ལེའུ་གཉིས་པ།
ལྕམ་མོ་ཧན་ནཱའི་སྨོན་ལམ།
1 དེ་ནས་ཧན་ནཱ་ཡིས་སྨོན་ལམ་བཏབ་ནས་འདི་ལྟར་ཞུས་པ་སྟེ།
ཡ་ཝཱེ་ལ་ནི་བདག་གི་སེམས་པ་དགའ། །
ད་དུང་ཁོང་གི་ཕྱིར་དུ་རྭ་གླིང་འབུད། །
ཁོང་གིས་ང་རང་བསྐྱབས་པས་སྤྲོ་བ་འཕེལ། །
དགྲའི་མདུན་བདག་གི་ཁ་སྟབས་མཐོ་བར་མཛད། །
2 ཡ་ཝཱེ་ཁོང་ལས་དམ་པ་གང་ཡང་མེད། །
ཁོང་ལས་གཞན་དུ་ཁོང་དང་འདྲ་བ་མེད། །
བདག་གི་དཀོན་མཆོག་ལྟ་བུའི་བྲག་རི་མེད། །
3 དེའི་ཕྱིར་མི་ཡིས་ང་རྒྱལ་གཏམ་མ་བརྗོད། །
འུར་དང་སྙེམ་པའི་ཚིག་ངན་མི་བཤད་རོགས། །
ཡ་ཝཱེ་ཁོང་ཉིད་ཐམས་ཅད་མཁྱེན་པ་ལགས། །
བྱ་བ་ཐམས་ཅད་གཟིགས་པའི་དཀོན་མཆོག་ལགས། །
4 མི་ཡི་དཔའ་བོ་རྣམས་ཀྱི་གཞུ་ཐག་ཆད། །
ཉམ་ཐག་པ་ལ་སྟོབས་ཀྱི་སྐ་རགས་འཕེན། །
5 སྔོན་ལ་ལོངས་སྤྱོད་ཡོད་པའི་ཕྱུག་པོ་རྣམས། །
རྗེས་སུ་བག་ལེབ་འཚོལ་བའི་གླ་བར་གྱུར། །
སྔོན་ལ་བཀྲེས་སྐོམ་མྱངས་པའི་སྤྲང་པོ་རྣམས། །
རྗེས་སུ་བཅུད་ཟས་བསྟེན་པའི་བདག་པོར་གྱུར། །
མོ་གཤམ་རྣམས་ལ་ཕྲུ་གུ་བདུན་ཙམ་སྐྱེས། །
བུ་མང་རྣམས་ཀྱིས་ཁེར་རྐྱང་མྱང་བར་འགྱུར། །
6 ཡ་ཝཱེ་ཉིད་ཀྱིས་ཚེ་སྲོག་གཅོད་པར་མཛད། །
ཁོང་གིས་ཚེ་སྲོག་གསོན་པར་ཡང་མཛད་དོ། །
ཁོང་གིས་གཤིན་པོའི་གནས་སུ་འཁྲིད་པར་བྱེད། །
ད་དུང་གོང་ནས་གོང་དུ་འཕགས་པར་མཛད། །
7 ཡ་ཝཱེ་ཉིད་ཀྱིས་མི་ནི་དབུལ་པོར་མཛད། །
ཁོང་གིས་མི་ནི་ཕྱུག་པོར་ཡང་མཛད་དོ། །
མཐོན་པོ་རྣམས་ནི་གཉའ་ནས་གནོན་པར་བྱེད། །
དམའ་མོ་རྣམས་ནི་ཟེ་ནས་འཐེན་པར་བྱེད། །
8 དབུལ་འཕོངས་རྣམས་ནི་རྡུལ་གྱི་ཁྲོད་ནས་སློང་། །
དམན་པ་རྣམས་ནི་ཐལ་བའི་གསེབ་ནས་སློང་། །
དེ་ཚོར་དཔལ་དང་འབྱོར་བ་བསྩལ་བྱས་ཏེ། །
རྒྱལ་པོ་རྣམས་ཀྱི་ཁྲི་ལ་འཛེག་པར་བྱེད། །
ས་གཞིའི་ཀ་བ་རྣམས་ནི་ཁོང་ལ་དབང་། །
