ལེའུ་གསུམ་པ།
ཞལ་ཆད་ཀྱི་ཕོ་ཉ་ཕེབས་ལ་ཉེ་བ།
1 དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་དུ། ལྟོས་དང་། ངས་རང་གི་ཕོ་ཉ་མངགས་ཏེ་ངའི་མདུན་དུ་ལམ་གྲ་སྒྲིག་བྱེད་པ་དང་། ཁྱོད་རྣམས་ཀྱིས་འཚོལ་བའི་གཙོ་བོ་ནི་གློ་བུར་ཉིད་ལ་ཁོང་གི་མཆོད་ཁང་ནང་དུ་ཕེབས་ངེས་ཤིང་། ཁྱོད་རྣམས་ཀྱིས་ཡིད་སྨོན་བྱེད་པའི་ཞལ་ཆད་ཀྱི་ཕོ་ཉ་དེ་འོང་བར་འགྱུར་ཞེས་གསུངས་སོ། །
2 ཡིན་ནའང་ཁོང་སླེབས་པའི་དུས་དེ་སུ་ཞིག་གིས་བཟོད་ནུས་སམ། ཁོང་མངོན་པའི་དུས་ལ་སུ་ཞིག་ཚུགས་ཐུབ་བམ། ཅིའི་ཕྱིར་ཞེ་ན། ཁོང་ནི་གསེར་བཙོ་སྦྱང་བྱེད་མཁན་གྱི་མེ་དང་། གོས་འཁྲུད་མཁན་གྱི་བ་ཚྭ་དང་འདྲའོ། །
3 ཡང་ཁོང་ནི་དངུལ་བཙོ་སྦྱང་བྱས་ནས་དེ་གཙང་མར་བཟོ་མཁན་གྱི་མི་དང་འདྲ་བར་བཞུགས་ཤིང་། ཁོང་གིས་ལེ་ཝི་པ་རྣམས་གཙང་མར་མཛད་ཅིང་། གསེར་དང་དངུལ་ལ་བཙོ་སྦྱང་བྱེད་པ་བཞིན་དུ་དེ་རྣམས་གཙང་མར་མཛད་པ་དང་། དེ་ནས་ཁོ་ཚོས་དྲང་བདེན་གྱི་ངང་ནས་དཀོན་མཆོག་ཡ་ཝཱེར་མཆོད་པ་འབུལ་བར་བྱའོ། །
4 གནའ་བོའི་དུས་དང་སྔོན་ཆད་ཀྱི་ལོ་ཟླ་ནང་བཞིན། དེའི་དུས་སུ་ཡ་ཧུ་དཱ་དང་ཡེ་རུ་སཱ་ལེམ་གྱིས་ཕུལ་བའི་མཆོད་པར་དཀོན་མཆོག་ཡ་ཝཱེ་ཐུགས་མཉེས་ནས་བཞེས་པར་འགྱུར།
5 དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་དུ། ཡང་ང་རང་ཉེ་བར་བཅར་ནས་ཁྱོད་རྣམས་ལ་ཉེས་ཆད་གཅོད་པར་འགྱུར་ཏེ། སྒྱུ་འཕྲུལ་སྟོན་པ་དང་ལོག་གཡེམ་བྱེད་པ། མནའ་རྫུན་མ་སྐྱེལ་བ། གླ་ཆའི་ཕྱོགས་ནས་གླ་པར་གཉའ་གནོན་བྱེད་པ། དྭ་ཕྲུག་དང་ཡུགས་མོར་གཉའ་གནོན་བྱེད་པ། བྱེས་པ་རྣམས་ལ་དྲང་བདེན་ལོག་པར་སྤྱོད་པ། བདག་ལ་གུས་ཤིང་འཇིགས་པར་མི་བྱེད་པ་བཅས་ལ་བདག་གིས་མྱུར་དུ་སྐྱོན་བརྗོད་བྱེད་ངེས་ཡིན་ཞེས་གསུངས་སོ། །
བཅུ་ཆ་གཅིག་ཞལ་འདེབས་སུ་འབུལ་འོས་པ།
