ལེའུ་གསུམ་པ།
རུ་ཐི་དང་པཱོ་ཨ་ཟི་གཉིས་གཡུལ་ཁའི་ནང་དུ་ཕྲད་པ།
1 ཉིན་ཞིག་སྒྱུག་མོ་ནཱ་ཨོ་མུས་རུ་ཐི་ལ་འདི་ལྟར། ངའི་བུ་མོ་ལགས། བདག་གིས་ཁྱོད་ལ་གནས་ས་ཞིག་བཙལ་ནས་བདེ་སྐྱིད་ལ་རོལ་དུ་འཇུག་མི་ཆོག་གམ།
2 ད་ལྟ་ཁྱོད་དང་ལྷན་དུ་ཡོད་པའི་གཞོན་ནུ་མ་རྣམས་ཀྱི་བདག་པོ་པཱོ་ཨ་ཟི་ནི་བདག་ཅག་གི་ཤ་ཉེ་མ་ཡིན་ནམ། ལྟོས་དང་། ཁོས་དོ་དགོང་གཡུལ་ཁའི་ནང་དུ་ནས་ཕྱར་རྒྱུ་ཡིན་པས།
3 ཁྱོད་ཀྱིས་རང་ལུས་བཀྲུས་ནས་དྲི་ཞིམ་བྱུགས་རྗེས་གྱོན་གོས་ལེགས་ཤོས་གྱོན་ཏེ་མར་གཡུལ་ཁ་རུ་སོང་ཞིག འོན་ཀྱང་པཱོ་ཨ་ཟིས་བཟའ་བཏུང་བྱས་ཚར་བའི་བར་དུ་ཁྱོད་རང་ངོ་ཤེས་པར་མི་བྱའོ། །
4 ཁོ་རང་གཟིམ་པའི་སྐབས་སུ་ཁྱོད་ཀྱིས་ཁོའི་ཉལ་སར་གསལ་པོར་ལྟོས་ལ། ཡང་ཁོའི་གམ་དུ་སོང་ནས་རྐང་མགོའི་མལ་གོས་བཤུས་ཏེ་དེར་ཉལ་ནས་སྡོད་ཅིག ཁོས་ཁྱོད་ཀྱིས་ཅི་ཞིག་བྱེད་དགོས་པའང་སྨྲ་བར་འགྱུར་ཞེས་སྨྲས་ཤིང་།
5 རུ་ཐི་ན་རེ། བདག་གིས་ཁྱེད་ཀྱི་བཀའ་བཞིན་དུ་བསྒྲུབ་པར་བྱའོ་ཞེས་སྨྲས་སོ། །
6 དེ་ནས་རུ་ཐི་མར་གཡུལ་ཁ་རུ་སོང་སྟེ་སྒྱུག་མོས་ཅི་ཞིག་བསྒོས་པ་བཞིན་དུ་བྱས།
7 པཱོ་ཨ་ཟི་ཡིས་བཟའ་བཏུང་ཡིད་ཚིམ་པ་ཞིག་ལོངས་སུ་སྤྱད་རྗེས་ཡིད་སེམས་སྤྲོ་བས་ཁེངས་ཤིང་། ནས་མའི་ཉེ་འདབས་སུ་ཉལ་དུ་སོང་ལ། རུ་ཐི་ནི་གྲགས་འགུལ་ཅི་ཡང་མེད་པར་ཡོང་སྟེ་ཁོའི་རྐང་མགོའི་མལ་གོས་བཤུས་ནས་དེར་ཉལ་ནས་བསྡད་དོ། །
8 ནམ་ཕྱེད་ཙམ་ལ་སླེབས་པ་ན་པཱོ་ཨ་ཟི་གློ་བུར་གཉིད་ལས་སད་ཅིང་གཞོགས་སུ་འཁོར་བ་ལ། ལྟོས་དང་། ཁོས་བུད་མེད་ཅིག་རང་གི་རྐང་བའི་མདུན་དུ་ཉལ་འདུག་པ་ཚོར་བའོ། །
9 དེ་ནས་ཁོས་འདི་ལྟར། ཁྱོད་རང་སུ་ཡིན་ནམ་ཞེས་དྲིས་པ་ན། ཁོ་མོ་ན་རེ། ང་ནི་ཁྱེད་ཀྱི་གཞོན་ནུ་མ་རུ་ཐི་ཡིན་ལགས། ཁྱེད་ནི་བདག་བླུ་མཁན་གཉེན་ཉེ་ཡིན་པས་ཁྱེད་ཀྱིས་ཐུ་བས་བདག་འགེབས་པར་མཛོད་ ཅེས་ཞུས་སོ། །
10 ཡང་པཱོ་ཨ་ཟི་ཡིས་འདི་ལྟར། ངའི་བུ་མོ་ལགས། དཀོན་མཆོག་ཡ་ཝཱེས་ཁྱོད་ལ་བྱིན་རླབས་གནང་བར་ཤོག ཁྱོད་རང་ན་གཞོན་དབུལ་ཕྱུག་གང་ཡིན་གྱི་རྗེས་སུ་མ་འབྲངས་པས། ཁྱོད་ཀྱི་རྗེས་ཕྱོགས་ཀྱི་བྱམས་བརྩེ་ནི་སྔོན་ཆད་ལས་ལྷག་ཏུ་ཆེན་པོ་ཡིན་ནོ། །