དེ་ཡི་དབུས་སུ་ཁོང་གིས་ས་གཞི་སྤར། །
9 ཁོང་གིས་དམ་པ་རྣམས་ནི་བསྲུང་བར་མཛད། །
ངན་པ་རྣམས་ནི་མུན་པར་རྫོང་བར་བྱེད། །
རང་གི་སྟོབས་ཀྱིས་སུ་ཡང་རྒྱལ་མི་འགྱུར། །
10 ཡ་ཝཱེ་དགྲ་རུ་འཛིན་པའི་མི་རྣམས་ནི། །
ཆག་ཅིང་དུམ་བུ་ཉིད་དུ་གས་པར་འགྱུར། །
དེ་ཚོའི་ཐོག་ཏུ་འབྲུག་སྐད་ལྡིར་བར་བྱ། །
ས་གཞི་མཐའ་མའི་བར་དུ་འདྲི་གཅོད་བྱ། །
ཁོང་གིས་བསྐོས་པའི་རྒྱལ་པོར་སྟོབས་ཤུགས་སྦྱིན། །
ཁོང་གིས་བྱུགས་པའི་རྭ་གླིང་གྱེན་དུ་བསྒྲེངས། ། ཞེས་པའོ། །
11 དེ་ནས་ཨེལ་ཁ་ནཱ་རང་གི་ཕ་ཡུལ་རཱ་མའི་ཁྱིམ་དུ་ཕྱིན་པ་དང་། སཱ་མུ་ཨེལ་གྱིས་མཆོད་དཔོན་ཨེ་ལིའི་མདུན་དུ་དཀོན་མཆོག་ཡ་ཝཱེ་ལ་བསྙེན་བཀུར་ཞུས་སོ། །
ཨེ་ལིའི་བུ་གཉིས་ཀྱི་སྤྱོད་ངན།
12 ཨེ་ལིའི་བུ་གཉིས་ནི་མི་ངན་པ་ཡིན་ཞིང་། ཁོ་གཉིས་ཀྱིས་དཀོན་མཆོག་ཡ་ཝཱེ་ངོ་མི་ཤེས་སོ། །
13 ཡང་མཆོད་དཔོན་དེ་གཉིས་ཀྱིས་མི་ཚོགས་ལ་འདི་ལྟར་བྱེད་པ་ཡིན་ཏེ། མི་ཞིག་གིས་མཆོད་པ་འབུལ་བ་དང་ཤ་ཚོས་ཀྱིན་ཡོད་པའི་ཚེ། མཆོད་དཔོན་གྱི་ཞབས་ཕྱི་ཡིས་ཚེབ་སོ་གསུམ་ཅན་ཞིག་ཁྱེར་ནས་འོངས་ཏེ།
14 རྫ་སྣོད་དམ་སླ་ངའམ་ཁྲོ་སྣོད་དམ་ཁོག་མའི་ནང་དུ་བཙུགས་ཏེ། ཚེབ་ཀྱིས་ཐོག་མར་བཏོན་པའི་ཤ་ནི་མཆོད་དཔོན་གྱིས་ལེན་ངེས་ཡིན། ཁོ་ཚོས་ཞི་ལོ་རུ་འོངས་པའི་ཡེས་ར་ཨེལ་གྱི་མི་ཐམས་ཅད་ལ་དེ་ལྟར་བྱེད་ཀྱིན་ཡོད་པ་རེད།
15 ཡང་ཚི་ལུ་སྲེག་པའི་སྔོན་དུ་མཆོད་དཔོན་གྱི་ཞབས་ཕྱི་འོངས་ནས་འདི་ལྟར། མཆོད་དཔོན་གྱིས་ཤ་ཞིག་བསྲེག་པའི་ཕྱིར་ཤ་ཞིག་བྱིན་ཅིག མཆོད་དཔོན་ལ་ཤ་བཙོས་མ་མི་དགོས་རློན་པ་དགོས་ཞེས་སྨྲ་ཞིང་།
16 གལ་ཏེ་མཆོད་པ་འབུལ་བཞིན་པའི་མི་དེས། དང་པོར་ཚི་ལུ་སྲེག་པ་དང་། དེ་ནས་ཁྱོད་ཀྱིས་ཅི་འདོད་པ་དེ་འཁྱེར་ཆོག་ཅེས་སྨྲས་ན། དེའི་ལན་དུ་ཞབས་ཕྱི་ཡིས། མིན། ད་ལྟ་རང་བྱིན་ཅིག མི་སྟེར་ན་འཕྲོག་པར་བྱ་ཞེས་ཟེར་རོ། །