6 དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་དུ། ཡ་ཝཱེ་བདག་ནི་འགྱུར་བ་མེད་པ་ཡིན་པས། ཡ་ཀོབ་ཀྱི་བུ་རྒྱུད་ཁྱོད་རྣམས་ཀྱང་མེད་པར་མི་འགྱུར།
7 ཁྱོད་ཅག་གི་ཕ་མེས་རྣམས་ཀྱི་དུས་ནས་བཟུང་སྟེ། ཁྱོད་རྣམས་བདག་གི་སྒྲིག་ཁྲིམས་དང་བྲལ་ནས་དེ་མ་བསྲུངས་པ་ཡིན། ད་ལྟ་ཁྱོད་རྣམས་བདག་གི་ཕྱོགས་སུ་འཁོར་ན། བདག་ཀྱང་ཁྱོད་ཅག་གི་ཕྱོགས་སུ་འཁོར་བར་འགྱུར། ཡིན་ནའང་ཁྱོད་ཚོ་ན་རེ། ངེད་རྣམས་ཅི་ལྟར་འཁོར་བར་བྱའམ་ཞེས་འདྲིའོ། །
8 མི་ཡིས་དཀོན་མཆོག་ལ་དབང་བ་གང་ཞིག་འཕྲོག་ནུས་སམ། ཡིན་ནའང་ཁྱོད་ཚོས་བདག་ལ་དབང་བ་དེ་ཕྲོགས་ནས། ད་དུང་ངེད་ཅག་གིས་ཁྱེད་ནས་ཅི་ཞིག་ཕྲོགས་སམ་ཞེས་འདྲིའོ། །དོན་དངོས་སུ་ཁྱོད་རྣམས་ཀྱིས་ཞལ་འདེབས་སུ་འབུལ་འོས་པའི་བཅུ་ཆ་གཅིག་དང་། འབུལ་དགོས་པའི་མཆོད་རྫས་ཕྲོགས་པ་ཡིན།
9 ཁྱོད་རྣམས་ལ་དམོད་མོ་ཚབས་ཆེན་ཐེབས་པར་འགྱུར་ཏེ། ཅིའི་ཕྱིར་ཞེ་ན། ཁྱོད་ཅག་མི་རིགས་ཡོངས་ཀྱིས་གང་ཞིག་ང་ལ་དབང་བ་དེ་ཕྲོགས་པས་སོ་ཞེས་གསུངས་སོ། །
10 ཡང་དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་དུ། བདག་གི་མཆོད་ཁང་དུ་འབྲུ་རིགས་ཡོད་པའི་ཆེད་དུ། ཁྱོད་རྣམས་ཀྱིས་ཞལ་འདེབས་སུ་འབུལ་འོས་པའི་བཅུ་ཆ་གཅིག་ཐམས་ཅད་མཛོད་ཁང་དུ་བསྐྱལ་དགོས་པ་དང་། དེ་བརྒྱུད་ནས་བདག་ལ་བརྟག་པར་གྱིས། བདག་གིས་ཁྱོད་རྣམས་ལ་ནམ་མཁའི་སྒོ་མོ་ཕྱེས་ནས་འདང་བས་མ་ཚད་ལྷག་མའང་ཡོད་པའི་བྱིན་རླབས་ཁྱོད་རྣམས་ལ་གནང་མིན་ལ་ལྟོས་ཤིག་ཅེས་གསུངས།
11 དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་དུ། བདག་གིས་ཁྱུར་མིད་གཏོང་མཁན་དེ་རྣམས་ལ་གཤེ་གཤེ་བཏང་ནས་ཁྱོད་རྣམས་ཀྱི་ས་སྟེང་གི་ལོ་ཏོག་བཟའ་རུ་མི་འཇུག་ལ། ཁྱོད་ཅག་གི་ཞིང་ཁའི་རྒུན་འབྲུམ་ཡང་མ་སྨིན་སྔོན་ལ་སར་ལྷུང་དུ་མི་འཇུག་གོ་ཞེས་གསུངས།
