་མིང་ནས་ཐོགས་པ་དང་། དེ་ནི་གསོལ་སྟོན་ནམ་དགའ་སྟོན་ཞེས་པའི་དོན་ཡིན། སྤྱི་ལོ་སྔོན་གྱི་538ལོར་ཏ་ཟིག་གི་རྒྱལ་པོས་ཡ་ཧུ་དཱ་པ་རྣམས་ཡེ་རུ་སཱ་ལེམ་ལ་ཕྱིར་བཏང་ནས་མཆོད་ཁང་ཡང་བསྐྱར་བཞེང་ཆོག་པར་གསལ་བསྒྲགས་བྱས། སཱ་མར་ཡ་པ་དང་ཁྱིམ་མཚེས་རྒྱལ་ཕྲན་དག་གིས་ལས་ཀ་དེ་ལ་ངོ་རྒོལ་ཤུགས་ཆེན་པོ་བྱས་པ་དང་། དར་ཡཱ་ཆེན་པོ་ཞེས་པ་རྒྱལ་པོར་བསྡད་པའི་བར་དུ་མཆོད་ཁང་བཞེང་བར་བཀག་འགོག་བྱས་པ་རེད། དར་ཡཱའི་སྲིད་ལོ་གཉིས་པར་ཧག་གཱ་ཨི་ཡིས་ཆོས་སྒྲོག་པའི་འགོ་བརྩམས་པ་རེད།

ལུང་སྟོན་པ་ཧག་གཱ་ཨི་དང་ཟཱ་ཀར་ཡ་གཉིས་ཀྱིས་བཙན་ཁྲིད་བྱས་པ་ནས་ཕྱིར་སླེབས་པའི་མི་རྣམས་ལ་མཆོད་ཁང་བཞེང་དགོས་པའི་སྐུལ་མ་མཛད། ལེའུ་གཉིས་པའི་ཚིག་རྐང་གསུམ་པའི་ནང་དུ་བཀོད་པ་ལྟར། ཅིག་བྱས་ན་ཧག་གཱ་ཨི་ནི་སོ་ལོ་མོན་གྱི་མཆོད་ཁང་གཏོར་བཤིག་བཏང་བའི་བདེན་དཔང་བྱེད་མཁན་ཡིན། གལ་སྲིད་དེ་ལྟར་ཡིན་པའི་དབང་དུ་བཏང་ན། ཧག་གཱ་ཨིས་ཆོས་ཀྱི་ཕྱག་ལས་གནང་བ་རྣམས་གཞུང་འདིར་ཡི་གེར་བཀོད་པའི་དུས་སུ། ཁོང་ནི་དགུང་ལོ་བརྒྱད་ཅུའི་ཡས་མས་ཡིན། སྤྱི་ལོ་སྔོན་གྱི་520ལོར་ཟླ་བ་བཞིའི་རིང་ལ་ཧག་གཱ་ཨི་ཡིས་ཁོང་གི་གསུང་བཤད་འདི་དག་གནང་བ་རེད།

ཧག་གཱ་ཨི་ཡིས་དཀོན་མཆོག་གི་བཀའ་མ་བརྩིས་ན་དོན་མི་ལེགས་པ་འབྱུང་བ་དང་། བཀའ་བརྩིས་ན་བྱིན་རླབས་འཐོབ་པའི་སྐོར་གསལ་པོར་བསྟན་ཡོད། མི་རྣམས་ཀྱིས་དཀོན་མཆོག་དང་ཁོང་གི་མཆོད་ཁང་གལ་ཆེན་པོར་བརྩིས་པ་ཡིན་ན། ཁོ་ཚོར་བྱིན་རླབས་འཐོབ་པར་མ་ཟད། བཀའ་བརྩིས་པ་ལ་བརྟེན་ནས་དཀོན་མཆོག་གི་ཐུགས་ཉིད་ཀྱི་སྐུལ་སློང་འཐོབ་པ་དང་སྙིང་སྟོབས་འཛོམ་ངེས་ཡིན།

1. གསུང་བཤད་དང་པོ་ལས་མི་རྣམས་ལ་མཆོད་ཁང་ཡང་བསྐྱར་བཞེང་དགོས་པའི་སྐོར་བརྗོད་པ། ༼1:1-11༽

2. ཟེ་རུ་པཱ་པེལ་དང་མི་རྣམས་ཀྱིས་དེ་བཞིན་བསྒྲུབས་པའི་སྐོར། ༼1:12-15༽

3. གསུང་བཤད་གཉིས་པ་ལས་མཆོད་ཁང་གཟི་བརྗིད་ཀྱིས་ཁྱབ་པར་འགྱུར་བའི་སྐོར་བརྗོད་པ། ༼2:1-9༽

4. གསུང་བཤད་གསུམ་པ་ལས་སྐྱོན་གྱིས་གོས་པའི་མི་རྣམས་གཙང་མར་བཟོས་ཤིང་བྱིན་རླབས་བསྩལ་པའི་སྐོར་བརྗོད་པ། ༼2:10-19༽

5. གསུང་བཤད་བཞི་པ་ལས་ཟེ་རུ་པཱ་པེལ་ལ་ཞལ་བཞེས་གནང་བའི་སྐོར་བརྗོད་པ། ༼2:20-23༽