༄༅། །ལུང་སྟོན་པ་མཱལ་ཨ་ཀེའི་མདོ།
ལུང་སྟོན་པ་མཱལ་ཨ་ཀེའི་མདོ་ཞེས་བྱ་བའི་ངོ་སྤྲོད་མདོར་བསྡུས།
ཁ་བྱང་དང་ལོ་རྒྱུས་རྒྱབ་ལྗོངས།
སྐབས་དེར་མཆོད་ཁང་ཡང་བསྐྱར་བཞེངས་ན་ཡང་དཔལ་འབྱོར་ཡར་རྒྱས་ཆེན་པོ་མ་བྱུང་། ཐན་པ་བྱུང་ནས་ས་ཞིང་ལས་ལོ་ཏོག་མ་སྨིན་པས་མི་རྣམས་སྡུག་བསྔལ་དང་མུ་གེས་མནར་ཞིང་། ཁོ་ཚོ་རྐྱེན་ངན་ལ་ཕྲད་པ་དང་སེམས་ཁམས་ཉོབ་ཅིང་གཏི་མུག་གིས་ཁེངས་པར་གྱུར། ཁོ་ཚོས་དཀོན་མཆོག་སྤངས་ནས་ཁོང་ལ་བརྩི་བཀུར་མ་བྱས་པ་དང་། ད་དུང་ཕྱི་ཕྱོགས་པའི་བུད་མེད་རྣམས་ཆུང་མར་བླངས་པ་རེད། དེ་ལྟར་གནས་ཚུལ་སྣ་ཚོགས་བྱུང་བའི་སྐབས་སུ། མཱལ་ཨ་ཀེ་ཞེས་པའི་གཞུང་འདི་ཡི་གེར་བཀོད་པ་ཡིན། མཱལ་ཨ་ཀེ་ཞེས་པ་ནི་བདག་གི་ཕོ་ཉ་ཞེས་པའི་དོན་ཡིན།
ཡི་གེར་འགོད་མཁན་དང་འགོད་དུས།
ལེའུ་གསུམ་པའི་ཚིག་རྐང་དང་པོར་གསུངས་པ་ལྟར། བདག་གི་ཕོ་ཉ་ཞེས་པའི་མིང་བརྡ་བྱུང་བ་དང་། ལུང་སྟོན་པ་དང་མཆོད་དཔོན་གཉིས་ལ་དཀོན་མཆོག་ཡ་ཝཱེའི་ཕོ་ཉ་ཞེས་འབོད་པའི་རྒྱུ་མཚན་ལ་བརྟེན་ནས། མི་འགའ་ཞིག་གི་སེམས་སུ། མཱལ་ཨ་ཀེ་ཞེས་པ་ནི་སྲོལ་རྒྱུན་ལྟར་བཏགས་པའི་ཁ་བྱང་འབའ་ཞིག་ཡིན་སྙམ། དེའི་སྐོར་ཐག་གིས་མི་ཆོད་ནའང་མཱལ་ཨ་ཀེ་ནི་ཡི་གེར་འགོད་མཁན་གྱི་མིང་ཡིན་པ་ཧ་ལམ་གཏན་ཁེལ་བྱས་ཡོད། གཞུང་འདི་ནི་ཕལ་ཆེར་སྤྱི་ལོ་སྔོན་གྱི་433ནས་430བར་དུ་ཡི་གེར་བཀོད་པ་ཡིན།
བརྗོད་སྙིང་དང་གསུང་འཕྲིན།
མཱལ་ཨ་ཀེའི་གསུང་བཤད་ལས་ཉེས་འཛུགས་དང་ཉེན་བརྡ་ཐེངས་མང་པོར་བཏང་ཡོད། མཱལ་ཨ་ཀེས་དཀོན་མཆོག་གི་བྱམས་པ་ལ་ཐེ་ཚོམ་སྐྱེས་པའི་ཡ་ཧུ་དཱ་པ་རྣམས་དང་། དད་པ་ལོག་པའི་མཆོད་དཔོན་༼ལེའུ་དང་པོའི་ཚིག་རྐང་དྲུག་པ་ནས་ལེའུ་གཉིས་པའི་ཚིག་རྐང་དགུ་པའི་བར།༽དང་མི་རྣམས་ལ་༼ལེའུ་གཉིས་པའི་ཚིག་རྐང་བཅུ་པ་ནས་བཅུ་དྲུག་པའི་བར།༽གཤེ་གཤེ་བཏང་ཡོད། མི་རིགས་དེས་དཀོན་མཆོག་དེ་ལྟར་མགྱོགས་པོར་བརྗེད་སོང་ཨང་། འགྱོད་བཤགས་དང་བསྐྱར་བཅོས་བརྒྱུད་ནས་མི་རྣམས་ལ་སླར་ཡང་དཀོན་མཆོག་གི་བྱིན་རླབས་ཐོབ་པ་རེད། ༼ལེའུ་གསུམ་པའི་ཚིག་རྐང་དྲུག་པ་ནས་བཅུ་གཉིས་བར།༽ དཀོན་མཆོག་ཡ་ཝཱེའི་རབ་ཏུ་ཆེ་ཞིང་འཇིགས་སུ་རུང་བའི་ཉིན་མོ་སླེབས་ཡོང་བ་དང་།༼ལེའུ་བཞི་པའི་ཚིག་རྐང་ལྔ་པར་གསལ།༽ མཱལ་ཨ་ཀེས་ཀྱང་ཁོང་གི་མི་རྣམས་ལ་ཡང་བསྐྱར་ཉིན་མོ་དེ་སླེབས་འོང་བའི་ཡིད་ཆེས་སྦྱིན་པ་དང་ཉེན་བརྡ་ཡང་གཏོང་བར་འགྱུར།
འཆར་ཟིན།
1. དཀོན་མཆོག་གིས་ཡེས་ར་ཨེལ་པ་རྣམས་ལ་བྱམས་ཤིང་བརྩེ་བའི་ཞལ་བཞེས་གནང་བའི་སྐོར། ༼1:1-5༽
2. ཡེས་ར་ཨེལ་པ་རྣམས་ཀྱི་དད་ལོག་གི་བྱ་སྤྱོད། ༼1:6-2:16༽
ཀ དད་པ་ལོག་པའི་མཆོད་དཔོན་དག་གི་སྐོར། ༼1:6-2:9༽
ཁ། དད་པ་ལོག་པའི་མི་རྣམས་ཀྱི་སྐོར། ༼2:10-16༽
3. གཙོ་བོ་ཡེ་ཤུ་ཕེབས་ཡོང་བའི་སྐོར། ༼2:17-4:6༽
ལེའུ་དང་པོ།
ཡེས་ར་ཨེལ་གྱིས་དཀོན་མཆོག་གི་བྱམས་པ་བརྗེད་ཟིན་པ།
1 དེ་ཡང་དཀོན་མཆོག་ཡ་ཝཱེས་མཱལ་ཨ་ཀེ་བརྒྱུད་ནས་ཡེས་ར་ཨེལ་ལ་བཀའ་ལུང་གནང་བ་འདི་ལྟ་སྟེ།
2 བདག་གིས་ཁྱོད་རྣམས་ལ་ཤིན་ཏུ་གཅེས་སོ་ཞེས་དཀོན་མཆོག་ཡ་ཝཱེས་གསུངས་ནའང་། ཁྱོད་ཅག་གིས་ངེད་རྣམས་ལ་ཅི་ལྟར་གཅེས་པ་ཡིན་ནམ་ཞེས་ཟེར་ཞིང་། དེ་ནས་དཀོན་མཆོག་ཡ་ཝཱེས་འདི་སྐད་དུ། ཨེ་སཱབ་ནི་ཡ་ཀོབ་ཀྱི་ཕུ་བོ་མ་ཡིན་ནམ། ཡིན་ནའང་བདག་གིས་ཡ་ཀོབ་གཅེས་སུ་འཛིན་པ༌དང༌།
3 ཨེ་སཱབ་ནི་བདག་གིས་འཁོན་དུ་འཛིན་པ་ཡིན་ཏེ། བདག་གིས་ཨེ་སཱབ་ཀྱི་རི་ཁུལ་རྣམས་མི་མེད་ལུང་སྟོང་དུ་བསྒྱུར་ནས་དེའི་ནོར་སྐལ་དབེན་སྟོང་གི་ཁྱི་སྤྱང་ལ་སྤྲད་པ་ཡིན།
4 ཇི་སྟེ་ཨེ་དོམ་གྱིས་ངེད་རྣམས་བཤིག་ན་ཡང་ཞིག་རོ་ཡང་བསྐྱར་བརྩིག་པར་བྱ་ཞེས་ཟེར་ན། དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་དུ། དེ་རྣམས་ལ་བརྩིག་ཏུ་ཆུག་དང་ངས་ཡང་བསྐྱར་བཤིག་པར་བྱ། མི་རྣམས་ཀྱིས་དེ་དག་ལ་སྡིག་པའི་ཡུལ་ཁམས་དང་། དུས་གཏན་དུ་དཀོན་མཆོག་ཡ་ཝཱེ་སྡང་བའི་མི་རྣམས་ཞེས་འབོད་པར་འགྱུར་ཞེས་གསུངས།