12 དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་དུ། རྒྱལ་ཁམས་ཀུན་གྱིས་ཁྱོད་རྣམས་བདེའོ་ཞེས་སྨྲ་བར་འགྱུར་ཏེ། ཅིའི་ཕྱིར་ཞེ་ན། ཁྱོད་ཚོའི་ཡུལ་འདི་དགའ་སྤྲོའི་གནས་སུ་འགྱུར་ངེས་པས་སོ་ཞེས་གསུངས་སོ། །
ཡེས་ར་ཨེལ་ང་རྒྱལ་དང་རང་རློམ་ཆེ་བར་སྐྱོན་བརྗོད་པ།
13 དཀོན་མཆོག་ཡ་ཝཱེས་འདི་སྐད་དུ། ཁྱོད་ཚོས་གུས་ལུགས་མེད་པའི་སྐད་ཆས་བདག་ལ་ཁ་ལན་བསློགས་ནས་ད་དུང་ན་རེ། ང་ཚོས་སྐད་ཆ་གང་ཞིག་གིས་ཁྱེད་ལ་ཁ་ལན་བསློགས་པ་ཡིན་ནམ་ཞེས་འདྲིའོ། །
14 ཡང་ཁྱོད་ཚོ་ན་རེ། དཀོན་མཆོག་ལ་ཞབས་ཏོག་སྒྲུབ་པ་ནི་དོན་མེད་ཡིན་ཞིང་། ཁོང་གི་བཀའ་བརྩིས་ཏེ་དཔུང་ཚོགས་ཀུན་གྱི་དཀོན་མཆོག་ཡ་ཝཱེའི་དྲུང་དུ་སྡུག་བསྔལ་སྤྱད་ན་ཕན་ཐོགས་ཅི་ཞིག་ཡོད་དམ།
15 ད་ལྟ་ང་ཚོས་ང་རྒྱལ་ཅན་རྣམས་བདེ་ཞིང་ངན་སྤྱོད་ཅན་རྣམས་ཡར་རྒྱས་གོང་འཕེལ་དུ་འགྲོ་བ་ཡིན་ཟེར་ཞིང་། དེ་དག་གིས་དཀོན་མཆོག་ལ་ཚོད་བགམ་བྱས་ན་ཡང་ཐར་བ་ཡིན་ཟེར་ཞེས་གསུངས་སོ། །
ཡ་ཝཱེ་ལ་གུས་ཤིང་འཇིགས་པར་ཁོང་གི་སྙིང་རྗེ་ཐོབ་པ།
16 དེའི་དུས་སུ་དཀོན་མཆོག་ཡ་ཝཱེ་ལ་གུས་ཤིང་འཇིགས་པའི་མི་རྣམས་ཀྱིས་ཕན་ཚུན་གཏམ་གླེང་བ་དང་། དཀོན་མཆོག་ཡ་ཝཱེས་གཟབ་གཟབ་ངང་ནས་གསན་ཞིང་། ཁོང་གི་དྲུང་དུ་ཟིན་ཐོ་ཡོད་ལ་དེའི་སྟེང་དུ་དཀོན་མཆོག་ཡ་ཝཱེར་གུས་ཤིང་འཇིགས་པ་དང་ཁོང་གི་མཚན་དྲན་པའི་མི་རྣམས་བཀོད་པའོ། །
17 དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་དུ། ངས་དོན་རྣམས་སྤྱོད་པའི་ཉིན་མོར། དེ་དག་ནི་ནོར་སྐལ་ཁྱད་པར་ཅན་དུ་གྱུར་ནས་ང་ལ་དབང་སྟེ། མི་ཡིས་རང་ཉིད་ལ་ཞབས་ཏོག་སྒྲུབ་པའི་བུ་ལ་སྙིང་རྗེ་བ་ནང་བཞིན་ངས་ཀྱང་དེ་རྣམས་ལ་སྙིང་རྗེ་བར་བྱའོ། །
18 དེའི་དུས་སུ་ཁྱོད་རྣམས་ཀྱིས་མི་དྲང་བདེན་ཅན་དང་མི་ངན་པ་གཉིས་དང་། དཀོན་མཆོག་ལ་ཞབས་ཏོག་སྒྲུབ་མཁན་དང་ཞབས་ཏོག་མི་སྒྲུབ་མཁན་གཉིས་ཀྱི་ཁྱད་པར་རྟོགས་པར་འགྱུར་ཞེས་གསུངས་སོ། །