17 དེ་ལྟར་གཞོན་ནུ་དེ་གཉིས་ཀྱིས་དཀོན་མཆོག་ཡ་ཝཱེའི་མཆོད་པ་ཁྱད་དུ་བསད་པས། ཁོ་གཉིས་ཀྱི་སྡིག་པ་དཀོན་མཆོག་ཡ་ཝཱེའི་སྤྱན་སྔར་ཆེན་པོར་གྱུར་ཏོ། །
སཱ་མུ་ཨེལ་གྱི་བྱིས་དུས།
18 སྐབས་དེར་སཱ་མུ་ཨེལ་ནི་ད་དུང་བྱིས་པ་ཞིག་ཡིན་ཏེ། སོ་རས་ཀྱིས་བཟོས་པའི་བེར་ཐུལ་གྱོན་ནས་དཀོན་མཆོག་ཡ་ཝཱེའི་དྲུང་དུ་ཞབས་ཏོག་བསྒྲུབས།
19 ཡང་ཁོའི་མ་ཡིས་ཕྱུ་པ་ཆུང་ངུ་ཞིག་བཟོས་ཏེ། རང་གི་ཁྱོ་ག་དང་མཉམ་དུ་ལོ་རེ་བཞིན་མཆོད་པ་འབུལ་དུ་འོངས་སྐབས་དེ་ཁྱེར་འོང་བ་རེད།
20 དེ་ནས་ཨེ་ལི་ཡིས་ཨེལ་ཁ་ནཱ་དང་དེའི་ཆུང་མ་གཉིས་ལ་བྱིན་རླབས་མཛད་ཅིང་འདི་ལྟར། ཕྲུ་གུ་འདི་དཀོན་མཆོག་ཡ་ཝཱེ་ལ་ཕུལ་བའི་ཚབ་ཏུ་ཁོང་གིས་ཁྱོད་ལ་བུད་མེད་འདི་ནས་རྒྱུད་འཛིན་གནང་བར་གྱུར་ཅིག་ཅེས་བརྗོད་ནས། དེ་དག་རང་རང་གི་གནས་སུ་ཕྱིར་ལོག
21 དཀོན་མཆོག་ཡ་ཝཱེས་ཧན་ནཱ་ལ་ཐུགས་རྗེས་གཟིགས་པས། ཁོ་མོ་ཡང་བསྐྱར་མངལ་དང་ལྡན་པར་གྱུར་ཏེ། རིམ་བཞིན་བུ་གསུམ་དང་བུ་མོ་གཉིས་སྐྱེས་པ་དང་། ཡང་སཱ་མུ་ཨེལ་ནི་དཀོན་མཆོག་ཡ་ཝཱེའི་དྲུང་དུ་འཚར་ལོངས་བྱུང་ངོ་། །
ཨེ་ལིས་བུ་གཉིས་ལ་གཤེ་གཤེ་བཏང་བ།
22 ཨེ་ལི་ཤིན་ཏུ་རྒས་ནས། ཁོའི་བུ་གཉིས་ཀྱིས་ཡེས་ར་ཨེལ་གྱི་མི་ཐམས་ཅད་ལ་ཅི་ཞིག་བྱས་པ་དང་། ཁོ་གཉིས་ཡ་ཝཱེའི་མཇལ་འཕྲད་གུར་མཆོག་གི་སྒོ་འགྲམ་དུ་ལས་བྱེད་མཁན་གྱི་བུད་མེད་དང་འགྲོགས་པའི་སྐད་ཆ་ཐོས་པས།
23 ཁོས་དེ་གཉིས་ལ་ཅིའི་ཕྱིར་དེ་ལྟར་བྱེད་དམ། ཁྱོད་གཉིས་ཀྱིས་སྤྱད་པའི་བྱ་བ་ངན་པ་དེ་ངས་མི་ཐམས་ཅད་ནས་ཐོས་བྱུང་།
24 ཀྱེ་བུ། ངས་ཐོས་པའི་དཀོན་མཆོག་ཡ་ཝཱེའི་འབངས་མིའི་ཁྲོད་གྲགས་པའི་གཏམ་དེ་ནི་བཟང་པོ་མ་ཡིན།