5 ཡང་ཁྱོད་རྣམས་ཀྱིས་དེ་དངོས་སུ་མཐོང་ནས། ཡེས་ར་ཨེལ་ཡུལ་གྱི་ཕྱི་རོལ་ནས་ཀྱང་དཀོན་མཆོག་ཡ་ཝཱེ་རབ་ཏུ་ཆེའོ་ཞེས་ཁྱོད་ཚོས་དངོས་སུ་བརྗོད་པར་འགྱུར་རོ། །
ལྷག་བསམ་རྣམ་དག་མིན་པ་དང་དད་གུས་མེད་པའི་མཆོད་དཔོན་རྣམས་ལ་བཀའ་བཀྱོན་གནང་བ།
6 དཔུང་ཚོགས་ཀུན་གྱི་དཀོན་མཆོག་ཡ་ཝཱེས་ཁྱོད་རྣམས་ལ་འདི་སྐད་དུ། ཀྱེ་བདག་གི་མིང་ལ་མཐོང་ཆུང་བྱེད་པའི་མཆོད་དཔོན་རྣམས། བུ་ཡིས་ཕ་ལ་བཀུར་ཞིང་གཡོག་པོས་བདག་པོར་གུས་ཤིང་འཇིགས་པ་ཡིན། གལ་ཏེ་ང་རང་ཕ་ཡིན་ན་ཁྱོད་ཀྱི་གུས་བཀུར་གང་དུ་ཡོད་དམ། གལ་ཏེ་ང་རང་བདག་པོ་ཡིན་ན་འཐོབ་འོས་པའི་གུས་ཞུམ་གང་དུ་ཡོད་དམ། ཁྱོད་རྣམས་ན་རེ། ངེད་ཅག་གིས་ཁྱེད་ཀྱི་མཚན་ལ་ཅི་ལྟར་མཐོང་ཆུང་བྱས་སམ་ཞེས་འདྲིའོ། །
7 ཁྱོད་རྣམས་ཀྱིས་ཁ་ཟས་མི་གཙང་བ་བདག་གི་མཆོད་ཁྲིའི་སྟེང་དུ་ཕུལ་ནས་ད་དུང་ན་རེ། ངེད་ཅག་གིས་ཁྱེད་ཀྱི་མཆོད་ཁྲི་ཅི་ལྟར་མི་གཙང་བར་བཟོས་སམ་ཟེར་ཏེ། ཅིའི་ཕྱིར་ཞེ་ན། ཁྱོད་ཅག་གིས་དཀོན་མཆོག་ཡ་ཝཱེའི་གསོལ་ལྕོག་ལ་མཐོང་ཆུང་བྱས་ཆོག་པར་འདོད་པས་སོ་ཞེས་གསུངས་སོ། །
8 དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་དུ། ཁྱོད་རྣམས་ཀྱིས་ལོང་བ་མཆོད་པར་ཕུལ་ན་དེ་ངན་པ་མ་ཡིན་ནམ། ཁྱོད་རྣམས་ཀྱིས་ཞ་བོ་དང་ནད་པ་མཆོད་པར་ཕུལ་ན་དེ་སྡིག་པ་མ་ཡིན་ནམ། ཁྱོད་ཀྱིས་རང་གི་འགོ་དཔོན་ལ་ལེགས་སྐྱེས་དེ་འདྲ་ཕུལ་ན། དེས་ཁྱོད་ལ་ཐུགས་རྗེས་གཟིགས་ནས་ཁྱོད་དང་དུ་ལེན་སྲིད་པ་ཡིན་ནམ་ཞེས་གསུངས།
9 དཀོན་མཆོག་གིས་ཁྱོད་རྣམས་ལ་ཐུགས་རྗེས་གཟིགས་པའི་ཆེད་དུ་ད་ལྟ་ཁོང་ལ་དགོངས་དག་ཞུས་ཤིག མཆོད་རྫས་མི་གཙང་བ་འདི་དག་ནི་ཁྱོད་ཅག་གི་ལག་པ་བརྒྱུད་ནས་ཕུལ་བས་ན། ཁོང་གིས་ཁྱོད་རྣམས་ལ་ཐུགས་རྗེས་གཟིགས་ནས་ཁྱོད་དང་དུ་ལེན་པར་བྱའམ། དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་དུ།
