ལེའུ་ལྔ༌པ།
དད་ལྡན་རྣམས་སྐྱོང་བའི་འགན༌ཁུར།
1 དེ་ཡང་ཁྱོད་ཀྱིས་མི་རྒན་པ་ལ་སྐྱོན་བརྗོད་ནན་མོ་མི་བྱེད་པར་རང་གི་ཕ་བཞིན༌དང༌། ན་གཞོན་རྣམས་ལ་སྤུན་བཞིན༌དང༌།
2 བུད་མེད་རྒན་པ་རྣམས་ལ་མ་བཞིན༌དང༌། བུད་མེད་ན་གཞོན་རྣམས་ལ་ལྕམ་སྲིང་ལྟར་བསམ་པ་རྣམ་དག་གིས་ཁ་ཏ་བྱེད་པར༌གྱིས།
3 ཡུགས་མོ་དངོས་མ་རྣམས་ལ་བརྩི་བཀུར༌བྱའོ།།
4 འོན་ཀྱང༌། ཡུགས་མོ་ཞིག་ལ་བུ་ཕྲུག་དང་ཚ་བོའམ་ཚ་མོ་ཡོད༌ན། དེ་དག་གིས་ཐོག་མར་ཡུགས་མོ་ལ་རང་ཁྱིམ་ནས་སྲི་ཞུ་བྱེད་པ་དང༌། རང་གི་ཕ་མར་དྲིན་ལན་འཇལ་ཚུལ་ལ་གོམས་དགོས་པ་ཡིན། ཅིའི་ཕྱིར་ཞེ་ན། དེ་ནི་དཀོན་མཆོག་གི་སྤྱན་སྔར་དོན་བཟང་པོ་ཡིན་པའི་ཕྱིར་རོ།།
5 ཡུགས་མོ་དངོས་མ་ནི་ཁོ་མོ་གཅིག་པུར་ལུས་ཤིང་རྟེན་ས་གཞན་མེད་པ༌དང༌། དཀོན་མཆོག་ལ་རེ་སྨོན་བྱེད་ཅིང་ཉིན་མཚན་མེད་པར་ཞུ་བ་བྱེད་པ་དང་གསོལ་བ་བཏབ་ནས་སྡོད་པ་ཞིག་ཡིན།
6 འོན་ཀྱང༌། ལྟོ་གོས་གཏམ་ལ་ཆགས་པའི་ཡུགས་མོ་ནི་གསོན་པོའི་དུས་སུའང་ཤི་བ་དང༌འདྲའོ།།
7 དེ་རྣམས་ལ་སྐྱོན་བརྗོད་རྒྱུ་ཅི་ཡང་མེད་པར་བྱེད་པའི༌ཕྱིར། ཁྱོད་ཀྱིས་དོན་འདི་དག་གི་སྐོར་ནས་ཡུགས་མོ་རྣམས་ལ་ཁ་བསྒོ་གཏོང་བར༌གྱིས།
8 གལ༌ཏེ། སུ་ཞིག་གིས་རང་གི་གཉེན་ཉེ་ལ་ལྟ་སྐྱོང་མི་བྱེད་པ༌དང༌། ལྷག་པར་རང་གི་ཁྱིམ་མི་ལའང་ལྟ་སྐྱོང་མི་བྱེད༌ན། མི་དེ་ནི་དད་པ་དང་རིང་དུ་གྱེས༌ཤིང༌། དད་པ་མེད་པའི་མི་ལས་ཀྱང་ངན༌པའོ།།
9 ཡུགས་མོའི་མིང་ཐོ་ནང་དུ་མིང་འགོད༌ན། ཡུགས་མོ་ནི་ངེས་པར་ལོ་དྲུག་ཅུའི་ཡན་ལ་སླེབས་པ་ཞིག༌དང༌། སྐྱེས་པ་གཅིག་ཁོ་ནའི་ཆུང་མ་བྱས་མྱོང་བ་ཞིག༌དང༌།