25 གལ་ཏེ་མི་ཞིག་གིས་མི་གཞན་ལ་འགལ་བའི་སྡིག་པ་བྱས་ན། དཀོན་མཆོག་གིས་མི་དེ་ལ་ཁྲིམས་ཐག་གཅོད་པ་ཡིན། འོན་ཀྱང་མི་ཞིག་གིས་དཀོན་མཆོག་ཡ་ཝཱེ་ལ་འགལ་བའི་སྡིག་པ་བྱས་ན། དེའི་དོན་དུ་སུ་ཞིག་གིས་ཞུ་བ་བྱེད་ཐུབ་བམ་ཞེས་སྨྲས་ནའང་། དེ་གཉིས་ཀྱིས་ཕ་ཡི་བཀའ་ལ་མ་མཉན། གང་ལ་ཞེ་ན། དཀོན་མཆོག་ཡ་ཝཱེས་དེ་གཉིས་འཆི་ལམ་དུ་འཇུག་པར་ཐུགས་ཐག་བཅད་དོ། །
26 ཡང་བུ་ཆུང་སཱ་མུ་ཨེལ་རིམ་བཞིན་ནར་སོན་ཞིང་། དཀོན་མཆོག་ཡ་ཝཱེ་ཁོ་ལ་ཐུགས་མཉེས་པ་དང་། མི་རྣམས་ཀྱང་ཁོ་ལ་དགའ་བར་གྱུར་ཏོ། །
ཨེ་ལིའི་མགོར་ཆགས་འཇིག་འོང་བའི་ལུང་བསྟན།
27 ཡང་དཀོན་མཆོག་གི་སྐྱེས་བུ་ཞིག་ཨེ་ལིའི་མདུན་དུ་འོངས་ནས་ན་རེ། དཀོན་མཆོག་ཡ་ཝཱེས་འདི་སྐད་དུ། ཁྱོད་ཀྱི་ཕ་མེས་ཨེ་ཅིབ་ཡུལ་གྱི་རྒྱལ་པོ་ཕཱར་ཨོལ་གྱི་མདུན་དུ་བྲན་གཡོག་ཡིན་པའི་ཚེ། བདག་ནི་དེ་དག་ལ་དངོས་སུ་མངོན་པ་མ་ཡིན་ནམ།
28 ཡེས་ར་ཨེལ་གྱི་ཚོ་ཁག་རྣམས་ལས་བདག་གིས་མཆོད་དཔོན་ཞིག་བདམས་པ་དང་། ཁོས་མཆོད་ཁྲིའི་སྟེང་དུ་མཆོད་པ་འབུལ་བ་དང་། བདུག་སྤོས་བདུག་པ་དང་། བེར་ཐུལ་གྱོན་པ་བཅས་ཀྱི་ཆེད་དུ་བསྐོས་པ་མ་ཡིན་ནམ། ད་དུང་ཡེས་ར་ཨེལ་པ་ཐམས་ཅད་ཀྱིས་ཕུལ་བའི་སྦྱིན་སྲེག་ནི་ཁྱོད་ཀྱི་ཕ་མེས་ལ་གནང་བ་མ་ཡིན་ནམ།
29 བདག་གི་བཞུགས་གནས་སུ་འབུལ་འོས་པའི་མཆོད་པ་ལ་ཅིའི་ཕྱིར་རྡོག་རྒྱག་གཞུ་ཞིང་སྨད་པ་ཡིན་ནམ། བདག་གི་འབངས་མི་ཡེས་ར་ཨེལ་པས་ང་ལ་ཕུལ་བའི་མཆོད་རྫས་ཀྱི་ཁག་བཟང་ཤོས་དེ་ཡིས་ཁྱོད་རྣམས་ཀྱི་ལུས་རྒྱགས་པར་བྱས་ཤིང་། ཁྱོད་ཀྱིས་བདག་ལས་རང་གི་བུ་ལ་ལྷག་པར་བཀུར་བསྟི་བྱས་པ་ཅི་ཡིན་ནམ།