10 ཁྱོད་རྣམས་ཀྱིས་ངའི་མཆོད་ཁྲིའི་སྟེང་དུ་དོན་མེད་ཀྱི་མེ་མི་སྒྲོན་པའི་ཕྱིར་དུ། ཁྱོད་ཅག་གི་ཁྲོད་ནས་མི་ཞིག་གིས་མཆོད་ཁང་གི་སྒོ་བརྒྱབ་ན་ལེགས་སོ། །བདག་ནི་ཁྱོད་རྣམས་ལ་མི་དགའ་ཞིང་ཁྱོད་ཚོའི་ལག་ནས་ལེགས་སྐྱེས་ཀྱང་མི་ལེན་ནོ་ཞེས་དཔུང་ཚོགས་ཀུན་གྱི་དཀོན་མཆོག་ཡ་ཝཱེས་གསུངས་སོ། །
11 དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་དུ། ཉི་མ་ཤར་ས་ནས་ཉི་མ་ནུབ་པའི་བར་གྱི་རྒྱལ་ཁམས་ཀུན་ཏུ་བདག་གི་མིང་ནི་ཆེན་པོར་བརྩི་ཞིང་། གནས་ཀུན་ཏུ་མི་རྣམས་ཀྱིས་བདག་གི་མིང་ལ་སྤོས་བདུག་པ་དང་མཆོད་པ་གཙང་མ་འབུལ་བར་འགྱུར། ཅིའི་ཕྱིར་ཞེ་ན། བདག་གི་མིང་ནི་རྒྱལ་ཁམས་ཀུན་ཏུ་ཆེན་པོ་ཡིན་པས་སོ་ཞེས་གསུངས།
12 དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་དུ། ཡིན་ནའང་ཁྱོད་རྣམས་ཀྱིས་ང་རང་ཁྱད་དུ་བསད་པ་སྟེ། ཅིའི་ཕྱིར་ཞེ་ན། ཁྱོད་རྣམས་ཀྱིས་གཙོ་བོའི་གསོལ་ལྕོག་ནི་མི་གཙང་བ་དང་། གསོལ་ལྕོག་སྟེང་གི་ཁ་ཟས་ལ་མཐོང་ཆུང་བྱས་ཆོག་པར་འདོད་པས་ཡིན།
13 ཡང་ཁྱོད་ཅག་ན་རེ། དོན་འདི་དག་ཇི་འདྲའི་རྙོག་འཛིང་ཆེ་ཨང་ཟེར་བཞིན་ཁྲེལ་དགོད་བྱེད་དོ་ཞེས་གསུངས། དཀོན་མཆོག་ཡ་ཝཱེས་འདི་སྐད་དུ། ཁྱོད་ཚོས་ཕྲོགས་ནས་འོངས་པ་དང་ཞ་བོ། ནད་པ་ལ་སོགས་པ་ཁྱེར་འོངས་ནས་ལེགས་སྐྱེས་སུ་བྱས་པས། ངས་ཁྱོད་ཚོའི་ལག་ནས་ལེན་རུང་ངམ་ཞེས་གསུངས།
14 དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་དུ། སུ་ཞིག་གིས་སྒོ་ཕྱུགས་ནང་གི་ཕོ་ཕྱུགས་འབུལ་བའི་དམ་བཅའ་བཞག་ཀྱང་། གཡོ་སྒྱུའི་ངང་ནས་གཙོ་བོར་དབང་བོ་སྐྱོན་ཅན་མཆོད་པར་ཕུལ་ན། མི་དེ་ལ་དམོད་མོ་ཐེབས་འོས་པ་ཡིན། ཅིའི་ཕྱིར་ཞེ་ན། ང་ནི་རྒྱལ་པོ་ཆེན་པོ་ཡིན་ཏེ། བདག་གི་མིང་ནི་མི་རིགས་རྣམས་ཀྱི་ཁྲོད་དུ་གུས་ཤིང་འཇིགས་འོས་པ་ཡིན་ཞེས་གསུངས་སོ། །