11 ང་ཡི་བུ་མོ་ལགས། ད་ནི་ཁྱོད་རང་མི་འཇིགས་པར་གྱིས། ཁྱོད་ཀྱིས་ཅི་ཞིག་ཞུས་པ་ཐམས་ཅད་བདག་གིས་བསྒྲུབ་པར་བྱའོ། །བདག་གི་གྲོང་རྡལ་གྱི་མི་ཐམས་ཅད་ཀྱིས་ཁྱོད་རང་ནི་བུད་མེད་སྤྱོད་བཟང་ཞིག་ཡིན་པ་ཤེས་སོ། །
12 བདག་ནི་བླུ་མཁན་ཞིག་ཡིན་པ་བདེན་མོད། འོན་ཀྱང་ད་དུང་བདག་ལས་ཀྱང་ཉེ་བའི་བླུ་མཁན་ཞིག་ཡོད་པའོ། །
13 དོ་དགོང་ཁྱོད་རང་འདི་རུ་སྡོད་དང་། སང་ཉིན་ཞོགས་པར་ཁོ་རང་གིས་ཁྱོད་ཀྱི་ཕྱིར་བླུ་མཁན་གྱི་འགན་ཁུར་དང་དུ་བླང་ན་ལེན་དུ་ཆུག འོན་ཀྱང་ཁོ་རང་གིས་དེ་བཞིན་བྱེད་མི་འདོད་ན་བདག་གིས་གཏན་གནས་ཀྱི་དཀོན་མཆོག་ཡ་ཝཱེ་དཔང་དུ་བཙུགས་ནས་བླུ་མཁན་གྱི་འགན་ཁུར་དང་དུ་ལེན་པར་བྱའོ། །ཁྱོད་རང་ཞོགས་པའི་བར་དུ་འདིར་སྡོད་ཅིག་ཅེས་སྨྲས་སོ། །
14 དེ་ནས་རུ་ཐི་ནམ་མ་ལངས་སྔོན་དུ་ཁོའི་རྐང་འདབས་སུ་ལོག་ནས་བསྡད་པ་དང་། མི་ངོ་མི་ཟིན་པའི་དུས་སུ་ཁོ་མོ་ཡར་ལངས་ཤིང་པཱོ་ཨ་ཟི་ཡིས་འདི་ལྟར། བུད་མེད་ཅིག་གཡུལ་ཁའི་ནང་དུ་ཡོང་བ་དེ་མི་སུ་ཞིག་ལའང་ཤེས་སུ་འཇུག་མི་རུང་ཞེས་སྨྲས་སོ། །
15 པཱོ་ཨ་ཟིས་ཡང་འདི་ལྟར། ཁྱོད་ཀྱིས་རང་གི་སྟོད་དཀྲིས་ཐར་ཆོད་ཅིག་ཅེས་སྨྲས་པ་དང་། ཁོ་མོས་དེ་ལྟར་བྱས་ཤིང་པཱོ་ཨ་ཟི་ཡིས་ནས་བྲེ་དྲུག་དེའི་ཁུགས་སུ་བླུགས་ནས་ཁོ་མོའི་ཕྲག་ཏུ་བཞག་པ་ལ་ཁོ་མོ་ཕྱིར་གྲོང་རྡལ་དུ་ལོག་གོ །
16 རུ་ཐི་ཕྱིར་སྒྱུག་མོའི་རྩར་སླེབས་པ་ན། ནཱ་ཨོ་མུ་ཡིས་འདི་ལྟར། ངའི་བུ་མོ་ལགས། གང་འདྲ་ཡིན་ནམ་ཞེས་དྲིས་པ་ལ། རུ་ཐི་ཡིས་པཱོ་ཨ་ཟིས་ཁོ་མོའི་དོན་དུ་ཅི་ཞིག་བྱས་པ་ཐམས་ཅད་སྒྱུག་མོར་སྨྲས་ཤིང་།
17 ཡང་ཁོ་མོ་ན་རེ། ཁོས་བདག་ལ། ཁྱོད་རང་ལག་སྟོང་དུ་ཁྱོད་ཀྱི་སྒྱུག་མོའི་རྩར་འགྲོ་མི་རུང་ཞེས་སྨྲས་ཤིང་བདག་ལ་ནས་བྲེ་དྲུག་གནང་བ་ཡིན་ཞེས་ཞུས།
18 དེ་ནས་ནཱ་ཨོ་མུ་ཡིས་འདི་ལྟར། ངའི་བུ་མོ་ལགས། པཱོ་ཨ་ཟིས་དོན་འདི་དེ་རིང་ཐག་གིས་མ་བཅད་ན་ངལ་གསོ་བར་མི་འགྱུར་བས། དོན་འདི་ཅི་ལྟར་འབྱུང་བ་མ་ཤེས་བར་དུ་བསྒུགས་ནས་སྡོད་ཅིག་ཅེས་སྨྲས་སོ། །