10 དོན་བཟང་བསྒྲུབས་ནས་མཚན་སྙན་ཅན་ཞིག༌སྟེ། བུ་ཕྲུག་སྙོར་སྐྱོང་དང་མགྲོན་པོར་སྣེ་ལེན་བྱས་མྱོང་བ༌དང༌། དད་ལྡན་དམ་པ་རྣམས་ཀྱི་ཞབས་བཀྲུས་པ་དང་དཀའ་ངལ་ཅན་ལ་རོགས་རམ་བྱས་མྱོང༌བ། དོན་བཟང་པོའི་རིགས་ཐམས་ཅད་ཧུར་ཐག་གིས་བསྒྲུབས་མྱོང་བ་ཞིག་ཡིན་དགོས་སོ།།
11 འོན་ཀྱང༌། ལོ་ན་གཞོན་པའི་ཡུགས་མོ་རྣམས་མིང་ཐོ་ནང་དུ་འགོད་པར་མི༌བྱའོ།། ཅིའི་ཕྱིར་ཞེ་ན། ཡུགས་མོ་རྣམས་སྐྱབས་མགོན་མཱ་ཤི་ཀ་དང་འགལ་ནས་འདོད་ཆགས་རྒྱས་པའི་དུས༌སུ། གཉེན་སྒྲིག་བྱེད་འདོད་པའི་ཕྱིར་ཡིན༌ཏེ།
12 ཡུགས་མོ་རྣམས་སྔར་གྱི་དམ་བཅའ་དང་འགལ་བས་དེ་དག་ལ་སྐྱོན་འཛུགས་པར་འགྱུར།
13 ཁོ་མོ་རྣམས་ལེ་ལོའི་དབང་དུ་སོང་སྟེ་ཁྱིམ་ནས་ཁྱིམ་གཞན་རྣམས་སུ་ཉུལ༌ཞིང་། ལེ་ལོ་ཅན་ཡིན་པར་མ༌ཟད། ངག་ནས་མི་བཤད་དགུ་བཤད་དང་དོན་མེད་ཀྱི་བྱ་བར་ཇུས་གཏོགས་བྱེད་པར་དགའ་བ༌དང༌། སྨྲ་མི་འོས་པའི་གཏམ་ཡང༌སྨྲ་བ་ཡིན་ནོ།།
14 དེའི༌ཕྱིར། བདག་གིས་ལོ་ན་གཞོན་པའི་ཡུགས་མོ་རྣམས་ཀྱིས་ཡང་བསྐྱར་གཉེན་སྒྲིག་བྱས༌ཏེ། བུ་ཕྲུག་བཙའ་ཞིང་ཁྱིམ་སྐྱོང་བར་བསྐུལ་བ༌ཡིན། དེ་ནས་དགྲ་བོར་སྡིགས་དམོད་བྱེད་པའི་གླགས་མི་གཏོང་ངོ་།།
15 ཅིའི་ཕྱིར་ཞེ་ན། འགའ་ཤས་ཁ་ཕྱིར་འཁོར་ནས་བདུད་སཱ་ཏན་གྱི་རྗེས་སུ་འབྲངས་པའི་ཕྱིར༌རོ།།
16 ཆོས་ཚོགས་ཀྱིས་རྟེན་ས་མེད་པའི་ཡུགས་མོ་དངོས་མ་རྣམས་ལ་རོགས་རམ་བྱེད་པའི༌ཕྱིར། བུད་མེད་དད་ལྡན་གང་གི་ཁྱིམ་དུ་ཡུགས་མོ་ཡོད༌ན། ཁོ་མོར་རོགས་རམ་བྱེད་འོས་པ་ལས་ཆོས་ཚོགས་ལ་ཁག་འགེལ་མི་རུང༌ངོ་།།
