ཕོལ་ལོལ་ཁོང་ཉིད་ཐེངས་བཞི་པར་ཆོས་སྤེལ་དུ་ཕྱིན་པའི་དུས་སུ། ཐི་མོ་ཐེ་ལ་ཨེ་ཕེ་སི་རུ་ཡོད་པའི་ཆོས་ཚོགས་ལ་བདག་སྐྱོང་བྱེད་པའི་སྐོར་ནས་སློབ་སྟོན་གནང་བ་ཡིན། དེ་ནི་ཕོལ་ལོལ་ཁོང་ཉིད་མ་ཀེ་དོན་ཡཱ་ཡུལ་དུ་འགྲོ་འདོད་པའི་དུས་ལ་ཁེལ་ཡོད། ཕོལ་ལོལ་གྱིས་རང་ཉིད་ཨེ་ཕེ་སི་ལ་སླར་ཡང་འགྲོ་མི་ཐུབ་པ་རྟོགས་ནས་ཐི་མོ་ཐེ་ལ་འཕྲིན་ཡིག་དང་པོ་འདི་བྲིས་པ་ཡིན། ཁོང་གིས་རང་ཉིད་ཐི་མོ་ཐེ་ལ་འཕྲད་དུ་འགྲོ་འདོད་པ་འཕྲིན་ཡིག་འདི་ལས་ཡང་དང་བསྐྱར་དུ་བརྗོད་པར་བལྟས་ན། འཕྲིན་ཡིག་འདི་འབྲི་དུས་ཕོལ་ལོལ་བཙོན་དུ་སྦྱར་མེད་པ་རྟོགས་ཐུབ།

སྔ་རབས་ཆོས་ཚོགས་ཀྱི་སྲོལ་རྒྱུན་དང་ཡེ་ཤུའི་ཆོས་ལུགས་ཀྱི་བདག་སྐྱོང་པའི་འཕྲིན་ཡིག་སྟེ་ཐི་མོ་ཐེ་དང་པོ་དང་གཉིས་པ། ཐེ་ཏུའི་འཕྲིན་ཡིག་བཅས་ཀྱི་ངོ་སྤྲོད་རྣམས་ལ་བལྟས་ན། འཕྲིན་ཡིག་འདི་ཡི་གེར་འགོད་མཁན་ནི་ཕོལ་ལོལ་ཡིན་པར་ར་སྤྲོད་བྱས་ཡོད་ལ། འཕྲིན་ཡིག་འདི་ནི་སྤྱི་ལོ་64ལོའི་ཡས་མས་སུ་ཡི་གེར་བཀོད་པ་ཡིན།

ཕོལ་ལོལ་གྱིས་ཐི་མོ་ཐེ་ལ་ཆོས་ཚོགས་ཇི་ལྟར་སྐྱོང་དགོས་པའི་སྐོར་གྱི་སློབ་སྟོན་གནང་ཞིང་། རང་གི་ཕྱག་རོགས་གཞོན་པ་ཐི་མོ་ཐེ་ལ་དགེ་རྒན་རྫུས་མ་རྣམས་ཀྱི་སྨྲ་སྒོ་གཅོད་དགོས་པ་དང་། ཨེ་ཕེ་སི་རུ་ཡོད་པའི་ཆོས་ཚོགས་ཀྱི་བྱ་བར་བདག་སྐྱོང་བྱེད་པའི་ལས་འགན་སྐོར་གསལ་པོར་སྨྲ་བའི་ཕྱིར་དུ་འཕྲིན་ཡིག་འདི་སྤྲིངས་པ་ཡིན། ཆོས་ཚོགས་དེའི་རྙོག་དྲ་གཙོ་བོ་ཞིག་ནི་ཆོས་ལོག་གི་གྲུབ་མཐའ་ནཱ་སི་ཊི་སེམ་༼Gnosticism༽ཞེས་པའི་གཞུང་ལུགས་དང་ཡ་ཧུ་དཱ་པའི་མི་རིགས་རིང་ལུགས། ཚངས་སྤྱོད་ཀྱི་ཉམས་ལེན་གསུམ་མཉམ་དུ་འདྲེས་ནས་ཆོས་ལོག་གཞན་ཞིག་བྱུང་ཡོད་པ་དེ་ཡིན།

1. དགེ་རྒན་རྫུས་མ་རྣམས་ཀྱི་སྐོར་ལ་ཉེན་བརྡ་གཏོང་བ། ༼1:1-11༽

2. དཀོན་མཆོག་གིས་ཕོལ་ལོལ་ལ་ཐུགས་རྗེས་གཟིགས་པའི་སྐོར། ༼1:12-17༽

3. བསམ་པ་རྣམ་དག་བཅང་དགོས་པར་གདམས་པ། ༼1:18-20༽

4. ཆོས་ཚོགས་ལ་སློབ་སྟོན་མཛད་པའི་སྐོར། ༼2:1-3:16༽

5. དགེ་རྒན་རྫུས་མ་རྣམས་ལ་དོགས་ཟོན་བྱེད་དགོས་པའི་སློབ་སྟོན་གནང་བ། ༼4:1-16༽

6. དད་ལྡན་རྣམས་སྐྱོང་བའི་འགན་འཁུར། ༼5:1-6:2༽

7. གནད་དོན་སྣ་ཚོགས་ཀྱི་སྐོར། ༼6:3-21༽