ལེའུ་གཉིས་པ།
ཐིག་སྐུད་ཀྱི་ཞལ་གཟིགས།
1 ཡང་ངས་མགོ་ཡར་བཀྱགས་ནས་བལྟས་ཚེ། ལག་ལ་ཐིག་སྐུད་ཐོགས་པའི་མི་ཞིག་མཐོང་།
2 ངས་དེ་ལ་ཁྱོད་རང་གང་དུ་ཕེབས་སམ་ཞེས་དྲིས་པ་ན། མི་དེས་ང་ལ་ན་རེ། ང་ནི་ཡེ་རུ་སཱ་ལེམ་ལ་ཚད་ཐིག་ལེན་དུ་འགྲོ་བ་ཡིན་ཏེ། དེའི་ཞེང་ལ་ག་ཚོད་ཡོད་པ་དང་། རིང་ཚད་ག་འདྲ་ཡིན་པར་བལྟ་རུ་འགྲོ་དགོས་ཞེས་སྨྲས་སོ། །
3 བདག་ལ་གསུང་གནང་བའི་ཕོ་ཉ་དེ་ཕེབས་པ་ལ། ཕོ་ཉ་གཞན་ཞིག་དེ་བསུ་བར་འོངས་ནས།
4 དེ་ལ་འདི་སྐད་དུ། ཁྱེད་རང་རྒྱུགས་ནས་ན་གཞོན་དེ་ལ་འདི་ལྟར་ཤོད་ཅིག ཡེ་རུ་སཱ་ལེམ་དུ་འདུག་མཁན་ཡོད་པ་དང་། གྲོང་ཁྱེར་ནང་གི་མི་ཕྱུགས་གཉིས་ཀ་ཧ་ཅང་མང་བས་ན་དེ་ནི་ལྕགས་རིའི་ཚད་བཀག་མེད་པའི་ས་སྟོང་དང་འདྲའོ། །
5 དཀོན་མཆོག་ཡ་ཝཱེས་འདི་སྐད་དུ། ང་ནི་ཡེ་རུ་སཱ་ལེམ་གྱི་ཕྱོགས་བཞི་ཡི་མེའི་ལྕགས་རི་དང་གྲོང་ཁྱེར་ནང་གི་གཟི་བརྗིད་དུ་འགྱུར་འོང་གསུངས་ཞེས་པའོ་ཞེས་གསུངས་སོ། །
6 ཀ་ཡེ། ཀ་ཡེ། ཁྱོད་རྣམས་བྱང་ཕྱོགས་ཡུལ་ནས་ཕྲོས་ཤིག ཅིའི་ཕྱིར་ཞེ་ན། སྔར་ངས་ཁྱོད་རྣམས་ས་གཞིའི་ཕྱོགས་བཞི་རུ་གཏོར་བས་སོ་ཞེས་དཀོན་མཆོག་ཡ་ཝཱེས་འདི་སྐད་གསུངས་སོ། །
7 ཡང་དཀོན་མཆོག་ཡ་ཝཱེས་འདི་སྐད་དུ། ཀ་ཡེ། པཱ་པེལ་ལོན་གྱི་ཡུལ་མི་དང་མཉམ་དུ་སྡོད་པའི་ཛ་ཡན་གྱི་མི་རྣམས་ཕྲོས་ཤིག་ཅེས་གསུངས།
8 དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་གསུངས་སོ། །གཟི་བརྗིད་ཐོབ་རྗེས། ཁོང་གིས་ང་རང་ཁྱོད་རྣམས་འཕྲོག་བཅོམ་བྱས་པའི་ཡུལ་ཁམས་དེ་དག་ལ་རྒོལ་བར་མངགས་པ་ཡིན་ཏེ། གང་ལ་ཞེ་ན། སུ་ཞིག་གིས་ཁྱོད་ལ་རེག་པ་ཡིན་ན་དེས་ཁོང་གི་སྤྱན་གྱི་རྒྱལ་མོར་རེག་པའོ། །
9 ལྟོས་དང་། ངས་དེ་དག་གི་ཕྱོགས་སུ་རང་གི་ལག་པ་ཕྱར་ན། དེ་དག་ནི་རང་གི་བྲན་པོའི་བཅོམ་ནོར་དུ་འགྱུར་ངེས་ཤིང་། དེ་ནས་དཔུང་ཚོགས་ཀུན་གྱི་དཀོན་མཆོག་ཡ་ཝཱེས་ང་རང་མངགས་པ་ཁྱོད་རྣམས་ཀྱིས་རྟོགས་པར་འགྱུར།
10 ཀྱེ་ཛ་ཡན་གྱི་མི་སྡེ་ལགས། ཁྱོད་རྣམས་ཀྱིས་དགའ་བའི་ཀི་སྒྲ་སྒྲོགས་ཤིག ཅིའི་ཕྱིར་ཞེ་ན། ང་རང་ཡོང་ནས་ཁྱོད་ཀྱི་ཁྲོད་དུ་གནས་པར་བྱའོ་ཞེས་དཀོན་མཆོག་ཡ་ཝཱེས་འདི་སྐད་གསུངས་སོ། །
11 ཡང་ཉིན་མོ་དེར་མི་རིགས་མང་པོས་དཀོན་མཆོག་ཡ་ཝཱེ་སྐྱབས་སུ་བསྟེན་ནས་ཁོང་གི་མི་སྡེ་རུ་འགྱུར་བ་དང་། ཁོང་ཉིད་ཁྱོད་ཅག་གི་ཁྲོད་དུ་བཞུགས་པར་འགྱུར་རོ། །དེ་ནས་ཁྱོད་ཀྱིས་དཔུང་ཚོགས་ཀུན་གྱི་དཀོན་མཆོག་ཡ་ཝཱེས་ང་རང་ཁྱོད་ཀྱི་གམ་དུ་མངགས་པ་རྟོགས་པར་འགྱུར་རོ། །
12 ཡང་དཀོན་མཆོག་ཡ་ཝཱེ་ལ་ཡ་ཧུ་དཱ་ཐོབ་ནས་ཁོང་གི་གནས་མཆོག་གི་ནོར་སྐལ་དུ་འགྱུར་བ་དང་། ཁོང་གིས་ཡང་བསྐྱར་ཡེ་རུ་སཱ་ལེམ་འདེམས་པར་འགྱུར་རོ། །
13 ཀྱེ་མིའི་རིགས་ཐམས་ཅད་དཀོན་མཆོག་ཡ་ཝཱེའི་དྲུང་དུ་ཁུ་སིམ་མེར་སྡོད་ཅིག ཅིའི་ཕྱིར་ཞེ་ན། ཁོང་ནི་ཉིད་ཀྱི་བཞུགས་གནས་དམ་པ་ནས་ཡར་བཞེངས་པའི་ཕྱིར་རོ། །