17 དེ་ཡང་ཆོས་ཚོགས་ལ་བདག་སྐྱོང་ལེགས་པོ་བྱེད་པའི་རྒན་པོ་རྣམས་ལ་བཀུར་སྟི་ཆེན་པོ་བྱ་འོས༌ཤིང༌། དཀའ་སྡུག་ངང་ནས་དཀོན་མཆོག་གི་བཀའ་སྒྲོག་པ་དང་ཁྲིད་སྟོན་བྱེད་མཁན་ལ་དེ་བས་ཀྱང་བརྩི་བཀུར་བྱ་འོས་སོ།།
18 རྒྱུ་མཚན་ནི་གསུང་རབ་ཀྱི་མདོ་ལས་ཇི་སྐད༌དུ། གཡུལ་ཁ་གཅོག་པའི་དུས༌སུ་བ་གླང་གི་མཆུ་ཏོ་མ༌སྡོམ་ཞེས་གསུངས་པ༌དང༌། ཡང་ཇི་སྐད༌དུ། ལས་ཀ་བྱེད་མཁན་རྣམས་ལ་གླ་ཆ་སྟེར་འོས་ཞེས་གསུངས་པའི་ཕྱིར༌ཡིན།
19 རྒན་པོ་ཞིག་ལ་སྐྱོན་ཡོད་པར་སྨྲ་བའི་དུས༌སུ། བདེན་དཔང་བྱེད་མཁན་གྱི་མི་གཉིས་སམ་གསུམ་མེད་ན་ཁས་ལེན་བྱ་མི་རུང༌ངོ་།།
20 མི་གཞན་རྣམས་ཀྱང་འཇིགས་པའི༌ཕྱིར། མུ་མཐུད་དུ་སྡིག་པ་བྱེད་མཁན་ལ་མི་ཐམས་ཅད་ཀྱི་མདུན་དུ་སྐྱོན་བརྗོད༌ཅིག
21 ངས་དཀོན་མཆོག་དང་མཱ་ཤི་ཀ་ཡེ་ཤུ་དང་ཁོང་གིས་བདམས་པའི་ཕོ་ཉ་རྣམས་ཀྱི་སྤྱན་སྔར་ཁྱོད་ལ་གདམས་པར་བྱ༌སྟེ། ཕྱོགས་ལྷུང་མེད་པར་བསླབ་བྱ་འདི་དག་བསྲུང་བར༌གྱིས། ལས་གང་ཞིག་བྱེད་ནའང་ཕྱོགས་རིས་མ་འཛིན༌ཅིག
22 མི་ཡི་ལུས་ལ་ལག་པ་འཇོག་པར་བྲེལ་འཚབ་མི་ལངས་པར༌གྱིས། མི་གཞན་རྣམས་ཀྱི་སྡིག་པའི་ལས་ལ་མི་ཞུགས་པར་རང་ཉིད་རྣམ་དག་ཏུ་བསྲུང་བར༌གྱིས།
23 ཁྱོད་ཀྱི་ཕོ་བ་མི་བདེ་ཞིང་བསྟུད་མར་ན་ཚ་བྱུང༌བས་ན། ཕྱིས་སུ་ཆུ་ཁོ་ན་མི་འཐུང་བར་རྒུན་ཆང་ཡང་ཉུང་ཙམ་འཐུང་བར༌གྱིས།
24 མི་ཁ་ཤས་ཀྱི་སྡིག་པ་ནི་མངོན་གསལ་ཡིན༌ཏེ། སྔོན་ལ་ཁྲིམས་ཐག་གཅོད་སར་སླེབས་པ་ལྟ༌བུ་ཡིན་ནོ།། ཡང་མི་ཁ་ཤས་ཀྱི་སྡིག་པ་ནི་སྡིག་ཅན་དག་གི་རྗེས་སུ་འབྲངས་ནས་སླེབ་ངེས་སོ།།
25 དེ་བཞིན་དུ་ལས་བཟང་པོ་རྣམས་ཀྱང་མངོན་གསལ་ཡིན༌ཞིང༌། མངོན་གསལ་མ་ཡིན་པ་རྣམས་ཀྱང་སྦ་མི་ནུས༌སོ།།