30 དེའི་ཕྱིར་ཡེས་ར་ཨེལ་གྱི་དཀོན་མཆོག་ཡ་ཝཱེས་འདི་སྐད་དུ། ཕ་མེས་ཀྱི་ཁྱིམ་རྒྱུད་དང་ཁྱོད་ཀྱི་བུ་རྒྱུད་རྟག་ཏུ་བདག་གི་མདུན་དུ་བགྲོད་དགོས་ཞེས་སྔོན་ཆད་བཀའ་བསྩལ་ནའང་། ད་ལྟ་དེ་ལྟར་གཏན་ནས་མི་རུང་སྟེ། རྒྱུ་མཚན་ནི། བདག་ལ་བཀུར་བསྟི་བྱེད་པའི་མི་ལ་ངས་ཀྱང་བརྩི་འཇོག་བྱེད་ཅིང་། བདག་ལ་སྨད་པའི་མི་ལ་ངས་ཀྱང་སྣང་ཆུང་བྱའོ། །
31 ཀྱེ་ཧོ་ཁྱོད་ཀྱི་སྟོབས་ཤུགས་དང་ཁྱོད་ཀྱི་ཕ་མེས་ཀྱི་སྟོབས་ཤུགས་གཅོག་པའི་ཉིན་མོ་ཞིག་འོང་བར་འགྱུར། ཁྱོད་ཀྱི་ཁྱིམ་དུ་མི་རྒན་པ་གཅིག་ཀྱང་རྙེད་པར་མི་འགྱུར།
32 ཡ་ཝཱེས་ཡེས་ར་ཨེལ་པ་རྣམས་ལ་ལོངས་སྤྱོད་གནང་བའི་དུས་སུ། ཁྱོད་ཀྱིས་ངའི་བཞུགས་གནས་ཉམས་རྒུད་དུ་འགྲོ་བ་མཐོང་བར་འགྱུར། དེ་ནས་ཁྱོད་ཀྱི་ཁྱིམ་དུ་ནམ་ཡང་མི་རྒན་པ་གཅིག་ཀྱང་རྙེད་པར་མི་འགྱུར།
33 ཁྱོད་ཀྱིས་མི་གང་ཞིག་ངའི་མཆོད་ཁྲི་ནས་འཕྲལ་བར་མི་བྱེད་པ་དེས། ཁྱོད་ཀྱི་མིག་ཞར་བ་དང་ཁྱོད་ཀྱི་སེམས་སྡུག་པར་བྱའོ། །ཡང་ཁྱོད་ཀྱི་རིགས་རྒྱུད་ཐམས་ཅད་ལང་ཚོའི་དཔལ་གྱི་དུས་སུ་འཆི་བར་འགྱུར།
34 ཡང་རྟགས་འདི་ལྟར་འབྱུང་སྟེ། ཁྱོད་ཀྱི་བུ་ཧོ་ཕེ་ནིས་དང་ཕེ་ནེ་ཧཱ་གཉིས་ཀྱི་སྟེང་དུ་འོང་བར་འགྱུར་ལ། དེ་གཉིས་ཀ་ཉིན་གཅིག་ལ་འཆི་བར་འགྱུར་ཞིང་།
35 ཡང་ངས་མཆོད་དཔོན་བརྟན་པོ་ཞིག་བསླང་བར་བྱ་སྟེ། དེས་བདག་གི་དགོངས་པ་བཞིན་དུ་ལས་བྱེད་དོ། །ངས་དེ་ལ་ཁྱིམ་གཞི་བརྟན་པོ་ཞིག་བཙུགས་ནས། མཆོད་དཔོན་དེ་ནི་ནམ་ཡང་ངས་འབྱུག་སྣུམ་གྱིས་བྱུགས་ས་དེའི་མདུན་དུ་མཆོད་པ་འབུལ་དུ་འགྲོ་བར་འགྱུར།
36 ཡང་ཁྱོད་ཀྱི་ཁྱིམ་རྒྱུད་ནས་ལུས་པའི་མི་རྣམས་ནི་མཆོད་དཔོན་དེའི་དྲུང་དུ་འོངས་ཏེ། དོང་ཙེའམ་བག་ལེབ་ཀྱི་དུམ་བུ་ཞིག་རྙེད་པའི་ཕྱིར་ཕྱག་འཚལ་བཞིན་འདི་ལྟར། ངས་བག་ལེབ་ཁམ་གང་བཟའ་བའི་ཕྱིར། མཆོད་དཔོན་གྱི་ལས་འགན་ཞིག་གནང་བར་མཛོད་ཅེས་ཞུ་བར་འགྱུར་ཞེས་གསུངས་སོ། །